pratyek vyakti ki likhavat ek saman nahin hoti, kyon? ‘kyon’ hi hastakshar vigyan ke adhyayan ka mukhya vishay hai. vibhinn manushyon men alg-alag pravrittiyan ya sochne evan kam karne ka taur-tarika alg-alag hota hai. isi se unke charitra ka nirman hota hai. uski antrik pravrittiyan hi svatah uski likhavat ko ‘ek prakar’ de dengi, us bare men ham dusre dhang se kahen ki kisi vyakti ki likhavat hi uska antahkaran hai, uska vyaktitva hai. raebart, milar, fraest adi vishva prasiddh bhasha vaigyanikon ka mat hai ki koi bhi vyakti ek bar jo akshar likhta hai, thik vaisa hi akshar jivan men do bar nahin likh sakta hai. arthat kisi kshan vishesh men usne kisi akshar ko jis rup aur prakar men likha hai, thik usi rup aur prakar men punah usi akshar ko likh hi nahin sakta. mansik avastha ki kamoveshta ke falasvarup hi likhavat par parne vale prabhav ke karan ‘hastakshara-vigyan’ ka vaigyanik rup mil sakta hai aur isi ko adhar banakar ham vishvas-purvak kah sakte hain ki is prakar ki likhavat vale vyakti ki mansik avastha aisi ho sakti hai aur uska svabhav aisa ho sakta hai. is bat ko nimn tark ke dvara spasht kiya ja sakta hai nepoliyan bonapart ka vyaktitva aur uski asadharan safltaen jahan yuddha-vishardon ke lie paheli bani rahin, vahan uske jivan ke chamatkarik utar-charhav bhara jivan visheshagyaon ke lie ashcharyaprad bhi. uske jivan men unnati ke din aye to avnti ke bhi. niche die gae ‘‘nepoliyan’ ke hastakshar uske jivan ki bhinna-bhinn mansik avasthaon ko spasht karte hain. ap dekhen ki mansik avasthaon ka dhani, ghamandi aur satta ke mad men chur vyakti ke hastakshar gahre tatha viral hote hain. nepoliyan ke nimn prabhav kis prakar uske hastaksharon men bhi purn rup se pratibimbit hai. urpukt hastakshar us samay ke hain jab usne do saptah men hi ‘yuddha’ jitakar nipun yuddh visharad hone ka parichay diya tha. uske hastakshar svayan hi uski uchchata evan atm vishvas ko sakar rup dene se dikhai de rahe hain. hastaksharon men n aspashtata hai, n asantulan, balki iske viprit spasht aur atm vishvaspurn ye hastakshar uski uchch mansik sthiti ko spasht kar rahe hain. niche die nepoliyan ke hastakshar us samay ke hain, jab san 1798 men usne misra par hamla kiya tha, par vah hamla safal nahin ho paya. hastakshar, is kathan ki pushti karte pratit hote hain. ye hastakshar san 1804 ke hain jab naipoliyan frans ka samrat banakar satta aur mad ke nashe men chur ho gaya tha. yah hastakshar uski isi manahsthiti ko spasht karte hain. nepoliyan ke nimn hastakshar us samay ke hain, jab ‘astaralitja’ par vijay prapt ki thi aur vah drutgti se age barhne ke mansube bandh raha tha. hastakshar svayan age ki or bhagte hue se pratit hote hain aur nepoliyan ke agrasar hone ki manahsthiti ka rahasyodghatan kar rahe hain. parantu jahan nepoliyan anya sthanon par vijay par vijay prapt karta raha, vahan rus men use prabal parajay ka bhi samna karna para. vah rus se bhir to gaya tha, par jit dur-bahut-dur dikhai parne lagi thi. itihas sakshi hai ki un dinon vah adhik ugra, adhik chirchira aur adhik bechain sa dikhai deta tha. uski vah bechaini hi uske nimn hastaksharon men spasht jhalak rahi hai. antrik ahlad ko prakat karte se pratit hote hain. bhagn hriday se kiye gaye hastakshar jahan ukhre-ukhre se pratit ho rahe hain, vahin nirashapurn manahsthiti ke samay ke hastakshar tute hue se chinna-bhinn tatha asanbaddh se ho jate hain. niche nepoliyan ke us samay ke hastakshar hain, jab 1814 i. men use jabaran gaddi tyagni pari. hastakshar svayan uski nairashyapurn mansik sthiti ko spasht kar rahe hain. par iske viprit ‘‘barlin ki sandhi’’ men uske kie gae hastakshar jahan saflta bata rahe hain, vahan atmasantosh bhi. upar ki or uthe hue hastakshar uski vijay, saflta aur uske man ka santosh sahi rup men ujagar karte se pratit hote hain. nepoliyan ek sahriday premi bhi tha. uski premika ko likhe uske patra is kathan ke sakshi hain, par us komal hriday ke age anushasan ka mota lauhadvar bhi laga tha. vijay prapt karte rahna uski ichcha thi to age hi age barhte rahna uska dhyey. 1809 men usne ek marshal ko march karne ki agya par jo hastakshar kiye the, ve (niche ke hastakshara) uski is mansik avastha ko pratibinbit karte hain. chote aur urte hue se hastakshar vyakti ki asadharan jit ke suchak hote hain. nimn hastakshar us samay ke hain, jab nepoliyan ne viyana par vijay prapt kar li thi. pathak svayan is avasar ke nepoliyan ke hastakshar ka sukshm adhyayan karen, hastakshar jit ki manahsthiti aur krodhatirek men mansik sthiti asantulit ho jati hai, dhamniyon par khun ka dabav barh jata hai aur mastishk men krur ‘sailane’ ki adhikta ho jati hai. aise samay men vyakti ke hastakshar bhi asantulit, ubr-khabar tatha asanbaddh ho jate hain. krodhatirek men jab nepoliyan ne ‘masko’ ko jala dene ki agya par hastakshar kiye the (niche) tab uska mastishk kodhabhibhut tha aur uska yahi krodh, mansik asanbaddhata aur asantulan uske hastaksharon men bhi anjane hi spasht ho gaya tha. niche ke hastakshar iski pushti kar rahe hain. jaisa ki upar kaha gaya ki nepoliyan jahan unnati ke sarvochch shikhar par pahuncha, vahin uska adhahpatan bhi parakashtha tak pahuncha. unnati tatha pragti ki or barhte-barhte jab lipjing ke yuddh men use parajay ka samna karna para to uska utsah thanda par gaya, uska man khand-khand ho gaya. niche ke hastakshar uske khandit man ke parichayak hain. san 1915 ke as-pas nepoliyan ne sannyas sa le liya tha. uska bhavishya andhkarpurn pratit ho raha tha. dhire-dhire- unke mitra usse dur hatte ja rahe the aur vah jivan men ekakipan tatha nirasha ka anubhav kar raha tha. nimn hastakshar uski isi nirashapurn manahsthiti ke dyotak hain. upar ek hi vyakti ke bhinna-bhinn manahsthitiyon ke hastakshar dekar yah spasht karne ka prayas kiya gaya hai ki vyakti ki likhavat ya hastakshar par us samay ke vatavaran evan manahsthiti ka purn prabhav rahta hai aur is prakar ke hastaksharon ke madhyam se sanbandhit vyakti ki manahsthiti ka sahi parichay prapt kar sakte hain.
Kya aapko lekh pasand aaya?
Subscribe