‘‘lingpuran’’ men gyarah rudron ki utpatti ka varnan prapt hota hai jo brahma ji ke bhauhon se utpann hone ke turant bad hi rudan karne lage. ‘‘shabdastom mahanidhi’’ ke anusar rudraksh ko ek vriksh ke rup men mana gaya hai. ‘‘shabdakalpadrum’’ ke anusar rudraksh ko vriksh ke rup men mante hue uske kuch paryayvachi nam bhi batae gae hain jo is prakar hai- sargakshan, shivapriyan, harakshan, pavnan, bhutnashan v nilkanthaksh ityadi. ek anya vivechan ke anusar rudraksh ek prakar ka fal bij hai jo mala ke rup men pirokar dharan kiya jata hai tatha mantra jap ke kam ata hai. rudraksh ko hindi, bangla, sanskrit, gujrati, panjabi v marathi bhasha men rudraksh hi kaha jata hai. kannar, telgu v tamil men ‘‘rudraksha’ koti’’ kaha jata hai.
angreji men utrasum beed tatha laitin bhasha men elaeocarpus ganitrus roxb kahte hain. ‘‘rudraksha’’ ke udbhav ki pauranik gathaen’’ ‘‘shiv mahapuran’ ki vidyeshvar sanhita ke pachchisven adhyay ke anusar- sutji maharaj kahte hain - mahapragya ! mahamte ! shiv rup shaunak ! ab main sankshipt rup men rudraksh ke udbhav v mahatmya ko batata hun. suno ! rudraksh bhagvan shiv ko atyant priya hai. ise parmpavan samjhna chahie. rudraksh ke darshan se, sparsh se tatha us par jap karne se vah samast prakar ke papon v kashton ko nasht karne vala mana gaya hai. mune ! purvakal men bhagvan shiv ne samast logon par upkar karne ki ichcha se devi parvati ke samaksh rudraksh ke udbhav v uski mahima ka varnan kiya tha. bhagvan shiv bole- he shive ! main tumhare premavash bhakton ke hit ki kamna se rudraksh ki mahima ka varnan karta hun.
suno ! maheshani! purvakal ki bat hai main man ko sanymit kar hajaron divya varshon tak ghor tapasya men laga raha. ek din achanak mera man kshubdh ho gaya. parmeshvari ! main sanpurn lokon ka upkar karne vala svatantra parmeshvar hun. atah us samay lilavash mainne hi apne donon netra khole, netra kholte hi mere manohari netron se kuch jal ki bunden girin. ansu ki un bundon se rudraksh namak vriksh utpann ho gaya. bhakton par anugrah karne ke lie ve ashrubindu sthavar bhav ko prapt ho gae. ve rudraksh mainne vishnubhakt ko tatha charon varnon ke longon men bant diya. prithvi par apne priya rudrakshon ko manaine gaur desh men utpann kiya. mathura, ayodhya, lanka, malyachal, madhyagiri, kashi tatha anya deshon men bhi unke ankur ugae. ve uttam rudraksh asankhya pap samuhon ka nash karne vale tatha shrutiyon ke bhi prerak hain. meri hi agya se ve brahman, kshatriya, vaishya tatha shudra jati ke bhed se is prithvi par prakat hue. rudrakshon ki hi jati ke shubhaksh bhi hain.
un brahmanadi jati vale rudrakshon ke varn shvet, rakt, pit tatha krishn janne chahie. bhog aur moksh ki ichcha rakhne vale charon varnon ke log aur visheshtah shivabhakton ko shiv-parvati ki prasannata ke lie rudraksh ke falon ko dharan karna chahie. anvle ke fal ke saman jo rudraksh ho, vah shreshth bataya gaya he. jo ber ke fal ke barabar ho use madhyam shreni ka bataya gaya hai. jo chane ke barabar ho uski ganna nimnakoti men ki gai hai. ab iski uttamata ko parkhne ki yah dusri uttam prakriya batai jati hai. ise batane ka uddeshya hai bhakton ki hit kamna. he parvati ! tum bhalibhanti prempurvak is vishay ko suno. maheshvari ! jo rudraksh ber ke fal ke saman hota hai vah utna chota hone par bhi lok men uttam fal dene vala tatha sukh-saubhagya ki vriddhi karne vala hota hai.
jo rudraksh anvle ke fal ke barabar hota hai vah samast arishton ka nash karne vala hota hai. jo ganjafal (ratti) ke saman bahut chota hota hai vah sanpurn manorthon ko purn karne vala aur falon ki siddhi karne vala hota hai. ‘‘devi bhagavat mahapuran’’ ke anusar - ek samay maharshi narad ji ne bhagvan shri vishnu se pucha, he anadya ! kripa karke ap mujhe rudraksh ke prabhav aur uski vishishtataon ke sanbandh men batayen jiske karan rudraksh devta ke saman mahan purush se pujit hai to iska karan kya hai? bhagvan vishnu ne kaha ki isi prakar ka prashn bhagvan kartikey ji ne bhagvan shiv se kiya tha. uska uttar jis prakar bhagvan shiv ne diya use tum dhyanpurvak suno.
bhagvan shiv bole he kartikey ! us paramatatva ke sanbandh men main jo kuch bata raha hun use suno. ek bar purvakal men tripur namak ek mahan daitya utpann hua jise koi bhi jit nahin sakta tha. us daitya ne brahma, vishnu ityadi sabhi devtaon ko tiraskrit (upekshit) kar diya to samast devgnon ne mere pas akar prarthana ki. tab mainne us daitya ka vadh karne ke lie devtaon ki raksha evan vighn ke nash hetu sabhi devtaon ki shaktiyon ko samanvit kar divya amogh astra ke nirman ka vichar banaya. isi ke lie mainne divya sahastra varshon tak netra band kar tapasya ki aur jab netra khole to mere netron se kuch ashrubindu gire. un ashrubinduon se hi meri agyanusar sabke hit ke lie rudraksh ke vriksh utpann hue. (ekadash skandh, adhyay char) ‘‘sanvatsar pradip ke anusar: tripur namak daitya ka vadh karne ke pashchat jab bhagvan shiv ke netron se ashrujal is bhutal par gira tab unse rudraksh vriksh ki utpatti hui.
‘‘vrihajjabalopnishad ke anusar - bhrigu rishi ne bhagvan kalagni rudra se rudraksh utpatti v uske dharan se kya fal prapt hote hain ke sanbandh men pucha tab bhagvan kalagni rudra bole jab mere dvara divya sahastra varshon tak tap karne ke pashchat tripurasur ka vadh karne ke lie jaise hi netra khole to unse is dhara par ashrujal gira jisse yah rudraksh vriksh utpann hue. is prakar anya granthon men bhi bhagvan shiv ke netron se gire ashruon se hi rudraksh ki utpatti batai gai hai. rudraksh kab dharan karen? rudraksh dharan karne hetu falgun mas men mahashivratri ka din sarvashreshth mana gaya hai. lekin shukla paksh ka somvar bhi shubh mana jata hai.
rudraksh dharan karne ke lie prachin granthon men mah, paksh, var, tithi, lagn, nakshatra v muhurtanusar varnan prapt hota hai jo pathkon ki suvidha hetu is lekh men prastut hai. rudraksh dharan karne hetu mah: rudraksh dharan karne hetu shastron men ashvin, kartik mas sarvashreshth mane gaye hain. margashirsh v falgun madhyam v asharh tatha shravan adham mane gaye hain. iske viprit bhadrapad, paush v adhikmas (malmas) ashubh mane jate hain. paksha: surya adhyatmik shakti ka data hai, jabki chandra bhautikta pradan karne vala hai. shukla paksh ko satvik v krishn paksh ko tamsi mana gaya hai. atah adhyatmik shaktiyon ko prabal karne hetu krishn paksh men rudraksh ko dharan karna chahie. sansarik v bhautik sukh-suvidhaon ki prapti hetu shukla paksh men rudraksh ko dharan karna chahie.
var: ravivar, somvar, budhvar, guruvar v shukravar shreshth var hai. manglvar v shanivar ko rudraksh dharan karna ashubh mana gaya hai. tithi: dvitiya, panchmi, dashmi, trayodshi v purnima ko rudraksh dharan karne se shreshth v shubh fal prapt hote hain. lagna: mesh, kark, tula, vrishchik, makar v kunbh lagn ko shubh mana gaya hai. nakshatra: rudraksh dharan karne hetu ashvini, rohini, uttarafalguni, hast, svati, vishakha, jyeshtha, uttarasharha, dhanishtha v shatbhisha ityadi nakshatra shubh mane gaye hain. in nakshatron men rudraksh dharan karne se shreshth v shubh falon ki prapti hoti hai. devi bhagavat puran ke gyarhven skandh ke anusar- ‘‘grahne vishuve ch ev sankrame ayne yatha. amavasya paurnamase ch punyeshu divse api..’’
arthat kisi bhi surya-grahan, chandra grahan, tula, makar sankranti, ayan, shiv chaturdashi, amavasya v basant panchmi ko rudraksh ko abhimantrit karne ke pashchat dharan kiya ja sakta hai.