kanvar yatra - virat dharmik ayojan rekha kalpadev anek tarah ke rup rang aur akar vali saji kanvron ko uthakar lanbi yatra karna jivat ka kam to hai hi lekin usse bhi adhik mahatvapurn hai is param pavitra ayojan se sanbandhit niyam adi ka kathorta aur nishthapurvak palan jo shiv bhakt ko apne isht dev aur jalabhishek karte samay unke sath bhavna ki drishti se lagabhag ekakar kar deta hai. ap jante hi hain, yah yatra virat kunbh mele ke saman hi anant dhara ki tarah hoti hain. kavar ka mul shabd hai ‘‘kanvr’’ jismen shiv bhakt apne kandhe par pavitra jal ka kalash lekar paidal yatra karte hue isht shivlingon tak pahunchte hain. pitribhakt shravan kumar ko pratham kanvar charhane vala mana jata hai. kanvar yatra nikalne ke piche ek tathya yah bhi hai ki bhagvan ashutosh devi ganga ko jyeshth dashhre ke din is prithvi par the. ganga unki jataon men virajman huin. islie bhagvan shankar ko ganga atyant priya hain. gangajal ke abhishek se vah atyant prasann hote hain. isi ke sath dugdh, belapatra aur dhatura arpit karne se bhagvan ashutosh bhakt par prasann hote hain aur us par kripa karte hue manokamnaon ki purti karte hain. shraddhalu shiv bhakt shravan mas men somvar ke din vrat rakhte hain aur bhagvan bholeshankar ki aradhna karte hue unke anekanek priya padarth unhen arpit karte hain. bharat men to shravan mas men shivabhakti ka virat rup aur astha ka anant pravah kanvar yatra ke rup men drishtigochar hota hai. hindu dharm men mana jata hai ki bhagvan shiv is pure jagat ka sanchalan karte hain aur sanhar bhi. yahi karan hai ki dharm shastron men shravan mas men bhagvan shiv ki aradhna ka shesh mason ki tulna men adhik mahatva hai. shastron men shravan mas ke mahatva ko batane vale anek dharmik prasang hain. inmen amrnath tirth men bhagvan shankar dvara mata parvati ko sunai gai amaratva ki kahani ka sabse adhik dharmik mahatva hai. pauranik manyata hai ki bhagvan shankar ne amaratva ka rahasya batane ke lie kahani mata parvati ko ekant men sunai. kahani sunne ke dauran mata parvati ko nind a gai. kintu us kahani ko us sthan par maujud shuk yani tote ne sun liya. kahani sunakar shuk amar ho gaya. isi shuk ne bhagvan shankar ke kop se bachakar bad men shukdev ji ke rup men janm liya. iske bad shukdev ji ne yah amar katha naimisharanya kshetra men bhakton ko sunai. manyata hai ki yahin par bhagvan shankar ne brahma aur vishnu ke samne shap diya ki ane vale yug men amar katha ko sunne vale amar nahin honge. kintu yah katha sunakar purva janm aur is janm men kie pap aur doshon se mukt ho jaenge. un bhakton ko shivlok milega. khas taur par savan ke mah men is amar katha ka path karne ya sunne vala janma-maran ke bandhan se chut jaega. dusri pauranik manyata ke anusar markandu rishi ke putra marakandey ne lanbi umra ke lie shiv ki prasannata ke lie shravan mas men kathin tap kiya jiske prabhav se mrityu ke devta yamraj bhi parajit ho gae. yahi karan hai ki shravan mas men shiv aradhna ka vishesh mahatva hai. is mas men shankar ji ki yathopchar puja, amar katha ka path karne ya sunne par laukik kashton se mukti milti hai jinmen parivarik kalah, ashanti, arthik hani aur kalasarp yog se ane vali badha shamil hai. is prakar shravan mas men shiv puja se grah badhaon aur pareshaniyon ka ant hota hai. shivji ek matra aise devta hain jinhen ling rup men puja jata hai. shiv hi ve devta hai jinhonne kabhi koi avtar nahin liya. shiv kalon ke kal hai yani sakshat mahakal hain. ve jivan aur mrityu ke chakra se pare hain islie samast devtaon men ekmatra ve parabrahm hai islie keval ve hi nirakar ling ke rup men puje jate hain. is rup men samast brahmand ka pujan ho jata hai kyonki ve hi samast jagat ke mul karan hai. shiv ka pujan ling rup men jyada faldayak mana gaya hai. kanvar yatra ke samay in baton ka rakhen dhyan hamare desh men prachin kal se kanvar yatraen nikali ja rahi hai. kuch log kanvar yatra ke sirf dharmik paksh ko hi jante hain jabki kanvar yatra ka manovaigyanik paksh bhi hai. kanvar yatra vastav men ek sankalp hoti hai, jo shraddhalu dvara liya jata hai. kanvar yatra ke dauran yatriyon dvara niyamon ka palan sakhti se kiya jata hai. kanvar yatriyon ke lie kisi bhi prakar ka nasha varjit rahta hai. is dauran tamsi bhojan yani mans, madira adi ka sevan bhi nahin kiya jata. bina snan kie kanvar yatri kanvar ko nahin chute. tel, sabun, kanghi karne v anya shrringar samagri ka prayog bhi kavar yatra ke dauran nahin kiya jata. kanvar yatriyon ke lie charpai par baithna evan kisi bhi vahan par charhna bhi nishedh hai. chamre se bani vastu ka sparsh evan raste men kisi vriksh ya paudhe ke niche kanvar rakhne ki bhi manahi hai. kanvar yatra men bol bam evan jay shiv-shankar ghosh ka uchcharan karna tatha kanvar ko sir ke upar se lene tatha jahan kanvar rakhi ho uske age bagair kanvar ke nahin jane ke niyam ka palan kiya jata hai. is tarah kathin niyamon ka palan kar kanvar yatri apni yatra purn karte hain. in niyamon ka palan karne se man men sankalp shakti ka janm hota hai. shastrokt niyam-vidhan anusar shivling puja shubh fal dene vali mani gai hai. in niyamon men ek hanai shivling puja ke samay bhakt ka baithne ki disha. jante hain shivling puja ke samay kis disha aur sthan par baithna kamnaon ko pura karne ki drishti se vishesh faldayi hai. 1. jahan shivling sthapit ho, usse purva disha ki or chehra karke nahin baithna chahiye kyonki yah disha bhagvan shiv ke age ya samne hoti hai aur dharmik drishti se dev murti ya pratima ka samna ya rok thik nahin hoti. 2. shivling se uttar disha men bhi n baithe kyonki is disha men bhagvan shankar ka bayan ang mana jata hai, jo shaktirupa devi uma ka sthan hai. 3. puja ke dauran shivling se pashchim disha ki or nahin baithna chahie kyonki vah bhagvan shankar ki pith mani jati hai. islie piche se devpuja karna shubh fal nahin deta. 4. is prakar ek disha bachti hai - vah hai dakshin disha. is disha men baithakar puja, fal aur ichchapurti ki drishti se shreshth mani jati hai. 5. saral arth men shivling ke dakshin disha ki or baithakar yani uttar disha ki or munh kar puja aur abhishek shighra fal dene vala mana gaya hai. islie ujjain ke dakshinmukhi mahakal aur anya dakshinmukhi shivling ki puja ka bahut dharmik mahatva hai. 6. shivling puja men sahi disha men baithne ke sath hi bhakt ko bhasm ka tripund lagana, rudraksh ki mala pahnna aur bilvapatra avashya charhana chahie. agar bhasm upalabdh n ho to mitti se bhi mastak par tripund lagane ka vidhan shastron men bataya gaya hai. aisa mana jata hai ki jab sare devta shravan mas men shayan karte hain to bholenath ka apne bhakton ke prati vatsalya jagrit ho jata hai. kanvar ka jal keval 12 jyortilingon aur svayanbhu shivlingon (jo svayan prakat hue hain) par hi charhaya jata hai. pran pratishthit murtiyon aur shivlingon par kanvar ka jal nahin charhaya jata. sanpurn bharat men bhagvan shiv ka jalabhishek karne ke lie bhakt apne kandhon par kanvar lie hue gomukh (gangotri) tatha anya samast sthanon par jahan bhi patit pavni ganga virajman hain, se jal lekar apni yatra ke lie nikal parte hain. uttar bharat men vishesh rup se pashchimi uttarapradesh men gat 10 varshon se adhik samay se kavanr yatra parva ek kunbh mele ke saman maha ayojan ka rup le chuki hai. bhakt log apni shraddha ke anurup sarvapratham apni samathrya, samay, apne gantavya ki duri ke anusar gangotri ya haridvar, rishikesh se jal lene ke lie bas, tren adi se pahunchte hain. haridvar men sarvadhik anavarat manav pravah rahta hai. ganga snan ke pashchat jal bhar kar paidal yatra sanpann ki jati hai. desh ke anya sthanon men bhi kisi n kisi rup men sanpurn shravan mas men aise hi vishisht ayojan chalte rahte hain. shravan mas ke shivratri parva se lagabhag 10-12 din purva se chalne vala yah jan sailab astha, shraddha, vishvas ke sahare hi apni kathin thakan bhari yatra puri karta hai. in shiv bhakton ko apne parivar se duri, kabhi umas, kabhi bhari bhishan garmi to kabhi nirantar varsha ke karan jal bhari sarken, gaddhe, bhayankar vayaral, ai flu, pechish, atisar adi rogon ki mar bhi diga nahin pati. antim do din to yah yatra akhand chalti hai. kanvar yatra ka ek mahatva yah bhi hai ki yah hamare vyaktitva ke vikas men sahayak hoti hai. lanbi kanvar yatra se hamare man men sankalp shakti aur atm vishvas jagta hai. ham apni kshamataon ko pahchan sakte hain, apni shakti ka anuman bhi laga sakte hain. ek tarah se kanvar yatra shiv bhakti ka ek rasta to hai hi sath hi yah hamare vyaktigat vikas men bhi sahayak hai. yahi vajah hai ki shravan men lakhon shraddhalu kanvar men pavitra jal lekar ek sthan se lekar dusre sthan jakar shivlingon ka jalabhishek karte hain.
Kya aapko lekh pasand aaya?
Subscribe