hast rekha se janie jatak ki vidya ruchi sat pramukh hast rekhaon men mastishk rekha aisi rekha hai, jo vyakti ka rujhan prakat karti hai. is rekha ka udgam kabhi ayushya rekha se hota hai, to kabhi yah svatantra rup se guru parvat ke mul se nikal kar age barhti hai. svatantra mastishk rekha ka arth hai niravlanbi vichar pranali, arthat svatantra nirnay kshamata, lagan evan ‘ekla chalo’ ki pravritti. aise jatak naukri nahin kar sakte. agar naukri karte bhi hain, to uchch pad par virajman hona hi pasand karte hain. mastishk rekha ka jhukav vyakti ki ruchi ki or ingit karta hai. yadi mastishk rekha chandra parvat ki or ja rahi hai, to jatak jarurat se jyada kalpanashil hota hai aur vyaparik vyavhar, uchch ganit evan vyavharik akalan shakti men asafal rahta hai. uski kalpanashilta se hi kala kshetra men uski shakti siddh hoti hai. iske viruddh, yadi yah rekha sidhi hatheli ke ant men a kar, upar budh parvat ki or mur kar samapt ho jae, to vyakti vigyannishth hota hai. nirarthak kalpana shakti ka abhav, kori akalan shakti, uchch bauddhik star, ek achche vaigyanik, ya taknishiyan ko janm dete hain. yadi yahi rekha adhe raste tak sidhi a kar, 85 digri ka kon banati hui, niche mur jae aur hatheli ke par ja kar samapt ho jae, to aise vyakti kalpana shakti evan vyavharikta ka samanvay sadhte hain. vyapar men in logon ko atyant labh hota hai. kisi ki hatheli ko apni hatheli men lene par sarvapratham hamen hatheli ki lanbai aur anguliyon ki lanbai men fark dikhta hai. kahin hatheli bari hai aur anguliyan tulnatmak rup se choti. kahin anguliyan hatheli se lanbi hain, to kahin donon saman anupat men hai. in anupaton ka apna alg-alag arth hai. yadi anguliyon ki apeksha hatheli bari hai, to vyakti samne ane vale tathyon par hi adhik vishvas karta hai. unhin ke adhar par kinhin thos parinamon par pahunchta hai aur nirnay lene men bhi saksham hota hai. vigyan bhi aise hi gunon ka mohtaj hota hai. vaigyanik kabhi bhi vyarth kalpana ko apni khoj, ya shodh ka adhar nahin banata. kuch anguliyan aisi dikhengi, jinki lanbai hatheli ki apeksha jyada hai. aise vyakti bhavnapradhan, hamesha svapn dekhne vale aur vastaviktaon se dur rahne vale hote hain. unhe sheksapiyar ki rachnaon ka arth jaldi samajh men aega. parantu rasaynshastra ka chota samikaran bhi unhen ubau aur duruh lagega. aise vyakti kala shakha ke uttam vidyarthi sabit hote hain. jinki anguliyon ka anupat hatheli ke saman hai, ve jivan men kalpana shakti aur vastavikta ka achcha mel sadhte hain. unhen prapt tathyon se satik anuman lagana ata hai aur unke adhar par turant nirnay lena aur karyavahi karna bhi ata hai. aise vyaktiyon ki vanijya kshetra men kafi unnati hoti hai; fir chahe ve kisi bhi star par karya kar rahe hon. guru parvat ke niche aur mangal se upar agar kraes hai, to jatak ko tatva gyan aur adhyatmik gyan milta hai. kanishthika anguli ke mul men til ho, ya fir mastak rekha ka ant chandra par do shakhaon se hota ho, to jatak ko vividh prakar ki vidya prapt hoti hai. budh ka parvat surya ki or dhalta ho aur sath men surya rekha aur budh rekha dosh mukt hon, to jatak daktar, vakil, ya achcha chitrakar ho sakta hai. vidya prapti ke bare men janne ke lie, mastak rekha ke alava, budh, surya, guru ke parvat ki sthiti dhyan men rakhni chahie. budh rekha kisi tirchi rekha se katti ho, ya ashubh chihnon vali ho, to vidya prapti men rukavten ati hain. sidhi, patli aur gahri mastak rekha achchi vidya ki suchak hai. madhyam anguli ke dusre por men ari rekha vala jatak anaparh rahta hai; ya fir thori bahut parhai ke bad bhi agyani hi rahta hai. jivan rekha ke sath mastak rekha agar janjirnuma ho, to jatak vidya men asafal rahta hai.
Kya aapko lekh pasand aaya?
Subscribe