kitna labhdayak hoga apke lie vyapar? do. arjun kumar garg is sansar men pratyek manushya achchi naukri ya vyavsay ko apni ajivika ke rup men apnana chahta hai, kintu yah saubhagya kisi birle ko hi milta hai. aisa kyon? jyotish shastra is vishay par vistar se prakash dalta hai. jyotish men kundli ka dasham bhav manushya ke karm ka sthan mana gaya hai. yadi dashmesh shubh grah se yukt hokar shubh sthan men sthit ho, to rajkiya madhyamon aur vyapar se dhan labh hota hai. iske viprit dashmesh ke ashubh sthan men hone se dhan ki hani hoti hai. maharshi garg aur varahmihir jaise mahan jyotish acharyon ka mat hai ki lagn aur chandrama men jo balvan ho, usse dasham bhav se karm aur manushya ki vritti ka gyan hota hai. maharshi garg ke anusar dasham bhavagat grah karm ko saflta pradan karte hain. yadi yah bhav kisi shubh grah ya uski drishti se vanchit ho, to jatak bhagyahin hota hai. jyotishacharyon ka yah bhi mat hai ki lagn, chandrama aur surya men jo bali ho, usse dasham bhav dvara karm ki prakriti aur jatak ki vritti ka vichar karna chahie. lagn se dasham bhav manushya ke daihik parishram ke dvara, chandrama se dasham bhav manushya ki mansik vritti ke dvara aur surya se dasham bhav uske atmabal dvara karm ki saflta, unnati aur arthik sanpannata ka bodh karate hain. faldipika ke anusar vyakti ka vyavsay uski janmakundli men us navansh adhipti ke anusar hota hai, jismen dashmesh sthit ho. jaise dhanu lagn ki kundli men dashmesh budh mithun rashi ke 170 19' anshon men hai. mithun ka chatha navansh 16040' se 20 anshon tak hai. atah dashmesh budh adhishthit mithun rashi ke chathe navansh arthat min rashi men hai. isse prakat hota hai ki jatak ka vyavsay min navansh pati guru ke anusar hoga. islie us jatak ke lie ved-puran, jyotish aur anya dharmik karyon adhyapan evan nyay adhikari ke rup men karya karne ke lie shreshth siddh honge. isi prakar anya grahon ke gun-dharm ke anurup ajivika sadhnon ki bhavishyavani ki ja sakti hai. kintu anya karkon ka bhi dhyan rakhna avashyak hai. kundli ka pratham bhav aur uska svami jatak ke vartaman jivan ke pratibinb hain. balvan lagna-lagnesh vyakti ko svasth aur dirghayu, atmabali, utsahi, samarthyavan, duradarshi aur sthirbuddhi banate hain. aise logon men tejobal aur purusharth ki prachurta hoti hai, jinse viprit paristhitiyon men bhi pragti ke path par agrasar hone ki prerna milti hai. aise logon ke gun, pad, man aur karm uchch shreni ke hote hain, jinse ghar-parivar, naukri-vyapar aur samaj men unka vishesh prabhutva hota hai. aise manushyon ka lagnesh dvitiya, ekadash, kendra ya trikon bhav men sva, uchch ya mitra rashi men shubh grahon se yukt ya drisht hokar sthit hota hai. iske viprit nirbal lagna-lagnesh jatak men vikritiyan utpann kar charitra, vyavhar, vyaktitva, bhagya nirman aur jivan ki pragti par nakaratmak prabhav dalte hain. kisi vyakti ko prayah aisi granthiyon ka abhas nahin hota aur yadi use inka abhas karaya jae, to vah unhen svikar nahin karta. aise logon men atmabal, utsah, sfurti aur prerna ka sarvatha abhav hota hai, jiske karan ve viprit paristhitiyon men adhik der tak sthir nahin rah sakte. unhen apne charon or bhay, dukh, nirasha aur hatasha ke badal mandrate hue dikhai dete hain, jinke karan unka vyaktitva shrihin ho jata hai. aise logon ka lagnesh trik bhav arthat 6, 8 ya 12 men pap grah se yukt ya drisht ya pap grah ki rashi men sthit hokar nirbal hota hai. atah balvan lagna-lagnesh ke logon ke lie hi vyapar upyukt hota hai, anya ke lie naukri. yadi lagnesh kendra ya trikon men ho, shubh grahon se yukt ya drisht ho, kisi shubh grah ke ghar men ho aur balvan ho, to jatak ka yash sudur deshon tak failta hai. lagnesh jis bhav ya jis bhavesh ke sang baitha ho, uska fal pradan karta hai. yadi lagnesh adhishthit bhav pusht ho to sukh aur yadi nirbal ho, to us bhav se sanbandhit kashton ka bolbala hota hai. lagnesh naisargik rup se chahe shubh ho ya papi, vah adhishthit bhav ke shubh prabhav ko barhata hai. mesh lagn ki kundliyon men lagnesh mangal ashtamesh bhi hai, fir bhi vah adhishthit bhav ki hani nahin karta, balki uski shubhta ko barhata hai. ek tathya yah hai ki shubh grahon ki unke shubh hone matra se shubhta nahin hoti aur pap grahon ki unke papi hone matra se ashubhta nahin hoti. lagnesh chahe shubh grah ho ya krur, yadi vah shadabal, sthanabal, kalabal, dikbal, cheshtabal aur drigbal men bali ho aur shubh vargon men sthit ho, to achche fal pradan karta hai. prayah sabhi mahapurushon, vyapariyon aur rajnitigyaon ki kundliyon men lagna- lagnesh bahut balvan hote hain. dhirubhai anbani ke lagn, chandra aur surya tinon lagn balvan hain, jin par pap grahon ka koi prabhav nahin hai. unka janm ghor arthik badhali men hua. unki lagnakundli men lagnesh guru dasham bhav men aur chalit kundli men bahut balvan hai, islie unhonne apna jivan shunya se shuru karke lagnesh guru ki mahadsha (mai, 1982 se mai, 1998 tak) men apar pragti ki aur 1 lakh karor ke samrajya ki sthapna karke markesh shani ki mahadsha men is sansar se vida ho gae. dhiru bhai ki kundli men surya, budh, brihaspati aur shani ye charon grah bahut balvan the, islie unhen apne karm ke pragti path par asfltaon ka mukh nahin dekhna para. isi prakar, amitabh bachchan ke jivan men pragti ka daur lagnesh shani ki mahadsha ( disanbar , 1970 se disanbar, 1989 tak) men praranbh hokar yash, dhan, sanpatti, stri, santan adi ke sukhon ke shikhar tak pahuncha. unka lagnesh shani chaturth bhavagat vrish rashi ke 19013' anshon men bahut balvan hai aur sabhi pap prabhavon se mukt hai. anek aise log hain, jinki kundliyon men lagn aur lagnesh balvan hain, fir bhi unhen apne jivan men vyavsayik safltaon ka sukh nahin mila. purva janm ke kuch sukarmon ke karan lagn aur lagnesh balvan ho jate hain, to jatak ko svasth deh aur dirghayu pradan karte hain. iske viprit kisi kundli men trikon bhav nirbal ho jate hain, to jatak ko manvanchit safltaon ka sukh nahin mil pata. sarvavidit hai ki kundli men trikon ke rup men navam bhav sarvashreshth sthan hota hai aur guru iska karak grah hai. jab ye donon balvan hote hain, to manushya ko alp parishram se kai guna adhik fal prapt hote hain. parishram aur purusharth ke sath yadi bhagya bhi sundar ho, to manushya saflta ki bulandiyon ko avashya chuta hai. dusri or navam bhav aur guru ke pirit hone se kai guna anisht aur kashtakari fal prapt hote hain. iska karan yah hai ki trikon bhav ki nirbalata se jatak men bauddhik chaturya, tarkik shakti aur duradarshita ka nitant abhav ho jata hai, islie aisi avastha men jatak ke dvara lie gae nirnay samay aur karm ke lie pratikul siddh hote hain. yah bhagyahinta ki avastha hai. prayah yah kaha jata hai ki manushya sahas ke sath purusharth karta rahe, to uska bhagyoday hota hi hai. kintu, jin vyaktiyon ke kendra aur trikon bhav nirbal hote hain, unke samaksh durbhagya ki sthiti ati hi hai, jiske karan unka parishram aur purusharth nishfal hote hain. jyotish shastra ke drishtikon se aise manushya kadapi vyapar ki or unmukh n hon. kendra aur trikon bhavon ka sanbandh yadi trik bhavon aur kisi anya pap grah se ho to ve nirbal hote hain. vyavsay-vyapar ka dhan se atut sanbandh hai. bina dhan ke vyapar ho hi nahin sakta. sarvavidit hai ki kundli men ekadash bhav dhanoparjan ka aur dvitiya bhav dhan samriddhi ka sthan hai. lagn, dvitiya aur ekadash bhavon men shubh grah tatha in bhavon ka apas men shubh sanbandh anek sroton se dhan sanchay ke prerak hote hain. in bhavon men pap grahon surya, mangal, shani, rahu aur ketu men se koi ek sthit ho to vah dhan-samriddhi men badhak nahin hota. keval do ya adhik pap grahon ka samuh dhannashak hota hai. vyapar prayah unhin manushyon ke lie labhaprad hota hai, jinki kundliyon men dhan bhav balvan ho arthat usmen sthit grah, us par drishti dalne vale grah shubh ya yog karak hon aur dhanesh bali avastha men ho. amitabh bachchan ki kunbh lagn ki kundli men dhanesh guru shashth bhavagat kark rashi men hai. shashth bhav ek papi sthan hai, jismen kendresh, trikonesh aur dhanesh apna bal kho dete hain, kintu is kundli men dhanesh uchch rashi men hone ke karan apna bal nahin khoya. isi prakar tula lagn ki kundli men ashtam bhavagat vrish rashisth dashmesh chandrama apna bal nahin khota, basharte use koi pap grah pirit n kare. lagn, dvitiya aur ekadash bhavon ke apsi shubh sanbandh se jatak apne parishram aur prayatn se dhan prapt karta hai. yadi kisi bhavesh ka lagn ya lagnesh se sanbandh ho aur sath hi kisi dhandayak grah jaise dvitiyesh, labhesh, chaturthesh, panchmesh, navmesh aur dashmesh se bhi sanbandh ho to jatak ko usi bhavkarak se dhanoparjan men sahayta milti hai. jaise kisi vyakti ki kundli men panchmesh lagn bhavagat ho ya lagnesh ke sang sthit ho aur kisi dhandayak grah se yut ya drisht ho, to vah apni santan ki sahayta se dhanoparjan karega. isi prakar saptamesh ka lagn ya lagnesh se aur sath hi kisi dhandayak grah se bhi sanbandh ho to jivnsathi ki sahayta se dhanoparjan karega. dhirubhai ki kundli men dhanesh svagrihi hai aur ekadash bhav par driisht dal raha hai. lagnesh guru dasham bhav se dhan sthan aur dhanesh donon ko dekh raha hai. is prakar lagn, dhan aur labh sthanon ka sanbandh parakram dvara prapti ka dhan yog sthapit kar raha hai. atah unhen apne vyapar men kisi anya ki sahayta ki avashyakta nahin hui. iske atirikt unki kundli men anya sabhi dhandayak grah balvan hain, jaise lagnesh dasham bhav men, bhagyesh surya lagn bhav men aur panchmesh mangal navam bhav men bahut balvan avastha men hain. yah grahyog uchch shreni ke vyapar, dhan samriddhi tatha parivarik, samajik aur rajnaitik star par uchchata ka karak banakar dhirubhai ko prasiddhi dilai. vyapar ke ichchuk vyaktiyon ko yah sunishchit kar lena chahie ki unki kundli men lagna-lagnesh, dhan sthan, dhandayak grah aur guru balvan hon, parakram se dhanarjan ka yog ho athva kisi anya vyakti ki sahayta se dhan prapti ka yog ho. fir kundli evan anya grah yog se jis vyavsay ka sanket mile, use hi ajmaen.