mandbuddhi bachcheah abhishapt jivan jine ko majbur acharya avinash sinh mandbuddhi bachcha sharirik, mansik evan samajik rup se pichra hua rahta hai. vah likhai-parhai adi bhi kar nahin pata. mandbuddhi, arthat 'mental ritardeshn' ek anuvanshik bimari hai, jo mata, ya pita ke bij ki vikriti ki vajah se paida hoti hai. ayurved men iska ullekh jar, vaman, alpayu, vikritakriti, nirgun, kuni adi namon dvara kiya gaya hai. bachche mata-pita ke pyar ki nishani aur unki asha ki kiran hote hain; burhape ka sahara bante hain. parantu kuch aise bhi mata-pita hote hain, jinke bachche, mandbuddhi hone ke karan, unke lie hamesha dukh aur chinta ka karan bane rahte hain. mandbuddhi ke lakshan : kuch bachchon ko dekhne se hi malum ho jata hai ki ve mansik rup se viklang hain. bachcha mandbuddhi hoga, yah anuman paida hote hi lagaya ja sakta hai. aise bachchon men nimn sharirik vikritiyan payi jati hain : mandbuddhi bachchon ka sir chota aur piche se chapta hota hai. unki ankhen choti, nak dabi hui, chapti jibh hamesha munh ke bahar rahti hai. kan apne prakritik sthan se niche aur vikritakriti ke hote hain. hath chote aur kuch chaukor se hote hain. unke munh se lar niklti rahti hai. unki sandhiyon ke jor dhile hote hain. pairon ka angutha aur pahli anguli ke bich jyada jagah hoti hai. janm ke pashchat inki buddhi ka vikas dhire-dhire hota hai. kyon paida hote hain mandbuddhi bachche?: ayurved men sharirik evan mansik drishti se viklang bachchon ke paida hone ke mulbhut karan is prakar kahe gaye hain: bijatmakarmashykaldoshaiah matustatha'harvihardoshaiah. kurvanti dosha vividhani dushtaah sansthanavarnendriyavaikritani॥ (charak sanhita) arthat, purush ka shukra, stri ka raj, mata-pita ke khud ke galat karm, garbhashay tatha kal adi ke dosh tatha garbhavati mata dvara galat ahar-vihar ke karan bachchon men viklangta utpann hoti hai. pavitrata ka nash aur kayik, mansik evan vachik pap karmon ki adhikta ko ayurved ahmiyat deta hai. pati-patni men se yadi koi pap karm, yani anaitik karm adhik karta hai, to unse utpann bachche mandbuddhi hote hain. choti ayu ki kanya, ya adhik ayu vali striyon ke sath sahvas karne se utpann bachche bhi viklang ho sakte hain. ek hi gotra ke, ya nazdiki rishte men shadi se utpann bachchon men bhi mandbuddhi hone ki sanbhavna rahti hai. mata, ya pita ke janmangon men, ya bij ki vikriti ke parinamasvarup bhi bachche mandbuddhi hote hain. rajasvala stri ke sath sahvas ke uprant hone vale garbh se bhi mandbuddhi bachcha hota hai. mata-pita ke vibhinn rogon, jaise tapedik, ganbhir raktalpata, piliya, prameh adi se pirit rahne par garbhadhan se utpann bachcha mandbuddhi ho sakta hai. garbhavastha ke dauran stri dvara galat ahar-vihar, ya bahut kam ahar lene, ya bar-bar sahvas karne adi se bhi mandbuddhi bachcha paida ho sakta hai. garbhavastha men garbh ko girane ki koshish asafal hone ke bad utpann bachche men mansik viklangta hoti hai. garbhavastha men garbhedik (emniyotik drav) kam hone se, ya bar-bar eksare lene se bhi garbh par viprit prabhav parta hai. kya mandbuddhi bachchon ka janm rok sakte hain? : mandbuddhi bachchon ke paida hone ke jo karan upar bataye gaye hain, unko chikitsak vistar se samjhate hain. ve svagotriya vivah, ya najdiki rishte men hone vale vivahon ka nishedh karte hain. vivah karne vale stri-purushon men pichli tin pirhiyon men koi mandbuddhi vyakti janma tha, ya nahin, iski janch ki salah dete hain. rakt ki kism bhi dekhne ki salah dete hain. nimn likhit baton ka dhyan rakhen: vivah purva stri-purush ki pichli tin pirhiyon men kisi prakar ki vikriti n ho. svagotra men, ya atyant nazdiki rishte men vivah n karen. 16 varsh se purva aur 35 varsh ke bad ki umra men stri garbhadharan n kare. masik dharm ke samay sahvas n karen. garbhavati ki ichchaon ki avhelna n karen. garbhavastha men kisi bhi prakar ki vyadhi hone par turant chikitsa karvaen. garbhavati mata kisi bhi prakar ke sharirik aur mansik adhat se bache. ayurvedanusar mandbuddhi bachchon men jinka ai. kyu. 51 se 70 pratishat hai, unke lie nimn davaiyon ka upyog chikitsak ki salah se evan nigrani men, kiya ja sakta haiah bachchon ko brihad chintamni, 25 migram ki matra men, din men 2 bar niyamit chataen. brahmi, sonth, jatamansi, shankhpushpi, yashti madhu aur harre ko saman bhag men le kar churn bana len. use ghi ke sath shakkar ki chashni men paka kar do gram din men do bar chataen. mandbuddhi bachchon ki talu deri se bharti hai. jab talu naram hoti hai, tab bala evan balachar vanaspatiyon se banaye gaye tel men rui ko dubo kar bachche ki talu par rakhen. ise do sal tak har roj 15 minat tak rakhen. brahmi buti ke do tole churn ko, badam ke tel men mila kar, kali mirch tatha choti ilaychi ke bij pis kar, pratyek din tin masha pila den. iske alava bachche ko mata ka dudh pilana, rog pratirodhak tike lagana adi sabhi kam samanya bachchon ke anusar kiye jane chahien. mandbuddhi bachchon ke lie sthapit sansthaon men unhen prashikshan diya jata hai. jyotishiya drishti men mandbuddhi bachcheah kal purush ki kundli men pratham bhav jatak ke vyaktitva ka hota hai, jismen vishesh kar mastishk ko pratham sthan diya gaya hai. is bhav ka sthir karak surya hota hai. isi prakar pancham bhav jatak ki buddhi ka hota hai, jiska sthir karak guru hai. jyotish men jatak ki buddhi ka sanbandh budh grah se hai. islie yadi jatak ka lagn, lagnesh, pancham bhav, panchmesh, surya, budh aur guru dushprabhavon men rahenge, to jatak mandbuddhi hota hai. vibhinn lagnon men mandbuddhi ke grah yog : mesh lagn : lagn, ya pancham bhav men budh ho, surya dvadash bhav men rahu se yukt ho, lagnesh trik bhavon men shani se drisht ho, guru shashth bhav men ho, to jatak mandbuddhi hota hai. vrish lagn : guru lagn men ho, lagnesh aur budh surya se ast ho kar chathe, ya athven bhav men ho, mangal pancham bhav men ho aur chandra se yukt, ya drisht ho, to jatak mandbuddhi hota hai. mithun lagn : mangal lagn men, ya pancham bhav men ho, ya pancham bhav ko dekhta ho, pancham bhav men guru ho, panchmesh shukra aur budh surya se ast hon aur ketu se drisht hon, to jatak mandbuddhi hota hai. kark lagn : lagn men budh, surya dvadash bhav men shani se yukt ho, shukra ekadash bhav men ketu se yukt ho, panchmesh shashth bhav men shani se drisht, ya yukt ho, guru ashtam bhav men ho, to jatak mandbuddhi hota hai. sinh lagn : shani lagn ko dekhta ho, lagnesh shashth bhav men ho, budh saptam bhav men, shukra chaturth bhav men shani se drisht ho, guru ashtam bhav men ho, to jatak mandbuddhi ho sakta hai. kanya lagn : lagnesh budh surya se ast ho kar shashth bhav men ho, mangal dasham bhav men ho aur chandra se yukt ho, panchmesh shani par mangal ki drishti ho, guru pancham bhav men ho, to jatak mandbuddhi hota hai. tula lagn : lagnesh shukra ast ho kar shashth bhav men ho, guru pancham bhav men ho, panchmesh shani dvadash bhav men ho aur mangal se drisht ho, budh bhi ast ho, to jatak mandbuddhi hota hai. vrishchik lagn : lagnesh mangal tritiya bhav men ho aur shani se drisht ho, budh lagn men ho aur surya dvadash bhav men ho, guru ashtam bhav men ho, to jatak mandbuddhi hota hai. dhanu lagn : shukra lagn men ho, budh tritiya bhav men ho, chandra surya se barabar anshon par ho kar dvitiya bhav men ho, lagnesh saptam bhav men ho, to jatak mandbuddhi hota hai. makar lagn : lagnesh shani trik bhavo men surya se ast ho, panchmesh shashth bhav men ho aur guru se drisht ho, to jatak mandbuddhi hota hai. kunbh lagn : guru lagn men ho, lagnesh shani shashth bhav men ho aur chandra se yukt, ya drisht ho, panchmesh budh surya se ast ho, to jatak mandbuddhi hota hai. min lagn : guru akarak shani, ya shukra se yukt, ya drisht ho kar lagn men ho, ya lagn par drishti rakhe, surya budh se yukt ho kar trik bhavon men ho, to jatak mandbuddhi hota hai. yadi janm samay sanbandhit grahon ki dasha chal rahi ho, to jatak janm se hi mandbuddhi hota hai. udaharan : yah kundli ek stri jatak ki hai, jo mansik rup se mandbuddhi hai. yadi iske janmang par drishti dalen, to dekhenge ki uska janm min lagn men hua hai. lagnesh guru akarak shani se yukt hai aur panchmesh chandra shani se drisht hai. pancham bhav par akarak shukra ki purn drishti hai aur rahu pancham bhav men hai. lagn par bhi akarak shani aur rahu ki drishti hai. budh surya se ast ho kar dvadash bhav men hai. is prakar jyotishiya drishti se lagn, lagnesh, pancham bhav, panchmesh aur budh sabhi dushprabhavon men hain. iske janm ke samay rahu ki mahadsha chal rahi thi aur usmen shani ka antar tha. isi karan yah janm se hi mandbuddhi hai.