kaun bante hain adhyatmik vyakti? pan. yogendra nath shukla pratyek manushya purva janm men kie gae karm arthat apne prarabdh ko lekar is bhumandal par janm leta hai. janm ke pashchat kuch yatnaon ko bhugatakar sabhi is sansar se chale jate hain. kuch mata-pita aur bandhuon ka sukh prapt karte hain aur kuch in sukhon se bhi vanchit rah jate hain. kuch apni praranbhik vidya ko safltapurvak prapt kar jivan ko sudrirh banakar apni jivan yatra puri karte hain tatha jo kuch vidya rupi gun ko prapt nahin karte ve murkhata rupi bhanvar men parakar sahaj hi apni jivan ki nauka ko duba lete hain. kuch logon ko purva janm ke satkarmon ke karan santan, sansarik sukh, dhan, samriddhi adi ki prapti hoti hai to kuch log purva janm men apne bure karmon ke karan in sukhon se vanchit rah jate hain. vahin kuch aise log bhi hote hain jinka adhyatm se lagav hota hai aur ve ishvar-prem rupi patvar ko prapt kar apni jivan nauka ko sansar sagar ke par utar lete hain aur jivan maran ke bandhan se mukt hokar moksh prapt karte hain. kundli ke bhav 3, 6, 10 tatha 11 ko upachay sthan kahte hain. upachay ka arth hai khajan, sangrah evan sanbandh arthat yahi vah karan hai jo dhara par manushya ko adhik samay tak jivit rahne v bar-bar janm lene ke lie prerit karta hai. tritiya bhav upachay ki pratham sirhi hai. jo prem, sahas tatha sneh ka vikas karte hue mansik aur sharirik vikas karne men manushya ki sahayta karta hai. shashth bhav upachay ki dusri sirhi hai jahan se vah nirog rahakar, shatruon ko parajit karte hue apne vyapar ka vistar karta hai. dasham tatha ekadash bhav upachay ki kramshah tisri aur chaithi sirhi hain jahan se vah sammanpurvak karya karta hai aur yash ke sath-sath apne ay ke srot ko barhata hai. atah yadi bhav 3, 6 tatha 11 bali hote hanai to vyakti men man men sahas, shatruta evan paropkar ki bhavna janm leti hai jo adhyatmikta, ishvar-prem evan yog ke lie pratikul hai. atah in bhavon ka nirbal hona adhyatmikta ke lie avashyak hai. adhyatmikta ka gunatmak paksh to pancham, navam evan dasham bhav men hota hai. pancham bhav ishvar-prem, navam dharmik anushthan evan dasham karya ka parichayak hai. ishvar-prem ke atirakt anushthan evan karm ke sanyog ke bagair adhyatmik pravritti panap to sakti hai kintu fal-ful nahin sakti. pancham evan navam men jab shubh yuti hoti hai tabhi anushthanadi ki kriya men bhakti hoti hai. pancham sthan se hi bhakti ki pragarhta ka vichar hota hai. atah jab navmesh aur panchmesh men paraspar sanbandh hota hai tab vyakti men bhakti evan anushthan ki bhavna jagrat hoti hai aur vah uchch shreni ka sadhak banta hai. dasham sthan karm sthan hai atah yadi pancham v navam ke sath dasham ka bhi sanbandh ho jae to fal men utkrishtata ati hai. shani avashya hi kathor pap grah hai parantu vah ismen mahatvapurn bhumika nibhate hue manushya ko tapakar uske vicharon ko shuddh kar deta hai. atah jab shani ka pancham, navam evan dasham se sanbandh hota hai to vah vyakti ko tapasvi bana deta hai. kabhi-kabhi diksha yog arthat lagn (sharir) evan chandrama (man) ka jab shani se sanbandh hota hai to shani vicharon ko shuddh karte hue man aur sharir par purn niyantran rakhta hai. isse bhi vyakti ki adhyatm men ruchi barhti hai. yadi janm ke samay char, panch, chah ya saton grah ekatra hokar kisi sthan par baithe hon to vyakti prayah sannyasi hota hai. parantu yah avashyak hai ki in men se koi ek grah balvan ho aur koi ek dashmesh. grahon ki ukt sthiti men yadi surya atyadhik balvan ho to sannyas ki prakriti ek tapasvi ki tarah hoti hai. chandra ke balvan hone par vyakti tantrik hota hai. mangal ke bali hone par vah geru rang ka vastra dharan karne vala sannyasi hota hai. brihaspati ke balvan hone par dandi sanyasi hota hai. shukra ke bali hone par vah chakradhari sadhu tatha shani ke balvan hone par naga sanyasi hota hai. ukt tathyon ko bauddh dharm ke sansthapak, param gyani evan tapasvi gautam buddh ji ki yahan prastut kundli men spasht rup se dekh sakte hain. kundli men sarvapratham upachay sthan par vichar karane to paenge ki tritiyesh budh pap kartari yog se grast hai. shashthesh brihaspati uchchasth surya tatha anya krur grahon se sanbandh ke karan aur ekadshesh shukra apni rashi se vyay bhav men krur yuti ke karan balhin hai. tritiya, shashth evan ekadash bhav nirbal hanai jo sannyas, adhyatmik prakriti evan ishvar-prem ke lie avashyak hai. kundli men panch grah surya, brihaspati, shukra, shani evan dashmesh mangal ki yuti, dasham bhav men hai jo sanyas ka pramukh karan hai. grahon ki is yuti men navmesh aur panchmesh ki upasthiti ne ishvar-prem aur aradhna men vishesh ruchi utpann kar jivan se virakt kar diya. samanyatah shani ek krur grah hai aur prastut kundli men dampatya sukh ko kshin karne vala bhi hai kintu shani ka yah vishesh gun hai ki navmesh evan panchmesh se vishesh sanbandh hone par vicharon men shuddhata lata hai. atah panchmesh, navmesh aur dashmesh ke sath shani ki upasthiti ne vicharon men shuddhata ke sath-sath drirhta bhi pradan ki. in panch grahon men sarvadhik shaktishali grah surya ne sannyas ki prakriti ko ek tapasvi ke saman banaya. chandra man ka karak hai. man aur man ke bhatkne se sannyas sanbhav nahin hai atah yadi chandra ko keval shani hi dekhta ho, to vyakti sannyas ke kuch hi dinon bad apne samajik jivan men vapas a jata hai. kintu prastut kundli men chandra ko shani ke atirikt anya char grah bhi purn drishti se dekh rahe hain. falasvarup bhagvan buddh ne ek bar drirh nishchay ke sath sanyas grahan kar lene ke bad kabhi bhi apne purva jivan men vapsi ka vichar nahin banaya aur apni athak tapasya se gyan arjit kar sanpurn vishva ko ek aisa marg bataya jiske anusaran se aj bhi log labhanvit ho rahe hain.
Kya aapko lekh pasand aaya?
Subscribe