kedarnath: parvat shila ke rup men puje jate hain shiv yahan per, pahar, pani! charon or hariyali, prakritik saundarya ka apratim najara. jahan bhi dekhen ankhen vahin thahar jaen. prakritik saundarya ke isi rup ka nam hai, uttaranchal. parantu in durgam pahariyon par pahunchna bhi koi asan kam nahin. aise hi sthal kedarnath men raman karte hain devon ke dev mahadev shiv. prastut hai usi kedarnath sthali ka chitra ukerta alekh. parvatiya pradesh devbhumi uttaranchal ke kror men base barah jyotirlingon men se ek pramukh jyotirling kedarnath ka bhavya saundarya dekhte hi banta hai. charon or himachchadit pahariyan, shital mand bahti bayar aur udit hote surya ki sunhri rashmiyan pure vatavaran ko naisargik anand se bhar deti hain. prakriti ke is apratim najare ko jo dekhe vahi apna astitva vismrit kar de. yah manohar pavan sthal desh-videsh ke yatriyon ke lie mukhya akarshan ka kanedra hai.
yahan ane vale log badrinath yamunotri, gangotri v gomukh ki yatra karne ka lobh bhi sanvaran nahin kar pate. kedarnath garhval ke uttarakashi jile men samudra tal se 3783 mitar ki unchai par sthit hai, jo chin ki sima se laga hua hai. kedarnath ka mandir lagabhag 1000 sal purana bataya jata hai. mandir ka nirman vishal shilaon se kiya gaya hai, jinhen dekhakar hairani hoti hai ki itni bari-bari shilaon ko kaise uthaya gaya hoga. mandir men ek garbhagrih nirmit hai, jahan shraddhalu puja-archana karte hain. garbhagrih ke bhitar vrishabh ke prishth bhag ke akar ke rup men bhagvan shiv virajman hain. yah svayanbhu jyotirling hai jise kisi manav ne nahin banaya balki yah prakritik rup se bana hua hai. parvat ke trikonakar rup men shiv ki puja sanbhvtya anya kahin nahin hoti hogi. mandir ke prangan men khari ek vishalkay nandi bail ki pratimurti shiv mandir ki pahredari karti pratit hoti hai.
shiv ki chamatkarik shaktiyan har jagah apna prabhav chorti hain. kedarnath ke udbhav ke bare men bhi kuch aisi hi katha prachlit hai. kaha jata hai ki jab pandav kurukshetra ke yuddh men apne sanbandhiyon ke apne hathon mare jane ka pashchatap karne yahan ae to shiv ke man men pandvon se chal karne ki sujhi, ve kedarnath men bail ke rup men rahne lage. lekin bhim ne pashuon ke jhanud ke bich shiv ko pahchan liya. shaktishali bhim ne shiv ko pakrna chaha lekin bail rupi shiv dharti men dhans gae, bhim ke hath men keval vrishabh ki punch hi a pai. yah sthan ‘mukhya kedar’ ke rup men prasiddh hai. vrishabh rupi shiv ke sharir ke baki bhag garhval men tungnath, madhyamheshvar, kalpeshvar aur rudranath men avasthit hanai. in panchon sthalon ki puja panch kedar ke rup men hoti hai. yahan panchon pandvon, shiv-parvati, vishnu lakshmi evan narad ke mandir bhi hain. sardiyon men kedarnath men bahut barf girne ke karan kedarnath ki chal murti ko ukhimath men laya jata hai. pure shitkal men unki puja-archana yahin hoti hai. kaha jata hai ki kedarnath ke mandir ka jirnoddhar adi guru shankracharya ne karaya. vartaman mandir shankracharya ka banaya hua hai. anya darshaniya sthala: shankracharya samadhi mandir ke prishth bhag men mandakini nadi ke tat par hi adi guru ne samadhi li thi. yahan shankracharya ka chota sa mandir aur unke dvara pujit shivling avasthit hai.
yah sthan naisargik saundarya se bharpur hai. chorabari tal: kedarnath se 2 kimi ki duri par yah ek chota sa khubsurat sarovar hai. sarovar ke upar nav ki tarah tairti barf dekhne valon ko mantramugdh kar deti hai. kaha jata hai ki yudhishthir ne isi sthan se svarg ke lie prasthan kiya tha. vasuki tal: kedarnath se lagabhag 8 kimi ki duri par yah ek atyant ramnik sthal hai. iski unchai samudra tal se 4,135 mitar hai. yahan jane ka marg bahut kathin hai, raste men koi vishram sthal bhi nahin hai. gauri kund: yahan do kund hain - ek garm pani ka dusra thande pani ka. shital kund ko amrit kund kaha jata hai. kahte hain, mata parvati ne isi men pratham snan kiya tha. gauri kund ka jal paryapt ushn hai. mata parvati ka janm yahin hua tha. yahan parvati ka mandir hai, yahan se kedarnath lagabhag 14 kimihai. somaprayag: yahan som nadi mandakini men milti hai. yahan se pul par chinnamastak ganpti hanai. triyugi narayn: som prayag se 5 kilomitar ki duri par sthit is parvat shikhar par narayan bhagvan ka mandir hai. yahan bhagvan narayan bhudevi tatha lakshmi devi ke sath virajman hain.
yahan ek sarasvati ganga ki dhara bhi hai jisse char kund banae gae hain- brahm kund, rudrakund, vishnu kund aur sarasvati kund. rudrakund men snan, vishnu kund men marjan, brahmakund men achaman aur sarasvati kund men tarpan hota hai. kahte hain ki isi sthal par shiv parvati ka vivah sanpann hua tha. unke vivah ki sakshi agni aj bhi akhand dhuni ke rup men mandir ke prangan men prajvalit rahti hai. triyugi narayan ka marg kathin charhai ka hai. yahan jahrili makkhiyon ke upadrav ka bhi samna karna parta hai. shakanbhri devi: jo log triyuginarayan jate hain, unhen lagabhag do mil ki charhai ke bad shakanbhri devi ka mandir milta hai. inhen mansa devi bhi kahte hain. devi ko chir charhaya jata hai. gupt kashi: yahan ardhanarishvar shiv ki nandi par arurh sundar murti hai aur kashi vishvanath ki ling murti bhi hai. yahan ek kund men do dharaen milti hain jinhen ganga-yamuna kahte hain. prachin kal men rishiyon ne bhagvan shankar ki prapti ke lie yahin tap kiya tha. yahan yatri snan karke gupt dan karte hain. yahan dakbangla v kshetra ki dharmashala bhi hai. avashyak baten: pahari kshetra men yatra karne ke lie avashyak jute, suti-uni kapre, barsati kot, imli, aushdhiyan, tarch, lalten, momabatti, sui dhaga, vaislin adi sath rakhen. chalte-chalte jharne ka jal sidhe n pikar bartan men thori der rakh kar pien, taki usmen sthit ret ya anya padarth niche baith jaen.
rishikesh se bichchu ghas (jhunjhuniya) milne lagti hai, uske sparsh se bachna chahie. kedarnath marg men jahrili makkhiyan hoti hain jinke katne par khujli aur khujlane par fore ho jate hain, islie pure sharir ko dhakne vale kapre pahnne chahie. kedarnath marg par kai logon ko ek pahari ful ki gandh bhi lagne lagti hai jisse prayah chakkar bhi a jate hain. khatta adi khane se iska asar kam ho jata hai. basi ya garishth bhojan nahin karna chahie. shital jal men adhik der snan nahin karna chahie. yatra pratah se 11 baje tak aur sham ko 3 baje ke bad suryast tak karni chahie. itna adhik nahin chalen ki thakan ho jae aur tabiyat kharab ho jae. kab jaen/kaise jaen: kedarnath jane ka sabse uttam samay mai se aktubar ke bich rahta hai. nikatatam havai adde jauli grant, dehradun aur relve steshan rishikesh evan kotadvar hain. sarak marg se gauri kund tak desh ke pramukh pahari steshnon se gariyan jati hain.