bhagvan shankar aur parvati ji ke putra shri ganesh ko ganpti, vinayak, lanbodar, vakratund, mahodar, ekdant tatha gajanan adi anek namon se sanbodhit kiya jata hai. sabhi devtaon men sarvapratham pujya shri ganesh sabhi siddhiyon ke pradata aur vighn vinashak hain. isilie hindu dharm men pratyek karya shuru karte samay saflta pane ke lie ganesh bhagvan ki puja ki jati hai.
buddhi ke vishesh pratinidhi hone se ganpti ka mahatva kafi barh jata hai. vibhinn dharmik kshetron men ganpti ke vishay men vistrit varnan kiya gaya hai. tantrashastron men bhi inki mahima ka varnan hai. inmen ganesh sadhna dvara anek prayog bataye gaye hain, jo upyogi hain.
sanatan sanskriti ke anuyayi bina ganesh pujan kiye koi shubh v manglik karya aranbh nahin karte. nishchit hi vah ati vishisht hi hoga jisne taintis karor devtaon men pratham sthan prapt kiya hai.
ganesh mahatmya : tripurasur ke vadh ke lie jiski svayan mahesh yani bhagvan shiv karte hain, mahishasur ke nash ke lie jiski tapasya svayan adi shakti bhagvti karti hain, vah ganadhyaksh vinayak koi bhi karya sanpadan ka ek matra adhishthata hoga hi. prabhu shri vishnu, ramavtar men vivah prasang ke samay bare manobhav se bhagvan ganesh ki puja karte hain to mata parvati evan baba bhole nath ne bhi apne vivah se pahle shri ganesh ki sarvapratham puja-archana ki. manav men sat chakra hote hain jismen sabse pratham hai- muladhar chakra. is muladhar chakra ko bhi ganesh chakra ke nam se khayati prapt hai.
muladhar chakra ko shakti v gyan ki gati ka adhishthan bataya gaya hai. aisa hi vilakshan darshan ganesh ke charitra se prapt hota hai. islie anant koti brahmand nayak paranbrahm, asadharan pratibhavan yah ganpti hi hain, vishnu mahakaitabh ke sanhar aur brahma srishti ke karya siddhi lie ganesh upasna yun hi nahin karte. vastutah prachin upasna kram men panch devopasna ka nirdesh milta hai. is upasna bhed men bhi shri ganesh ko apna sthan prapt hua hai.
aisa kaun sa vishay hai jahan shri ganesh ki koi bhumika n rahi ho. vidhi ka vidhan ke sandarbh men jo charcha ham aur ap karte hain uske nirdeshak pratirup bhagvan ganpti hi hain. atah kuch dene men yadi koi samarthyavan hai to vah ganpti hi hai. atah yahan ganesh sadhna ke anek prayog bataye ja rahe hain jo jivnopyogi hain.
1. pratahkal ganesh ji ko shvet durva arpit karke ghar se bahar jayen. isse apko karyon men koi badha utpann nahin hogi.
2. ghar ke mukhay dvar ke upar ganesh ji ka chitra ya pratima is prakar lagaen ki unka munh ghar ke bhitar ki or rahe. isse dhan labh hoga.
3. ganpti ko durva aur motichur ke laddu ka bhog lagakar shri lakshmi ke chitra ke samne shuddh ghi ka dipak jalaen kabhi dhanabhav nahin hoga.
4. dukan ya vvavsay sthal ke udghatan ke samay chandi ki ek katori men dhaniya dalakar usmen chandi ke lakshmi ganesh ki murti rakh den. fir is katori ko purva disha men sthapit karen. dukan kholte hi panch agarabatti se pujan karne se vyavsay men unnati hoti hai.
5. nitya shri ganesh ji ki puja karke unke mantra 'shri gan ganptye namah' ka jap karne se sabhi prakar ki pariksha men saflta prapt hoti hai.
6. chatron ko jo vishay kathin lagta ho us vishay ki pustak men ganesh ji ka chitra tatha durva rakhne se vah vishay saral lagne lagega.
7. budhvar ka vrat rakhakar budh stotra ka path karne se, ganesh ji ko mung ke laddu charhane se ajivika ki prapti shighra hoti hai.
8. ravivar ke din pushya nakshatra men shvet ak ki jar lakar usse shri ganesh ji ki pratima banayen. fir us par sindur aur deshi ghi ke mishran ka lep karke ek janeu pahnakar puja ghar men sthapit kar den. tatpashchat iske samaksh shri ganesh mantra ki 11 mala ka jap karen. arthik sthiti sudrirh hogi.
9. budhvar ke din shri ganesh ka pujan karke gay ko ghas khilane se sas ke prati bahu ka katu vyavhar dur hota hai.
10. budhvar ke din shri ganesh sadhna karne se budh grah ke dosh dur hote hain.
11. ganesh chaturthi ke din se shri ganesh stotra ka path shuru karke bhagvan se prarthana karne par pita-putra ke sanbandhon men madhurta ati hai.
12. ek supari par mauli lapetakar use ganpti ke rup men sthapit kar tatpashchat uska pujan karke ghar se bahar jayen. karyon men saflta prapt hogi.
13. bhagvan ganesh ko nitya pratahkal laddu ka bhog lagane se dhan labh ka marg prashast hota hai.
14. bhagvan ganpti ji ko besan ke laddu ka bhog lagakar vyavsay sthal par jayen aur koi mitha fal kisi mandir men charhaen. isse dhan-dhanya v sukh-samriddhi ki prapti hogi.
15. dhanteras se dipavli tak lagatar tin din sayankal shri ganesh stotra ka path karke gay ko hara chara (sabji-sag adi) khilayen. badhayen -rukavten dur hongi.
16. pariksha dene se purva shri ganesh mantra ka 108 bar jap karen aur ganpti ko safed durva charhayen. pariksha men nishchay hi saflta milegi.
17. ghar men ganesh ji ke pratima ke samne nitya pujan karne se dhan man aur sukh ki prapti hoti hai.
18. pratah kal ganpti ji mantra ka 21 dinon men sava lakh bar jap karne se sabhi manokamna purn hongi. isilie ganapatya'tharvashirsh men kaha gaya hai ki shri ganesh bhagvan ap hi brahma, vishnu, shiv ho. ap hi agni, vayu, surya, chandra ho. samast devta, panchatatva, navagrah adi sab kuch apka svarup hain. ganesh puran men varnit ganeshashtak ko siddhi pradayak kaha gaya hai. nishchit hi riddhi-siddhi ki sahjta se upalabdhi ganesh tatva se hi sanbhav hai. riiddhi-siddhi ki prapti kamnapurti, sanktnash, prem prapti, madhur danpatya jivan, vighnanash, arogya adi koi bhi aisi kamna nahin hai jo ki ganeshkripa se purn n ho.