sabse pahle ap sabhi ko nav varsh ki bahut-bahut shubhkamnaen. har naya varsh jivan men nayi umang aur ummiden lekar ata hai kuch nai mahatvakankshaen to kuch adhure sapne ko pura karne ka naya mauka. prayah sabhi log navavarsh ke avasar par khushiyan manate hain. jahan ek or nae varsh pravesh ki khushi hoti hai vahin dusri taraf har kisi ko man hi man lagta hai ki is naye varsh men dhan varsha hogi ya nahin, naukri milegi ya nahin, bachchon ka svasthya aur parhai achchi chalegi ya nahin, vyapar men kuch teji hone ki ummid hai ya nahin, pati se sanbandh achche rahenge ya nahin. niji, parivarik aur samajik jivan men talmel bithane men man udher-bun men lagna shuru ho jata hai.
aie jante hain ki yah naya varsh apki lagna/rashi ke lie kaisa rahega:
mesh: is varsh ki shuruat mane guru apke pancham sthan se gochar kar rahe hain jo ki ati shubh hai isilie santan sanbandhi koi achchi khabar avashya mil sakti hai jaise bachchon ka rishta/shadi, santan prapti, santan ko achchi sehata/pad aur vyaktigat uchchastariya shiksha ke bhi achche yog prapt hone ki ummid hai. shani ke ashtam sthan par gochar ke karan karyon men adhik shram karna par sakta hai. vyavsayik jindgi achchi rahegi kintu anavashyak kharchon se bachen. hamesha jaldabaji se karya karne ki adat ko thora badlen aur puri yojna se lanbe parinamon ka andaja lagate hue nivesh karen.
vrish: yah varsh apke lie mangldayak aur khushiyon se bhara rahega. guru ka gochar pahle 6 mahine apko grihasth aur parivarik sukh pradan karega, jivnsathi se sanbandh achche rahenge, bachchon ke svasthya aur parhai, vyavsay ke lie agle 6 mahine ati uttam rahenge. apke vyavsay aur naukri men kuch rukavton ka samna karna par sakta hai. arthik drishti se yah varsh uttam rahega. shatru aur badhaen samapt hongi. apko chahie ki kisi ek vyakti ya pareshani par jyada dhyan n den aur uljhen nahin.
mithun: is varsh guru maharaj ka gochar apke lie shubhaprad hai jiske karan jivnsathi ke sath grihasth jivan anandmyi pratit ho raha hai. svasthya par vishesh dhyan den aur kharchon par niyantran bana kar chalane kyonki shani ke chathe bhav men gochar ke karan apko in choti-choti dikkaton ka samna karna par sakta hai. rishtedaron se mel-milap barhega. sal ki shuruat men achcha sthanantaran mil sakta hai. kul milakar yah varsh apke lie samanya hai.
karka: grah sthiti ke karan is sal apko svasthya par dhyan rakhne ki avashyakta hai. apko arthik rup se achcha mahsus hoga kintu jivnsathi ke sath kuch matbhed ho sakte hain jiske lie prayas karke inhen lanba khinchne se rokne ki koshish karen. ap parivarjnon se hriday se juri hoti hain isilie is varsh parivarik sanbandhon par khas dhyan den. prem prasangon ke prati adhik bhavnaon men n bahakar dimag se kam lene men hi bhalai hai. kisi par bhi ankh band karke vishvas n karen. naukri badlne ya nai naukri ke lie achche yog hain.
sinh: yah varsh apke lie ati uttam hai, santan/pautra prapti ke purn yog hain, bhagya ki bhi vriddhi saf jhalkti hai. santan aur bhagya donon pakshon par guru ki drishti se ruke hue sabhi karya banne ki purn ummid hai. chahe vah naukri ho ya vyapar ap adhik mehanat karke bahut adhik labh utha sakti hain, is varsh achcha dhanarjan hoene ke yog hain lekin shani ka gochar chaturth sthan par hone ke karan grihasth jivan aur parivarik matbhedon ka samna karna par sakta hai. apko chahie ki apne gusse par sanyam rakhen, sabko sath lekar chalen.
kanya: is sal pahle 6 mahine guru ka gochar apki kundli ke 12ven sthan par aur bad men lagna/rashi par rahega jiske chalte ap agast ke bad kafi achcha mahsus karengi. isse pahle jivnsathi ke sath madhur sanbandhon men kami rah sakti hai aur parijnon ke sath bhi nok-jhonk ki sanbhavnaen hain. santan prapti aur santan se sanbandhit anya sukh bhi agast ke bad purn hai. is varsh apko videsh jane ke avasar bhi mil sakte hain.
tula: tula lagna/rashi men janm lene ke karan ap suljhi aur santulit stri hain, yah naya varsh apke lie anukul rahega. sal ke pahle 6 mahine guru apko achche aur bad men madhyam fal denge. sath hi videsh yatraon ke achche yog hain. shuruat se hi apko arthik labh mahsus hone lagenge, santan aur parivarik sukh-shanti bhi anukul rahegi, is varsh apko apni vani aur svasthya par thora dhyan dena chahie. madhur shabdon ka prayog karen.
vrishchik: is varsh apko jivn-sathi ke sath samanjasya banakar chalna chahie. guru agast tak apke vyavsay aur karya bhav par bhraman karenge islie purn mehanat kar dhanarjan ki koshish karen. gharelu mahilaen bhi apna paisa sanbhal kar chalen aur iske bad hi nivesh karen. vaivahik jivan aur sharirik sukh ka purn anand rahega. shani ka lagna/rashi par pure sal virajman rahna apko thori chintaen pradan kar sakta hai, iske lie shani mantra ka jap karen.
dhanu: yah varsh apke lie bhagyavriddhi se praranbh ho raha hai. lagna/rashi svami guru bhagya sthan se bhraman kar rahe hain isilie yah varsh apke lie uttam aur safltapurn rahega. is varsh bhai-bahnon se achche sanbandh banae rakhne ka prayas karen. sal ke purvarddh men svasthya ati uttam rahega aur nae vishay sikhne men ruchi barhegi. vidyarthi uchch shiksha ya projekt ke lie videsh ja sakti hain. vyavsay aur dhan ke sanbandh mane agast ke bad samay jyada achcha hai. kul milakar yah varsh apke lie uttam varsh hai.
makr: yah varsh apke lie arthik rup se uttam hai. ap kharchon par niyantran rakh kar uchch koti ka dhanarjan kar sakti hain. sal ke uttararddh men svasthya bhi uttam rahega. pahle 6 mahine thora dhyan den. vaivahik aur parivarik sukh samanya rahega. shani ke shubh bhraman ke karan santan paksh se nishchintata rahegi. takniki shiksha ki or rujhan barhega. vidyarthiyon ke lie manchahe kors men pravesh ke yog hain.
kunbh: apke lagna/rashi svami shani maharaj is varsh karm bhav men sthit rahenge jiski vajah se karya aur vyavsay men kami nahin rahegi, uttam karya milenge aur ap inhen mehanat se purn bhi karne men saksham rahanegi. apko chahie ki mahatvakankshaon ko purn karne ke lie jamakar mehanat karen. ay ke achche srot banenge kintu kharchon par niyantran rakhen. grihasth jivan samanya rahega. parivarik vivadon se bachen, mitrajnon ka bharpur sukh rahega.
min: is varsh apke lagnesh/rashi svami guru 6the, 7vane sthanon se kramshah varsh ke purvarddh evan uttararddh men gochar karenge isilie agast tak apko sehat ka khas khyal rakhna chahie. shadi aur vaivahik sukh ke yog bhi agast ke bad khule hain. vivah ke lie sathi talash rahi yuvtiyon ki manokamna purn hone ki purn sanbhavnaen hain. is varsh kort kachhri se bachen aur agast ke bad nai vyaparik sajhedari men nivesh karen. nai naukri bhi uttararddh men behatar milegi. purvarddh men har or se mile-jule fal milenge kintu sal ka dusra hissa apke lie behad sukhapradayak rahega.