bhakton ki pukar sun turant vardan dene ke lie daur parne vale bhaktavatsal shiv ka nam desh ki simaon ke bahar bhi gunjayman hota hai kyonki unke bhakt asankhya hain. bhang dhature ka sevan karne, ang men bhasm ramane vale shiv ne kabhi kisi bhautik aishvarya ki chah nahin ki lekin apne bhakton ko sada sanpannata pradan ki. ghumakkar pravritti ke shiv jahan man kiya vahin chal die, kalantar men unke bhakton ne vahin unki sthapna kar di. nepal sthit pashuptinath ji ka bhavya mandir bhi shiv ke prati unke bhakton ke apratim lagav ka parinam hai. yahan varsh bhar bhakt janon ka mela laga rahta hai. shivratri ke avasar par yahan adbhut utsavi vatavaran utpann ho jata hai. lakhon ki sankhya men log yahan puja-archana karne ate hain. aisi manyata hai ki char dhamon ki yatra ke bad yadi pashuptinath ke darshan n kie jaen to yatra adhuri hi rahti hai.
pashuptinath ji ke mandir ka bahri drishya bhavya chavi pradan karta hai. mandir ki chat sone ki evan darvaje chandi ke bane hain. mandir ka shilp vinyas pagoda shaili men hai. sath men bahti bagmti nadi ki aviral dhara naisargik saundarya ke bich base is anuthe dham ko alaukik lok ka sa rup deti hai. pashupti ka arth hai- samast jivon ka ishvar, jiv ‘pashu’ hai aur uske ‘pati’ ish maheshvar hain. pashuptinath ki sthapna ke sanbandh men kai prakar ki kathaen prachlit hain. ek katha ke anusar shiv kailash par rahte-rahte jab bahut thakan mahsus karne lage to is sthan ke saundarya se abhibhut hokar apni divya shakti se ve bina kisi ko batae chupchap yahan chale ae. mata parvati ko jab shiv ke gayab hone ki bat pata chali to unhonne sabhi devtaon se mantrana ki. shiv ko khojne men sabhi devta lag gae. jab tak ve shiv ko khoj pate tab tak shiv nepal men pashupti ke nam se prasiddh ho gae the.
dusri katha ke anusar kisi karanavash shiv ne jab ek sing vale pashu ka rup dharan kar liya, to sabhi devta unhen pakrne aur sing ko tor dalne ke lie yahan tak ae aur akhirkar unka sing tor hi dala. iske bad shiv ne ling ka rup dharan kar liya. iske kuch samay bad vah ling gayab ho gaya, fir vah ek aise sthan par mila jahan ek gay apne thanon se dudh gira rahi thi. tisri katha (gopal raj vanshavli) ke anusar nepa namak gvale ki gay bahuhri roj bagmti nadi ke tat par jaya karti thi. ek din utsuktavash vah gay ka picha karta-karta us sthan par pahuncha. usne vahan ki mitti ko khodna shuru kiya to use vahan shivling mila. in katha prasangon men kitni satyata hai yah to samay ke garbh men band hai. lekin pashuptinath ki alaukik shakti pure vishva men divya mani ki tarah dedipyaman hai.
bhakti-bhavna, prem evan astha se kshan bhar men prasann ho jane vale ashutosh shiv yahan ane vale sabhi bhakton ki kamna puri karte hain. pashuptinath mahadev ling rup men nahin, manushi vigrah ke rup men virajman hain. yah vigrah katipradesh se upar ka bhag hai. murti svarnanirmit evan panchmukhi hai jismen char mukh saf dikhai dete hain. iske as-pas chandi ka jangla hai jo safai dhang se n hone ke karan kalimayukt dikhai deta hai. yahan par keval pujari hi ja sakta hai. darshanarthiyon ko jane ki anumti nahin hoti. yahan tak ki nepal naresh ka pravesh bhi yahan varjit hai. yahan lagabhag do hajar varshon se nirantar puja-archana ho rahi hai. mukhya mandir men keval hinduon ko hi pravesh ki anumti di gai hai. mandir prakritik chata se ghira hua hai. charon or pahariyan, sath men bagmti nadi. yah parisar chote-bare mandiron, stup, dutavas adi se ghira hua hai. kathmandu se gujrne vale paryatak aisi saundaryamyi sthali ki andekhi bhala kaise kar sakte hain !
is kshetra men foto lena varjit hai. yahan ke sadhu shiv ke anuyayi hain aur shiv ka anukaran karte hue ang men bhasm ramae mrigchala orhe ghumte dikhai dete hain. yadi ap unki tasvir lena chahen to hairan n hon, ve apse iske badle men paise ki mang bhi kar sakte hain. farvri-march men shivratri ke avasar par yahan pure nepal aur bharat se log saprivar ate hain. subah 7 se 10 baje aur sham ko 6 se 8 baje ka samay arti ka hota hai jo sabse vyast samay hota hai. shraddhalu log bagmti nadi men snan kar shiv ki puja archana karte hain. bagmti nadi kshetra: bagmti nadi ka mahatmya ganga nadi ki tarah hi hai. yahan shivratri, makar sankranti (14-15 janvri) bal chaturdashi (navanbr-disanbr) purnima, ekadshi evan agast ya sitanbar men ane vali tij ke avasar par snanarthiyon ka mela laga rahta hai. yahan se kuch hi duri par bahut bara maidan hai jahan kai chitaon ko ek sath jalte hue dekha ja sakta hai.
aisi manyata hai ki yahan dah-sanskar hone se jiv bar-bar janm mrityu ke fer se mukt ho jata hai. bagmti nadi ke purvi kinare se pashupti nath mandir ka drishya behad sundar dikhai deta hai. nadi ke kinare choti-choti pahariyon par yahan darjanon shivling dikhai dete hain. uttari kinare ke akhiri chabutre par shivling sthit hai jis par chathi shatabdi ki khudai hai. yahan se pashuptinath ji ke mandir ke upar laga sone ka trishul saf dikhai deta hai. bagmti nadi ke us par jakar antyeshti maidan ko par karne ke bad dakshin ki or ram mandir v ram janki mandir avasthit hain. iske age lakshmi narayan (vishnu) ka mandir hai jiske prangan men vishnu ke vahan garur ji ki pratima bani hui hai. nadi ke us par pahariyon ke upar bahut hi khubsurat jagah gorkhnath kampaleks hai jahan par bandron ka samrajya hai. gorkhnath ka mukhya mandir shikhar tavar hai. is mandir ke shirsh par gorkhnath ji ko ingit karta hua trishul hai.
iske charon or anya mandir, murtikla, shiv, nandi evan shivling bane hue hain. gorkhnath mandir ke dakshin purva men vishvarup mandir hai jo bhagvan vishnu ke sarvabhaumik svarup ka pratinidhitva karta hai. yahan par shiv-parvati ki bahut bari pratima bani hai. gorkhnath mandir se age chalte hue niche pahari ki or guhyeshvari mandir hai, jahan kali ki puja ki jati hai. kaha jata hai jab shiv mata parvati ki mrit deh ko lekar yahan ae to unka guhya pradesh ka bhag yahan gira. bagmti nadi ke pashchimi tat par kirateshvar mahadev ka mandir hai jahan purnima ke din nepali shastriya sangit ke karyakram ka ayojan hota hai. kaise jaen/khan thahren: kathmandu vayu marg se jura hai. rel se gorkhpur tak jaya ja sakta hai. vahan se sunoli, fir rikshe se sima par kar nepal ki sthaniya bas pakrni parti hai. kathmandu se pashuptinath ka 45 minat ka bas ka rasta hai. yahan se sthaniya basen, baitri se chalne vale tempo adi asani se mil jate hain. thahrne ke lie pashuptinath ke pas hi yatri nivas, dharmashalaen, hotal adi asani se upalabdh ho jate hain.