yugshevar mahadev mandir  

yugshevar mahadev mandir thakur jayant sinh dalash namak ganv unche paharon ki god men, shanti ka samrajya lie, fal-ful raha hai. dalash jila kullu se lagabhag 150 kilomitar ki duri par hai tatha ani ghati se 22 kilomitar ki duri par hai. is ganv men yugshevar mahadev mandir apne dharmik aur aitihasik drishtikon se pure rajya men prasiddh hai. yadyapi is prachin mandir ke bare men koi abhilekh, ya granth nahin, jo iske itihas ki purnarupen jankari de sake, fir bhi sthaniya mandir ke karmachariyon, pujariyon, kuch prachin dastavejon aur yahan ke logon se sune vrittanton aur kinvdantiyon ke adhar par iske sanbandh men kafi jankari hasil hui hai. dalash ganv samudra tal se lagabhag 6,600 fut ki unchai par sthit hai. yahan gugshevar ke 2 prachin mandir hain, jo aitihasik drishtikon se ek dusre se jude hue hain. ye donon mandir shiv bhagvan ke hain. dalash ganv ka nam dvadash ling se para. is mandir men bahar lingon ki sthapna ki gayi hai. pramukh bara shiv ling mandir ke madhya men sthapit kiya gaya hai. iske sath masan devtaon ka sthan hai, jo rampur bushahar ki devi bhim kali ka putra hai. inhen yugshevar mahadev ka vajir kaha jata hai. iske atirikt baki 11 shiv ling mandir ke charon or sthapit kiye gaye hain. mandir ki divaron par prachin bhasha men kafi likha gaya hain, parantu yah likhavat n to vidvan aur n hi itihaskar parh paye hain. is likhavat ke spasht hote hi is mandir ke sandarbh men nayi baten samne aengi, aisa mandir ke karmachariyon aur yahan ke nivasiyon ka vichar hai. yugshevar mahadev ka dusra pramukh bara mandir ling mandir se lagabhag 20 fut ki duri par hai, jismen yugshevar mahadev ki bhavya murti vidyaman hai. prachin katha ke anusar yugshevar mahadev ki murti ki utpatti ‘kutrvubal dankar’ (jo dalash ganv se 7 kilomitar ki duri par hai) parvat se hui. dankar pahari bhasha men us prakritik jharne ko kahte hain, jo atyant uncha hai aur isapar charhna bahut kathin hota hai. yah dankar samudra tal se lagabhag 8,500 fut ki unchai par sthit hai. yugshevar mahadev ka sthan pahle yahan tha. kisi samay pralay aya aur yah dankar tut gaya tatha murti bah gayi aur bahti hui ganv rathoh men pahunchi. vahan ek vyakti hal chala raha tha. hal chalate-chalate uske hal ki nok se koi vastu takrayi aur jamin se avaj ayi ki hal dhire chalao. usne hal chalana band kar ke apne hathon se us bhari vastu ko bahar nikala, to dekha ki yah ek sunhri rang ki shiv ki murti thi. iske dahine hisse par hal ki nok ka nishal lag gaya tha, jo ismen abhi tak vaisa hi drishtigochar hota hai. usne socha ki use bahumulya khajana mil gaya hai. usne apne bhagya ko saraha aur apna kam band kar ke chupke se murti ko apne kapron men chipa liya. lekin yah murti us ke kapron se nikal kar bahar a gayi. usne ise durhku (anaj rakhne ka baksa) men rakha. lekin yah fir bahar a gayi. vah ise kisi surakshit sthan par rakhna chahta tha, taki samay ane par vah ise bech kar apna naya jivan shuru kar sake. dobara usne murti ko korli (sanduk) men band kar diya. uske ashcharya ki tab sima n rahi, jab vah murti sanduk tor kar bahar a gayi. ab use purnataya vishvas ho gaya ki yah murti avashya hi asadharan hai. yah soch kar vah murti katudtikar (rathor ke samip) ganv men le gaya. parantu yah jagah mahadev ko n bhayi aur unhin ke adesh par vah murti ko khorog parvat (dalash ke samip) par le gaya. yahan kuch din rahne ke uprant, yugshevar mahadev ke adesh par, unhen dalash ganv le aya. yahan use ek ratri svapn aya ki dalash ganv men jahan chitiyon ka dal gol dayre men ghum raha hoga, uske bhitar meri sthapna karo. yahi svapn rampur bushahar ke raja khadag sinh ko bhi aya aur unhonne mahadev ke adeshanusar chitiyon ke gol dayre men chardivari banvayi. fir iske bhitar mandir ki sthapna ganv valon ne miljul kar ki. yugshevar mandir domanjila hai. yah mandir himachal ke anya mandiron ki bhanti itna bhavya, ya sundar to nahin hai, parantu, aitihasik aur dharmik drishtikon se, logon men iske prati asim shraddha is bat ka pratik hai ki is mandir ki mahatta yahan ke nivasiyon ke lie atyadhik hai. mandir ki bahri divaron par mahadev ki chauti-choti murtiyan sthapit ki gayi hain. mandir ki chaten urte hue kauon ki bhanti drishtigochar hoti hain. mandir ke nichle bhag men yugshevar mahadev ke saj-baj hain, jinmen nagara, dhol bhana (kanse ki bajane vali thali) karnal, narsinge, kauri, damam (bara dhol) ityadi shamil hain. mandir ki upri manjil men mandir ke devta ka khan-pan rakha gaya hai. yahan ek bahut bara prachin baksa hai, jismen mahadev ke abhushan, vastra ityadi rakhe gaye hain, jinhen vishesh utsavon par nikala jata hai. mandir ki upri manjil men yugshevar ki bhavya murti vidyaman hai. yahan lakri ka bahut prachin palang hai, jismen mahadev ke sath anya devtaon ki bhi murtiyan hain. yugshevar ki murti anya sabhi murtiyon ke madhya men hain. burha mahadev, yugshevar mahadev ki patni nagin aur kuch anya devtaon ki murtiyan, jinhen yugshevar ki sena kaha jata hai, bhi hain. is ke atirikt yahan ek lohe ki char (dabri) rakhi hui hai. utsav ke avasar par jis vyakti ke sharir men devta pravesh karta hai, vah dabri utha kar devta ki utpatti ki kahani sunata hai. yugshevar mahadev ki murti dekhne men sone ki lagti hai, parantu yah asht dhatu ki bani hui hai. iska rang kabhikbhar kuch kala ho jata hai, jo murti ko saf karne ke uprant bhi saf nahin hota. kabhi-kabhi vah apne ap itni bhavya aur chamkili ho jati hai ki koi manushya usse ankhe nahin mila sakta. yah katu satya hai aur yahan ke nivasiyon ne is karishme ko apni akhon se dekha hai. yugshevar mandir se burhi divali, bhadon mela aur basti mela ityadi mele jure huai hain. in melon men purush aur striyan devtaon ki prashansa men nati (nritya) karte hain. iske atirikt mandir ke bahri bhag men lakri par khubsurat nakkashi ki gayi hai aur lakri par mor, unt, hanuman, shri ram, lakshman, sita, ghore, hathi, nati karte purush aur striyon ko khubsurti se lakri par tarasha gaya hain. ye is tarah sajiv pratit hote hain, mano ane vavali pirhi ko kuch kahne ja rahe hain.