parmyog: maharshi parashar ke shastra ki yah ek visheshta hai ki ismen sarvatra ‘dharma’ (gun-dharma) ke bhed se ‘dharmon’ men bhed mana gaya hai. islie ek hi grah ya bhav ke vividh gun-dharm ke adhar par usmen bhed kiya jata hai. yah bhed islie bhi avashyak hai ki iske bina n to faladesh ki jatiltaon ko suljhaya ja sakta hai aur n hi vilakshan gati se chalne vale jivan ke ghatnachakra ki shastrasammat vyakhya ki ja sakti hai.
jo grah kendresh hai vahi trikonesh ho jae to ek hi grah kendra evan trikon ka svami ho jata hai. is sthiti men ek hi grah men kendreshatva evan trikoneshatva sath-sath evan sadaiv rahte hain. jis prakar kendra evan trikon ke svami sath-sath rahne se yuti sanbandh ke prabhavavash yogkarak ho jate hain, thik usi prakar ek hi grah ke kendresh evan trikonesh hone par usmen kendreshatva evan trikoneshatva ki yuti sadaiv evan nirantar rahti hai. islie aisa ek hi grah yogkarak mana jata hai.
(1) aise grah ki ek pramukh visheshta yah hai ki vah kabhi bhi n to ‘itr’ bhav ka svami ho sakta hai aur n hi doshyukt ho sakta hai. islie vah anuchched 35 ke anusar vishesh faldayak kahlata hai. parinamtah ek hi grah ke kendresh aur trikonesh hone par use shuddh yogkarak evan svayankarak kahte hain. ‘itr’ bhav ka svami ya doshyukt n hone se use shuddh tatha kendra evan trikon ka svami hone se use svayankarak kahte hain. is prakar vrish evan tula lagn men shani, kark evan sinh lagn men mangal tatha makar evan kunbh lagn men shukra kendra evan trikon ka svami hone ke karan svayanyogkarak hote hain. svayanyogkarak grah se anya trikonesh ka sanbandh ho jae to isse achcha kaun sa yog ho sakta hai?’’
(2) tatparya yah hai ki yogkarak grah svabhavtah vishesh shubh faldayak hota hai aur uska dusre shubhfldayak trikonesh se sanbandh ho jae to shubhatva utkarsh par pahunch jata hai. atah svatah yogkarak grah ke sath dusre trikonesh ka sanbadh hona sarvottam rajyog hota hai. ekatva ka abhipray: laghuparashri ke kuch tikakaron
(3) ne kendra trikonadhipyorekattve yogkarkau’’- yah path man kar is shlok ka yah arth kiya hai ki kendresh ka ek trikonesh se sanbandh hona yogkarak hai. uska dusre trikonesh se sanbandh ho to kya bat hai ! kintu ‘‘kendratrikonadhipyorekattve’’ iska arth - ‘‘y evan kendradhishah s evan trikonadhish iti kendratrikonadhipyorekatvam-arthat jo grah kendresh hai vahin trikonesh ho tab kendresh evan trikonesh men ekta hoti hai. yahan ‘yogkarkau’ yah dvivchnant path kuch kathinaiyan ya bhranti utpann karta hai.
iske sthan par ‘yogkarita’ path svikar kar liya jae to kisi prakar ki kathinai ya bhranti ke lie avasar nahin rahta. atah ‘kendratrikonadhipyorekatve yogkarita’- yah path mulparashri evan laghuparashri ke anukul hai aur iska artha-kendra evan trikon ka svami ek grah hone par vah yogkarak hota hai,’ bahusammat hai. ek kendresh ke trikonesh se sanbandh hone par ve yogkarak hote hain aur unka anya trikonesh se sanbandh ho to ve shreshthatar fal dete hain. yah sarvottam yog vrish, tula, kark, sinh, makar evan kunbh in chah lagnon men banta hai. inmen se kark lagn men svatah yogkarak mangal se guru ka sanbandh hona tatha sinh lagn men svatah yogkarak mangal ka guru se sanbandh hona avashyak hai. kintu kark lagn men guru shashthesh tatha sinh lagn men guru ashtamesh hai.
isi prakar makar lagn men svatah yogkarak shukra ka budh se sanbandh ho tatha kunbh lagn men svatah yogkarak shukra ka budh se sanbandh hona anivarya hai. kintu makar lagn men budh shashthesh tatha kunbh lagn men vah ashtamesh hota hai. yahan yah svabhavik shanka utpann hoti hai ki is sarvottam yog men dusre trikonesh ke shashtesh ya ashtamesh hone par kya vah yog sarvottam rahega? is vishay men mulparashri evan laghuparashri ka spasht mat yah lagta hai ki is yog men ek kendresh tatha do trikonon ke sanbandh ke karan itni shubhta hai
ki dusre trikonesh ka shashthesh ya ashtamesh hona use nasht nahin kar sakta. yadi ek kendresh evan do trikoneshon ka sanbandh sarvottam yog banata hai to kya do kendresh evan ek trikonesh ka sanbandh ek kendradhipti ke sanbandh ki apeksha prabal nahin hoga? aur yadi vah kendradhipti lagnesh ho to vah yog adhik prabal hona hi chahie jaise mithun ya kanya lagn men budh ka shukra ke sath sanbandh tatha dhanu ya min lagn men guru ke sath mangal ka sanbandh.
karak grahon men uttamata ka taratamyah
1. ek kendresh ka ek trikonesh se sanbandh.
2. do kendreshon ka ek trikoneshon se sanbandh.
3. ek kendresh ka do trikoneshon se sanbandh.
4. do kendreshon ka do trikoneshen se sanbandh.
5. tin kendreshon ka do trikoneshon se sanbandh.
6. charon kendreshon ka do trikoneshon se sanbandh.
is prakar yadi charon kendreshon aur donon trikoneshon ka paraspar sanbandh ho to yah parashar shastra ke anusar karakatva yog ka sabse anutha evan uttam udaharan hoga. vividh lagnon men svatah yogkarak evan anya trikoneshon ki talika upar prastut hai.
kundli sankhya 1 men svatah yogkarak shani ka budh ke sath yuti sanbandh param yogi banta hai.
kundli sankhya 2 men svatah yogkarak mangal ki navmesh guru se yuti tatha lagnesh chandrama se drishti sanbandh hai. yahan do kendreshon (lagnesh evan dashmesh) ka do trikoneshon (panchmesh evan navmesh) ke sath sanbandh aur bhi achcha yog banata hai. yah kundli ek aise vyakti ki hai jo sadharan kisan ke parivar men janm lekar bharat ka pradhanmantri bana.
kundli sankhya 3 aisi mahila ki hai jo uchcha-madhyam parivar men utpann hokar bharat ke pradhanmantri ki putravdhu aur bad men kendriya mantri bani. inki kundli men svatah yogkarak mangal ka navmesh guru ke sath drishti sanbandh hai.
kundli sankhya 4 ek aise vyakti ki hai jo sadharan parivar men janm lekar kendriya mantri bana tatha apne nirvachan kshetra men kai bar rikard maton se vijyi hua. inki kundli men do kendresh (lagnesh evan dashmesh) budh ka do trikonesh shani evan shukra ke sath yuti sanbandh hai.
kundli sankhya 5 rus ki us mahan hasti ki hai jo sadharan parivar men janm lekar desh ka pradhanmantri bana aur vishva shanti ke lie nobl-puraskar se sammanit kiya gaya. inki kundli men tin kendresh dashmesh, lagnesh evan chaturthesh ka panchmesh mangal ke sath parasparik sanbandh hai.