bhagvan ne kaha hai ki hriday men sthit main dip jalata hun. jo gyan antratma se fut pade, vah param kripa prasad hai, param mridul prem hai, param anukampa hai, param kalyanmyi gyanganga hai. dhyan rahe parmatma bahya darshan nahin dete, antrik dip jalate hain. yah antrik bahav hai. yadi jivan shivamay ho jae to ganga bah hi jayegi. man-mastishk se vah fut paregi aur nitya avinashi gyan pravah banakar janma-janm ke sanskar ko dho degi. jo is gangarup pravah ke asre shiv tatva tak pahunchega vah shiv ka aur shiv jaisa hi ho jaega. unke lie bhagvan kahte hain ki main unke sukshmatisukshm ahan ki antyeshti karne aunga. main svayan gyandip jalaunga. main svayan dipavli manaunga. ‘‘teshamevanukamparthamahamagyannan tamah. nashyamyatmabhavastho gyandipen bhasvata..’’ -shrimadbhagavatagita-10/11 shri krishn kahte hain- bhakton par vishesh kripa karne ke lie unke hriday men nivas karne vala main svayan hi prakashamay tatvagyanrup dipak ke dvara unke agyan janit andhkar ko sarvatha nasht kar deta hun.
dusre shabdon men un mere bhakton ka kisi bhi bhanti kalyan ho aisi anukanpa karne ke lie hi main unke antahkaran men sthit hua unke avivekajanya mithya pratitirup mohamay andhkar ko prakashamay vivek-buddhi rup gyandipak dvara sada-sarvada ke lie nasht kar deta hun. un bhakton ke hriday men koi bhi sansarik chah nahin hoti. itna hi nahin unke antahkaran men mujhe chorakar mukti tak ki bhi chah nahin hoti. tatparya yah hai ki ve n to sansarik vastuen chahte hain aur n parmarthik. ve to keval prem se mera bhajan hi karte hain. unke is nishkambhav aur prem purvak bhajan karne ko dekhakar hi mera hriday dravit ho jata hai. main chahta hun ki mere dvara unki kuch seva ho jay, ve mujhse kuch len. kintu ve mujhse kuch lete hi nahin, to svabhavtah dravit hriday hone ke karan keval un par kripa karne ke lie main unke agyanajanya andhkar ko dur kar deta hun. mere dravit hriday hoene ka karan yah hai ki mere bhakton men kisi prakar ki leshmatra bhi kami n rahe.
manushya apna jo astitva mante hain ki ‘main hun’ to yah astitva prayah sharir ke sath sanbandh jorakar hi mante hain. arthat tadatmya ke karan sharir ke badlne men apna badlna mante hain. jaise- main balak hun, main yuva hun, main sashakt hanu, main ashakt hun adi. lekin in visheshnon ko chorakar tatvik drishtikon se in praniyon ka apna jo astitva ho, vah sharir se rahit hai. prakriti se rahit hai. dedipyaman tatva gyan dipak ke dvara un praniyon ke agyan janit andhkar ka main samul nash kar deta hun. abhipray yah hai ki jis agyan ke karan ‘main kaun hun aur mera svarup kya hai?’ aisi jo agyanta rahti hai, us agyanta ka main nash kar deta hun arthat tatvabodh kara deta hun. jis tatvabodh ki mahima ved-shastron men gayi gayi hai, uske lie unko shravan, manan, smaran, dhyan adi sadhan nahin karne parte, koi parishram nahin karna parta, pratyut main svayan unko tatvabodh kara deta hun. jahan bhaktirupi man hogi, vahan uske vairagya aur gyanrupi bete rahenge hi.
isi karan bhakti ke ane par samta-sansar se vairagya aur apne svarup ka bodh-ye donon svatah a jate hain. tatvabodh athva svarup gyan bhagvan svayan dete hain ka tatparya yah hai ki bhakton ko inke liye ichcha aur prayatn nahin karna parta, pratyut bhagavat kripa se unmen samta svatah a jati hai. unko tatvabodh svatah ho jata hai. iska ashay yah hai ki jo sadhanajanya purnata hoti hai, uski apeksha bhagvan dvara pradÿa purnata bahut hi vilakshan hoti hai. ismen apurnata ki gandh bhi nahin rahti hai. kabhi-kabhi bhakton ki alochna darshanik yah sochakar karte hain ki bhaktagan andhkar men hain, darshanik drishti se ve bhole-bhale tatha bhavuk hain; kintu yah kathya satya nahin. yadi koi bhakt bare-bare vidvan pranit bhakti sahitya aur vyapak bhakti darshan athva svagurugyan ka labh n bhi uthaye to bhi yadi vah apni bhakti men eknishth rahe, to yogeshvar svayan uski sahayta karte hain. ataev krishn bhavamrit men rat eknishth bhakt gyan rahit nahin ho sakta.
iske lie keval itni hi yogyata chahie ki vah purn krishn bhavnamrit men rahakar bhaktiyog sanpann karta rahe. adhunik darshanikon ka vichar hai ki bina vivek ke shuddh gyan prapt nahin ho sakta. unke lie yogeshvar ka uÿar hai ki jo log shuddh bhakti men rat hain, bhale hi ve paryapt shikshit n hon tatha vaidik niyamon se purnataya avagat n hon, to bhi bhagvan unki sahayta karte hi hain. kore mansik prayas se n to bhagvan ko jana ja sakta hai, n hi prapt kiya ja sakta hai. koi lakhon varsh tak chintn-manan, adhyayn- adhyapan karta rahe aur bhakti nahin karta tatha vah paramasatya ka premi nahin hai, to use kabhi bhi krishn athva param satya samajh men nahin ayenge. param satya krishn keval bhakti se prasann hote hain aur apne achintya shakti se ve shuddh bhakt ke hriday men svayan prakat hote hain. shuddh bhakt ke hriday men krishn sada-sarvada vidyaman rahte hain aur krishn ki yahi upasthiti surya prakar ke saman hai, jiske dvara agyan, andhkar avilanb dur ho jata hai.
shuddh bhakt ke prati bhagvan ki yahi vishesh kripa hai. karoron janmon ke bhautik sansarg ke dosh ke karan manushya ka hriday bhautikta ke mail se achchadit ho jata hai, kintu jab manushya bhakti men lagta hai aur nirantar hari un tatsat ka ajpajap karta hai to vah mail turant dur ho jata hai aur use shuddh gyan prapt ho jata hai. param lakshya bhagvan ko isi ajpajap tatha bhakti yog ke madhyam se prapt kiya ja sakta hai. anya kisi bhi bhanti manodharm athva tark ke madhyam se nahin. shuddh bhakt jivan ki bhautik avashyaktaon ke lie chitann nahin karta hai aur n use koi anya vishayak chintan karne ki avashyakta hai kyonki hriday se andhkar hat jane par bhagvan svayan use sab kuch pradan kar dete hain. jaise hi manushya bhagvan ke sharnagat hokar shuddh bhakti men lag jata hai aur bhakt ki premabhakti se bhagvan prasann ho jate hain vaise hi bhagvan apne upar bhakt ka bhar le lete hain aur bhakt sare bhautik prayason se mukt ho jata hai.
yahi shrimad bhagavadgita ka sar hai. smaran rahe, bhagvan ne kaha hai ki hriday men sthit main dip jalata hun. jo gyan antratma se fut pade, vah param kripa prasad hai, param mridul prem hai, param anukampa hai, param kalyanmyi gyanganga hai. dhyan rahe ve bahya darshan nahin dete, antrik dip jalate hain. yah antrik bahav hai. yadi jivan shivamay ho jae to ganga bah hi jayegi. man-mastishk se vah fut paregi aur nitya avinashi gyan pravah banakar janma-janm ke sanskar ko dho degi. jo is gangarup pravah ke asre shiv tatva tak pahunchega vah shiv ka aur shiv jaisa hi ho jaega. unke lie bhagvan kahte hain ki main unke sukshmatisukshm ahan ki antyeshti karne aunga. main svayan gyandip jalaunga. main svayan divali manaunga.