dvitiya bhav men agni tatva rashisth surya ka fal acharya kishor dvitiya bhav ka vichar karte samay dhan, marak, netra, kutunb, vani, mukh, khadya, labh, hani adi ka vishesh rup se vichar karna chahie. yah sarvavidit hai ki raja, pita, neta, atma, mastishk, hriday, netra, uchch akanksha, garva, mahatva, adanbar, chikitsa, gau-palan, krishi karya adi surya ke karakatva men ate hain. surya ke dvitiya bhav men hone se jatak dhan sanpann hota hai aur use uttam rojgar tatha uchch pad ki prapti hoti hai. vah uttam khan-pan ka shaukin hota hai, uski vani ganbhir hoti hai aur uska svabhav ghamandi aur dusron ko adesh dene vala hota hai. vah parivar evan kutunb men apna varchasva dikhata hai. uske netra ujjval aur chamkdar hote hain. bhinna-bhinn rashiyon men bhinna-bhinn grahon ke apsi sanbandh ke anurup bhinna-bhinn fal milte hain. kabhi shubh fal milte hain to kabhi ashubh. vahin kabhi mishrit fal milte hain to kabhi koi fal nahin milta. yahan vibhinn agni tatva rashiyon men dvitiya bhavasth surya ke falon ka vishleshan prastut hai. mesh mesh rashi men surya uchch ka hota hai. yadi dvitiya bhav men mesh ka surya ho to vyakti ka lagn nishchit rup se min hoga. min lagn ke lie surya shashth bhav ka svami hota hai aur shashth bhav se shatru, krur kritya, rog, chinta, munhase adi ka vichar karte hain. yadi shashth bhav ka svami balvan ho to jatak ke shatruon ki sankhya bari hoti hai aur use jivan bhar sangharsh karna parta hai. vah rogi, ghamandi krur aur anyayi hota hai. use uchch padasth vyaktiyon se labh milta hai parantu sthir dhan ki prapti nahin hoti. uski vani asthir aur katu hoti hai. kintu is bhav par brihaspati ki drishti ho to jivika ke uttam sadhan prapt hote hain. vyakti apni santan ke lie shubh hota hai aur uska parivarik jivan sukhamay hota hai. vahin yadi mangal ki drishti ho to vah atyadhik ghamandi hota hai aur uski vani karkash hoti hai. kintu use jamin-jaydad ka labh milta hai. yadi is bhav ka shukra se sanbandh ho to vyakti ko netra rog hota hai. use patni se kasht milta hai aur uske parivar men ashanti rahti hai. yadi iska sanbandh budh se ho to makan ka labh milta hai. jatak desh videsh ka bhraman karta hai. budh ke vyapar ka grah hone ke karan vyakti ke vyapar men vriddhi hoti hai. kintu shani se sanbandh hone par dhan hani, sharirik kasht, rin aur duahkh ka samna karna parta hai. upar jin grahon ke bare men likha gaya hai, unke bal ka ganbhirtapurvak vishleshan kar hi faladesh karna chahie. prastut kundli ravindra nath taigor ki hai. unka janm 6-7 mai 1861 ko 2 bajakar 51 minat par hua. is kundli men kai rajyog hain. lagnesh guru ka pancham trikon ke svami chandra se parivartan yog hai. guru pancham bhav men uchchasth hai. yah sarvadhik prabal rajyog hai, islie taigor gyani, pandit aur darshanik the. fir bhi pancham sthan men brihaspati ne karak bhav nashay ke karan bhav ko hani pahunchai. taigor ko panch santanon men se keval do santanon ka hi sukh prapt ho saka. saptamesh budh surya evan shukra ke sath dvitiya bhav men hai. dvitiya bhav ke parivar evan kutunb ka bhav hone ke karan unka parivarik jivan kashtamay raha aur unhen stri aur putra ka viyog sahna para. budh evan shukra janmakundli men dvitiya bhav men hain, parantu navansh men budh aur shukra apni-apni rashi men hain. is yog ke falasvarup unke jivan men bahut si shubh ghatnaen bhi ghatin aur desh videsh men unhen khayati mili. kintu surya ke dvitiya bhav men hone ke karan shatruon ke sath sangharsh hona svabhavik tha, parantu shashth bhavasth shani ke karan shatru ka daman bhi hua aur chandra, brihaspati, shukra aur budh ke karan bane rajyog ke falasvarup shatru unka kuch nahin bigar pae. han, surya ki mahadsha men unhen stri aur putra ka viyog sahna para. taigor surya ki dasha men bar-bar videsh gae, kyonki surya saptamesh budh ke sath dvitiya bhav men sthit hai. unhonne shanti niketan jaisi sanstha ki sthapna ki. taigor ki kundli men lagn se saptam sthan ke madhya rahu ko chorakar sabhi grah vidyaman hain, islie unhen yash, kirti, dhan, man-samman sab mila. uchch sthan men surya aur guru ke hone ke karan unhen dirgh ayu bhi mili. ashtam sthan se guru kendra (dashm) men hai. sinh sinh rashi men surya svagrihi hota hai. surya dvitiya bhav men sinh rashi men ho to jatak ka lagn kark hota hai. yadi dhanesh svagrihi hokar dhan sthan men ho to jatak ko dhan ki kami sadharntya nahin hoti. uska rojgar uttam hota hai. vah svatantra vyavsay karta hai athva uski niyukti kisi uchch sarkari pad par hoti hai. jisse samaj men man-samman evan vishesh adhikar ki prapti hoti hai. sinh rashi ke sthir rashi hone ke karan jatak ka dhan sthir hota hai. uski vani ganbhir hoti hai. parivar men uska varchasva hota hai. parantu use patni evan putra se duahkhi hona parta hai. yahan par dhan evan vyay ke svami ka sanpark nahin hai. surya ka adhipatya keval sinh rashi par hota hai. surya apni dasha-antardasha men baki grahon se sanbandhon ke anurup arthat pap grahon se sanbandh hone par ashubh fal aur shubh grahon se sanbandh hone par shubh fal deta hai. dvitiya bhav marak bhav bhi hota hai, islie yahan surya marak bhi hai, parantu svagrihi hone ke karan marak dosh prabhavi nahin hoga. is lagn ke lie shani saptama-ashtam bhav ka svami hokar prabal marak hai. yadi shani ka sanbandh ya drishti surya par ho to surya marak ho jaega. yadi brihaspati ka sanbandh ho to dhan labh hoga. shukra se sanbandh ho to netra vikar ya ankhon ki bimari dega. chandrama ke sath sanbandh ho to svasthya par pratikul prabhav parta hai. mangal ke sath sanbandh ho to bhagya evan dhan ki vriddhi hoti hai. niche ek aise vyakti ki kundli ka vishleshan prastut hai jo ek garib parivar men janm lene ke bavjud bahut bara admi bana. jatak vidyarthi jivan pura karke ek bahut bare vakil bane. unka charitra asthir raha, kyonki budh lagnasth aur lagnadhipti chandra shani, shukra evan mangal se drisht hai. fir bhi amerika jaise desh men loksbha sadasya bane. unke vichar nakaratmak the fir bhi ve jan priya the. unmen rajnitik gun atyadhik the, kyonki kark lagn se dvitiya arthat vani bhav men mangal ke sath svarashisth surya ke karan nam aur yash ke sath-sath dhan ki prapti bhi hui. surya ki mahadsha men rajniti ke kshetra men vishesh saflta mili. yahan surya ko marak nahin man sakte. lekin chandra ki mahadsha men budh ki antardasha men ek atankvadi ki goli se ahat hue. yahan shukra ekadash bhav tatha chaturth kendra ka svami hokar prabal marak grah shani ke sath sthit hai. donon ki drishti chandra par hai. chandra lagn men gulik sthit hai aur us par mangal ki drishti bhi hai. guru ki rashi men bhagya bhavasth chandra dushit nahin hai. tritiya evan dvadash bhav ke svami budh ke lagn men hone ke karan chandra ki mahadsha men budh ki antardasha men unki mrityu hui. dhanu vrishchik lagn se dvitiya bhav ya dhanu rashi men dashmesh hokar surya ke sthit hone se jatak ko apne karm se paryapt labh milta hai. sath hi use rajyog bhi milta hai. use uchch pad ki prapti ki sanbhavna bhi rahti hai, kyonki surya apni rashi se pancham hota hai. pap grah surya kendresh hokar lagn se dvitiya bhav men sthit ho to jatak ko mantri pad jaise uchch pad ke sath-sath paryapt dhan ki prapti bhi ho sakti hai. dasham aur dhan bhav balvan hon to jatak yashasvi aur gunvan hota hai. yadi brihaspati ka sanbandh ho to santan sukh ki prapti hoti hai. kintu shani ke sath sanbandh hone par hani ki prabal sanbhavna rahti hai. shukra ka sanbandh ho to jatak vishyi aur striyon ke prati asakt hota hai. kintu is sthiti ke shukra ka marak prabhav bhi ho sakta hai. surya ka budh ke sath sanbandh ho to dhan ki vriddhi hoti hai. bhagyesh chandra ka sanbandh hone par jatak bhagyavan hota hai. in sare tathyon ko aur spasht karne ke lie niche ek karmachari ki kundli ka vishleshan prastut hai. is kundli men svagrihi mangal navansh kundli men uchch ka hone ke bavjud adhik balvan nahin hai, kyonki lagn kundli men nich ke chandra ke sath v mangal tatha shani se drisht hai. yahan sabse balvan surya hai, kyonki surya apne mitra brihaspati ki rashi men hai aur usse drisht bhi hai. surya se dasham ka svami budh hai. surya aur brihaspati donon budh ke navansh men hai, islie jatak balvan hai. dvitiya bhav men surya ke brihaspati ki drishti men hone aur surya se dasham bhav men rahu ke hone ke karan vyapar ke sath-sath rajniti men bhi surya ki mahadsha men saflta mili. kundli men chandra nichasth mangal ke sath v shani se drisht hai. surya se rahu 1350 aur ketu se 450 dur sthit hai. brihaspati mangal ki drishti men hai. is prakar jab-jab shubh grah ki drishti rahi tab-tab jatak ko rajyog mile, kintu jab-jab pap grah ki drishti rahi, yog prabhavhin bhi hote rahe. agni tatva rashi (dhanu rashi) men dvitiya bhav men sthit surya-budh par brihaspati aur pap grah shani ki drishti hai. yah ek stri, jo bhartiya prashasnik seva adhikari hain, ki kudli hai. mere vichar men yah ek kamjor adhikari rahin, kyonki lagn aur chandra donon ko shani evan surya ne pirit kiya hai, islie lagn kamjor sthiti men hai, parantu lagnesh mangal lagn evan chandra se kendra men hokar balvan hai. dasham bhav par mangal, shukra aur guru ki drishti hai dashmesh surya apne ghar se pancham sthan men kendra ka svami hokar balvan hai. bhav chalit men shani ke ekadash bhav men hone se uski purn drishti surya ke upar nahin par rahi, islie jatak jun 2006 (shukra ki mahadsha) tak kamjor adhikari rahin. fir bhi is kundli men kai rajyog hain. bhagyesh chandra lagn men nich rashi men nich bhang karke baitha hai, kyonki chandra vrishabh rashi men uchch hota hai aur vrish rashi ka svami shukra lagnesh mangal ke sath chaturth kendra men hai aur shukra evan shani ka parivartan yog hai. karm evan labh sthan ka svami surya evan budh dhan sthan men sthit hokar dhan rajyog banae hue hain. dhanesh guru evan dhankarak grah brihaspati apne hi rashi evan dhan sthan ko dekh rahe hain. sath-sath mangal evan shukra, surya navansh men vargottam hain. rajyog ke alava surya ka agni tatva rashi men balvan hona jatak ko is pad tak pahunchaya, kyonki surya dashmesh hai. mainne dekha hai ki grah kundli men jitne bhi balvan hon yadi uski dasha nahin ati to uska parinam kinchit rup se milta hai. tatparya yah hai ki prakritik pap grah kendra ka svami hokar guru ki drishti men yadi rajyog banata hai to surya ki mahadsha men jatak ko atyadhik shubh fal milta hai. vartaman samay men ukt jatka par jun 2006 se 2012 tak surya ki mahadsha chalegi. vartaman men jatka kendra sarkar men sachiv pad par asin hain. fir bhi jatak ko danpatya sukh nahin mila. shukra ki mahadsha men 1986 ke bad jatak ka talak ho gaya, kyonki saptamesh shukra mangal ke sath hai aur balvan surya evan budh (jo ashtamesh hai) ashtam bhav par drishti dal rahe hain. islie pati ka sukh inhen nahin mila. saptam se ashtam bhav men surya-budh ki sthiti aur is bhav par un ki drishti talak ka karan bana. chunki is bhav par guru ki drishti thi, keval isi karan inka vivah hua. surya ka dhan sthan men hona aur dhan sthan ke svami brihaspati ki is bhav par drishti inhen uchch shiksha ya pratiyogita ki taraf laya, kyonki guru panchmesh hai aur pancham se pancham bhagya sthan ke svami chandra se lagn men nich bhang ho raha hai. uchch shiksha ke lie pancham navam ka sanbandh avashyak hai. bhagyesh chandra navam se pancham men hai. navmesh pancham bhav se navam men hai aur surya dashmesh hai. surya se pancham men lagn se pancham bhav ka svami guru mesh rashi men sthit hai. surya evan guru donon agni tatva rashi men hain. surya raja hai, prashasak hai, sarkar hai, islie surya ki mahadsha men jatak ko sarkar ka uchch pad prapt hua. is prakar agnitatva rashiyon men dvitiya bhavasth surya anya grahon ke sath yuti ya drishti sanbandh ke anurup achcha ya bura prabhav deta hai. yadi surya ka bura prabhav mile to mantra jap, dan, puja adi kar usse mukti prapt ki ja sakti hai.
Kya aapko lekh pasand aaya?
Subscribe