rahu aur ketu ko is nabh mandal ke do binduon ki sangya di gai hai. dusre shabdon men rahu aur ketu ki dhuri par hi sanpurn nabh mandal bhraman kar raha hai. yadi janmank men rahu aur ketu ko bindu manakar rahu se ketu tak ya fir ketu se rahu tak ek sidhi rekha khinchne se sare grah is rekha ke kisi bhi ek or a jaen to is grah sthiti ko kal sarp yog mana gaya hai.
parivartan arthat kal chakra ki gati ke anusar utthan-patan ya fir utar-charhav prakriti ka niyam hai. yadyapi vartaman men prachlit manyata yah hai ki kal sarp yog ek atyant sankat janak, kalah karak, anishtakari, kashtakar aur dukhdayi yog hai, tathapi yah ek atyant kalyankari, yash, kirti, shri sanpannata, samriddhi aur prasiddhi dayak yog bhi hai. vaise to kal sarp yog se grast jatak ka jivan chakra kolhu ke bail ki bhanti ghumta rahta hai lekin fir bhi vah itihas ke pannon par apna nam svarnaksharon men ankit karta rahta hai.
aisa jatak gagnchunbi, unchai ko bhi chumta hai aur gahan gart men bhi dubta hai. bhav ke anusar 12 aur lagn ke anusar 12 arthat 12 g 12 = 144, arthat udit golarddh ke bhed ke anusar 144 aur anudit golarddh ke bhed ke anusar 144 g 2 = 288 prakar ke kal sarp yog hote hain. jab kal sarp yog rahu se lekar ketu tak banta hai tab vah udit golarddh kahlata hai aur jab ketu se lekar rahu tak banta hai tab anudit golarddh kahlata hai.
iske atirikt jab koi ek grah inki pakar se bahar niklne men safal ho jata hai tab 288 g 7 = 2016 prakar ke anshik kal sarp yog ban jate hain. chunki kul 2016 prakar ke kal sarp yog aur anshik kal sarp yog sanbandhi vyaktigat udaharan prastut karna lagabhag asanbhav hai, islie keval bhav ke anusar rahu se ketu tak athva ketu se rahu tak matra 12 prakar ke kal sarp yogon ka vyaktigat udaharan sahit varnan agrankit hai .
anant kal sarp yog yadi pratham bhav men rahu, saptam bhav men ketu aur shesh sabhi grah rahu-ketu ke ek or sthit hon to is grah sthiti ko anant kal sarp yog kahte hanai. svatantra bharat ki janm kundli men pratham se saptam bhav tak bana anant kal sarp yog vidyaman hai tadnusar rahu pratham sharir tatha mastishk bhav men sthit hokar pancham santan bhav, saptam vyapar vyavsay-udyog tatha pati-patni athva viprit ling bhav aur navam dharm bhav ko purn drishti se dekh raha hai.
faltah bharat ko rajnitik daliya samasyaon se jujhna para raha hai. adhikadhik jansankhya vriddhi, vyaparik, vyavsayik athva audyogik ghotale tatha balatkar aur dharmik unmad sursa ke munh ke saman failte hi ja rahe hain. is prakar bharat ko nirantar sangharsh karna par raha hai. kulik kal sarp yog yadi dvitiya bhav men rahu, ashtam bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko kulik kal sarp yog kaha jata hai. edavard saptam ki janm kundli men ashtam se dvitiya bhav tak kulik kal sarp yog vidyaman hai.
tadnusar rahu dvitiya dhan bhav men sthit hokar shashtham svasthya bhav, ashtam ayu bhav aur dasham rajya bhav ko purn drishti se dekh raha hai. faltah edavard saptam 60 varsh ki avastha men inglaind ke rajya sinhasan par asin hue. unhin ke shabdon men - ‘‘main sanvaidhanik samrat banne ke lie purnatah taiyar hun aur jab tak mere sharir men pran hain, main apni praja ki sthiti’’ ko sudharne ke lie karya karta rahunga. unhonne apne shabdon ka aksharashah palan bhi kiya.
lagabhag 70 varsh ki ayu men unki mrityu ho gai. svargiya rajesh pailat ka janm ek garib ghar men hua. jivan men sangharsh karte hue unhonne vayusena ki pratiyogita pariksha uttirn ki aur pailat jaisa uchch koti ka pad grahan kiya, jiske lie tvarit aur thos nirnay lene ki kshamata nitant avashyak hai. nirbal mansik shakti ka vyakti kabhi bhi aise pad hetu upyukt nahin hota. unki kundli men mithun rashisth kal sarp uchch mansik star aur paripakvata ka dyotak hai. jivan men kuch naya kar dikhane ki abhilasha, umang aur utsah ka hi parinam hai ki unhonne rajniti men utar kar kendriya mantri ka pad bhi prapt kiya aur unhen lokapriyata bhi mili.
lekin ashtam ka ketu durghatana dvara asamay maut ka karan bana. vasuki kal sarp yog yadi tritiya bhav men rahu, navam bhav men ketu aur shesh sabhi grah rahu-ketu ke ek or sthit hon to is grah sthiti ko vasuki kal sarp yog kaha jata hai. dhiru bhai anbani ki janm kundli men tritiya bhav se navam bhav tak bana vasuki kal sarp yog vidyaman hai. tadnusar rahu tritiya parakram bhav men sthit hokar saptam sathi bhav, navam bhagya bhav aur ekadash labh bhav ka purn drishti se dekh raha hai.
rahu ke parakram sthan men hone ke karan ve puri jindgi sangharsh karte rahe. shankhpal kal sarp yog yadi chaturth bhav men rahu, dasham bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko shankhpal kal sarp yog kaha jata hai. charchit sheyar vyapari harshad mehta ko samucha bharatavarsh janta hai.
chaturth bhav men rahu evan dasham bhav sthit ketu ke madhya jahan sabhi grah kalasarp yog bana rahe hain, vahin dvadash bhavasth shukra bhikshuk ko bhi raja banata hai. labhesh jahan svagrihi hai vahin vyayesh surya bhi labhasth hai. parakramesh mangal uchchabhilashi hai tatha vyaparesh-sukhesh guru kendra men hai aur dashmesh budh yukt hai. budh-guru-surya-chandra par mangal ki drishti hai. vahin panchmesh shani apni uchch rashi men dhanasth guru (dhan kark) se drisht hai
atah bharpur lakshmi yog hai. kintu bharat ke arth tantra ko hila dene vale evan choti umra men alp avdhi men dhan ka anbar laga dene vale harshad mehta kal sarp yog ke karan svayan shadyantra men fans gae. sachin ki kundli men bhi shankhpal kal sarp yog vidyaman hai. iske karan unhen khyati to prapt hui lekin anek bar chot lagne ke karan purn pratibha pradarshan nahin kar pae, nitya nae nae kirtiman sthapit karne ke bavjud kaptan ki pari lanbe samay tak nahin chala pae.
padm kal sarp yog yadi pancham bhav men rahu, ekadash bhav men ketu aur shesh sabhi grah rahu-ketu ke ek or sthit hon to is grah sthiti ko padm kal sarp yog kaha jata hai. sar dorab ji tata ki janm kundli men pancham se ekadash bhav tak padm kal sarp yog vidyaman hai. tadnusar rahu pancham vidya, buddhi aur vivek bhav men sthit hokar navam satya, dharm, tyag aur nishtha bhav, ekadash labh bhav aur pratham sharirik sanrchna bhav ko purn drishti se dekh raha hai. yahan yah vishesh drashtavya hai ki ashubh grah bhi trikon men sthit hone se shubh fal pradan karte hain. prastut kundli men rahu pancham trikon bhav men sthit hai.
faltah tata samuh ke sansthapak sar dorab ji tata bharat ke agrani audyogik samrajya ke pramukh kirti stanbh rahe. tata samuh ke pas aj lauh evan ispat, tel, sabun, vanaspati ghi, rang-rogan, rasaynik padarth tatha vidyut utpadan ke kal karkhane hain. baink evan bima kanpniyan tatha vaigyanik aur takniki shikshan sansthaen bhi hain. shri nelsan mandela ki kundli men bhi padm kal sarp yog vidyaman hai jiske karan unhonne apni buddhi ka prayog kar dakshin afrika men sarvochch sthan prapt kiya, lekin isi dosh ke karan unhen anek bar jel yatra evan anek prakar ke kasht sahne pare. mahapadm kal sarp yog yadi shashtham bhav men rahu, dvadash bhav men ketu aur shesh sabhi grah rahu-ketu ke ek or sthit hon to is grah sthiti ko mahapadm kal sarp yog kaha jata hai.
vishva prasiddh vidvan pan. suryanarayan vyas ki janm kundli men shashtham se dvadash bhav tak mahapadm kal sarp yog vidyaman hai. tadnusar rahu shashtham pratispardha bhav men sthit hokar dasham karm bhav, dvadash vyay bhav aur dvitiya uchch shiksha bhav ko purn drishti se dekh raha hai. faltah ve ujjain jaise chote se nagar men vikram vishvavidyalay, vikram kirti mandir, sindhiya prachya vidya shodh pratishthan aur kalidas akadmi jaisi mahan sansthaon ka nirman kar sake. padm vibhushan, sahitya vachaspati aur di. lit. jaisi upadhiyon se sammanit, anek granthon ke rachyita panvyas vikram jaise yashasvi patra ke sanpadak bhi rahe.
isi yog ne unhen svadhinta andolan ka prakhar krantikari banaya. sare sansar men pujya pan. vyas apne kutunb, parivar, bandhujnon aur nagar men prayah upekshit hi rahe. takshak kal sarp yog yadi saptam bhav men rahu, pratham bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko ‘takshak kal sarp yog’ kaha gaya hai. samrat akabar ki janm kundli men pratham se saptam bhav tak takshak kal sarp yog vidyaman hai. tadnusar rahu saptam uttaradhikari bhav men sthit hokar ekadash labh bhav, pratham sharir bhav aur tritiya parakram bhav ko purn drishti se dekh raha hai.
faltah din-e-ilahi dharm ke pravartak yashasvi samrat akabar mahan ka balyakal vaibhvhin tatha sangharshamay vyatit hua. yadyapi ve apne parijnon tatha parivarjnon ki or se udvign rahte the. putra salim (jahangir) aur rajput patni jodhabai se unke gu. shu. chanmtbhed sarvavidit hain fir bhi ve chakravarti samrat akabar mahan ki upadhi se vibhushit hue. karkotak kal sarp yog yadi ashtam bhav men rahu, dvitiya bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko karkotak kal sarp yog kaha jata hai.
prasiddh abhinetri smita patil ki janm kundli men dvitiya se ashtam bhav tak karkotak kal sarp yog vidyaman hai. tadnusar rahu ashtam mrityu bhav men sthit hokar dvadash vyay bhav, dvitiya kutunb bhav aur chaturth bhautik sukh bhav ko purn drishti se dekh raha hai. faltah smita patil ko saikron upalabdhiyon ke sath khyati to mili, sitaron ke sansar men sthapit bhi huin, kintu unhen sharirik sukh, kautanubik tatha parivarik sukh, dampatya sukh, ya bhautik sukh kisi bhi sthiti men nahin mil paya. itna hi nahin unki mrityu bhi asamay hui. vah alpayu men achanak chal basin.
shankhchur kal sarp yog yadi navam bhav men rahu, tritiya bhav men ketu aur shesh sabhi grah rahu-ketu ke ek or sthit hon to is grah sthiti ko shankhnad ya shankhchur kal sarp yog kaha jata hai. shri ram kathakar shri murari bapu ki janm kundli men navam se tritiya bhav tak shankhnad ya shankhchur kal sarp yog vidyaman hai. tadnusar rahu navam dharm bhav men sthit hokar lagn sharir, tritiya parakram aur pancham vidya, buddhi aur vivek bhav ko purn drishti se dekh raha hai. faltah vartaman men shri murari bapu lokapriya evan apekshakrit sarvadhik vyast shri ram kathakar hain.
aj v ganv-ganv, nagr-nagar aur desh-videsh men lok kalyankari, manvtavadi shri ram ka sandesh pahuncha rahe hain. is karan unhen anek daihik, mansik aur dharmik samasyaon ka samna karna parta hai. grihasthashrami hote hue bhi unka sanpurn jivan parmarth ke lie hi samarpit hai. yahan yah ullekhniya hai ki papi grah bhi trikon men sthit hone se punya fal pradan karte hain.
amerika ke bhutpurva rashtrapti abraham linkan ki kundli men bhi kal sarp yog banta hai fir bhi unhonne ek uchch pad ko sanbhala evan amerika se kale aur gore ke bhed ko mitaya. is janm kundli men lagnesh shani dasham bhav men sthit hai. kendra men sthit hokar lagnesh aur bhi balvan ho jata hai. lagnesh par guru ki shubh drishti bhi hai. panchmesh budh evan saptamesh surya bhi lagn men sthit hain. is prakar janm kundli men kal sarp yog hote hue bhi abraham linkan ne amerika ke rashtrapti pad ka bhar sanbhala, gulam pratha ko samapt kiya evan amerika se bhed bhav dur kiya.
is sabke bavjud inhen janta ka virodh sahna para, ant men inhen goli mar di gai. atah janm kundli men kal sarp yog kitna kashtadayak hai ya kitna shubhdayak iska vishleshan janm kundli men ban rahe anya mahatvapurn yog evan dasha sthitiyon ko dhyan men rakh kar karna chahie. ghatk/patak kal sarp yog yadi dasham bhav men rahu, chaturth bhav men ketu aur shesh sabhi grah rahu-ketu ke ek or sthit hon to is grah sthiti ko ghatak ya patak kal sarp yog kaha jata hai. shrimti maragret thaichar briten ki pratham nirvachit mahila pradhanmantri thin. unki janm kundli men kal sarp yog hote hue bhi anya raj yogon ki vajah se ve do bar lagatar briten ki pradhanmantri banin. is janm kundli men chaturthesh aur panchmesh shani lagn men hai.
navmesh budh bhi lagn men hai. dasham bhav ka svami chandrama ekadash bhav men sthit hai tatha us par guru ki drishti hai. shash yog bhi ban raha hai. dasham bhav men sthit rahu bhi yogkarak shani ki drishti pa raha hai. is grah sthiti ke karan ve pradhanmantri banne men safal huin aur kal sarp yog unke lie badhak nahin ban saka. vishadhar kal sarp yog yadi ekadash bhav men rahu, pancham bhav men ketu aur shesh sabhi grah rahu-ketu ke ek or sthit hon to is grah sthiti ko vishakt ya vishadhar kal sarp yog kaha jata hai.
shri narayan datt tivari ki janm kundli men ekadash se pancham bhav tak vishakt ya vishadhar kal sarp yog vidyaman hai. tadnusar rahu ekadash labh bhav men sthit hokar tritiya parakram bhav, pancham vidya, buddhi aur vivek bhav aur saptam sahyogi bhav ko purn drishti se dekh raha hai. faltah shri tivari ke jivan men nirantar pad parivartan hote rahe hain. ve uttar pradesh ke mukhya mantri rahe, hate, vidhan sabha men vipaksh ke neta rahe, hate, kendriya mantri rahe, hate, parti ke bhi mahatvapurn padon par padasth rahe, hate.
yadyapi ve vartaman men uttaranchal ke mukhyamantri hain, tathapi unhen sadaiv rajnitik sankat ka samna karna parta raha hai aur rahega. jarj dablyu bush bhi vishadhar kal sarp yog ke karan bahucharchit to hue hain lekin unki chavi am janta men dhumil hi hai. sheshnag kal sarp yog yadi dvadash bhav men rahu, shashtham bhav m ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko shesh nag kal sarp yog kaha jata hai. pan. javahar lal nehru ki kundli men spasht sheshnag kal sarp yog hai kyonki pratyek bhav men grah upasthit hai.
surya dvitiyesh hokar pancham bhav men krurta de raha hai. chandrama lagnesh hokar svagrihi hai panrtu papakrant hai. spashtatah chandra rahu aur shani ke madhya hai tatha dashmesh mangal dasham se shashth hai. budh dvadash aur tritiya bhavon ka svami hokar chaturth bhav men labhesh shukra se yuti kar raha hai. shukra yadyapi svagrihi hai par labh bhav se shadashtak hai. saptamesh shani ashtam hokar saptam bhav se shadashtak kar raha hai tatha sukh bhav par uski drishti hai. is grah sthiti ke karan unka sanpurn jivan sangharshamay raha tatha unhen putra santan ka abhav raha.
patni ka sath bhi lanbe samay tak nahin raha, vahin damad ki mrityu ka dukh jhelna para. anek bar jel gae. chin ke hamle ko sahan nahin kar sake aur mrityu asamay hui. lara datta ki kundli men svarashi kanya men rahu ke karan kal sarp yog ban raha hai. lara datta ne apne jivan men kari mehanat, lagan, utsah aur man ki ekagrata se karya kar ke vishva star ki saundarya pratiyogita men pratham sthan prapt kiya. in pratiyogitaon men daihik saundarya ke sath-sath buddhi-chaturya aur mansik drirhta ki avashyakta hoti hai.
in sab ki svamini hone ke bavjud lara datta filmi duniya men uchch mukam hasil nahin kar pai samasya: yadyapi kal sarp yog dhari jatkon ko uchchatam upalabdhiyan prapt hui hain tathapi kisi bhi vyakti ne is yog ko shreshth nahin mana hai. sabhi ne ise umrta-ghumrta kala badal, sundar shabdon men kahen to saghan krishn meghmala aur ek shabd men kahen to kali ghata hi kaha hai. kal, karal, klesh, kasht, pira, vyatha, vedna, chot, ghat, sanghat, tap, santap, paritap, pashchatap, manastap, hras, hani, kshati, vipatti, ashanti, yantrana, yatna, durghatana, prakop, viplav, vidroh, upadrav, uthl-puthal aur umr-ghumar hi kaha hai.
samanyatah yah mana jata hai ki kalasarp yog dhari jatak ko jivan bhar sangharshon ka samna karna parta hai. ek gaya to dusra aur dusra gaya to tisra, inke jivan men sada sankton ka tanta laga rahta hai. inhen bhanti-bhanti ki prakritik vipdaen aur daivi prakop jhelne parte hain. inmen sharirik aur mansik durbalata ke karan nirasha ki bhavna jagrat hoti hai. kutunbiyon dvara inka vyarth virodh hota hai. jatak sadaiv dhan k lie tarste rahte hain. inhen parakram aur yuktiyukt prayas karne par bhi saflta nahin milti. vidyarjan men badhaen upasthit hoti hain.
inke kandhon par rin ka bhari bojh bana rahta hai. mitra vishvasghat karte hain. svasthya sanbandhi vikar utpann hote rahte hain. kes mukdmon ke makar jal men jakar jate hain aur kabhi-kabhi to inhen bandigrih bhi jana parta hai. inka vivah vilanb se hota hai. santan sukh prapt nahin hota aur yadi prapt ho bhi jae to dampatya jivan men katuta utpann ho jati hai aur kabhi-kabhi to sanbandh vichched tak ho jata hai. inki mrityu akasmik hoti hai, jivan men maran tulya kasht tatha choti-moti durghatanaen hoti hi rahti hain.
bhagya inse ruth jata hai. yathayogya kam upalabdh nahin hota. kam mila to usmen anekanek archnen upasthit ho jati hain. apekshakrit kam labharjan hota hai. bhinna-bhinn vishyantargat inka vyay adhikadhik hota rahta hai. is prakar inka jivan vibhinn trasdiyon se ghira rahta hai. faltah inke lie apna jivan nirvah karna atyant kathin ho jata hai. ye apne jivit sharir ka bojh dhote-dhote lagabhag purnatah thak jate hain.
ye sabhi sthitiyan sab par lagu nahin hotin rahu-ketu ki sthiti ko dekhte hue uparyukt tathyon men se ek ya do tathya avashya satya hote hain. in kashton ke nivaran ke lie kal sarp dosh ki shanti karana avashyak ho jata hai. kal sarp dosh ki shanti ke pashchat upalabdhiyan to prapt hoti hi hain lekin sangharshamay jivan ke kasht shantipurvak kat jate hain.