ajivika aur kairiyar ke vishay men dasham bhav ko sabse adhik mahatvapurn mana jata hai. iske atirikt kairiyar ke lie ham dvitiya tatha shashth bhav ko bhi mahatvapurn darja dete hain jismen dasham bhav hamara karm kshetra hai ham jo bhi karya karte hain uska nirdharan dasham bhav tatha dashmesh karta hai. iske atirikt jivan ka sabse mahatvapurn bhav dvitiya bhav ya dhan sthan hai isi bhav se vyakti ki pratishtha tatha dhan ka bhi akalan kiya jata hai. fir shashth sthan ki vivechna bhi jaruri hai jo ki seva tatha naukri ka hai. shashth bhav hamara shatru sthan bhi hai aur isi se vyapariyon ko grahak bhi milta hai. yadi janm kundli, surya kundli ya chandra kundli men shashth bhav ki sthiti thik nahin hai to hamen naukri ya vyavsay men saflta nahin milti hai.
atah kairiyar ke lie 2, 6, 10 bhav ka apas men agar sanbandh thik nahin hai to hamen jivan men saflta nahin milti isse shatru bhavna agar adhik hai to ham na naukri men safal ho sakte hain aur na hi vyapar men. iske atirikt kuch aur bhi jyotishi siddhant hai jisse bari asani se ham apne kairiyar aur vyavsay ka nirdharan kar sakte hain. jaimini paddhati ki manen to atmakarak aur amatya karak grah hi hamare kairiyar ka nirdharan karta hai. usi prakar yadi ashtak varg men sabse adhik ank dasham bhav men hai to vyakti ka kairiyar svatah chuna jata hai. bas jaruri hai to jyotish ka akalan. kairiyar nirdharan men jyotishi siddhant
1. kairiyar nirdharan ke lie janm kundli, chandra kundli, surya kundli men jo adhik bali ho usi ka chunav karen.
2. dasham bhav dashmesh tatha dashmansh ki kya sthiti hai.
3. dashmesh aur navmansh ki kya sthiti hai.
4. dasham bhav ke svami ke dvara, dasham bhav men baithe grahon ke dvara tatha dashmesh jis grah ke navmansh men ho us grah ke anusar ajivika ka vichar kiya jata hai.
jyotish ki drishti se kisi bhi vyakti ki kundli men dashmansh shubh sthan par majbut sthiti men hota hai to ajivika ke kshetra men uttam sanbhavnaen deta hai aur yadi dashmansh agar shashth, ashtam, dvadash bhav men ho ya kamjor ho to rojgar, vyavsay men hani hoti hai. dasham bhav dashmesh ka sanbandh yadi dvitiya bhav dasham tatha shashth aur ekadash bhav se sanbandh ho to naukri men adhik saflta milti hai aur yadi dvitiya bhav saptam, pancham, ekadash bhav se sanbandh ho to vyapar men saflta milti hai. saptam bhav ki sthiti majbut ho to vyapar bahut safal hota hai. ashtakavarg dvara kairiyar ki vivechna ashtakavarg kisi bhi paddhati men sabse mahatvapurn hai. iska varnan brihtprashar horashastra men maharshi parashar ke dvara hua hai. ashtak varg sat grahon tatha lagn se bana hai ismen surya, chandra, mangal, budh, brihaspati, shukra, shani aur lagn ki ganna ki jati hai. ye saton grah har samay gatiman rahakar sthitiyan badlte rahte hain. ye sthiti agar shubh hai to shubh fal milta hai ashubh ho to ashubh fal milta hai.
is vidya men sarvashtakavarg ek aisa varg ya kundli hai jiski sahayta se falakathan satik hota hai aur bahut hi asan ho jata hai. sarvashtakavarg men jis bhav men adhik bindu ho us bhav ka fal jarur milta hai aur jismen kam bindu ho usmen fal achcha nahin milta hai. kai bar kundli men koi grah uchch ka hokar bhi fal nahin de pata. is sthiti men agar ashtakavarg se ganna ki jaye to pata chalta hai ki shayad shubh bindu kam hai islie fal nahin mil raha hai. ismen uchch grah ya nich grahon ka mahatva nahin hota hai. sarvashtakavarg men yadi navam, dasham, ekadash, v lagn bhav men 28 ya isse adhik bindu ho tatha dasham bhav men kam bindu ho aur ekadash bhav men adhik bindu ho tatha vyay bhav ke binduon ki sankhya kam ho to jatak dhani, samriddhashil hota hai aur vyay bhav men adhik ank tatha labh bhav men kam bindu ho to jatak daridra hota hai.
kairiyar aur vyavsay men ashtakavarg ki bhumika sarvashtakavarg men dasham sthan men yadi 28 se adhik bindu ho to jatak svatah apna vyavsay karta hai aur shashth bhav men dasham bhav se kam bindu ho to jatak naukri karta hai. shashth sthan men adhik bindu hone par jatak naukri ya kisi ke adhin karya karta hai. shani se dasham men adhik bindu ho to naukri unche darje ki hoti hai aur agar kam bindu ho to vyapar men ya naukri men sthiti samanya hoti hai. dasham se adhik bindu ekadash bhav men ho to jatak ko kam mehanat ke sath adhik fal milta hai. isi ke sath-sath grahon ke gochar tatha dasha antardasha men grahon ki apne bhav tatha binduon ki sthiti ke hisab se jan kar ham naukri ya vyavsay men labh hani jan sakte hain. is kundli men kark lagn hai aur dasham bhav men 29 bindu hai aur ekadash bhav men 40 bindu tatha vyay bhav men 29 bindu jatak ka svayan ka vyapar hai aur ati dhanvan hai.
is kundli men shashth sthan men 33 bindu hai lekin saptam bhav men 21 bindu se jatak naukri men safal nahin ho saka aur vyapar men bahut labh ho raha hai. ismen mahatvapurn bat yah hai ki dasham se adhik ank ekadash bhav men hai dasham bhav karm ka hai jatak svayan ka vyapar kar adhik labh le raha hai aur naukri men adhik labh nahin ho sakta kyonki ap simit hoti hai vyapar adhik safal raha. isi prakar dasham bhav aur ekadash bhav men binduon ki sthiti viprit ho jaise dasham bhav men 40 bindu aur ekadash bhav men 29 bindu ho to jatak ko naukri men saflta milti hai. is sthiti men adhik labh nahin ho sakta hai. alg-2 grahon ke apne alg-2 prabhav hote hain karkansh kundli ko dekha jae to atmakarak sabse adhik digri ka grah hamare karya vyavsay ka nirdharan karta hai. vibhinn grahon ke karakatva nimn prakar hai.
surya: shasan satta, achcha vyapari, uchch adhikari, sarkari thekedar, netritva karna, prashasnik adhikari, chikitsak, sarjan, anaj ka karobar, surya ke majbut balvan hone se hota hai. chandra: chandi, barf, khane ki vastuen, sajavat, navik, nevi, machli palan, deyri, aushdhi, eyar hostes, sharab adi ka vyapar ya naukri men saflta. mangl: ast shastra vibhag, pulis, prabandhan, mashinri vibhag, kasai, sena, pulis, agni saman, injiniyar adi kshetra men saflta, bhumi aur makan. budh: klark, ekautent, hisab kitab, khelkud, sanvaddata, dak vibhag, stenografar, sandeshvahak, dur sanchar vibhag, bima, dalali, lekhan, patrakarita, jyotish adi kshetron men saflta.
guru: rajdut, vigyan, shiksha, adhyapak, vakil, pravakta, pujari, dharmik sthalon ka mahant, kaishiyar, darshanik, sahitya, treval ejent adi kshetron men saflta. shukra: hire, javahrat, abhushan, videshi mudra, nritya, gayan, gana bajana, filmi kalakar, midiya, sangit adi kshetron men saflta. faishan, kala, fulon ka shrringar dekoretar. shani: koyla, indhan, thekedar, jaj, darshanik, kanun visheshagya, antyeshti karne vale, aisakrim banane vale, haddi, chamre juta chappal ka karya nagrpalika, jamadar adi. ab dekhna chahie ki karkansh ka sanbandh kis grah se ho raha hai usi se hamen us kshetra ka chunav karna chahie. karkansh kundli men jaise surya 280 ka hai aur sabse adhik majbut hai to jatak ka sanbandh sarkari kshetra se hoga ya sarkari naukri karega. yadi vyapar karega to vyapar aisa hoga jismen ki sarkari kshetra ho jaise relve ya sarkari kshetron ki thekedari adi. isi prakar ka sanbandh anya grahon se bhi hota hai.
jaimini siddhant ke anusar kairiyar ka nirdharan karkansh kundli men lagn sthan men surya ya shukra ho to vyakti ka sanbandh rajkiya ya sarkari kshetra se hota hai. karkansh kundli men lagn sthan men chandra ho aur shukra ka isse sanbandh ho to adhyapan ya fainsi kshetron se sanbandh hota hai. yadi budh se chandra ka sanbandh ho to medikal chikitsa tatha dava pratinidhi men kairiyar uttam hota hai. karkansh men mangal ki sthiti pulis, sena, bhumi, makan, rasayan, raksha adi ke kshetra men saflta deta hai.
karkansh lagn men yadi budh ho to vyakti vyapar, salahkar tatha shiksha ke kshetra tatha sanchar ke kshetra men safal hota hai. karkansh ka sanbandh yadi shani se ho ya karkansh lagn men shani ho to lohe, chamre, sharab tatha das banata hai. shani nya ka karak bhi hai. vyakti majistret, nyaydhish banakar ajivika chalata hai. karkansh lagn se pancham sthan men yadi ketu ki sthiti ho to vyakti ganitagya hota hai aur yadi lagn se pancham men mangal sthit ho to kort kachhri adi men saflta deta hai.