vedang jyotish shastra ke antargat surya ke adrra nakshatra pravesh kundli ke adhar par bharat men varsha adi ka fal vichar kiya jata hai. is varsh jyeshth shukla paksh, ekadshi tithi, svati nakshatra, shiv yog, vishti karan, manglvar, dinank 22 jun 2010 ko pratah 9.55 baje surya ka adrra nakshatra men pravesh hoga. itihas gavah hai ki varsh 1877, 1904, 1905, 1918, 1951, 1952, 1965, 1966 aur 1987 men bharatavarsh men sukha para tha. ataev sarvapratham ham in varshon men surya ke adrra nakshatra pravesh kundliyon ka avlokan karen. ki devkerlkar likhte hain - lagnan syat pransangyakam’. arthat lagn pran hai. lagn kundli ka sar hai, kundli ka sarvasva hai. yah uparjan karne vala nij sthan hai. islie hamen lagn, lagnesh aur lagnasth grahon ki sthiti tatha un par parne vale prabhavon par vishesh dhyan dena chahie.
lagn bhav par drishti prabhav, lagnesh ki sthiti aur us par anya grahon ka drishti prabhav tatha lagnasth grahon ka anya grahon se sanbandh, lagn bhav ke karak, lagn bhav ke svami aur lagn bhav men sthiti grahon ka uchcha-nich, digbali, ansh bali, uday, ast, vakri tatha margi hona vishyantargat vishesh mayne rakhta hai. in sabke atirikt in par shubh tatha ashubh prabhavon ki nyunadhikta ka vishleshan vishesh avashyak hai. uprokt kundliyon ke avlokan se spasht hai ki varsh 1877 ki adrra nakshatra pravesh kundli men lagn bhav men hi sthit lagnesh guru par papi grahon rahu, mangal aur shani ki saptam purn drishti dhari papi grah ketu ki pancham purn drishti hai. is prakar lagn bhav, lagnesh tatha lagnasth guru tinon par pap prabhav vidyaman hai. isi karan is varsh sukha para. varsha-1904 ki kundli men lagnesh mangal ashtam bhav men sthit hai.
us par papi grah ketu ki pancham purn drishti hai. lagn bhav par ashtamesh budh ki saptam purn drishti hai. lagn bhav par ashtamesh budh ki sapatam purn drishti hai. is prakar lagn bhav par koi grah sthit nahin hai aur lagn bhav tatha lagnesh par pap prabhav vidyaman hai. varsh 1905 ki kundli men lagn bhav men koi grah sthit nahin hai. lagnesh par shashth, asht aur dvadash bhav men baithe papi grahon kramshah rahu, mangal aur shani ka purn drishti hai. is prakar lagnesh purnatah dushprabhavit hai. varsh 1918 ki kundli men lagn bhav men papi grah, shatru grah shani ki sthiti hai. lagn bhav par papi grah rahu ki navam purn drishti hai. lagnesh chandra ki rahu ke sath sthiti hai aur lagnesh par ketu ki saptam purn drishti hai.
is prakar lagn bhav, lagnasth shani tatha lagnesh chandra tinon purnatah dushprabhavit hain. varsh 1951 ki kundli men lagnesh budh lagn bhav men sthit hai aur ast hai. lagnesh budh aur lagn bhav men sthit grah surya par papi grah shani aur rahu ki kramshah dasham aur pancham purn drishti hai. is prakar lagnesh, lagnasth aur lagn bhav tinon dushprabhavit hain. varsh 1952 ki kundli men shani lagn bhav men baitha hai. lagn bhav par mangal aur ketu papakartari yog bana rahe hain. lagnesh budh par papi grah shani aur rahu ki kramshah dasham aur pancham purn drishti hai. is prakar lagnesh, lagnasth aur lagn bhav tinon dushprabhavit hain.
varsh 1965 ki kundli men lagnesh shani ek to svayan mrityu ka karak hai aur upar se shatru tatha saptamesh chandra ke sath dvitiyasth hai. uska rahu aur ketu ke sath kendriya sanbandh sthapit hai. n keval lagn apitu charon kendriya bhav grahon se rikt hain. is prakar lagn bhav aur lagnesh dushprabhavit hain. varsh 1966 ki kundli men lagnesh shukra papi grah rahu aur mangal ke madhya lagn bhav men hi sthit hai aur us par papi grah ketu aur shani ki kramshah saptam aur tritiya purn drishti hai. is prakar lagnesh, lagnasth grahon tatha lagn bhav tinon par dushprabhav sthapit hai. varsh 1987 ki kundli men lagn men papi grah ketu baitha hai aur use tatha lagn bhav ko papi grah rahu saptam purn drishti se dekh raha hai.
lagnesh budh ka papi grah rahu aur ketu se kendriya sanbandh sthapit hai. lagnesh budh donon agni tatvik grah ravi aur mangal ke madhya sthit hai. is prakar lagn bhav, lagnasth grah tatha lagnesh tinon dushprabhavit hain. nishkarsh yah hai ki uprokt tamam varshon men kisi n kisi prakar lagn bhav, lagnasth grah tatha lagnesh tinon dushprabhavit rahe, isi karan uprokt varnit varshon men sukha para. uproktanusar ab is varsh ki adrra pravesh kundli ka avlokan karen. is varsh surya ki adrra nakshatra pravesh kundli ke adhyayan se spasht hai ki lagn rashi sinh agni tatva rashi hai aur lagn men papi tatha agni tatva grah mangal baitha hai.
lagn bhav aur lagnasth mangal par papi grah rahu ki navam purn drishti hai. lagnesh surya papi grah ketu ke sath sthit hai aur use papi grah rahu saptam purn drishti se dekh raha hai. is prakar lagn bhav, lagnasth mangal aur lagnesh surya tinon dushprabhavit hain. faltah is varsh jyotish darpan men alp vrishti yog drishtigochar hota hai.