pratham bhav pratham bhav men shani jatak ko alsi, rogi, avishvasniya, svarthi, nirdhan, tarkashil, kapti, vatrog se grast, kayar, prabhavhin tatha nikat sanbandhiyon se aprasann rahne vala banata hai. yah prabhav aur adhik ho sakta hai yadi shani badhit athva nich ka ho kintu shani ke uchch ka hone tatha mitra grahon ke prabhav men hone par labh bhi spasht rup se dekha ja sakta hai. ayu ke 5ven varsh men jatak durbhagya ka bhagi hota hai. dvitiya dvitiya bhav men shani jatak ko kushal vakta (vak patu) tatha pita ki sanpatti ka bhog karne vala banata hai aur yadi shani uchch ka ho to anek sukhon ka data tatha yada kada dusron ki alochna karne vala banata hai. vah bahut buddhiman, ati parigyani parantu uske anurup labh n pane vala, parai sampatti ka bhog karne vala parantu achcha bhojan n pane vala ho sakta hai. vah achchi ay vala kintu asantusht, sambandhiyon se talmel n rakhne vala, aushdhi athva dhatu ke vyavsay se labh pane vala, netra rog hone ki sanbhavna, ek se adhik jivan sathi, avagyakari santan tatha chal-prapanch se kam nikalne vala ho sakta hai. ayu ka 12van varsh arthik hani de sakta hai. tritiya bhav shani ke tritiya bhav men hone par vyakti bhagyashali tatha achche ghar v santan vala hota hai. kutniti se virodhiyon ko parast karta hai tatha shasan se labh pata hai. uchch ka shani use shant, sabhya, sushil, vicharvan tatha chote bhai-bahnon se sukh prapt karta hai. vah dayavan tatha ashriton ki sahayta karta hai kintu badhit shani bhai-bahnon se duri, dukh, kan ka rogi tatha bahudha bhagya se har pane vala hota hai. ayu ke 30ven varsh men sanbandhiyon se labh prapt karta hai. chaturth bhav chaturth bhav men shani jatak ko kapti, anaitik, jivan sathi ke sukh ki hani, krodhi, krur tatha mata ko kasht ka karan banta hai. yadi shani labhkari hai to paitrik dhan pane vala, vriddhavastha men sukhi tatha sannyasi vritti ka ho sakta hai. badhit shani mata - pita ke pyar se vanchit, ashant, paitrik dhan nasht karne vala tatha jivan men vibhinn kasht pane vala hota hai. ayu ka 8van varsh parivar ke lie kasht ka karan hota hai. pancham bhav pancham bhav men shani jatak ko dirghayu, dharmik, nashe ka adi, chanchal, virodhiyon par vijay prapt karata hai. jod-tod karne vala, srijak, santan v jivan sathi se dukh ka bhagi hota hai. uchch ka shani use shasan se labh tatha samajik sanstha ke uchch adhikariyon ka kripa patra banata hai. yadi shani apne hi ghar men uchch ka ho to buddhi man santan, vyavsay men unnati, patni se sukh ya jivan men saflta deta hai kintu badhit ya nich ka shani asadhya rog, jal se bhay tatha apayash ka bhagi hota hai. vah bure vicharon se pidit tatha kamuk hota hai. use ayu ke chathe varsh men bijli tatha ag se bhay rahta hai. shashtam bhav shashtam bhav ka shani vyakti ko nashe ka adi, virodhiyon v shatruon se sada kasht pane vala parantu achchi ay vala banata hai. usmen unche logon se maitri ki yogyata hoti hai tatha apne virodhiyon ko vah chaturai se parast karta hai. apne dharm men shanti prapt karta hai. uchch ka shani dalit logon ka mitra, chaturai se virodh ko kuchlne vala kintu jivan bhar shatruon se jujhne vala, dirghayu tatha sharirik akraman ka bhagi banata hai. shani ke nimn athva badhit sthiti men vah hriday, gale athva mutra ke vikar se pidit banata hai. sabhi prakar ke sukh hone par bhi samay par bhojan nahin kar pata. ayu ka 24van varsh jatak ke jivan men parivartanakari hota hai. saptam bhav saptam bhav men shani hone par jatak apni hi murkhata ka shikar, galat prakar ke mitron se ghira hua. jivan sathi se dukhi tatha der se vivah karne vala hota hai. badhit shani use nashe ka adi, buri sangat vala, vaivahik sukh se vanchit, nirarthak vivadon men adalton ke chakkar katne vala, kabhi - kabhi bure kam karne vala tatha mitra ke karan kasht pane vala hota hai. svarthi, utsahhin, sada chintit, jhuth tatha dusron ke lie kam karne vala hota hai kintu sashakt shani (uchch ka) virodhiyon par vijay, jivan sathi se labh tatha yash ka bhagi banata hai. vah 27ven varsh men durbhagya ka bhagi hota hai. ashtam bhav ashtam bhav men shani jatak ko dhan ki kamin, krodhi, bhaybhit, lalchi, bure logon ki sangat tatha vidvanon ki sangat se vanchit karta hai. vah bavasir, shugar, daibitij tatha netron ka rogi, nashebajon ki sangat karne vala ho sakta hai. galat karyon se ay karne vala, dhokhebaj, rahasyavad men ruchi rakhne vala, dirghayu tatha bhagvan se darne vala hota hai. ayu ke 25ven varsh men sharirik kasht ka bhagi hota hai. navam bhav navam bhav men shani vyakti ko sahsi, dhani, rishvatkhor tatha dusron ko dhokha dekar dhan kamane vala banata hai. dharm men uski astha sada nahin rahti, use jal se bhay tatha jivan sathi se matbhed rahta hai. yadi shani nich avastha men hai to jatak kripan (lalchi), svarthi, dusron ki bhavna ko thes pahunchane vala, batuni, vaivahik sukh se vanchit, chalak, achche mitron se rahit, bhagyahin tatha pita ke samman ko thes pahunchane vala hota hai. yadi shani uchch ka ho to mahan atma, gyanvan, prachin shastron men ruchi rakhne vala, shuddh, charitravan, sannyasi tatha purva janm men pap karmon ka bhagi raha ho sakta hai. ayu ke 36ven varsh men bhagyoday hota hai. dasham bhav dasham bhav men shani jatak ki shiksha men kami kintu ati bhagyavan banata hai. apne parivar ka nam karne vala tatha sarkar se bahut adhik labh pane vala hota hai. vibhinn kalaon ka gyata, bahut se mitron vala, buddhiman, dhani, bahadur, nyayapriya, neta tatha dusron par adhikar vala astik, parishrami, sangit men ruchi, saumya tatha apni mehanat ke bal par unnati karne vala hota hai. yadi shani badhit hai to apne vyavsay men unnati se girne vala hota hai. yadi shani atibadhit ho to mata - pita se sukh nahin milta tatha unke dhan ka lambe samay tak bhog nahin kar pata aur yadi mangal se badhit ho to virodhiyon se bhay, madhumeh adi rog tatha bahut parishram karne par bhi kam labh pane vala hota hai. ayu ke 26ven varsh men durghatana ka bhay rahta hai. ekadash bhav ekadash bhav men shani jatak ko raja athva shasan se labh deta hai. vah kami, shatruon par vijyi, nitivan, sankat mukt, sukhi v anandamay jivan pata hai. yadi shani kamjor ho to ati lobhi kintu vriddhavastha men sukhi hota hai. vah dhani hota hai parantu viprit ling valon par kharch karne vala hota hai. vah tejasvi, sthir charitra, rog mukt, vastuvid kintu santan se sukh n pane vala hota hai. yadi shani badhit ho to viprit ling ke vyakti se jal men fansne vala, mitron se chala jata hai tatha nuksan uthata hai. yadi vah jue ka adi ho jaye to apayash ka bhagi v dhan ki hani pata hai kintu ayu ke 24ven varsh men vishesh arth labh pata hai. dvadash bhav yadi dvadash bhav men shani hota hai to jatak apnan se khushi men kami, dhurt, garib, udas, alsi, kathor, rini, sannyasi vritti vala, paisa bahane vala tatha dusron ko labh dene vala hota hai. apni hi pragti men badha utpann karne vala tatha apnon se hi virodh prapt hoga. yadi shani uchch ka ho to dharmik, samajik karya karne vala, sahayta karne vala, nek chalan tatha dhan sangrah men durdrishti vala hota hai. ayu ke 45ven varsh men arth hani ho sakti hai. shani ka vibhinn rashiyon men parinam: mesh mesh rashi men shani jatak ko kamjor, mansik chinta athva rakt vikar ka rogi kar sakta hai. sharirik kasht, apach aur jivan men anek dukh ka bhagi hota hai. vrish vrish rashi men shani vyakti ko buddhiman, sahsi, nirbhik, upakramon men kushal, vivadon v sankton par vijyi banata hai. vah sampatti se labh tatha viprit ling valon se maitri labh lene vala hota hai. mithun mithun rashi ka shani jatak ko viprit ling valon se labh, jivan sathi se sukh tatha sukhon men anand pane vala hota hai. vah bure logo ki sangat pane vala kintu apni buddhi se logon ko prabhavit karne vala hota hai. kark kark rashi men shani jatak ka kamjor (sharirik) kaya, asvasth, sankat grast tatha netra rog se pidit karta hai. svarthi, sanymi, sabhi ka mitra, chanchal tatha jivan sathi aur santan se sukh pata hai. sinh sinh rashi men shani hone par jatak ka jivan sathi v santan se matbhed rahta hai. dusron se akaran vivad, virodh, apayash, mansik santap tatha jivan men vibhinn kashton ka bhagi hota hai. kanya kanya rashi men shani jatak ko vyavsay tatha rachnatmak karyon se achcha dhan kamane vala banata hai. vah achal sanpattiyon ka svami anek mitron vala tatha rangakarmi hota hai. tula tula rashi men shani hone par jatak shasan dvara sammanit tatha jivan men bahut dhan kamane vala hota hai. vah achchi sampatti, anek sevak tatha uttam vahan ka bhagi hota hai. vrishchik vrishchik rashi men shani jatak ko jivan men bahut yatra karne vala banata hai tatha vah prarambhik kashton se gujar kar sthirta pata hai. adhikansh ichchaon ko pane vala parantu nichle darje ke logon se mitrata rakhne vala hota hai. dhanu dhanu rashi men shani jatak ko virodhiyon ko nasht karne ki kshamata pradan karta hai. vah vivad aur yuddh men sada vijyi hota hai. dhairyavan jivan men achchi pravritti rakhne vala kintu ati vyayi hota hai. makar makar rashi men shani ho to jatak bahut kasht uthane par bhi adhik nahin kama pata. vah dhokhe ka shikar hota hai. viprit ling valon se maitri, vishay vasna men lipt, arthik kasht pane vala, jivan men arthik hani tatha kaleshon ka bhagi hota hai. kunbh kumbh rashi men shani vyakti ko bahut yash, samman aur khyati pradan karta hai. vah achcha pad, uttam mitron vala, gyanvan tatha bahut dhan kamane vala hota hai. min yadi shani min rashi men sthit ho to jatak adhikari tatha achal sampattiyon ka svami hota hai. apni buddhi ke bal par bahut labh kamane vala tatha sabhi prakar ki sukh suvidhapurn jivnyapan karne vala hota hai.