ramayan ke asli nayak hanuman sham dhingra tumhare bina treta yug men mera yah avtar adhura hai. yah satya hai ki jo karya tumne kiya hai, aur koi nahin kar sakta. tum shakti aur buddhi ke punj ho. tumhen samast srishti ko apne men dharan karne vale virat svarup ki pratima manakar samast grahon ne jo tumhari vandna ki hai vah uchit hi hai. main bhi unka samarthak hun. tumne har pal har sankat ka samna karne men meri madad ki hai - chahe lakshman ko unki muchrchitavastha se mukt karne ke lie sanjivni buti aur vaidyaraj sushen ko lane ka karya ho, lanka jakar sita ki khabar lani ho ya ravan ka darp dalan karne ke lie lanka ko jalana ho. mere hi nam ki shakti ka mujhse behatar upyog karte hue samudra par tumne jo pul banadha hai, uski to kalpana bhi koi nahin kar sakta tha. jab ahiravan mujhe aur lakshman ka haran kar patal men devi ke sammukh hamari bali dene ki taiyari kar rah tha, tab tumhin ne apne bal aur kaushal se hamen usse mukt karvaya tha. is prakar tum ne hamare pranon ki raksha ki thi aur pran rakshak jiski raksha karta hai uske svami hone ka adhikar rakhta hai. tum mujhe apna svami aur svayan ko mera sevak kahte ho. thik yahi vichar mera bhi hai kyonki main manta hun ki tum mere svami ho aur main tumhara sevak hun.’ prabhu ram se aisi baten sunakar hanuman ji ne donon hathon se apne kanon ko band kar liya to prabhu ram ne unhen apne sine se laga liya aur kaha- ’he hanuman! tum mere hi nahin sare jagat ke sankat mochak ho. treta yug men jo tumne mera sath diya hai, uski mahima yugon-yugon tak gai jaegi. kaliyug men sabse adhik agar kisi ki puja archana hogi, to vah hanuman ki hogi.’ bhagvan ram ke ye vachan kaliyug men charitarth ho rahe hain. aj sabse adhik mandir hanuman ji ke hain aur sabse adhik puja archana unhin ki hoti hai. bachapan se hi hanuman kitne shaktishali the iska parichay unhonne surya dev ko apne mukh men rakhakar diya tha. unke surya ko nigal lene ke bad jab charon or andhiyara cha gaya tha tab use dur karne aur surya ko mukti dilane ke uddeshya se devraj indra ne bal hanuman par bajra se prahar kiya. hanuman ji ne us bajra ko ek shreshth khilari ki tarah aise lapak liya tha jaise koi bachcha kisi gend ko lapak leta hai. hanuman ji chahte to bajra ko torakar uska namonishan bhi mita sakte the. parantu unhonne maharshi dadhichi ki haddiyon aur devraj indra ka man rakhte hue use indra ki or uchal diya tha. ant men sabhi devi devtaon ke anurodh par unhonne surya dev ko mukt kar diya tha. bhagvan surya ka manna hai ki hanuman ji bhagvan shankar ke rup hain, lakshmipti narayan hain aur bhagvan radha-krishn bhi hanuman hi hain. unhonne vaman rup dharakar rakshason ke raja bali se 3 pag bhumi mangi thi aur jab usne bhumi de di to hanuman ji ne virat rup dharakar do pag men hi sari srishti ko samahit kar liya aur tisre pag men unka charan brahmand ko bhedakar brahm lok men a gaya tha. tab brahma ji ne atyant prem se us charan ka prakshalan kiya aur jal ko apne kamandal men bhar liya. kalantar men vahi jal bhagvti ganga ke rup men avtrit hua. mahabharat kal men bhi pandvon men bhim ko apni shakti par bahut abhiman ho gaya tha. tab hanuman ji burhe ka bhesh dharakar unke raste men let gae the. bhim ne unse kaha- ‘he vriddh vanr! main tumhare upar se nahin gujrna chahta, islie rasta de do.’ hanuman ji ne kaha- ‘tum to bahut balshali ho. mujhe uthakar raste se alag kar do.’ bhim ne kruddh hokar unhen uthakar fenkne ka man banaya. parantu apni puri shakti lagakar bhi vah hanuman ji ki punch tak nahin hila pae. pasine-pasine hokar unhonne hanuman ji ke charnon men apna sir rakh diya. tab hanuman ne prakat hokar unhen gyan diya ki abhiman parajay ka sabse bara karan hota hai. aise parakrami hanuman har yug men har varg ke nayak the aur nayak rahenge.
Kya aapko lekh pasand aaya?
Subscribe