sheyar bajar men nivesh ke falasvarup kuchek log vakai sanpannata ke shikhar par pahunch jate hain kintu adhikansh logon ko munhki khani parti hai aur ve kangali evan divaliyepan ka bhi shikar ho jate hain. kintu yah bhi sahi hai ki sheyar bajar arthavyavastha ki rirh mani jati hai tatha yahan kie gae nivesh par hi kisi kanpni athva udyog ka bhavishya nirbhar karta hai. atah yah to jahir hai ki kisi desh ki unnati ke lie samagra rup se sheyar bajar men nivesh ati avashyak hai. ismen yah savdhani bartni anivarya hai ki hamara nivesh is prakar se ho ki yadi ham atyadhik munafa n bhi arjit kar saken to nuksan bhi itna adhik n ho jisko jhelna hamare lie kathin ho jay. yahan ham sheyar bajar men nivesh ke lie uttaradayi jyotishiya tatvon ka vishleshan karenge ki kundli men kaun se bhav, grah athva bali yog hona chahie jisse ki har hal men munafa hi prapt ho.
lagn kisi bhi kundli ki jan hoti hai. atah kundli men lagn evan lagnesh ka kafi bali hona kisi bhi udyam men saflta prapt karne ke uddeshya se avashyak hai. yadi lagn evan lagnesh bali hon, shubh grahon se drisht athva yut hon, rajyog ke nirman men shamil hon to aise lagn ko bali kaha ja sakta hai. lagn ke atirikt kundli men ekadash bhav jo ki ay bhav hai, dvitiya bhav jise dhan bhav ki sangya di gayi hai, navam bhav jiska bal jatak ke samanupatik bhagya ka nirdharan karta hai tatha pancham bhav jo purvanuman ke lie mahatvapurn hai, in sabhi ka parikshan karna nitant avashyak hai. iske atirikt ashtam bhav achanak dhan prapti men sahayak hai. yadi ham grahon ki bat karen to sheyar bajar men pratyutpannamatitva evan shighra nirnay kshamata ke lie budh evan guru ki bhumika ati mahatvapurn hai. sheyar bajar men turant sochakar turant nirnay lene ki avashyakta hoti hai.
kis samay sheyar khariden tatha kis samay ise bechen iska shighra nirnay lena tatha use karyarup men parinat karna ati avashyak hai. budh aur guru buddhimatta ko nirdisht karne vale grah hain. atah kundli men inki sahi sthiti honi sheyar bajar men nivesh ke lie ati avashyak hai. iske atirikt mangal, surya evan rahu utprerak ki bhumika nibhate hain tatha iske prabhavasvarup sheyar bajar men achanak teji athva mandi ati hai. kundli men dasham bhav manushya ke karm ka sthan mana gaya hai. atah sheyar bajar men labh-hani ke drishtikon se dasham bhav bhi ati mahatvapurn hai. in sab baton ke atirikt vartaman men grahon ke gochar tatha kisi jatak ki chal rahi dasha ki bhi apni bhumika hoti hai. yadi janmakundli men lagn se 2, 5, 9, 11 bhavon men shubh grah hon sath hi lagnesh kendra athva trikon men ho to sheyar bajar men munafe ki atyadhik sanbhavna hoti hai. sheyar bajar men munafe ke lie pancham bhav ati mahatvapurn hai kyonki yah bhav satta, laetri athva sheyar ke madhyam se achanak prapt hone vale dhan tatha inke lie lagaye jane vale purvanuman ka dyotak hai.
yadi panchmesh shubh hokar navam, ekadash athva dvitiya bhav men sthit ho, sath hi pancham bhav evan panchmesh par shubh prabhav ho to aise jatak ko nivesh kar kam avdhi men atyadhik labh kamane ka avasar prapt hota hai. yadi sthiti iske viprit ho to jatak ko niahsandeh nuksan uthana parta hai. lagn, dvitiya, pancham, navam, dasham ya ekadash bhav men dhanesh aur lagnesh athva dhanesh aur labhesh athva bhagyesh aur dashmesh athva dhanesh aur panchmesh ki yuti ho to jatak ko laetri, sheyar, satte se achanak labh prapt hota hai. yadi lagn, chaturth, saptam aur dasham bhav men shubh grah bali hokar sthit hon to sheyar market se dhan prapti ke yog bante hain. pancham bhav men guru aur lagnesh ki yuti se achanak dhan prapti ke yog ka nirman hota hai. yadi jatak ki kundli ke pancham bhav men chandrama ho tatha ekadash bhav men baithakar shukra ek-dusre ko drishti pradan karen to sheyar market se anayas labh prapt hota hai. yadi kundli men kahin bhi lagnesh aur panchmesh ki yuti ho aur ye shubh hokar shubh prabhav men hon to nishchit rup se sheyar market se labh ki prapti hoti hai.
yadi dhanesh aur labhesh chaturth bhav men hon aur chaturth bhav ka svami shubh grahon se drisht ya yut ho to sheyar market se akasmat dhan ki prapti hoti hai. kisi tarah ka achanak labh prapt hone ke lie navam bhav ki bhumika aham hoti hai. atah is par vichar karne ke lie ukt bhav ka vishleshan karna avashyak hai kyonki achanak labh men bhagya ka barabar ka hath hota hai. navam bhav par shubh grah ki drishti v shubh yog navam bhav ko bal pradan karte hain. lagn men balvan budh par chandra ya ashtamesh drishti de to achanak labh hota hai. iske alava sheyar bajar ke utar-charhav janne ke lie grahon ke gun-dharm, karakatva, udy-ast, vakri aur margi adi gati bhi avashyak hoti hai. guru, shukra, balvan chandra aur akela budh sab gochar men mandi ke karak hain, guru grah se lanbi mandi ka sanket milta hai. shukra aur budh alp samay ke lie mandi late hain. surya, mangal, shani, rahu aur ketu teji karak grah mane jate hain.
kshin chandra evan ashubh budh tejikarak hote hain. chandra ki teji-mandi alpakalin hoti hai aur uska vibhinn nakshatron men gochar bhraman dainik teji mandi par vishesh prabhav dalta hai. chandra ki tarah budh bhi alp samay ke lie teji ya mandi darshata hai. surya se budh ki yuti men ast aur uday hone ki sthiti sheyar bajar ke lie kafi mahatvapurn mani jati hai. jab budh purva disha men ast hota hai to sheyar ke bhav men teji ati hai kintu jab budh pashchim disha men ast hota hai tab bajar men mandi ka asar hota hai. isi tarah jab budh purva disha men udit hota hai to bajar men teji ati hai tatha jab budh ka uday pashchim disha men hota hai tab mandi ka mahaul banta hai. surya ka gochar bhraman jab vibhinn nakshatron se hota hai to nakshatra ki prakriti ke anusar sheyar bajar men teji athva mandi hoti hai. satte se labh kab milega ?
1. jis vyakti ki janmakundali men dhanesh labh sthan men ho ya khastaur par labh sthan men nich-rashi ka budh ho athva nich-rashi ka koi anya grah ho, to achcha dhan-yog banta hai.
2. lagnesh, dhanesh tatha ashtamesh (tinon) labh sthan men hon aur vrishabh ya min rashi ka chandrama athven sthan men ho, to vah vyakti satte ke vyapar men karorpti hota hai.
3. guru min rashi men ho ya surya, budh evan guru mithun rashi ke labh sthan men ho, v keval mangal vrish rashi ka kendra men ho, to vah manushya rui tatha sheyron ke vyapar se karorpti hota hai.
4. lagn men dhanu rashi ka guru, ashtam sthan men kark rashi ka chandrama, labh sthan men tula rashi ka shukra ho to chandi-sone ke vyapar se karorpti hota hai.
5. purvokt grahyog ke sath-sath yadi dasham sthan men kanya rashi ka budh bhi ho, to apar sampatti ka svami banata hai. aisa vyakti sona-chandi ke vyapariyon men agraganya hota hai.
6. mesh rashi ka surya aur sinh rashi ka chandrama ho, to us vyakti ko satte ke vyapar se dhan labh hota hai.
7. mesh ka uchchasth surya ho aur vrishchik ka nichasth chandra ho, to use sona, chandi, rui, sheyars ke vayda-vyapar se vishesh dhanlabh hota hai.
8. mithun rashi ka surya aur sinh rashi ka chandrama ho, to us vyakti ko satta-vyapar se achcha labh hota hai.
sheyr-market ki ghati-barhi: prashnalagn athva vastu ki rashi ko lagn manakar, uske pratham tatha dusre bhav aur chandrama dvara sheyron ki ghata-barhi ka vichar kiya jata hai. chandrama yadi ashtamesh ke sath kisi shubh drishtiyog men ho dusre bhav par koi shubh drishti-sambandh karne vala grah ho, to us samay staek ya sheyar jarur kharid lena chahie. dvitiya bhav ka svami jab ashtamesh ki uchcharashi men pahunch aur vah dvitiyesh chandra guru ya shukra ki kisi shubh-drishti men ho, to us samay sheyron ka kharidna ya bechna labhdayak hota hai. lagn, dvitiya, saptam aur ashtam bhav men yadi papagrah sthit hon, to kadapi sheyar nahin kharidne chahie. kadachit ve papagrah lagn v dvitiya bhav ke svami hon, tab to bari hi satarkata se kam lena chahie. saptamesh ki yadi lagnesh v dvitiyesh par koi ashubh drishti par rahi ho, to aisi dasha men bhi sheyron ka n kharidna hi achcha hota hai.
lagn v dvitiya sthan men baitha hua grah yadi ashtamesh ko kisi papdrishti se dekh raha ho, tab kharidna ya bechna (donon hi) labhdayak hota hai. saptesh yadi dusre sthan men ja baithe, to nissandeh sheyron ka bhav gir jata hai. jis samay dvitiyesh ashtamesh ke sath shubh-drishti men ho, athva dvitiyesh ashtamesh ki uchcharashi men pahunche, athva chandrama ashtamesh se sanyog karke alag hota hua dvitiyesh se ja mile, us samay (us din) sheyar kharidna chahie. ‘‘kis samay ya kitne baje kharidna chahie.’’ iske lie dvitiyesh jis samay sthaniya samay ke anusar ashtam bhav ke praveshansh par pahunche us samay kharidna chahie. sheyron ki kharid ke lie yah samay atyuttam hota hai aur jis samay chandrama ashtamesh se alag ho raha ho, us samay sheyron ka kharidna bhi labhdayak hua karta hai athva chandrama jis samay ashtamesh se sanyog karke age barhe aur dvitiyesh se ja mile tab kharidna vishesh achcha hai.
sheyar kab bechen ? jis samay dvitiya sthan men koi shubh grah pahunche, tab bech dena chahie athva lagnesh jis samay saptam sthan men pahunche, tab bechna achcha hai aur chandrama jab dvitiyesh ki shubh drishti men se nikalakar saptamesh ya ashtamesh ke sath kisi pap drishti men pahunche, tab bechne se labh hota hai. jis din upar likhe niyamon ke anusar grahon ke drishti-sambandh jis samay par hon, us samay sheyar bech dena chahie. vayde ke saude par labh-hani kab hogi? lagnesh, dvitiyesh aur panchmesh yadi lagn se dasham sthan men sthit hon, to sabhi vastu ke vayde ke saude men ho to avashya labh hota hai.
panchmesh yadi pancham sthan men hi sthit hokar lagnesh ya dvitiyesh ke sath koi shubh-drishti kar raha ho, to yah ek mahan suyog hota hai. guru pancham ya dvitiya sthan men balvan hokar baitha ho, panchmesh kendra men ho aur vah kisi pap-drishti men n ho, to vah samay labhdayak hota hai. yadi is prakar ke yog n hon, to kadapi kisi bhi vastu ke vayde ke saude n karne chahie. yadi gyarhvan bhav balvan ho, athva gyarhven bhav ka svami balvan ho, to vayde ke kam men hani hogi-labh nahin hoga. yah sab vichar prashna-lagn se karna chahie. dashmesh jis samay dvitiyesh ke sath shubh drishti kar raha ho, surya dvitiyesh ke sath shubh-drishti sambandh kar raha ho, lagnesh yadi gyarhven sthan men ho, guru, shukra, surya athva chandrama dasham sthan men balvan hokar baithe hon aur un par koi pap-drishti n par rahi ho to us samay kisi bhi kam ke lie kiye gae kaentrekt ya vayde men labh hi hota hai.
kintu dashmesh aur dvitiyesh jab kisi pap-drishti men fanse hon ya lagn se panafar sthanon (2-5-8-11ven sthanon) men hon athva in sthanon men pap-grah baithe hon, tab man-pratishtha aur dhan (donon hi) chale jate hain-bhari hani hoti hai. dainik lagnon se teji-mandi ka gyan: jis tarah grahon ke vedh, rashi-sankranti, nakshatra-bhraman, chandra-darshan evan grahon tatha bhavon ke parasparik drishti-sambandh adi ka sahara lekar vibhinn padarthon ki teji-mandi janne ki anek paddhatiyon ka varnan hamare purvacharyon ne apne prachinatam sanhita adi granthon men kiya hai, usi tarah din-bhar men lagabhag do-do ghante men badal jane vale lagnon ke dvara bhi utne samay ki prayah sabhi padarthon ki teji-mandi janne ke lie ‘‘lagna-paddhati’’ ka ek sundar aur saral prakar bhi unke granthon men paya jata hai, jise ham apne pathkon ki jankari ke lie yahan prastut kar rahe hain. yadyapi sansar ke sabhi pramukh vyapari kendron ke sthaniya (lokl) samay ke anusar pratyek lagn ka shastra-sammat arambh aur samaptikal hua karta hai, tab bhi nirnayakarta ki suvidha ke lie bhartiya kuch prasiddh panchangon men pratyek lagn ka staindard taim ke anusar bhi arambh tatha samapti ka samay likha rahta hai.
kyonki, is samay bhumandal par sarvatra staindard taim ke adhar par hi samast vyapar-karyon ka sanchalan ho raha hai ataev nirnayakarta ko chahie ki, vah kisi sarvashuddh ganitvale sthaniya panchang ke anusar bajar khulne ke samay se lekar bajar ke band hone ke samay tak ki lagnakundaliyan bhav tatha grah-spasht sahit taiyar kar len. fir pratyek lagn men bhavadhiptiyon ke anusar grahon ka shubhashubhatva nishchit kar len. karan yah hai ki, pratyek lagn ke badlte rahte hain-unka shubhashubhatva bhi badlta rahta hai aur pahle lagn men grahon aur bhavon men jo paraspar drishti-sambandh rahta hai, vah bhi badal jata hai. grahon ka samanya shubhashubhatva: shubh grah-guru, shukra, purnachandra aur shubh grah se sambandh karne vala budh, ye shubh grah mane gaye hain. pap grah- surya, mangal, shani, rahu, ketu, kshin chandrama aur pap grahon se sambandh karne vala budh, ye pap grah hain.
bhartiya paddhati ke anusar grahon ki purn drishtiyan:
1. surya, chandra, budh, shukra, rahu aur ketu jis sthan men sthir hote hain, us sthan se saptam sthan ko purn drishti se dekhte hain.
2. mangal 4-7-8 in sthanon ko purn drishti se dekhta hai.
3. guru 5-7-9 in sthanon ko purn drishti se dekhta hai.
4. shani 3-7-10 in sthanon ko purn drishti se dekhta hai. grahon ke shubhashubhatva ke vishay men shastriya vishesh mantavyah
1. sabhi lagnon men trikon ke svami grah sarvada shubh fal hi karte hain. bhale hi ve samanya shastra men krur sangya vale kyon n hon.
2. shubh grah kendresh hokar ashubh fal kiya karta hai.
3. pap grah kendresh hokar shubh fal kiya karta hai.
4. tisre, chathe aur gyarhven sthanon ke svami shubh fal nahin karte.
5. athven ghar ka malik yadi lagn ka bhi svami ho, to shubh fal karta hai. yadi aisa nahin hai, to vah ashtamesh sarvada ashubh fal kiya karta hai.
6. yadi panchmesh saptam sthan men ho athva isi tarah shubh saptamesh pancham sthan men ho, to vah atyant shubhdayak hota hai.
7. jis lagn men panchmesh ya saptam sthan ka svami grah 6-8-12 in sthanon men se kisi sthan men ho, tab bhi vah grah ashubh fal kiya karta hai.
lagn se teji-mandi janne ki yukti: shastrakaron ne vyapar-sambandhi shubhashubh fal ke vichar ke lie saptam sthan ko mukhyata di hai aur lagn se pancham sthan ko vyapar ka labh sthan mana hai, isse nirvivad siddh hai ki vyapar-sambandhi vicharon ke lie ye hi do mukhya sthan hain. sabse pahle yah vichar karna chahie ki kaun-kaun grah pancham tatha saptam sthan ko purn drishti se dekh rahe hain aur kaun-kaun grah pancham aur saptam sthan men vidyaman hain. jis lagn men upar batlai hui riti se nishchit kiye hue kisi shubh grah ki pancham ya saptam sthan par purn drishti par rahi ho to utne samay men bajar ka bhav gir jaega.
pancham ya saptam sthan par parne vali purn drishtiyan shubh hon, aur unke shubhatva ki matra jis pariman men adhikadhik ho, usi hisab se anuman lagaiye ki is vastu ka bhav yahan tak uncha jaega aur in donon sthanon par pap grahon ki purn drishtiyon ki jitni matra hogi, tadnusar bhav gir jaega. yahi bat shubh ya pap grahon ki pancham ya saptam sthan men sthiti ke adhar par bhi vichar karke fal ka nishchay karen. t kis sektar men nivesh karen yadi apki kundli men har prakar ke shubhatva maujud hain tatha akasmik dhan prapti ke yog vartaman hain tab bhi apko un sektar ke sheyron men hi nivesh karna chahie jis sektar ko niyantrit karne vale grah apki kundli men sarvadhik bali hain. sabse pahle apke jyotishi ko apki kundli ke sarvadhik bali graha/grahon ka nirdharan karna chahie. us grah ke dvara niyantrit sektar men nivesh karne se ap atyadhik munafa kama paenge.
yadi apki kundli men brihaspati atyadhik bali hai to apko farma evan ejukeshan sektar men nivesh karne se atyadhik labh ki prapti hogi. yadi apki kundli men shukra bali ho to apko saundarya prasadhan, javahrat tatha aeto indastri men nivesh karna chahie. yadi budh bali ho to telikamyunikeshan men nivesh karen. yadi shani bali ho to metal sektar khasakar ayaran end stil, egro sektar adi men nivesh kar munafa kama sakte hain. yadi apki kundli men mangal sarvadhik bali ho to ap pavar sektar men nivesh kar munafa kama sakte hain. yadi kundli men rahu majbut sthiti men ho to aiti sektar men nivesh kar munafa kamaya ja sakta hai. surya sarkar se sanbandhit sektar ke niyantrak hain atah yadi apki kundli men surya majbut sthiti men hain to sarkari upakramon se sanbandhit sheyron men nivesh karna munafe ka sauda sabit hoga.
uparyukt varnit tathyon ke atirikt apki vartaman dasha apke hani-labh ka nirdharan karne men sahayak hai. yadi apki vartaman dasha evan antardasha shubh grahon ki chal rahi hai to is samay ka nivesh apke lie labhdayak sabit hoga. dasha, antardasha ke atirikt apni kundli par gochriya prabhavon ki samiksha karna bhi n bhulen. yadi in sabhi baton ka ankalan samagra rup se karke sheyar bajar men nivesh kiya jay to achanak dhan labh prapt kiye ja sakte hain tatha atyadhik nuksan athva ganbhir arthik sankat se bacha ja sakta hai.