prashna: kya vastu dvara bhagya badla ja sakta hai?
uttara: vastu dvara kadapi apna bhagya nahin badal sakte. lekin ishvar ne manushya ko karmashil banaya hai evan karm karne se vah apne duahkhon ko kam avashya kar sakta hai. isi prakar vastu dosh nivaran dvara apne duahkh avashya kam kiye ja sakte hain. lekin purnataya dosh nivaran ho jae, yah mumkin nahin.
prashna: yadi ghar men bimari hai, to kya vastu dosh nivaran dvara bimari ko dur bhagaya ja sakta hai?
uttara: kuch bimariyan vastu doshajanya hoti hain. unko vastu dosh nivaran dvara thik kiya ja sakta hai, ya unmen kami layi ja sakti hai, jaise dama, ghutnon men dard evan khansi adi. lekin kuch rogon ka karan sharir ki kshamata, ya kundli hi hoti hai. aise rogon ko vastu dosh dvara thik nahin kiya ja sakta.
prashna: kya vastu dvara ghar ki daridrata dur ki ja sakti hai?
uttara: yadi daridrata vastu doshon ke karan hai, to yah avashya thik ki ja sakti hai, jaise ghar men kalah ho, to lakshmi nahin tikti. lekin kabhi-kabhi daridrata bhagya men hi, arthat janmakundli men hi vidyaman hoti hai. use vastu dvara dur nahin kiya ja sakta.
prashna: kiraye ke ghar men bhi kya vastu ki pransgikta hoti hai?
uttara: ghar kiraye ka ho, ya apna aur keval asthayi rup se usmen rah rahe hon, jaise hotal ityadi men, har jagah vastu purn rup se prasangik hota hai. jis prakar se kisi nav men ja rahe hon aur nav men surakh ho jae,to avashya hi dub jaenge, chahe vah nav apni ho, ya kiraye ki, ya fir keval usmen yatra kar rahe hon.
prashna: jivan par desh ya shahar ke vastu ka adhik prabhav hota hai, ya ghar ke vastu ka?
uttara: desh aur shahar ka vastu ghar ke vastu se upar hota hai. jis prakar havai jahaj se ja rahe hon aur havai jahaj kharab ho jae, to jivan bhi havai jahaj ke sath nasht ho jaega, usi prakar se yadi desh men yuddh hota hai, ya desh unnati karta hai, to uske sabhi nagrikon par uska asar parta hai. lekin fir bhi apne ghar ka vastu desh ke vastu ke ausatan vastu fal se upar, ya niche le ja sakta hai. desh ka vastu thik nahin kar sakte, lekin ghar ka vastu thik kar ke apne ap ko samriddhishali avashya bana sakte hain.
prashna: yadi ghar men vastu dosh hai, to kya bina tore-fore vastu dvara dosh ka nivaran ho sakta hai?
uttara: vastu ke kuch dosh aise hote hain, jo bina aepreshan kiye, arthat tore-fore thik nahin ho sakte. lekin kuch doshon men, bina tore-fore bhi, alpata layi ja sakti hai, jaise shauchalay ka ishan men hona, ya rasoi ghar ka agney men nahin hona. in doshon ko upay dvara thik kiya ja sakta hai. lekin yadi ghar ka dalan ulta ho, ya nairritya men kuna ho, to upay purn rup se karagar nahin hote.
prashna: am manushya kaise jane ki ghar vastu ke anukul hai, ya nahin?
uttara: yadi kisi sthan men pravesh karne se pahle ya vartaman avas men saj-sajja, ya kam karvane se pahle karobar thik chalta tha, ya shanti rahti thi aur keval sthan parivartan ke bad karobar niche gir raha ho, ya ghar men shanti nahin rahti ho, jabki purn lagan aur kshamata se karya kar rahe hon, to iska tatparya hai ki sthan men vastu dosh hai. apni janmakundli se bhi jan sakte hain ki grah anukul hain, ya nahin. yadi grah anukul hone par bhi saflta nahin mil rahi hai, to apne ghar ka vastu kisi vastu shastri se avashya thik karvaen.
prashna: yadi ghar men vastu dosh hai aur jivan bhi purnatah sukhi aur shant hai, to kya tabbhi vastu dosh ka nivaran karna chahie?
uttara: kai bar yadi grah sthiti anukul hoti hai, to vastu dosh mahsus nahin hota hai. lekin jab grah sthiti badlti hai, to vastu dosh prabhavi ho jata hai. yah isi prakar se hai, jaise kisi bari nav men yadi ched ho, to avashyak nahin ki dub jaenge. lekin yadi bahut samay tak usi nav men baith kar yatra karte rahane, to ek samay aisa aega ki nav dub jaegi.
prashna: feng sui aur vastu ke niyamon men bhinnata hai. kiski manen?
uttara: feng sui ka mul chin men hone ke karan iske niyam vastu ke niyamon se bhinn hain, jo vahan ki sthiti ke anusar thik hain. donon ko mila kar upay karna thik nahin hai. bharat men bhartiya vastu niyam hi purn rup se lagu hote hanai.
prashna: kya feng sui ke upayon se vastu dosh nivaran ho sakta hai?
uttara: feng sui ke upay khushi ka manmohak vatavaran paida karte hain. yahi vastu ka bhi mul siddhant hai. atah feng sui ke upay vastu dosh dur karne men saksham hain.
prashna: vastu dosh nivaran yantra ka kya mahatva hai?
uttara: vastu dosh nivaran yantra sthapit karne se chote-chote vastu doshon ka nivaran avashyak nahin rah jata evan dhanatmak urja ka srijan hota hai.
prashna: vastu men piramid shakti ka kya mahatva hai?
uttara: piramid dvara dhanatmak urja ko kendrit kar liya jata hain. atah piramid ka upyog kai prakar ke vastu doshon ko dur karta hai.
prashna: kya divaron ka rang badlne se vastu dosh ka nivaran hota hai?
uttara: vastu men rangon ka bahut mahatva hai. har disha ka apna svami evan rang hai. yadi dishanusar divaron par rang karate hain, to ve kai prakar ke vastu doshon ko dur karte hain.
prashna: vastu ke anurup sajja karne se kya vastu dosh nivaran ho sakta hai?
uttara: vastu ka sahi arth men yahi upyog hai ki sthan men akarshan ho evan vayu mandal shuddh ho. atah koi bhi sajja vastu ke anurup hogi, to avashya achchi lagegi, ya koi bhi sajja yadi manmohak lagti hai, to vah avashya vastu ke anurup hogi.
prashna: vastu shastri ko bulaye bina kya apne ghar ka vastu khud thik kar sakte hain?
uttara: pustakon se parh kar kuch had tak vastu dosh nivaran kar sakte hain. lekin kai bar kuch mahatvapurn vishay chut jate hain, ya kuch anavashyak vishyon par adhik sochte rahte hain. atah ek gyani vastu shastri se paramarsh karna avashya hi uchit rahta hai.