achla saptami vrat  

achla saptami vrat (02 farvri 2009) pan. brajkishor bharadvaj 'brajvasi' achla saptami ek divya vrat hai aur iske palan se vividh kamnaen purn ho jati hain. achla saptami ka vrat magh mas ke shuklapaksh ki saptami ko kiya jata hai. yah saptami puranon men rath, surya, bhanu, ark, mahti, arogya, putra, saptasaptami adi anek namon se prasiddh hai aur anek puranon men un namon ke anurup vrat ki alg-alag vidhiyon ka ullekh hai. yahan bhavishya puran men varnit is vrat ki katha, mahatmya aur vidhan sankshep men prastut hai. ek bar raja yudhishthir ne bhagvan shrikrishn se pucha- 'bhagavan! apne uttam falapradata 'magh snan' ka vidhan bataya tha, parantu jo pratahkal snan karne men asamarth hon ve kya karen? striyan ati sukumari hoti hain, ve kis prakar magh snan ka kasht sahan kar sakti hain? islie ap koi aisa upay bataen ki thore se parishram ke dvara nariyon ko rup, saubhagya, santan aur anant punya ki prapti ho.' bhagvan shrikrishn bole- 'maharaj! main achla saptami vrat ka vidhan batlata hun. yah vrat karne se vrati ko sab uttam fal prapt ho sakte hain. is sanbandh men ap ek katha sunen. magadh desh men indumti nam ki ek ati rupvti veshya rahti thi. ek din vah pratahkal baithi-baithi sansar ki anavasthiti (nashvarta) ka is prakar chintan karne lagi- 'dekho! yah vishay rupi sansar-sagar kaisa bhayankar hai, jismen dubte hue jiv janm, mrityu, jara jaise jal-jantuon se pirit hote hue bhi kisi prakar par nahin utar pate. brahmaji ke dvara nirmit yah prani samuday apne kie gae karmarupi indhan evan kalrupi agni se dagdh kar diya jata hai. praniyon ke jo dharm, arth, kam se rahit din vyatit hote hain, ve vapas kahan ate hain? jis din snan, dan, tap, vrat, hom, svadhyay, pitritarpan adi satkarm nahin kie jate, vah din vyarth hota hai. putra, stri, ghar, kshetra tatha dhan adi ki chinta men dube manushya ki sari ayu bit jati hai aur mrityu akar daboch leti hai.' is prakar kuch nirvinna-udvign hokar sochti-vicharti hui vah veshya maharshi vashishth ke ashram men gai aur unhen pranam kar hath jorakar kahne lagi- 'bhagavan! mainne n to kabhi koi dan kiya, n jap, tap, vrat, upvas adi satkarmon ka anushthan kiya aur n hi shiv, vishnu adi ki aradhna ki. ab main is bhayankar sansar se bhaybhit hokar apki sharan men ai hun, ap mujhe koi aisa vrat batlaen jisse mera uddhar ho jae.' vashishth ji bole- 'varanne! tum magh mas ke shukla paksh ki saptami ko snan karo. is snan se rup, saubhagya adi sabhi fal prapt hote hain. shashthi ke din ek bar bhojan karke saptami ko pratah kal hi aise naditat athva jalashay par jakar dipdan aur snan karo, jiske jal ko kisi ne snan kar hilaya n ho, kyonki jal mal ko prakshalit kar deta hai. bad men yathashakti dan bhi karo. isse tumhara kalyan hoga.' vashishth ji ka aisa vachan sunakar indumti apne ghar vapas laut ai aur unke dvara batai gai vidhi ke anusar usne snan-dhyan adi karmon ko sanpann kiya. saptami ke snan ke prabhav se chirkal tak sansarik sukhon ka upbhog karti hui vah deh tyag ke pashchat devraj indra ki sabhi apsaraon men pradhan ke pad par adhishthit hui. yah achla saptami sanpurn papon ka prashaman karne vali tatha sukh-saubhagya ki vriddhi karne vali hai.' raja yudhishthir ne pucha- 'bhagavan! achla saptami vrat ka mahatmya to apne batlaya, kripakar ab snan vidhi bhi batlaen. bhagvan shri krishn bole- 'maharaj! shashthi ke din ekbhukt hokar surya narayan ka pujan karen. yathasanbhav saptami ko pratahkal hi uthakar nadi ya sarovar par jakar arunoday vela men snan karne ki cheshta karen. svarn, chandi athva tamra ke patra men kusunbh rang se rangi hui batti aur til ka tel dalakar dipak prajvalit karen. us dipak ko sir par rakhakar hriday men bhagvan surya ka is prakar dhyan karen. namaste rudrarupay rasanampataye namah. varunay namaste'tu harivas namo'stu te॥ yavajjanm kritan papan maya janmasu saptasu. tanme rogan ch shokan ch makri hantu saptami॥ janni sarvabhutanan saptami saptasaptike. sarvavyadhihre devi namaste ravimandale॥ (uttaraparva 53. 33-35) tadnantar dipak ko jal ke upar taira den, fir snan kar devtaon aur pitron ka tarpan karen aur chandan se karnika sahit ashtadala-kamal banaen. us kamal ke madhya men shiv-parvati ki sthapna kar pranav mantra se puja karen aur purvadi ath dalon men kram se bhanu, ravi, vivasvan, bhaskar, savita, ark, sahasra kiran tatha sarvatma ka pujan karen. in namon ke adi men '¬' kar, chaturthi vibhakti tatha ant men 'namah pad lagaen, yatha-'¬ bhanve namah', ¬ravye namah' ityadi. is prakar pushp, dhup, dip, naivedya tatha vastra adi upcharon se vidhipurvak bhagvan surya ki puja kar-'svasthanan gamyatam' kahakar visarjit kar den. bad men tamra athva mitti ke patra men gur aur ghrit sahit til churn tatha svarn ka tal patrakar ek kan ka abhushan banakar patra men rakh den. anantar rakt vastra se use dhakakar pushpa-dhupadi se pujan karen aur vah patra durbhagya tatha duahkhon ke vinash ki kamna se kisi brahman ko de den. tadnantar 'saputrapshubhrityay me'rko'yan priyatam' putra, pashu, bhritya-samanvit mere upar bhagvan surya prasann ho jaen aisi prarthana karen. fir guru ko vastra, til, go aur dakshina dekar tatha shakti ke anusar anya brahmanon ko bhojan karakar vrat ka paran karen. jo log is vidhi se achla saptami ko snan karte hain, unhen sanpurn magh snan ka fal prapt hota hai. vrat ke rup men is din namak rahit ek samay ekann ka bhojan athva falahar karna chahie. manyata hai ki achla saptami ka vrat karne vale ko varsh bhar surya vrat karne ka punya prapt ho jata hai. jo achla saptami ke mahatmya ka shraddha-bhakti se vachan, shravan tatha updesh karega, vah uttam lok ko avashya prapt karega.' bhartiya sanskriti men vrat, parva env utsavon ki vishesh pratishtha hai. yahan prati din koi-na-koi vrat, parva ya utsav manaya jata hai. achla saptami ek divya vrat hai aur iske palan se vividh kamnaen purn ho jati hain, atah stri-purushadi sabhi ko is vrat ka palan avashya karna chahie.