darshaniya hai bodh gaya  

darshaniya hai bodh gaya do. rakesh kumar sinha 'ravi' bharatavarsh tirthon ka desh hai. yahan uttar se lekar dakshin tak aur purva se lekar pashchim tak kul kitne tirth hain yah ek shodhpurn saval hai. par in bhartiya tirthon men kuch aise tirth hain jo pure sansar men prasiddh hain. inhin prakhyat bhartiya tirthon men 'bodhgya' vishesh prakhyat hai. tirthanagari gaya se lagabhag 12 kimi. dakshin tatha bihar ki rajdhani patna se karib 115 kimiduri par avasthit bodhgya men prachin bhartiya gaurvmyi sanskriti ke n jane kitne hi adhyay sushobhit aur pushpit-pallavit hain, jinhen dekhakar yahan ane vale paryatak prachyakalin sadabhar shukhbu men kho jate hain. yah gyatavya hai ki samudra tal se 113 mi. ki unchai par avasthit bodhgya taponishth vaishnav asur 'gay' ka pad kshetra hai jahan prakarantar se shraddh pinddan ke tin sthalon ki mahatta bani hai. dharma-itihas ke pannon par vishvavishrut bodhgya ka prachin nam urubilva (urubel) tha. us jamane men yahan jatil tray kashyapon men ek urubel kashyap ka adhipatya tha. prachin kal men yah bhumi ekantik sadhna ka divya sthal tha, jahan ki prakriti-samriddhi sadhnamay tatva ki shrivriddhi men sada sahayak bane rahe hain. kahte hain gyan prapti ki khoj men dar-dar bhatkte siddharth ki jivan gati men shringar jahan hua, vahin bodhgya hai. gaya se sannikat hone ke karan v tathagat ko gyandipti prapt hone ke karan kalantar men is pure kshetra ko 'bodhigya', 'buddhagaya', 'sanbodhi' adi kaha gaya hai. isi ka mul nam bodhgya hai jo gaya jile ka ek purana prakhand hai. tathagat ke agaman ke purva bodhgya kshetra men pandvon ka agaman hua tha aur yahin dharmaranya kshetra men pandav bandhuon ne chaturmas yagya sanpann kiye the. vaise jatak kathaon se gyat hota hai ki yahin niranjna (lilajn), muhane (mahana) aur adrishya sarasvati ki sangam bhumi 'dharmaranya' men buddh men gandh hasti ke rup men janm lekar putra kartavyanusar apni andhi mata ka bharn-poshan kiya tha. aitihasik tathya sanket pradan karte hain ki tathagat ke pitamah ayodhan ka bhi yahan gaya shraddh sanpadan karm men agaman hua tha. aj bhi bodh gaya men vah punyamay bodhitru (ashvatth vriksha) maujud hai jiski chanv tale 89 din tak samadhisth rahne ke bad siddharth ko gyan-jyoti ki sanprapti hui. yahi karan hai ki sanpurn dharadham par avasthit bauddh sthalon men bodh gaya ka vishesh man hai. gyat hota hai ki gyan-prapti ke purva tathagat ne sujata namak krishak mati kanya se payas (khir) grahan kiya tha aur unke 89 kaur arpan ke bad hi gyan prapti ki or prabhut hue. yah sthan yahan se do kimi. ki duri par aj bhi dekha ja sakta hai jise ''sujata gadh'' kaha jata hai. siddharth grih-tyag ke uprant rajgrih, jethiyan tapovan, brahmayoni v dugeshvari hote hue bodh gaya ae the. aj bhi in sabhi sthalon par tathagat se jure smriti-avsheshon ka darshan sahaj men kiya ja sakta hai. yah gaurav ki bat hai ki tathagat ki is gyan-bhumi men sanpurn varsh deshi-videshi yatriyon ka agaman bana rahta hai. paryatan mausam kahne ka arth hai, aktubar se march tak yahan paryatkon ke agaman se mela lag jata hai. aise bodhgya men vaishakh purnima ka vishesh mahattva hai kyonki isi din tathagat ko gyan prapti hui. aur to aur prabhu kripa dekhen ki inka janm v nirvan bhi isi din hua. bodh gaya koi bahut bari jagah nahin hai. islie yahan paryatkon ko koi pareshani nahin hoti. nagar bhraman hetu tamatam, riksha, auto, taiksi v choti-bari gariyan sahaj men mil jati hain. yahan harek varg ki jeb ke layak khane aur thahrne ki bhi achchi vyavastha hai. ab to bodhgya men paryatkon ke ratri vishram ko dekhte hue kai thos karya kie gae hain jinmen antarrashtriya sadhna kaksh, sviming pul, vatar gem steshan v dhyan kendra ka mahatvapurn sthan hai. bodhgya ki vartaman prasiddhi varsh 1956 ki vaishakh purnima se barhi hai kyonki isi varsh tathagat ke janm ki 2500 vi varshaganth ke upalakshya men yahan kafi kuch shringar karaya gaya. isi varsh yahan ''puratatva sangrahaly'' ki sthapna ki gai jismen tathagat ke vishishtashaili ke vigrah ke sath-sath shungkalin vedi ka utkrisht sangrah darshaniya hai. jun 2002 men 'vishva day smark' men namit hone ke uprant mahabodhi mandir ki raunak bhi barhi hai. bodh gaya men darshaniya sthalon ki koi kami nahin. yahan deshi videshi smarkon ko dekhakar darshak mantramugdh ho jate hain. n sirf bodh gaya varan pure vihar ke shreshth prachya smarkon men mahabodhi mandir ki ganna ki jati hai jise yatra-tatra 'mahabodhi mahabihar' bhi kaha jata hai. isi mandir parisar men sapt pavitra sthan hain jinmen vajrasan, bodhivriksh, ajpal nigrodh, panch pandav mandir v bodhi stanbh ke sath muchlind sarovar darshaniya hai. iske alava bodhgya men japan, chin, thailaind, koriya, bhutan, myanmar, tibbat, bangladesh, indoneshiya adi ki kala-shaili men bane bauddh paigorao, khule akash ke niche bani vishal buddh murti, maya sarovar, jay prakash udyan, vishal ghanta, chalet buddh murti, antarrashtriya vipashyana kendra, purasthal taradih, magadh vishvavidyalay adi ka darshan labh bhi paryatak avashya karte hain. bodhgya ke aspas ke paribhraman sthalon men matangi, sarasvati, durgeshvari, mocharim v bodhgya math ka vishesh sthan hai. kuch aise bhi paryatak hote hain jo bodhgya ko kendra manakar rajgrih, gaya, patna, nalanda v pavapuri ka darshan karne jate hain. paryatan ke drishtikon se bodhgya ki vishesh mahatta hai tabhi to ise bihar ke sarvapramukh paryatan kendra ke rup men pratishtha prapt hai. astu ! chatushya pradhan bauddh tirth yatha 'janm sthal lumbini, 'gyan prapti sthal bodhgya', 'pratham pravachan sthal sarnath' aur nirvan sthal kushinara men, bodhgya adi anadi kal se samriddh raha hai. yahi karan hai ki bodhgya ko ''bauddhon ka prantirtha'' kaha jata hai jiske darshan - naman ki abhilasha harek ke jivan men sarvochch jivant rahti hai aur jahan tak bihar bhraman ka saval hai. kaha gaya hai ki bihar ghumne men agar bodhgya nahin gae to samjhen ki apki yatra purn nahin hui. sachmen bodhgya buddhi, gyan aur vidya ki bhumi hai tabhi to chini yatri havensang ne ise 'sansar ka nami kshetra' kaha hai.