adikal men jab brahmand se brahma ji ki utpatti hui to unhonne sarvapratham o'm ka uchcharan kiya. yahi o'm srishti ka pratham shabd tatha surya ka sharir kaha jata hai. jab brahma ke charon mukhon se ved prakat hue tab ve surya ke tej se prakashit hue. surya ke sarvavyapi prakash ne unhen ekikrit kar shakti punj bana diya. yahi ekikrit shakti punj vastav men vaidik surya devta ke rup men jana jata hai. yah bhi manyata hai ki samast gyat jagat isi surya ke dvara utpann kiya gaya hai tatha usi ke karan astitva men hai. surya srishti ke prarambh se hi upasthit raha hai tatha aditya ke nam se bhi jana jata hai. surya ki utpatti se judi ye kathaen use unnat sanbhavnaon aur shakti ke srot ke rup men chitrit karti hain. ham sabhi jante hain ki prithvi par surya hi samast praniyon ke jivan ka adhar hai chahe ve ped-paudhe hon, janavar ya manushya. yadi surya ka prakash kisi bhi karan se milna band ho jaye to ve nishchit hi kuch samay men nasht ho jayenge aur prithvi par jivan hi samapt ho jayega.
vastav men samast jivan ka adhar surya hi hai. brahmand ki pratham shakti ke rup men surya gyan ka margadarshak hai tatha prithvi par jivan ke shuru hone ka hi nahin balki uske samayojit rup se chalte rahne ka karan hai. surya ki katha se spasht sanket milta hai ki vah srishti ke prarambh se hi upasthit tha tatha vahi is jagat ke lie prakash aur shakti ka mul srot hai. aisi manyata hai ki vaidik kal men gyan chahunmukhi tha. vaidik sabhyata vishva ki prachinatam sabhyataon men se ek hai. gyan ko bhi prakash ka hi rup mana jata hai tatha surya ki kirnon ke tej se prakashit hokar vah naya ayam prapt karta hai aur ‘apt dipo bhav’ ke bhav ko charitarth karta hai. isi karan surya samast urja aur prakash ka prachinatam srot hai. atah ashcharya nahin ki jyotish men surya ko samast shakti, pad, man aur upadhi se jodakar dekha jata hai. surya saurmandal ka kendra hai tatha sabhi grah uske charon or chakkar lagate hain.
jyotish men surya ko nij se jodakar dekhte hain tatha vahi vyakti ko uska nijatva pradan karta hai. surya ko manav man ki mul vrittiyon men se ek man sakte hain. is vritti ka mahatva islie bhi bahut adhik hai kyonki vah vyakti ke nij ka pratik hai tatha vah nijatva hi samast se vyakti ko jodta hai. janmakundli manushya ke charon or usi prakar ghumti jan padti hai jaise sabhi grah surya ki parikrama karte hain. yah tathya surya ko manav svabhav men mahatvapurn sthan pradan karta hai jise ham vyakti ka pran ya atma kah sakte hain. yahi vah mul shakti hai jiske sath hamara janm hota hai tatha jis purn ki sanbhavnaon ko janakar use prapt karna hi jivan ki uchchatam upalabdhi hai jismen manushya jivan bhar laga rahta hai. janmakundli men surya ki bhumika hamen yah gyan deti hai ki pratyek vyakti apne ap men purnatah svatantra aur vishisht hote hue bhi apne se jude athva pas ane vale pratyek vyakti ko prabhavit karne ki shakti aur sanbhavna rakhta hai.
surya jivan ke bahut se pakshon par prabhav rakhta hai jaise-shakti, bal, rachnatmakata, kriyashilta, samathrya, urja tatha jivanashakti, vyakti ki shakti samy-samay par inhin pakshon ko siddh karne men vyay hoti hai. udar atma grah surya ke svabhav se jude hue anya mahatvapurn gun hain-svatantrata, ichchashakti, atmavishvas, udarta, uddeshyapurnata, sabhyata, nishtha tatha chamatkari netritva. kundli men surya ke alabhkari hone par vyakti men nimn durvrittiyon ka uday ho sakta hai jaise ki ayogyata, nirdayata, ahankar, atmarati, atmanirnay ka abhav, atmaprerna ya utsah men hras adi. surya manushya ki atma ka bhi dyotak hai. atma pratyek men parmeshvar ka ansh rup hi hai. yah hi manav ka sambandh vishva ki nirmankari shaktiyon se jodakar usmen rachnatmakata ko janm deti hai kintu virla hi apne vastavik satya ko janakar apne surya ki purn kshamata ka prayog kar pata hai.
adhikanshtah to vibhinn rup men hi ulajhakar rah jate hain. yadi koi apne surya ki purn kshamata ko jan pae to vah apne vyaktitva par purn adhikar prapt kar leta hai. jyotish dvara manav svabhav ko 12 rupon men jana jata hai jo surya dvara rashichakra ke barah chitron par hone se jane jate hain. surya ka rang lal tatha uska vahan rath hai jiska ek hi chakra hai jo varsh ko darshata hai. is chakra ke barah bhag hain jo 12 mason ke dyotak hain. is chakra ke madhya men chah bhag hain jo chah rituon ke dyotak hain. surya anaj, tanbe aur svarn par prabhav rakhta hai. isse sanbandhit ratn manik hai. jyotish ke anusar surya sinh rashi ka svami hai tatha sinh rashi jo ki rashichakra ki panchvin rashi hai, vah rachnatmakata, buddhi, santti tatha prarabdh (purva janm ka prabhav) ko darshati hai. mesh rashi men surya uchch ka hota hai tatha iska uchchatam sthan 15 ansh par hota hai.
tula rashi ka surya nich ka kahlata hai tatha 20 ansh par sabse adhik nich ka mana jata hai. sinh rashi men surya apne mul trikon men hota hai tatha usmen 4.20 ansh par vah purn svagrihi mana jata hai. surya aur chandra jaise prakashit grahon ke atirikt anya panch grahon ko do-do rashiyon ka svami mana jata hai. yah dekha gaya hai ki svabhavanusar grahon men apas men nishchit maitri sanbandh hote hain. jab bhi grah apne svayan ke athva mitron ke sthan par hote hain to bahut labhkari hote hain. isi prakar sam athva shatru grah ke sthan par inka purn dushprabhav bhi dekhne men ata hai. janmakundli ke vibhinn bhavon par surya ka prabhav pratham bhav jab surya pratham bhav men hota hai to vyakti balvan, atmavishvasi tatha alsi kintu kuch bhi than lene par purn shakti lagakar lakshya ko prapt karne vala hota hai.
prabhavi surya hone par shasan se labh, nyayapriya, parivar tatha gyan se prem karne vala, uchch adarshon vala kintu lobhi hota hai. nich ka surya use pratishodhi, mithyabhimani aur atmalin banata hai. dvitiya bhav dusre bhav ka surya vyakti ko apavyayi, udarmna, rini tatha chehre athva netra ke rog se pidit karta hai. parivar tatha patni se santapt kintu virodhiyon aur shatruon par prabhavi hota hai. vah prabhavi vakta hota hai. tritiya bhav tritiya bhav ka surya vyakti ko sahsi v nirbhik karta hai. vah dayavan aur apni sanpda v upalabdhiyon ke lie vikhyat hota hai. shastron men ruchi vala, kushal, atmavishvas se bharpur, bhramnshil tatha karyakshetra men purn svatantrata chahne vala hota hai. chaturth bhav chaturth bhav men surya bahut labhakar nahin hota kyonki vah vyakti ko paitrik sanpda se vanchit rakhta hai. manhani ka karan hota hai tatha bhai-bahnon men mel ka bhi virodhi hota hai kintu achche grahon ke prabhav se vyakti dhanvan aur badi umra men shasan dvara samman ka adhikari hota hai.
pancham bhav pancham bhav ka surya vyakti ko adhir, bhraman men ruchi lene vala tatha natak, sinema v telivijan ko chahne vala banata hai. shashtham bhav chathe bhav ka surya vyakti ko atmasamman, sahas, shasan se samman tatha prasiddhi pradan karta hai. vah ayurved evan anya chikitsa paddhatiyon men ruchi rakhta hai. naukri se labh, vyavhar kushal, dusron ki sahayta karne vala, khushmijaj, bhojan ka premi tatha spashtavadi hone ke karan bahut se shatruon vala hota hai. saptam bhav saptam bhav ka surya vyakti ko krodhi banata hai. patni se sukh men kami tatha kuch samay ke lie viyog bhi ho sakta hai. imandar, sajhedari men labh, patni ke prabhav men bahut baten banane vala kintu sunne valon ka priya hota hai. ashtam bhav ashtam bhav: athven bhav men surya hone par vyakti hriday se asantusht rahne vala, rogi deh vala, anyon se anadar pane vala tatha jivan ke tisre varsh men mrityu tulya kasht pane vala hota hai. pati-patni men talmel ki kami hoti hai.
bura svabhav, chanchal, upadravi netra rogi tatha apne parijnon dvara thaga jane vala hota hai. navam bhav naven bhav ka surya vyakti ko mata-pita v guru ka drohi tatha apne se anya dharm ko manne vala banata hai. jivan ke prarambh men rogi kintu bad men svasth tatha dhanvan hokar santan ke sath khushamay tatha sukhi lanba jivan bitata hai. dasham bhav dasham bhav ka surya vyakti ko pita dvara sampatti tatha sukh prapt karane vala hota hai. apne svabhav ke karan achche mitron vala, rajsi sukh bhogne vala, achche svabhav ka svami, bahut buddhiman, lekhak, shasan se labh pane vala tatha uchch pad ka labh prapt karne vala hota hai. kalatmak abhiruchi hone ke karan vah kisi bhi kala men sahaj hi nipunta prapt kar leta hai. ekadash bhav gyarhven bhav men surya ke prabhav se vyakti atyant dhanvan, bahut-se bhrityon vala, buddhiman tatha ichchanusar bal prayog karne vala hota hai. dharmik kashton par vijay pane vala, shatruon ka nash karne vala, uchch varg men maitri rakhne vala, gyanvan, patni ko samjhne vala, sabhi sukhon ka bhokta kintu putra se sukh men kami vala hota hai. dvadash bhav barhven bhav ka surya vyakti ko pita ke sath nahin chalne deta athva pita se sneh men kami karta hai. jivan men arthik kasht ate hi rahte hain. surya ke prabhav men kami ane par shasan v adhikariyon se dand ka bhagi hota hai.
nich ka surya karavas ka karak hota hai. vibhinn rashiyon men surya ka prabhav mesh is rashi men surya uchch ka mana jata hai. vaise to vah rashi ke tison anshon par uchch ka rahta hai kintu das ansh par vah vishesh rup se purn uchchata ka mana jata hai. mesh rashi ka svami ugra grah mangal hai tatha mangal aur surya men vishesh maitri ke karan mangal uchch ke surya ke lie vishesh labhakar hota hai. mesh rashi man surya parivar se arthik labh, paitrik sanpda, santan aur patni ka sukh pradan karta hai. vyakti apni dharmik prishthabhumi par man rakhne vala atyant adarshavadi, prakhar buddhiman evan atyant mahatvakankshi hota hai. vrish vrish rashi ka svami shukra hai tatha shukra aur surya men maitri n hone ke karan surya yahan asahaj rahta hai. grah asahaj rashi men apna prabhav kho deta hai tatha bure parinam deta hai. vrish rashi ka surya isi karan patni tatha santan ke sukh men kami lata hai. parivar men sada tanav rahta hai. mithun mithun rashi ka svami uddipt grah budh hai. surya aur budh men vishesh maitri hai. yahan surya vishesh prabhavi hota hai aur bahut achche prabhav deta hai. is rashi men surya hone par vyakti ko prachin shastron men vishesh shraddha hoti hai. vah gyanvan aur dhani hota hai.
kark kark rashi ka svami chandra hai jo surya ke prakash se hi prakashvan hai. atah surya is rashi men vishesh sahjta anubhav karta hai kintu kuch had tak hathi ho jata hai. shasan v samaj men vishesh pad pane vala, uchch varg men maitri rakhne vala hota hai. sinh is rashi ka svami hone ke karan surya ka is rashi se vishesh prem hai. yah rashi surya ka mul trikon hai. sinh rashi ka surya vyakti ko sahsi, vishvast, sahayak, dayavan, dhairyavan evan bhavyata pradan karta hai. arthik rup se sanpann tatha dusron par prabhav rakhne vala hota hai. kanya kanya: is rashi se vishesh sanbandh ke karan surya ismen budh ki ashavadi vritti ko badhava deta hai. vah gyani janon se vicharon ka adan-pradan karne men ruchi leta hai. vah vahan sukh ka bhokta tatha bhumi aur sanpda se labh pane vala hota hai.
mridubhashi hone ke karan vah viprit ling vale logon ko vishesh rup se prabhavit karta hai. tula yah surya ke nich ka sthan hai. yahan vah apne prabhav ko hi nahin, apne svabhav ko bhi kho deta hai. nich ka grah kabhi bhi achche parinam nahin deta. arthik hani, patni se sukh ka abhav tatha bahut buri avastha men sanpatti ki hani bhi hoti hai. vrishchik vrishchik rashi ka svami mangal hai. atah mitra grah ki rashi men surya mukti aur svatantrata ka anubhav karta hai. vrishchik rashi men surya vyakti ko sahsi, ugra, bahanebaj banata hai. use shatru tatha vishaile jivon se hani ka bhay rahta hai. dhanu dhanu rashi ka svami guru hai. atah surya yahan balvan aur sanymi ho jata hai. surya is rashi men kalpana ko badhava dene aur vyakti ko naye ayam chune ki prerna deta hai. vyakti bahut dhan kamata hai tatha patni v santan ke sath sukh-shanti se jivan ke anand ka bhog karta hai.
makar makar rashi ka svami shani hai. atah surya yahan sahaj nahin rahta kyonki surya aur shani men paraspar vishesh virodh hai jo ki is rashi men surya ke hone par milne vale parinamon se sahaj hi spasht hota hai. surya makar rashi men shok v bhay ka karan hota hai tatha jatak ko bahut kam sukh pradan karta hai. kunbh shani kanubh rashi ka bhi svami hai. atah yahan bhi surya ke sanbandh men vishesh antar nahin ata kintu yahan surya kuch achche parin aam deta jan padta hai. kunbh ka surya jatak ko dhan aur santan se sukh pradan karta hai kintu patni ke karan kasht tatha badhi hui ayu men hriday rog v mansik kasht ki sanbhavna rahti hai.
min min ka svami brihaspati hai. halanki surya v brihaspati mitra grah hain tathapi is rashi (min) men surya kuch apne sakaratmak gunon ko kho deta hai. yah islie hota hai kyonki is rashi ki prakriti aur surya ki prakriti apas men mel nahin rakhti.