vatavaran ko anukul banane men shriyantra ka sahyog  

vatavaran ko anukul banane men shri yantra ka sahyog pan. ramesh shastri kisi bhi jatak ko adhik safal evan sabal hona hai, to uske aspas ke vatavaran ka anukul hona avashyak hota hai. aise men yadi bhautik, athva vaigyanik paddhati se vatavaran ko prabhavit karna pare, to yah mahanga evan kathin hoga. yadi isi vatavaran ka sudhar ratnon ke shri yantra ki sthapna se kiya jae, to vah kam kharchila evan adhik labhkari hoga. jyotishiya samagriyon men shri yantra ka bahut mahatva hai. yah bat bhi sarvavidit hai ki ’shri’ ki akanksha har kisi ko hoti hai. shri yantra dhan se sanbandhit to hai hi, sath hi mansik shakti, samanjasya evan ekta tatha saflta ka bhi labh deta hai. shri yantra ke akar, dhatu, pashan se uske nyunadhik labhkari hone ka nirnay kiya jata hai. sumeru shri yantra ko pashan (patthar, athva ratna) men nirmit kiya jae, to uski gunavatta barh jati hai. bhale hi iska mulya adhik ho, par shastron men iski mahima prabal batai gai hai. jatak ke n chahne par bhi kai aise lakshmi dosh lag jate hain, jinke karan unke jivan men dhan, svasthya evan prasiddhi ki hani hoti jati hai, athva inko pane men adhik kathinaiyon ka samna karna parta hai. yadi shri yantra sumeru, arthat parvatakar ho tatha kisi ratn se nirmit ho, to uski gunavatta koti guna adhik ho jati hai. atah jyotishiya samagri ki shrinkhla men sangsitara evan maragaj ke shri yantra ko sarvopri man sakte hain. ratn hone ke karan inka mulya, anya ki apeksha, adhik ho sakta hai. fir bhi samathrya ke anusar, chota-bara jo bhi ho sake, prapt kar uski pran pratishtha tatha sthapna kar use anukul karne ke lie niyamit rup se uski puja archana karni chahie. sangsitare ka shri yantra vatavaran men faili nakaratmak urja ko kam karta hai tatha maragaj ka shri yantra jatak ko manovanchit labh deta hai. maragaj evan sangsitare se aur bhi anek jyotishiya samagriyon ka nirman hota hai, parantu shri yantra unmen pramukh hai. yah shri yantra, janmapatrika ke kisi bhi dosh ka shaman kar ke, jatak ko safal evan sabal banne men madad karta hai. shri yantron ka upyog koi bhi jatak kar sakta hai. jo jatak bauddhik karyon se jure hote hain, shri yantra unki thakan, pira evan mansik vyatha ko kam karta hai. ise ghar, vyavsay, karyalay, gari, adi men laga kar labh paya ja sakta hai. jivan men anek bar lakshmi sanbandhi dosh lag jate hain. in doshon ka shaman karne men yah shri yantra sahayak hota hai. chatron ko iske upyog se adhik ank prapt hote hain tatha adhyayan men man lagta hai. murti puja karne vale jatak yadi ise sammukh rakh kar apna koi bhi mantra jap karte hain, to sahasron guna adhik labh milta hai. kaha jata hai ki samay se purva evan bhagya se pahle jatak ko kuch nahin mil pata. parantu jyotishiya samagri evan ratnon se bane shri yantra ki sthapna matra se use bhagya se adhik evan samay se purva bhautik sukh evan adhyatmik anand ki prapti hone lagti hai. avsad, hatasha, bechaini, chinta adi se jatkon ko yah shri yantra labh pradan karta hai. iske upyog se sharir men jaiv rasaynik prakriya ka santulan bana rahta hai tatha mansik rogi ko yah rahat pradan karta hai. jatak ke jivan men bahya kriya-kalapon ka sanbandh samaj evan parivar se hota hai, jabki antrik kriya-kalapon ka sanbandh kisi ishvariya satta se hota hai. atah ishvariya satta ko anukul evan shri yantra jatak ke antrik jagat ko urjavan banata hai tatha sakaratmak bhavnaon ko barhava deta hai. ratn nirmit yah shri yantra durlabh hai. iski puja-pratishtha sahaj tatha niyam saral hain. yadi koi jatak ise sthapit matra kare, to bhi yah sakaratmakata pradan karta hai. sahyogi banane hetu koi dharmik evan jyotishiya upay karna hota hai. yah jab kisi jatak ko svasthya adi ki pira hone vali hoti hai, to uske purva uske najdiki vatavaran men halachal evan kanpn-spandan adi shuru ho jate hain. shri yantra pratikul spandan evan kanpan ko rokta hai, jisse sthiti jatak ke anukul ho jati hai tatha pira se uski raksha hoti hai. vyaparik sansthan adi men ise sthapit karne se yah mansik v sharirik shakti evan bhautik samriddhi ke lie apni urja evan spandan bikher kar, vahan ke kshetra ko samriddh evan sabal banata hai. is shri yantra ki sthapna se vastu evan grahon ke ashubh parinamon se bacha ja sakta hai. jin jatkon men nirasha, susti adi adhik hoti hai, unhen iske dvara labh hota hai aur ve dhire-dhire ashavadi evan chaitanyata ki or agrasar hone lagte hain. nirdhanata ko shighra dur karne ke lie yantra ke sammukh shuddh man se, siddh lakshmi stuti, kanak dhara, shri sukt, mahagauri stotra adi ka path karne se, lakshmi ki vriddhi hoti hai aur jatak ko sablta milti hai. shri yantra ke sammukh kisi bhi mantra ka jap tatha kisi bhi devta ki puja ki ja sakti hai. yah shri yantra jatak ko apar labh deta hai, jo dekha to nahin ja sakta, parantu anubhav avashya kiya ja sakta hai. savdhani evan rakhrkhav: is shri yantra ko aisi jagah sthapit karna chahie, jahan vatavaran shuddh evan satvik ho. sath hi yah gir kar tut n jae, iska bhi dhyan rakhna chahie. kisi vishesh pareshani evan pira ke samay iska bar-bar sparsh evan naman karna chahie. iski puja archana shraddha evan vishvas ke sath karni chahie. yadi yah gir kar tut jae, to shri sukt ka 16 path kar ke, ise visarjit kar chahie. visarjit karne ke pashchat punah dusre shri yantra ki sthapna karni chahie. yadi kisi ke pas aur bhi shri yantra hon, to bhi ise sthapit kiya ja sakta hai. iske upyog se ek or anek labh hote hain tatha dusri or yah hani se bachata hai. atah is shri yantra ka upyog koi bhi jatak kar sakta hai. iske upyog se kisi bhi prakar ki hani athva anisht ki sanbhavna samapt ho jati hai.