kaun ban sakta hai achcha sadhk  

kaun ban sakta hai achcha sadhk? pan. radhakrishn tripathi mantra sadhna se purva sadhak ke janmakalin grahon ke adhyayan se yah gyat kar lena chahie ki vah kis prakar ki upasna men safal hoga. janmakundli men navam bhav se hi upasna ka gyan hota hai. kuch anubhav siddh tathya yahan prastut hain. yadi janmakundli men brihaspati, mangal evan budh sath hon ya unki ek dusre par paraspar drishti ho to vyakti sadhna kshetra men saflta prapt karta hai. guru v budh donon hi navam bhav men hane to vyakti brahm se sakshatkar kar sakne men safal hota hai. surya uchch ka hokar lagnesh ke sath ho to jatak shreshth sadhak hota hai. yadi lagnesh par guru ki drishti ho to jatak svayan mantrasvarup ho jata hai, mantra uske hathon men khelte hain. yadi dashmesh dasham sthan men ho to vyakti sakar upasak hota hai. dashmesh shani ke sath ho to vyakti tamsi upasak hota hai. ashtam bhav men rahu ho to jatak shreshth mantra sadhak aur tantrik hota hai. par aise log apne apko gopniya banae rakhte hain. dashmesh ka shukra ya chandra se sanbandh ho to jatak dusron ki sahayta se upasna sadhna men saflta prapt karta hai. yadi pancham sthan men surya ho ya surya ki us par drishti ho to vyakti shakti upasna men purn saflta prapt karta hai. yadi pancham evan navam bhav men shubh bali grah hon to vyakti sagunopasak hota hai. navam bhav men mangal ho ya mangal ki us par drishti ho to jatak shivaradhna men saflta pa sakta hai. yadi navam sthan men shani ho to jatak sadhu hota hai. yadi aisa shani svarashi ya uchch rashi ka ho to vyakti vriddhavastha men vishva prasiddh sannyasi hota hai. janmakundli men surya bali ho to shakti ki upasna karni chahie. chandra bali ho to tamsi upasna men saflta milti hai. mangal bali ho to shiv upasna se manokamna ki purti hoti hai. budh prabal ho to tantra sadhna men saflta prapt hoti hai. guru shreshth ho to jatak ko sakar brahm ki upasna se khyati milti hai. shukra balvan ho to mantra sadhna men saflta prapt hoti hai. shani balvan ho to jatak siddh upasak hota hai. use tantra evan mantra donon ki sadhna men saflta prapt hoti hai. yadi lagn ya chandra par shani ki drishti ho to jatak safal sadhak ho sakta hai. dasham bhav ka svami saptam bhav men ho to vyakti tantrik upasna ke kshetra men safal hota hai. yadi vrish ka chandra guru aur shukra ke sath kendra men ho to vyakti upasna ke kshetra men safal hota hai. yadi sabhi grah chandra aur guru ke bich hon to vyakti tantra ki apeksha mantranushthan men vishesh saflta prapt kar sakta hai. yadi kendra aur trikon men sabhi grah hon to jatak prayatn kar sadhna kshetra men saflta prapt kar sakta hai.