bhartiya dharm aur sanskriti men manushya ke char purusharthon - dharm, arth, kam aur moksh men se jivan men arth prapt karna ek anivarya purusharth hai, jiske lie hamare pauranik granthon men apni yogyata v kshamata ke anurup nishkam bhav se karm karne ka nirdesh hai (gita, adhyay 2, shlok 47, adhyay 3, shlok 7, 8). apne satkarmon ke falasvarup manushya yashasvi aur dhani hota hai. jab manushya bhautik sukh sadhan, bahya adanbar aur vyasnon ki purti hetu anaitik marg apna leta hai, to uski mansik shanti, sthirta aur santulan shanaiah-shanaiah kshin hone lagte hain.
iska prabhav uski rog pratirodhak shaktiyon par parta hai aur uska sharir rog aur dukhon se grast hone lagta hai. jyotish shastra yash aur dhan se sanbandhit marg ka nirdesh karta hua manushya ko sachet karta hai ki inki prapti hetu vyarth ki bhagdaur, mithya adanbar, lobhvritti aur anaitik karyon ke bhanvar men fansakar apni shanti bhang n karane, kyonki purva janm ke karmon ke adhar par yash aur dhan ki sthiti pratyek manushya ki janm kundli men vidhata ankit kar chuka hai. yadyapi janm kundli men adhisankhya bhav yash aur dhan se sanbandhit hote hain, fir bhi bhav 1, 2, 5, 9, 10 aur 11 ka vishesh mahatva hai.
lagn se manushya ke paurush ka parinam aur purusharth ki kshamata prakat hoti hai. yash aur dhan prapti ka pratham sopan karm sanpadan hai, jiska nimitt manushya hota hai aur kundli men manushya ka apna sthan lagn hota hai, jo uski atmasthapan ki pravritti aur yatharth se sandharsh ki kshamata ko prakat karta hai. manovishleshak aidalar ke anusar jivan ki pramukh prerak shakti atmasthapan hai. yatharth se sangharshon ke falasvarup yadi vyakti ke atmasthapan ko santosh nahin milta, to usmen hin bhavna viksit ho jati hai. is hin bhavna se mukti pane ya iska daman karne ke lie vyakti kuch vishesh prayatn karta hai, jinke falasvarup uski koi jivnshaili nishchit ho jati hai, jiska sakaratmak paksh unnati aur nakaratmak avnti ka prerak hota hai. is prakar lagn aur lagnesh jivan ki pramukh prerak shakti hote hain.
frayad ke anusar jivan ki pramukh prerak shakti kamvritti hai. lagn ke samne ka arthat saptam bhav kamvritti ka hi bhav hai. saflta ke shikhar par prayah ve log hi pahunche hain, jinki kamvritti purn santusht rahi hai ya fir jinhonne apni kamvritti ko purnatah niyantrit kar liya hai. ek anya manovishleshak jung ke anusar vyakti do prakar ke hote hain - antarmukhi aur bahirmukhi. antarmukhi log prayah ekantapriya aur avyavharik hote hain, jabki bahirmukhi samajik, rajnitik, vyaparik, vyavharkushal aur kriyashil hote hain. prayah aise log hi yash, dhan aur sanpatti se sukhi hote hain. islie sarvapratham lagn ke balabal ka adhyayan karna bahut avashyak hai. bali lagn aur lagnesh ke jatak ka dehabal, atmabal aur manobal uchch hota hai, jisse vah jivan ke marg men ane vali badhaon ko par karke apna lakshya prapt karne men safal hota hai. aise logon men utsah, uddeshya, karmathata, duradarshita aur mahatvakanksha bhari hoti hai.
trikonkendre yadi lagnanathe shubhanvite shobhan vikshite va. shubhagrahagargte baladhye chatuahsmudrant yashah sameti.. - jatak parijat, adhyay 11, shlok 16 yadi lagnesh kendra ya trikon men ho, shubh grah se yut ya drisht ho, balvan ho, to vyakti yashasvi hota hai. svami vivekanand, rashtrapti dae. abdul kalam, nobal puraskar vijeta amatrya sen, purva chunav ayukt ti.en. sheshan aur prasiddh arthashastri evan vartaman pradhanmantri dae. manmohan sinh ki dhanu lagn ki kundli 1-6 men lagn, kendra aur trikon bhav, surya, chandrama, mangal, budh, brihaspati, shani aur rahu bahut balvan avastha men hain, jo atmik aur mansik rup se bahut bali, utsahi, karmath aur dridh sankalp se paripurn vyaktitva ke prerak hain. ye sabhi medhavi, buddhiman, nirbhik, mitrapriya, shrutismritidhar, asadharan pratibha aur adamya sahas ke svami hain tatha inhonne apne-apne kshetra men apne nam ke sath-sath apne parivar, samaj aur desh ka nam roshan kiya hai. aise vyaktiyon ki upalabdhiyan unke tyag, tapasya, parishram, siddhant aur kathorta ki pratifal hain. svami vivekanand ke vyaktitva men itna oj, tej aur akarshan tha ki jab unhonne 11 sitanbar 1893 ke din shikago-dharm sammelan men ‘amerikavasi bhaiyon aur bahnon kahakar sabha ko sanbodhit kiya to turant saikron nar-nari unke samman men khare ho gae aur charon or se taliyon ki bauchar hone lagi. unke bhashan men vishva-bhratritva ka bij, vishva manvta ki jhankar aur vaidik rishi ki vani thi, jiski vipul shakti se shrotaon ka hriday shraddha, vismay aur bhratri bhav se jhankrit ho utha.
dae. kalam ne misail kshetra men, dae amatrya sen ne arthashastri ke rup men aur dhirubhai ne vyaparik kshetra men vishisht karya karke bahut yash aur dhan prapt kiya. ti.en. sheshan ne prashasnik adhikari ke rup men jis drirhta ka parichay diya, usse chunav karyakram men anek sudharon ka sutrapat hua. pan. javahrlal nehru ki kundli 7 men lagnesh chandrama svagrihi hokar bahut balvan hai. uske upar kisi bhi papi grah ki drishti nahin hai. unke vyaktitva men adbhut oj, akarshan, utsah, duradarshita, kalpanashilta, bhavukta aur nidrta ka samavesh tha. unhonne bhartiya rajniti ko nae parivesh men dhalakar nai disha pradan ki. vishva ke sarvadhik dhani aur pratishthit logon men se ek bil gets ki mithun lagn ki kundli 8 men lagnesh budh svarashi kanya men shashthesh mangal ke sath chaturth bhav men sthit hai. kya yah lagnesh nirbal aur pap pirit hai ? nahin, kyonki budh 23 anshon men svarashi kanya men bahut balvan hai, bhadra yog bana raha hai aur shubh grah chandrama se drisht hai. unhonne saeftaveyar ke kshetra men vishisht upalabdhi prapt kar asim dhan v pratishtha arjit ki. purva janm men pap karm karne vale manushyon ke lagna-lagnesh nirbal hote hain, jiske karan shreshth karm nishpadan men ve mand, shithil, ayogya aur aksham siddh hote hain.
unki n koi yojna hoti hai aur n hi koi lakshya. jivan jar svarup aur sharir rogi hota hai. aise log yash aur dhan se rahit hote hain. nimnalikhit paristhitiyon men vyakti yash aur dhan se rahit hota hai - û lagn v lagnesh papi grahon ke madhya hon, unse yut ya drisht hon ya lagnesh nich rashi men ho. û lagnesh shushk rashi (mesh, sinh) men ashtam bhavasth ho. ûrahu ya ketu lagn men aur lagnesh bhav 6, 8 ya 12 men ho. û shashthesh se lagn ya lagnesh yut ya drisht ho ya bhav 6, 8 ya 12 men shashthesh v lagnesh ki yuti ho. û lagnesh jis rashi men baitha ho, us rashi ka svami bhav 6, 8 ya 12 men ho ya in bhavon ke kisi svami se yut ya drisht ho ya pap pirit ho. bhavarth ratnakar ke anusar lagn, chaturth aur navam tinon bhavon ke svami ashtam bhav men hon ya lagnesh aur dvadshesh men parivartan yog ho, to vyakti yash aur dhan se rahit hota hai. ek sadharan vyakti ki makar lagn ki kundli 9 men lagnesh shani dvadash bhav men hone aur mangal se drisht hone ke karan nirbal hai, jiske falasvarup usmen rog pratirodhak shakti, atmabal, mansik bal, utsah, umang aur duradarshita ka abhav hai. march 2003 se rahu-rahu ki dasha chal rahi hai, jismen uske gurde itne kharab ho gae hain ki ab apreshan ke dvara inka badla jana bahut avashyak hai, anyatha jivan ko khatra hai.
yah vyakti yash, dhan aur achchi vidya se rahit hai. virasat men mila hua dhan aur vyavsay nasht ho chuka hai. dvitiya bhav dhan sangrah ka sthan hai. iske svami ka sva, uchch ya mitra rashi men shubh grahon se yut ya drisht hona dhan yog ka suchak hai. brihaspati dhandayak grah hai, islie dhan se sanbandhit bhav ya bhaveshon par iski drishti se yash aur dhan ki vriddhi hoti hai. bhavarth ratnakar ke anusar bhav 1, 2 aur 11 ke svami apne-apne bhavon men svakshetri hon ya bhav 2-5, 5-9 aur 2-11 ke svamiyon ka sthan parivartan ho, to vishesh dhan yog utpann hota hai. pan. nehru ki kundli men dvitiyesh surya shubh pancham sthan men sthit hokar yash, dhan aur vidya ki vriddhi kar raha hai. dhirubhai ki kundli men dvitiyesh shani svagrihi aur brihaspati se drisht hai tatha bil gets ki kundli men dvitiyesh chandra dasham bhavasth hai. is prakar yah uchch shreni ka dhan-pratishtha karak yog nirmit hua hai.
yadyapi mangal, shani, rahu aur ketu uchch shreni ke papi grah hain, kintu inmen se koi akela dvitiya bhavasth ho, to dhan ki hani nahin, balki vriddhi karta hai aur yadi surya ke sath mangal, shani, rahu aur ketu men se koi ek ya do papi grah hon, dvitiyesh shashth ya dvadash bhav men ho ya dvitiyesh v dvadshesh men parivartan yog ho, to dhan aur pratishtha nasht hone ki bahut sanbhavna rahti hai. daridryadau shashirvi dhanrashiyatau. bhaumarkajau sakal rogkrau bhavetam.. - jatak parijat, adhyay 11, shlok 75 yadi surya aur chandra donon dhan sthan men hon, to jatak daridra hota hai tatha mangal aur shani ki upasthiti se anek prakar ke rog (netra, dant aur jihva adi se sanbandhit) hote hain. char prakar ke grah dhandayak hote hain- dvitiya bhavasth grah, dvitiyesh, dvitiya bhav aur dvitiyesh par drishti dalne vala grah tatha brihaspati. dvitiya bhavasth koi grah yadi papi grah se yut ya drisht ho, ast ho ya fir shatru ya nich rashi men ho, to vah apni mahadsha ya antardasha men dhan ki hani karta hai. isi prakar dvitiyesh kisi bhi rup men pirit ho ya bhav 6, 8 ya 12 men ho, to dhan ki hani hoti hai. yadyapi bhav 8 men sthit grah ki drishti se dvitiya bhav pusht hona chahie, kintu sabhi grahon se aisa nahin hota. dekhne men aya hai ki keval dvitiyesh aur budh bhav 8 men dhan ki vriddhi karte hain. kundli 10 aise vyakti ki hai, jisne san 1983 men rahu-budh ki dasha men jalandhar se landan jakar janaral stor ka karya shuru kiya. guru ki mahadsha (agast 1991 se 2007 tak) men usne bahut dhan arjit kiya aur uske vyapar ka varshik tarn ovar karoron rupyon tak pahunch gaya, kintu dhanesh mangal ki antardasha (aprail 2004 se march 2005 tak) men use karoron rupyon ki hani ho gai.
kyon? yah mangal 10 40‘ anshon men bahut nirbal hai aur fir shashth bhavasth hai, jis par kisi bhi shubh grah ki drishti nahin hai. atah is avastha men dhanesh kadapi dhanaprad nahin ho sakta. kundli 11 men dvitiyesh aur navmesh shukra shashth bhav men hone ke karan yash, dhan aur bhagya nasht kar raha hai. lagnesh budh papi grahon se pirit hone ke karan nirbal hai atah is vyakti ki deh krish aur rogi hai tatha nirnay shakti aur duradarshita ka abhav hai. yah vyakti 25 varsh se svatantra vyavsay kar raha hai, jismen apne galat nirnayon ke karan anek bar yash aur dhan ki hani kar chuka hai. iske chaturth bhav ka svami guru yadyapi svagrihi hai, kintu shashthesh shani aur ashtamesh mangal se pirit hai. atah uska jivan sukhi aur tanav rahit nahin ho sakta. kuch varsh pahle rahu v mangal ki dasha men use yash aur dhan ki bahut hani uthani pari. uska vyapar thapp ho gaya aur sabhi jama punji nasht ho gai.
tatpashchat guru v shani ki dasha men apne murkhatapurn nirnayon ke karan usne apna samast dhan nasht kar diya. abhi tak apna ghar nahin bana saka hai, kiraye ke ghar men rahta hai. pancham aur navam bhav kundli men sarvashreshth sthan hote hain. in bhavon ko dev tulya sthanon ki sangya di jati hai kyonki ye buddhi, tark, vishleshan kshamata, pratiyogita, bhagya, dharm, purvajanm aur vartaman janm tatha achanak dhan prapti ke sthan hain. jab in bhavon ka sanbandh shubh aur balvan grah tatha kendresh se hota hai, to manushya ke purva aur vartaman janm ke shubh aur naitik karm prakat hote hain. in bhavon ki balvan avastha se manushya ki vidya-buddhi, tark shakti aur duradarshita bahut viksit hoti hai, islie jivan ki daur men vah anya pratispardhiyon se age barh kar saflta prapt kar leta hai. lagna-dvitiya, lagna-navam, dvitiya-pancham, dvitiya-navam aur panchm-navam bhavon ke svamiyon ka yuti ya drishti sanbandh uttam dhan yog ka nirman karta hai. aisi avastha men manushya alp parishram se yathasanbhav yash-pratishtha aur dhan-sanpatti arjit karta hai. dhaneshe panchamasthe ch panchmesho dhane yadi. - bhavarth ratnakar dhanesh pancham bhav men ya panchmesh dhan bhav men ho, to vishesh dhanyog hota hai. dvitiya aur navam bhavon ke svamiyon ka sthan parivartan dhan yog ka nirman nahin karta kyonki dvitiya se navam bhav ashtam sthan par aur navam se dvitiya bhav shashth sthan par hai. navmesh ki bhav 1, 3, 5, 7 aur 10 men sthiti uttam hoti hai. guru ravindranath taigor ki min lagn ki kundli 12 men lagnesh brihaspati pancham bhavasth aur uchch kark rashisth hokar navam aur lagn par drishti dal raha hai. panchmesh chandra lagn bhavasth hai.
lagnesh aur panchmesh ki bhav parivartan ki yah sthiti yash, dhan aur pad hetu ati uttam hai. lagn bhavasth chandra, dvitiya bhavasth surya, budh aur shukra tatha pancham bhavasth aur uchch rashisth brihaspati ke karan guru ravindra vidyapremi, mishtabhashi, kavi, lekhak, kalakar, sangitkar, darshanik aur kalpanashil vyaktitva ke svami the. shubh grahon ke is sanbandh se unhen satya ke marg arthat sahitya ki seva se dhan-pratishtha ka labh hua. unhonne kisi vyapar ya rajniti ke madhyam se dhan arjit nahin kiya. san 1913 men chandra v shukra ki dasha men unki kavya rachna gitanjli ke lie unhen vishva ke sarvottam nobel puraskar se sammanit kiya gaya. panchmesh chandra brihaspati adhishthit rashi ka svami hai, jo akasmik dhan yog nirmit kar raha hai. vastav men yah lagn, dvitiya, pancham aur navam bhavon ke sanbandhon ka pratap hai. dasham bhav anya kendra sthanon men sarvadhik bali hai. yah karm sthan hai. gita men karm ko bahut mahatva diya gaya hai, islie manushya jivan karm pradhan bataya gaya hai. karm ke bina yah jivan jar svarup hai, islie dasham bhav gatishilta ka dyotak hai. is bhav se ajivika sadhan jaise naukri, vyapar, rajkiya pad, samman, unnati-utthan adi ka bodh hota hai. jab lagn, kendra aur trikon ka dasham bhav se sanbandh sthapit hota hai, ya jab dasham bhav aur uska svami shubh grahon se labdh hote hain, to manushya ke karm shreshth hote hain aur fir shreshth karmon se dhan evan kirti ki vriddhi hoti hai. aise vyakti apne parishram aur duradarshita se uttam shreni ke ajivika sadhan nirmit kar khub yash-dhan prapt karte hain. is bhav men chandra aur shukra nirbal hote hain magar surya, mangal, guru, shani aur rahu balvan hone ke karan samajik, rajnitik aur arthik sanpannata ke bodhak hote hain. yadi is bhav men surya shubh grahon se yut ya drisht ho, to manushya shurvir, pratapi aur rajkiya pad, dhan aur samman prapt karne vala hota hai. is bhav men mangal, shani aur rahu hon, to vyakti men sahas evan shurvirta charam par hoti hai. aise log vyapar ki bajay rajnitik, samajik aur fauji jivan men jokhim bhare karyon se dhan-pratishtha prapt karte hain. adhyapak, nyay adhikari, dharm adhikari aur vyapariyon ke lie is bhav men budh aur bririhaspati dhan-pratishtha ke karak hote hain. is bhav men brihaspati kendra adhipatya dosh ke bure fal nahin deta, balki dirghayu, uchch pad, unnati, khyati, satkarm aur sadgun pradan karta hai.
devkerlkar ke anusar yadi labhesh, karmesh aur dhanesh men se ek bhi grah chandra se kendravarti ho, to jatak paryapt yash aur dhan prapt karta hai. sarva vidit hai ki yadi dashmesh bhav 6, 8 ya 12 men nirbal avastha men ho, to jatak ke karm dhan-pratishtha hetu hanikarak hote hain. agyasthangte surye bhumiputren va yute. kendranvite tadishepi kruramagyan karoti sah.. - sarvarth chintamni, adhyay 8, shlok 16 yadi surya aur mangal dasham bhav men hon aur dashmesh kendra men ho, to vyakti uchch shaskiya pad par asin hota hai. dhiru bhai ki kundli 4 men dasham bhavasth brihaspati dhan, samman aur ayushman karak hai. unke jivan men brihaspati ki mahadsha mai 1982 se 1998 tak chali. us dauran unke vyapar ki unnati charmotkarsh par thi. unhen dvadash bhavasth dashmesh se koi hani nahin hui. kyon? budh apne hi nakshatra jyeshtha men shubh grah shukra ke sath bali avastha men hai. yadi yah budh kisi papi grah se pidit hota, to hani ho sakti thi. iske viprit kundli 9 ke pancham aur dasham bhav ka svami shukra ashtam bhavasth hai. is vyakti ko virasat men mila hua dhan aur vyavsay nasht ho chuka hai aur ab vah gurdon ke rog se grast hai aur maut se jujh raha hai. kundli 11 ke dasham bhav men ashtamesh mangal vyavsay men hanikarak siddh hua. is vyakti ka vyavsay kabhi falful nahin saka, balki use kai bar dhan-pratishtha ki hani uthani pari.
rajnitigyaon ke lie aisa mangal haniprad nahin hota hai. purva pradhanmantri narsinh rav ki kundli 13 ke dasham bhav men surya, mangal (digbali) aur budh (bhadra evan budhaditya yog) uchch shreni ke pratishthakarak siddh hue. vah anek bhashaon ke gyata tatha samajshastra aur rajniti ke vidvan the. vah kendra sarkar men uchch padon par asin rahe. san 1990 men vah rajniti ko alvida kah kar apne paitrik sthan par lautne ka man bana chuke the. kintu rajiv gandhi ki hatya ke bad mangal v rahu ki dasha men achanak unka nam pradhanmantri ke lie prastavit ho gaya aur 21 jun 1991 ko unhonne yah pad bhar grahan kar liya. pradhanmantri dae. manmohan sinh ki kundli 6 men navam aur dasham bhav ke utkrisht sanbandh ke rup men surya-budh yuti (budh-aditya yog) vidya, buddhi, prashasnik pad aur vidvatta, imandari, kartavyanishtha evan dharmaparaynta karak hai. dashmesh budh apne hi nakshatra uttarafalguni aur apni hi rashi kanya men hone ke karan bahut balvan hai. unhonne ek prabuddh arthashastri ke rup men bhartiya artha-vyavastha aur rajniti ko sanvara hai. tatpashchat unhonne rahu, shani aur brihaspati ki dasha men 22 mai 2004 ki sham 4.35 baje pradhanmantri pad ki shapath li. ab dashmesh budh ki antardasha chal rahi hai, jismen ve anek samasyaon ka hal aur sahyogi dalon ka tushtikaran karte hue apna karya sucharu rup se kar rahe hain. ekadash bhav labh ka sthan hai. is bhav se jatak ke labh ka anuman hota hai. is bhav men sthit grah apni dasha ya antardasha men yash, dhan, pad adi se sanbandhit labh pradan karte hain. yadi is bhav men lagnesh, dvitiyesh, panchmesh, navmesh aur koi kendresh papi grahon se pirit hon, to us pirit grah se labh ki sanbhavna kshin ho jati hai, jaise yadi mithun lagn ki kundli men lagnesh budh mangal ya shani ke sath is bhav men ho ya unse drisht ho, to budh ki mahadsha ya antardasha adhik labhaprad nahin hogi.
atah keval balvan dhan karak grah hi labhkarak ho sakte hain, jaise dhanu lagn valon ke lie dhanesh shani is bhav men uchch rashisth hokar dhandayak hai. isi prakar is bhav men rahu vrish, mithun, kanya ya kunbh rashi men yash, dhan, pad adi ke sukh deta hai. ekadash bhavasth grahon se ay ke srot ka gyan bhi hota hai, jaise is bhav men surya ho, to pita ki sahayta se ya uske dvara sthapit vyavsay ke rup men ay ke sadhan prapt hote hain. vahin chandra ho, to mata ke sahyog se, mangal ho, to bhaiyon ke sahyog se ya svaprishram se, budh ho, to mama ya kisi mitra ke sahyog se, brihaspati ho, to bare bhai ke sahyog se, adhyapan, prakashan, nyayalay sanbandhi ya kisi dharmik karya se, shukra ho, to stri ke sahyog se aur shani ya rahu ho, to apne se nimn star ke logon ke sahyog se ay ke sadhan prapt hote hain. dhanpe labhge vapi labhesho dhango yadi. - bhavarth ratnakar dhan aur labh bhavon ke apas men sthan parivartan, yuti ya drishti sanbandh hone se dhan yog banta hai. ekadash bhav ko labhkari manne ke sath-sath papi bhi mana jata hai, kyonki iske svami ki dasha ya antardasha men jatak ko daihik rog hone ki sanbhavna hoti hai. dhanu lagn valon ke lie shukra shashthesh aur ekadshesh ke rup men ek prabal papi grah hai, jo apni dasha bhukti men rog, rin aur shatruon ki vriddhi karta hai tatha unke madhyam se daihik evan mansik kasht utpann karta hai.
jyotish granthon men budh v shukra ki yuti ka vidya, dhan, pad, pratishtha aur vyapar ke karak ke rup men ullekh kiya gaya hai, jo prayah shashth ko chorakar pratyek bhav men shubhafal karak hota hai. rudrabhatt ke anusar budh aur shukra hon aur balvan hon, to jatak bhupti ya senapti hota hai. saravli ke anusar in donon ki yuti se jatak atyadhik dhani, nitigya, vedon ka vidvan tatha satyavadi aur madhur vachan bolne vala hota hai. lagn bhavasth budh v shukra ke karan manushya sundar, svasth, sukhi, bandhu aur mitron se yukt, vidvan, lokapriya aur raja se sammanit hota hai. purva rashtrapti dae. radhakrishnan ki kanya lagn ki kundli men budh v shukra lagn bhavasth (svagrihi budh se bhadra yog bana hai aur shukra ka nich bhang ho gaya hai) aur svami vivekanand ki dhanu lagn ki kundli men dhan bhavasth hain. is yog ke falasvarup donon prabhavshali, vakpatu, mridubhashi, manvtavadi, nyayvadi, sanvednshil, chintak, lekhak evan darshanashastra ke prakand pandit the tatha bhartiya darshan se sanbandhit apne vyakhyanon se desh-videsh men bahut lokapriya hue. dae. radhakrishnan ki vidvatta aur saumya vyavhar se prabhavit hokar pan. javahrlal nehru ne unhen soviyat sangh men rajdut aur fir bharat ka uprashtrapti tatha rashtrapti banaya. pan. nehru ki kundli men yah yog chaturth bhavasth hai, jismen shukra svagrihi hai aur malavya yog bana raha hai.
guru ravindranath taigor ki kundli 12 men yah yuti dvitiya bhavasth hai. ashtam bhav men yah ayushman karak (dekhen morarji desai ki kundli) aur dvadash bhav men yash v dhan-sanpatti vriddhikarak hai (dekhen dhirubhai ki lagn kundli aur amatrya sen ki nirayan bhav chalit kundli). is brahmand men brihaspati sarvashreshth grah hai. yah dhan, dharm, putra aur saubhagya ka pratik hai. yadyapi kaha jata hai ki yah sthan ki hani karta hai, kintu iski drishti parne par bhav aur usmen sthit grahon ke bal men vriddhi hoti hai. iski upasthiti se keval pancham bhav ki santan se sanbandhit aur saptam bhav ki pati se sanbandhit hani hoti hai, anya kisi bhav men iski upasthiti se koi hani nahin hoti. ise dhankarak grah mana gaya hai kyonki dhan dyotak bhavon par iski drishti se yash, dhan, pad aur saubhagya ki vriddhi hoti hai. karko bhav nashay siddhant ke anusar iski dvitiya bhav men upasthiti dhandayak nahin hoti. hamara vichar hai ki dvitiya bhavasth shatru rashisth hokar hi yah dhan ki hani karta hai. kundli men bhav 6, 8 aur 12 dusht sthan hain, jinmen 8 nikrishtatam hai. in bhavon men anya grah apna bal kho dete hain, kintu brihaspati apna bal nahin khota. vastutah yah in sthanon ke kuprabhav ko kam karta hai. bhav 6 aur 8 men sthit brihaspati ki drishti se dhan sthan pusht hota hai jisse dhan ki vriddhi hoti hai. bhav 12 men sthit hokar brihaspati aur anya shubh grah chandra, budh v shukra shubh karyon men dhan ka vyay karte hain, apavyay nahin karte. bhaveshakrant rashishe duahsthe bhavasya durbalam. svochchamitrastharashisthe bhav pushtin vaded budhah.. - jatak parijat, adhyay 11, shlok 10 jis rashi men vicharniya bhav ka svami ho, us rashi ka svami yadi dukh sthan (bhav 6, 8, 12, nich rashi, shatru rashi, nich navansh, shatru navansh adi) men ho, to vicharniya bhav ashakt (durbala) ho jata hai, islie uski shubhafal dene ki kshamata shithil ho jati hai. iske viprit vicharniya bhav ka svami jis rashi men ho, us rashi ka svami yadi apni sva, uchch ya mitra rashi men ho, to vicharniya bhav pusht hokar shubhafal dene men saksham hota hai. amitabh bachchan ki kundli 14 men labhesh aur dhanesh brihaspati shashth bhavasth uchch kark rashi men sthit hokar dhan bhav par drishti dal raha hai aur kark rashi ka svami chandra navam bhav men hai. yahan shashth bhav men dhanesh ko apne shubh fal dene men aksham hona chahie, magar aisa nahin hai kyonki yah uchch rashi men hai aur apne bhav par drishti dal raha hai.
atah dhan aur labh bhav pusht hokar apna shubh fal dene men saksham hai. unke jivan men brihaspati ki mahadsha disanbar 1954 se 1970 tak thi, jismen unki shiksha-diksha, parvrish aur yauvnkal purn hua. san 1969 men brihaspati-rahu ki dasha men unka padarpan film kshetra men hone se unke jivan ko ek pragtishil ayam mila. amitabh ka janm ek sadharan parivar men hua tha. lagn, karm, dhan aur bhagya bhavon ki balvan sthiti se unhen apar yash aur dhan mila. navmesh shukra apni rashi tula se dvadash bhav men (lagn se ashtama) anya tin grahon ke sath hai. sadharntya shashth, ashtam aur dvadash bhavon men grah achche nahin mane jate, magar bhog ka grah shukra bhog ke sthan men achcha mana jata hai. bhrigurjanayati vyaye sarti saukhya vittadyutim. - faldipika, adhyay 8, shlok 19 vyay sthan men shukra ho, to vyakti ko dhan, pratishtha adi ka sukh prapt hota hai. ashtam bhavasth char grahon ne amitabh ke jivan ko ek naya ayam diya, jisse unke jivan men apratyashit unnati hui. sarvavidit hai ki ashtam bhav guhya sthan hai, jismen sthit shubh grahon se vyakti ke antrik gun ujagar hote hain.
ashtam bhav manushya ke rahasyavad ka sthan hai. is bhav men shubh grahon ki prerna se manushya apne rahasyon ko khojta hua gahrai men utrta hai aur fir utkarsh ki sanbhavnaon ko dhundh kar lata hai. vastutah yah bhav bhautik yash aur dhan ka hi nahin, balki adhyatmik rahasyavad ka sthan bhi hai. shubh grahanan sanbandhe randhre paribhav n hi. - sarvarth chintamni, adhyay 7, shlok 60 ashtam bhavasth shubh grahon ke karan manushya ko jivan men parabhav nahin sahna parta. vastav men aise log kalakaushal, pratibha aur nipunta ke dhani hote hain. unke lagn v lagnesh nirbal hon, to unmen uparyukt gunon ki kami hoti hai. kundli 15 men ashtam bhavasth dhanesh aur labhesh brihaspati dhan aur vyay bhav par drishti dalte hue apavyay ki sanbhavna ko kshin kar raha hai. svarashisth surya aur purnima ka chandra donon purn balvan hone ke karan atmabal, mansik bal, kalpana shakti aur duradarshita ki vriddhi kar rahe hain.
atah is vyakti ko apne jivan men yash, dhan aur sanpatti ka sukh milna chahie. kintu aisa nahin hai. yah vyakti ek sadharan dukandar tha, jise kabhi bhi yash, dhan aur sanpatti ka sukh nahin mila kyonki sattebaji men lipt hone ke karan iska sara dhan nasht ho gaya. dhanesh ki svagrih par drishti dhan sangrah ki suchak hai, magar dhan sangrah nahin hua. lagnesh shani nich mesh rashi men aur sukhesh tatha bhagyesh shukra shashth bhav men hone ke karan nirbal hai tatha shani ki drishti se pancham aur navam bhav donon pirit hain. shashthesh chandra se lagn dushit hai. shani ki mahadsha (agast 1947 se 1966 tak) men is vyakti ko dhan ki bahut hani hui aur vah karjadar ho gaya. uttarakalamrit ke anusar rahu vrish rashi men uchch hota hai atah is kundli men chaturth bhavasth vrish rashisth rahu ko, jis par dhanesh aur labhesh brihaspati ki drishti bhi hai, apni dasha men jatak aur uske mata-pita ke lie bahut labhaprad hona chahie. kintu rahu ki mahadsha (agast 1913 se 1931 tak) men uske mata-pita ko mithya aropon ke shadyantra se apna ghar aur ganv chor kar idhr-udhar bhagna para. chaturth bhavasth chaya grah mata-pita ke yash, dhan, sanpatti, ayu aur svasthya sukh hetu shubh nahin hote. chaturth ki apeksha dasham bhavasth rahu yash, dhan v pad ka karak hota hai.