muhurt gyan vaise to pratyek pal agle pal ka suchak hai lekin vyavharikta ki drishti se dekha jay to dainik karyon ke lie jaise karyalay jana ya ghar ana ityadi ke lie muhurt ganna nahin karni chahie lekin jo karya ham kabhi-kabhi karte hain aur jinka jivan par vishesh prabhav parta hai unka muhurt ka gyan karne se karya men saflta prapt hoti hai? aur jivan sukhamay banta hai. vastutah muhurt ka arth do ghati arthat 48 minat hota hai. lekin muhurt ka arth hai vah kshan jab grahon ki sthiti hamare kisi karya ki saflta sunishchit karti hai. muhurt nikalne men sarvapratham ham us karya ke lie safal samay ki ganna karte hain. taduprant vyakti-vishesh ke lie us samay ki shubhta ka avlokan karte hain.
muhurt men mukhytah surya evan chandrama hi bhumika nibhate hain. tithi, var, nakshatra, karan, yog dvara panchang shuddhi karke lagn shuddhi dvara kal-nirdharan karte hain. kahte hain, kisi vyakti ka bhagya, ayu v sanpatti ka nirdharan uske janm samay par hi ho jata hai. balak ka janm bhi uske jivan ka muhurt kal hi hai jo ki uske janm ke utar-charhav ko purn rup se darshata hai. isi prakar kisi bhi vishesh kriya ka muhurt us kriya ke bhavishya ka gyan karata hai, jaise shadi kis samay hogi. muhurt vaivahik jivan ka purva gyan karata hai. isi tarah grih pravesh ka muhurt kal ane vale samay men us ghar men sukh shanti ka abhas karata hai.
yahi siddhant muhurt ki avashyakta ka mul hai kyonki kisi karya ke shubhashubh ka gyan muhurt dvara hota hai atah sahi muhurt ka chayan karke ham karya-vishesh ko apne anukul banane ka prayas karte hain. jyotish ke mukhytah tin bhag hain -
1. siddhant
2. sanhita
3. hora.
hora jyotish men jatak ki kundli ke bare men vivechan kiya jata hai. sinddhant men grah gochar ganna, kal ganna v saur-chandra mason ka pratipadan kiya jata hai. sanhita jyotish men melapak, muhurt ganna, grahon ke udyast ka vichar aur grah vivechan adi ka samavesh hota hai. is prakar muhurt sanhita jyotish ka ek bhag hai. muhurt ganna ke lie nilakanth ke anuj, ramdevagya ki kriti muhurt chintamni pramukh granth hai aur sarvapratham nilakanth ke putra shrigovind ne muhurt chintamni par piyushdhara namak suprasiddh vyakhya likhi.
muhurt ka nirnay nimn prakar se kiya jata hai-
1. jatak se abhisht karya ke bare men tatha sanbhavit avdhi ke bare men puchen ki kis mahina, var adi men karya karna chahte hain.
2. us karya ke lie kaun se mah shuddh hain, unka chayan karen.
3. yadi vivah adi ka muhurt nikalna hai to surya bal ke lie bhi mah ka chayan kiya ja sakta hai.
4. grah bal, shukra athva guru ast v holashtak tatha pitri paksh adi ka nirnay karke mas ki shuddhi kar leni chahie.
5. nakshatra, tithi, var, yog v karan dekh kar panchang shuddhi karni chahie aur is prakar shuddh dinon ki ganna karni chahie.
6. chandrama ki ganna karke chandra bal nirdharit kar len arthat chandrama yadi jatak ke janm kalin chandrama se 4, 8, 12 bhav men ho to un tithiyon ko chor dena chahie. is prakar hamen shuddh muhurt ki tithiyan prapt ho jayengi.
7. ab ye tithiyan jatak ko batakar in tithiyon men se karya ke lie kinhin do, tin tithiyon ka chayan kar lena chahie.
8. in shuddh tithiyon men lagn shuddhi karke shuddh muhurt kal ganna karni chahie. yadi jatak ke pas karya ke lie mahinon ka samay nahin hai to keval panchang shuddhi karke lagn shuddhi kar leni chahie.
yadi itna bhi samay nahin hai to keval lagn shuddhi karke aur ho sake to sath men shubh hora ya chaughriya ke adhar par muhurt nirdharit karne ka vidhan hai. muhurt ke bare men ek aur manyata hai ki karyon ko karne men jab man men utsah ho to vah karya siddh hota hai. dusra lagn ka prabhav grahon se adhik dekha gaya hai. atah yadi lagn shuddhi ho to vah muhurt anya shubh tithi se adhik balvan mana jata hai. atah koi bhi karya karne ke lie yadi koi shubh tithi nahin mil pa rahi ho to keval lagn shuddhi karke kisi bhi muhurt ki ganna ki ja sakti hai. muhurt men abhijit muhurt ka bhi vishesh mahatva mana gaya hai. abhijit muhurt ya to madhya ratri men ya madhya divas men 24 minat purva se lekar 24 minat bad tak rahta hai. kahte hain ki abhijit muhurt men kiye gaye karya avashya safal hote hain. atah abhijit muhurt ko bhi samyabhav men upyog men laya ja sakta hai. jyotishacharyon ke lie muhurt ki ganna unhen ekamat hone ka sthan pradan karti hai. faladesh men akasar matbhed rahte hain v upayon men usse bhi jyada matbhed hote hain kyonki aksar upay grahon se nirdeshit vastuon ke adhar par karaye jate hain.
atah koi kisi ek vastu ko dharan karne ka nirdesh deta hai to koi unke visarjan ke lie, koi unke mantron ke uchcharan ki bat karta hai to koi un vastuon ke dan ki bat karta hai. atah sarvada se vibhinn jyotishiyon ke mat alg-alag hi prapt hote hain lekin muhurt ganna ka adhar ek hone ke karan ek hi muhurt sabhi vidvanon dvara bataya jata hai jo ki janta ka jyotish men vishvas prakat karta hai. muhurt ek aisa vishay hai jis par rishiyon ne to bahut kuch likha hai lekin us ganna ka kya adhar hai, is bare men charcha nahin milti. atah muhurt vaigyanik n hokar keval hamari astha rup men rah gaya hai.
jaise ham shadi ke muhurt ki ganna karte hain aur koi shubh tarikh nikalte hain to hamen nahin pata hota ki yadi ham us kal men shadi karen to kya labh hoga aur nahin karen to kya hani hogi. lekin anekanek jyotishiyon ne muhurt ki shubhta ka ahsas kiya hai v bina muhurt ke karya karne par nishfalata dekhi hai. atah muhurt ka upyog karke jivan men upyog kar jivan ko adhik sukhamay banane ka prayas hamen avashya karna chahie.