muhurta: mahatva evan upyogita dae. bhagvan sahay shrivastav ek jigyasa aksar utha karti hai ki muhurt kya hai, ya ki muhurt kise kahte hain. yahan yah spasht kar dena uchit hai ki kisi karya ke safal sanpadan ke nimitt jyotishiya ganna par nirdharit samay muhurt kahlata hai. bhartiya jyotish men muhurt ka sarvadhik mahatva hai. muhurt ki apni vaigyanikta, apna mahatva hai. iska nirdharan yadi jyotishiya siddhanton aur brahmand men vicharan kar rahe grahon ki sthitiyon ki ganna ke adhar par kiya jae to karya ki saflta ki sanbhavna kai guna barh jati hai. garbha-dharan se antim sanskar tak har sanskar men muhurt ki bhumika aham hoti hai. aj ke vaigyanik yug men chikitsa vigyan men muhurt atyant shubh, sarthak, labhkari v kalyankari siddh ho rahe hain. abhipray: jivan ko sukhamay banane hetu samanyatya har sanatan dharmavlanbi dharmik anushthan, tyohar, sabhi sanskar, griharanbh tatha grihapravesh, yatra, vyaparik karya adi ke sath-sath apna har shubh karya muhurt ke anurup karta hai. is tarah jivan ko sukhamay banana muhurt ka abhipray hai. muhurt ke mahatva ko yahan prastut ek udaharan se samjha ja sakta hai. gehun surya ke svati nakshatra men ane par boya jata hai. iski boai yadi surya ke tula rashi men 6 ansh 40 kala se 20 ansh ke madhya hone par ki jae to fasal achchi hogi. yah samay har varsh kartik mas men parta hai. kaha bhi gaya hai - ’chana chittara chaiguna, svati gehun hoy.’ kisan ganv ke kisi jyotishi ya pandit se is muhurt ka pata kar gehun ki boai karte hain. iske viprit yadi kisi anya samay men iski boai ho, to fasal achchi nahin hogi. ashubh muhurt men kie gae karya ka parinam ashubh hota hai. drashtavya hai ki bharat ko svatantrata 15 agast 1947 ki madhya ratri ko vrish lagn men mili thi. us samay vrish lagn men rahu tha aur kendra sthan khali the. sare grah kalasarp yog men the. jyotish men yah yog bara ashubh mana jata hai. iske parinamasvarup svatantrata prapti ke bad hui rashtrapita ki hatya aur anya ghatnaon se sabhi parichit hain. muhurt men tithi v var ke bad nakshatra ka vishesh mahatva hai. saurmandal men asankhya chote-bare tare bikhre hue hain, jinke apne-apne samuh hain. in samuhon ko nakshatra kahte hain. nakshatra mukhyatah sattais hain kintu uttarasharha ke chaturth charan aur shravan nakshatra ke man ke pandrahven bhag (4 ghatiyan) ke samay ko abhijit nakshatra ki sangya di gai hai, jisse inki sankhya atthais mani gai hai. abhijit nakshatra sabhi karyon hetu shubh mana gaya hai. abhijit ek ati shubh muhurt hai. pratyek din ka madhyahn bhag abhijit muhurt kahlata hai, jo madhyahn se pahle aur bad men 2 ghari arthat 48 minat ka hota hai. dinman ke adhe samay ko sthaniya suryoday ke samay men jor den to madhyahn kal spasht ho jata hai, jismen 24 minat ghatane aur 24 minat jorne par abhijit ka praranbh kal aur samapti kal nikal ata hai. abhijit kal mane lagabhag sabhi doshon ke nivaran ki adbhut shakti hai. jab mundnadi shubhkaryon ke lie shuddh lagn n mil raha ho, to abhijit muhurt men shubhkarya ho sakte hain. abhijit ke bad krittika anya sabhi muhurton se adhik shubh muhurt hai. yah ek stri sangyak muhurt hai jiska sanbandh agni se hai. ise sat siron vala nakshatra bhi kaha gaya hai. chaighriya vichar: chaighriya muhurt men shubh, char, amrit aur labh ke chaighriya shubh aur udveg, rog tatha kal ke chaighriya ashubh hote hain. ashubh chaighriya muhurton ka yatnapurvak tyag karna chahie. dinman ko (suryoday se suryast ke samay ko) 8 se bhag dene par prapt hone vala samay din ki ek chaighriya ka samay hota hai. isi prakar ratriman (suryast se suryody) ke samay ko 8 se vibhajit karne par prapt samay ratri ke ek chaighriya ka samay hota hai. chaighriya muhurton ke svami kramshah udveg ke surya, char ke shukra, labh ke budh, amrit ke chandra, kal ke shani, shubh ke guru aur rog ke svami mangal hain. atah kisi disha ki yatra men sanbaddh chaighriyon ke svamiyon ka vichar bhi kar lena chahie. dishashul men varjit disha ki yatra ukt chaighriyon men nahin karni chahie. udaharan ke lie amrit ka chaighriya (shubh) hone par bhi purva disha ki yatra n karen kyonki amrit ka svami chandra hai aur chandravar ko purva men dishashul hota hai. dishashul vivechan purva disha - somvar, shanivar dakshin disha- guruvar pashchim disha- ravivar, shukravar uttar disha- budhvar, manglvar dishaon ke samne die gae varon men ukt disha men dishashul hota hai atah us din us disha men yatra n karen. ravivar, guruvar aur shukravar ke dosh ratri men tatha somvar, manglvar aur shanivar ke dosh din men prabhavi nahin hote hain. budhvar har prakar se tyajya hai. atyavashyak hone par ravivar ko pan ya ghi khakar, somvar ko darpan dekhakar ya dudh pikar, mangal ko gur khakar, budhvar ko hari dhaniya ya til khakar, brihaspativar ko jira ya dahi khakar, shukravar ko dahi ya dudh pikar aur shanivar ko adarak ya urad khakar prasthan kiya ja sakta hai. yadi ek hi din men gantavya sthan par pahunchna aur fir vapas ana nishchit ho to dishashul par vichar ki avashyakta nahin hai. guru aur shukra ke ast samkal men varjit karma: guru aur shukra ke ast hone par griharanbh tatha grihapravesh, kuan-talab adi ka nirman, vrataranbh, vratodyapan, namakaran, mundan, karnavedh, yagyaopvit, sagai-vivah, vadhu pravesh, godan, dev pratishtha (murti sthapna), chaturmasya prayog, agnihotra (yagya) praranbh, sakam anushthan, yatra, diksha, sannyas grahan adi shubh karya shastra vachnanusar nishiddh evan tyajya mane gae hanai. vyaktigat karmon ke atirikt rajkiya karyon men bhi muhurt labhkari siddh hote hain. udahrnarth shapath grahan, shanti prastav adi bhi shubh muhurt men hi karne chahie. dainik karyon men bhi muhurt ke mahatva ko nakara nahin ja sakta. aj manav jati vibhinn rogon tatha dukhon se grast hai. anukul muhurton ke prayog se in dukhon se mukti sanbhav hai. muhurt ke prayog se pichle kukarmon ke dushprabhav ko kam kiya ja sakta hai. janmakundli dvara vibhinn rogon ki janch evan akalan arthat dayagnaesis kiya ja sakta hai. avashyakta hai sukshm vishleshan kar shubh muhurt ke nirdharan v satik prayog ki. is tarah manav jivan ko sukhamay evan samriddh banane men muhurt ki bhumika aham hoti hai. kisi karya ki saflta upyukt aur suvivechit muhurt par nirbhar karti hai. islie shastron tatha rishi muniyon ke nirdeshansuar har karya shubh muhurt men hi karna chahie.
Kya aapko lekh pasand aaya?
Subscribe