samanya vaidik jyotish tatha lalkitab ke falit kathan men antar hone ka mul karan unki bhav tatha rashi se sanbandhit bhinn drishti men nihit hai. samasya nivaran ke lie bhi donon bhinn prakar ke upay batate hain. aiye, janen lal kitab men panchva ghar tatha guru sanbandhi upyogi siddhant evan upay adi ke bare men
lal kitab men panchven ghar ko putra tatha anya santan, mantrana shakti, lekhan kala, pet, isht dev, uhapoh- shakti, bhavishya, satta, sinema, mauj-masti, premika, dil, bare bhai ki patni, bari bahan ka pati, patni ke bare bahn-bhai, daulat aur nasib adi ka vichar bhi isi ghar ke dvara hota hai. pramukhtya panchven ghar ko aulad ka pratibimb mana gaya hai.
- panchven ghar men nek surya aulad ki vriddhi karta hai. vahin mande ya bad surya ke karan santan ki hani hoti hai. aise men bandron ko gur khilane se surya prabal hota hai. iske atirikt chintiyon ko sat anaj paraspar milakar pisakar dalne chahie. ag jalakar use dudh se bujhana chahie.
- panchven ghar men chandrama apna jahr-ugal raha ho arthat ashubh prabhav dal raha ho to apni charpai ke charon payon men tanbe ki kil garne se chandrama ka nek asar milta hai. chandrama ko anukul banane ke lie gur ko bhumi men dabana chahie. is prakar upay karne se santan sukh milta hai. yadi santan ko kasht ho raha ho to bhi upyukt upay karne se anukulta milti hai.
- panchven ghar men bad mangal ke prabhav ke karan santan par bura asar par raha ho to santan sukh ke lie bhikhariyon ko gur ka dan karen. bachche ke janm par mithai ke sthan par namkin banten.
- budh panchven ghar men sthit hokar santan ke sukh men badha utpann kar raha ho to aise vyakti ko apni nak chidvakar chandi ka challa nak men pahnna chahie. ghar men pavitra jal bharakar puja ghar men rakhna chahie.
- guru panchven ghar men sthit hokar santan ke sukh men badha utpann kar raha ho to pile chandan aur kesar ko ghisakar guruvar ke din tilak lagana chahie. sath hi sath sone ko dharan karne se bhi guru ki ashubhta men kami ati hai.
- shukra panchven ghar men sthit hokar santan-sukh men badha utpann kar raha ho to aise vyakti ko apni saf-safai, sundrta ka vishesh dhyan rakhna chahie. safed evan khushbudar pushp bahte hue svachch jal men bahane chahie.
- shani panchven ghar men sthit hokar santan ke sukh men badha utpann kar raha ho to aise vyakti ko shani ki ashubhta dur karne ke lie vyakti ko bahte hue jal men nariyal chorna chahie. kale til, kale kapre men bandhakar jamin men garna chahie.
- rahu panchven ghar men sthit hokar santan sukh men badha utpann kar raha ho to aise vyakti ko hamesha apne pas chandi ka ek chaukor tukra rakhna chahie, nagpanchmi ke din jangal men chor dena chahie.
- ketu panchven ghar men sthit hokar santan ke sukh men badha utpann kar raha ho to aise vyakti ko do rangon ka kanbal nirdhan vyaktiyon ko dan karna chahie tatha kan men sone ka kundal dharan karne se bhi ketu ka ashubh prabhav dur hota hai. ketu jin vyaktiyon ko adhik pareshan kar raha ho to unhen visheshakar apni bahan ke sath marpit nahin karni chahie.
yadi santan ke ghar men do ya adhik papagrah baithakar athva dekhakar apna ashubh prabhav chor rahe hon to donon grahon ke upayon ko karne se santan sukh milta hai.
apni janmakundli men sabse pahle yah dekhna chahie ki kahin koi grah apne ghar se 8ven ghar men baithe grah ko takkar to nahin mar raha hai? athva jis vishay vastu ke bare men jankari chahte hon to dekhen ki us vishay vastu ka kaun sa grah svami hai? vah kis halat men hai aur uske apne pakke ghar men kaun se grah baithe hain tatha apni drishti se kaun sa grah use labh ya hani pahuncha raha hai? udahrntya kisi jatak ki talim ke bare men jankari hasil karni hai to pahle talim ke ghar panch ko dekhen ki us ghar ka svami grah surya kis halat men hai. fir us ghar ke pakke ghar ke svami grah brihaspati ko dekhen.
iske bad chandra ko dekhen, kyonki talim (shiksha) ka shubh grah nich ka raha hoga, to talim adhuri ya bhari jhanjhton ke bich hogi aur grah agar achchi halat men hain to talim puri jarur hogi. isi tarah janmakundli ke gharon se usmen maujud grahon ka fal asani se jan sakte hain.
brihaspati ki gati :
- brihaspati jab dushman grahon ke ghar men ho to bura asar nahin karta, kintu dushman grah (budh, shukra) brihaspati ke gharon men a jaen to hamesha bura fal dete hain.
- shani, rahu, ketu jaise papi grahon ke sath brihaspati bhi papi ho jata hai. 6ven v 11ven ghar men baitha brihaspati sirf shani ko madad karta hai.
- akela brihaspati jahan bhi baitha hoga, achcha fal hi dega. jab ketu manda ho to ketu (putra) par apna bura asar dalta hai.
- agar rahu 1/2/3 gharon men, yani brihaspati se pahle gharon men ho to jatak guruon ka bhi guru hota hai.
- jab papi grahon ka fal nicha ho raha ho to brihaspati ka fal nicha ho jata hai aur jab mangal nasht ya manda (bad) ho to brihaspati bhi nasht ho jata hai. santan, shiksha, rajya se samman aur adar aur barappan adi brihaspati ke shubh hone se hi hasil hote hain.
- brihaspati jab mithun rashi men ata hai to charon or avyavastha faila deta hai, tab apratyashit ghatnaen ghatti hain. agar uske samne dhanu rashi men shani ho to anek utpat upadrav hote hain. 1/4/5/ 8/ 9/12 gharon men brihaspati baitha ho to jatak uchch shiksha prapt karta hai aur usi se jivan bhar gujar basar karta hai.
- kendra sthanon (1/4/7/10) ka brihaspati jatak ki sath lai hui daulat hota hai. basharte vah kisi dusre grah se manda n ho raha ho. agar brihaspati ke mitra achchi halat men n hon to bhi jatak ka bhagya soya rahta hai.
- brihaspati jab 1/5/12ven ghar men ho to surya aur shani ko aur 6/11ven ghar men ho to sirf shani ko madad karta hai.
ashubh brihaspati ke kulakshan :
- kisi bhi rup men sona (svarna) kho jae ya chori ho jay.
- shiksha (talim) band ho jae.
- sir ke bal choti ke sthan se ur jaen.
- akaran jhuthi afvah, galtfhmi failne lage.
- koi arop, dosharopan ya tohamat lage.
- gale men mala pahnna bhi ashubh brihaspati ke lakshan hain.
- brihaspati ko uchch evan anukul banane ke lie samuchit upay labhdayak siddh hote hain.
brihaspati ke upay
- sona gale men dale rakhen.
- kesar khaen aur usika tilak karen.
- brihaspati ki chijon men se koi patra, khand (chini), ghi, pila rang, dal, chana (chane ki dal) haldi ya koi pavitra pustak dan men den.
- chalte pani men tel, badam aur nariyal bahaen.
- brihaspativar ko brahman ko pile vastra dan karen.
- karhi aur chaval khaen aur khilaen.
- har samay pile rang ka rumal apni jeb men rakhen.
- brihaspativar ke din kisi bhi halat men sabut mung nahin khana chahie.
- mung yani budh ke milne se brihaspati ka prabhav nasht ho jata hai arthat budh ki kudrishti se brihaspati ka asar manda ho jata hai.