vivah sanskar ke samay hi var vadhu ki mang men sindur lagata hai. mastak par jis sthan par sindur lagaya jata hai, vah sthan brahmarandhra aur adhip namak marm ke thik upar ka bhag hai. stri jatak ke sharir men yah bhag, purush ki apeksha, adhik komal hota hai. atah uski raksha ke lie shastrakaron ne sindur ka vidhan prachlit kiya. sindur men para jaisi alabhya dhatu adhik matra men hoti hai. vah stri sharirasth vaidyutik uttejna ko hi niyantran men nahin rakhta, apitu marm sthan ko bahri dushprabhavon se bhi bachata hai.
adbhud ramayan men ek katha prasiddh hai ki shri hanuman ji ne jagadjanani janki ke simant mastak men sindur laga dekh kar ashcharyapurvak pucha:”mata! apne lal dravya mastak men kyon lagaya hai ? shri janki ji ne brahmachari hanuman ki is sidhi-sadi bat par prasann ho kar kaha: ”putra! iske lagane se mere pati ki dirghayu hoti hai.“ shri hanuman ji ne yah suna, to bahut prasann hue aur vichara ki jab anguli bhar sindur lagane se svami ki ayushya vriddhi hoti hai, to fir kyon n sare sharir par ise pot kar apne svami ko ajr-amar bana dun? vaisa hi kiya hanuman ne. sanpurn sharir par sindur pot kar sabha men pahunche, to bhagvan unhen dekh itna hanse, jitna ki shayad kabhi n hanse honge.
hanuman ji ki mata janki ke vachnon se ismane aur bhi adhik vishvas hua. kaha jata hai ki us din se hanuman ji ki is udatt bhakti ke smaran men unke sharir par sindur ka chola charhaya jane laga. is kathanak se yah sahaj men hi spasht ho jata hai ki treta yug men bhi striyon ke mang (simant) men sindur lagane ka vidhan prachlit tha. striyon ke bhal pradesh men sindur ki bindi jahan saubhagya ka pradhan lakshan samjha jata hai, vahan isse saundarya bhi barh jata hai. pichle kuch dinon se gujrat, maharashtra, madras aur bangal adi deshon ki striyon ke mastak men nirantar bhal bindu saja dekh kar panjab, pashchimi yukt prant aur dehli tatha marvar prant ki striyon ne bhi mastak men nitya bindi lagana anivarya bana liya hai.