midlaif kraisis shabd ka prayog sarvapratham iliyat jaiks ne 1965 men kiya. vastav men chalis ki umra ko jivan ka ek mahatvapurn mod mana gaya hai. yahan pahunchakar vyakti ko jhatka sa lagta hai. aisa hone ka ek karan is samay men achanak mata-pita ki mrityu hona ya dukh ka koi anya karan jaise berojgari ya rojgar men santosh ki kami bhi ho sakti hai. is avastha men use mahsus hota hai ki uski yuvavastha uske hath se fisli ja rahi hai. use samajh men nahin ata ki vah kya kare. uska man use kisi aur disha men le jana chahta hai par samajik jivan ka yatharth use vaisa karne se rokta hai. manovaigyanik is avastha ko mid laif kraisis kahte hain. am taur par purush men iski shuruat 42-43 varsh men hoti hai jabki mahilaon men yah 44-45 ke bad ati hai. aurton men yah bahut jaldi khatm bhi ho jati hai lekin purushon men der tak bani rahti hai. purushon ke bhitar achanak vahi bhav jag jata hai jo kishoravastha men hua karta hai. iski ek vajah to harmaunal badlav hai. is samay vyakti ko lagta hai ki uski adhi jindgi bit chuki hai. vah shesh jindgi apne mutabik jina chahta hai. islie purush apni fitnes, pahnave adi par adhik dhyan dene lagte hain. unmen javan dikhne ki ichcha utpann hone lagti hai. ve apni jindgi ke khalipan ko bharne ke lie eksaitment lana chahte hain. islie ve fir se romans aur pyar khojne lag jate hain jisse unki jindgi thodi chatpti ban sake.’ darasal is samay tak danpatya jivan kai tarah ke dabavon ke karan niras hone lagta hai. agar pati-patni sachet rahakar iska samadhan nikalne hetu prayas n karen to unka jivan asahaj ho jata hai. mahilaen am taur par khud ko kai chijon men invalva kar leti hain lekin purush kamyabi n milne ke karan hatash ho jate hain. is umra tak roji-roti ke lie sangharsh ya santan ke kariyar ki chinta se kafi had tak mukti mil jati hai. aise men vyakti achanak khalipan mahsus karta hai aur jivan men kuch badlav chahta hai. bahrhal kuch log samay rahte sanbhal jate hain aur apne jivan ka koi lakshya nirdharit kar use hasil karne men lag jate hain. halanki kuch log 60 varsh tak isi avastha men rahte hain. mid laif kraisis ke kuch lakshan is prakar hain- (midlaif kraisis grast logon ki bhavnaen) - - ek anjan manjil ki talash - lakshya prapti n hone ke karan man ke andar gahri nirasha ki bhavna. - adhik safal sahakarmiyon ke madhya apmanit hone ka bhay. - ekantavas karne ya kisi samakaksh vyakti ke sath adhik samay bitane ki avashyakta. (mid laif kraisis grast logon ka vyavhar) - - nasha karna ya elkahlik hona. - motrbaik, nauka, kapde, khelkud, sportas kar, jyulri, gaijet v tatu adi par asadharan rup se apavyay karna. - apni kamiyon ke lie gamgin rahna. - apne bachchon par khel-kud, shiksha v kala adi kshetra men umda pradarshan karne ke lie avashyakta se adhik dabav banana. - yuva logon se mitrata karna. manochikitsakon ke anusar mid laif kraisis ke nidan men adhik urja v samay lag sakta hai lekin jivan shaili men samay rahte kuch parivartan karne se ashatit labh prapt kiya ja sakta hai. basharte aise parivartan jinse mansik tanav nishchit rup se kam hota hai kam avastha men hi kar die jane chahie. apne mitron ya manochikitsak se apni ichchaon v mahatvakankshaon ke bare men charcha karen v apne uddeshyon v jivan ki mahatvakankshaon ka punarmulyankan karen. jivan ki avastha ko khule man se svikaren. niyamit rup se vyayam karen v paushtik ahar len. vyayam karne se tanav kam hoga tatha santulit ahar ke sevan v madak vastuon ke parhej se nind v aram achche se ho jaega. jyotish shastranusar mid laif kraisis ka prabhav adhikatar un logon ki jindgi par adhik hota hai jinki kundli men shukra grah adhik sakriya hota hai. 42 varsh ki avastha vah hoti hai jab apki kundli men rahu grah ka prabhav apne charam par hota hai. yadi yah kundli men ashubh ho to yah apke jivan men bhay aur bhram ka vatavaran sthapit kar deta hai kintu yadi yah grah bali hokar 3, 6, ya 11 bhavon men ho to vyakti mid laif kraisis ke dushprabhav se shighra hi ubar jata hai tatha yadi guru grah bhi shubh ho to aisa jatak apne lie koi lakshya nirdharit kar leta hai tatha nirantar us or badhne lagta hai.
Kya aapko lekh pasand aaya?
Subscribe