ghar ka vastu dosh kuch n kuch samasyaen utpann karta hai. yadi koi samasya apko bar-bar gher leti hai to sanbhav hai ki apke ghar men koi vastu dosh hai. har samasya ka sanbandh kisi vishesh vastu dosh ko darshata hai. samasya dvara yah jana ja sakta hai ki apke ghar men kaun sa vastu dosh hone ki sanbhavna hai. yah samasya apki janmapatri men sthit grah v unapar gochar v apki dasha ke bare men bhi ingit karti hai. yadi vastu ya jyotishiya upay kar diye jaen to samasya ka nidan ho sakta hai. aie janen kaun si samasya ke piche kaun sa vastu ya jyotishiya dosh hai aur uska kya nidan hai.-
mansik chinta: ap kisi n kisi chinta se grast rahte hain. ek ke bad ek samasya ati hai.
vastu dosh v upay: apke ghar ki uttara-disha kati hai. vahan par pilar ya koi bhari vastu hai. vahan par shisha lagaen taki uttara-purva disha arthat ishan kon barha hua lage. yadi uttara-purva ki jamin ka bhag kata hua hai to piramid ka upyog is prakar se karen ki ya to uttara-purva ka bhag pura ho jae ya piramid athva kaepar vayar ke dvara uttara-purva disha ka jamin ke shesh bhag se vibhajan dikhaya jae.
jyotishiya karan v nivarn: yadi apki kundli men lagn, chaturth, pancham bhav v chandrama krur shani ya rahu ke sath hai ya papakartari yog se pirit hai to un namah shivay mantra ka rudraksh ki mala par jap karne se samadhan ho jata hai.
dhan ki barakat n hona: apke yahan dhan ki barakat nahin hai ya paisa ane par turant hi kharch ho jata hai ya paisa ane men badhaen ati hain ya anayas hi dhan hani ho jati hai, ap rinagrast rahte hanai amdni adhik nahin ho pati hai.
vastudosh v upay: apke ghar ke ishan kon men taeylet ya koi anya gandgi hai athva nairritya kon men koi gaddha hai ya is kshetra ka leval nicha hai, ghar ki dhalan uttara-purva se unchi hai v dakshin-pashchim ki or nichi hai, taeylet men ek namak ka katora ya paiket rakh den aur har mahine use badlen. yadi ishan men gandgi ho to use hata den. nairritya men yadi dhalan ho to vahan piramid lagaen . gaddha ho to use bhar den. ghar ki sirhiyan agar vamavarti hain to unhen thik kar den.
jyotishiya karan v nivarn: kundli men guru nich rashisth athva durbal hai athva lagn v chandrama se chathe, athven ya 12ven bhav men sthit hai ya dvadash bhav men sthit grah ki dasha/antardasha chal rahi ho athva gochar men grah 12ven bhav men ja rahe hon to nivaran ke lie 12ven bhav men sthit grahon ka dan karen.
patni rogi: apki patni hamesha rugn rahti hai aur vyarth ka chirchirapan rahta hai.
vastu dosh v upay: rasoi agney kon men hone ki bajay purva ya ishan men bani hai, chulha rasoi ke pravesh dvar ke thik samne hai, khana banane vale ka munh khana banate samay pashchim disha ki taraf rahta hai, yadi rasoi purva ya uttara-purva men chali gai hai to chulha rasoi ke agney kon men rakhen v khana banate samay munh purva ki taraf rakhen. ghar ka pravesh dvar dakshin-pashchim men hone se bhi rog ki samasya bani rahti hai. ise band karke upyukt disha men pravesh dvar banaen.
jyotishiya karan v nivarn: shukra, saptam bhav v saptamesh ke pirit hone se patni rugn rahti hai. nivarnarth mahamrityanujay ka path v rudrabhishek karen. nityaprati durgapuja karen.
santan sanbandhi samasya: apki santan kahna nahin manti, niyantran se bahar hai, santan prapti men badha hai, bachchon ka parhai men man nahin lagta.
vastudosh v upay: ghar men uttar v uttara-purva ka bhag band hai, roshni kam hai, samne gaddha hai tatha is bhag men taeylet, sirhiyan, lift athva ovrhaid taink bana hai, dakshin-pashchim bhag barha hua hai ya bachcha ghar ke dakshin-pashchim disha men sota hai. uttar v uttara-purva se taeylet, sirhiyan, lift athva ovrhaid taink hatana sanbhav n ho to piramid dvara upay karen. roshni ki vyavastha karen. gandgi hataen. gaddhe ko bhar den. ishan kon men shiv ki murti ya shivling sthapit karen. vahan pila balb jalta rahe. dakshin-pashchim bhag barha ho to kaepar vayar ya piramid se use shesh bhag se alag kar den. bachchon ko uÿar ya purva disha ke kamre men sulaen.
jyotishiya karan v nivarn: kundli men surya v pancham bhav karak guru ki kharab sthiti se bhi santan sanbandhi samasyaen hoti hain. pukhraj dharan karen, satvik bhojan karen. nimnankit mantra ka nityaprati jap karen- un hrin ghrini surya aditya shrin.
svayan ka ghar n hona: kirae ke ghar men rahte hain. apna ghar nahin hai.
vastu dosh v upay: ghar pashchimmukhi ho athva pashchim ya agney kon men koi dosh hai. kiraye ka pashchimmukhi makan n len. pashchim disha v agney kon ke dosh dur karen.
jyotishiya karan evan nivarn: apki kundli men chaturth bhav, chaturthesh v shani kamjor hai. pratidin shani ke nimnankit mantra ka 108 bar jap karen - un shan shanaishcharay namah.
mukaddamebaji: apke upar kort kes chalte rahte hain.
vastudosh v upay: ghar ke purva disha men dosh hai, purva disha kati hai, vahan taeylet hai athva band hai. purva men khanbha, per, transfaermar, mandir, shmashan ghat athva anya sarvajnik sthal hai. pashchim disha barhi ho ya vithishul ho to bhi kort kes chalte hain. purva, pashchim v dakshin disha ke dosh dur karen v ghar men vastudosh nivaran yantra v kali yantra sthapit karen.
jyotishiya karan v nivarn: lagnesh v surya, mangal v shani ke ashubh bhav men sthit hone v pirit hone se bhi yah dosh hota hai. upay ke rup men baglamukhi mantra ka nityaprati jap karen.
shatru bhay: shatru havi rahte hain. bhay rahta hai.
vastudosh v upay: ghar ke dakshin disha men vastudosh hai. unhen sudharne hetu hanuman yantra sthapit karen.
jyotishiya karan v nivarn: lagn v parakram bhav ke svami kamjor hain. hanuman chalisa ka nityaprati path karen.
svasthya sanbandhi samasya: ghar men kisi n kisi ko hamesha hi svasthya sanbandhi samasya bani rahti hai. apko prayah najar lagti hai. haespital ke kharche barhe rahte hain.
vastudosh v upay: apke ghar ki purva disha men vastu dosh hai. ghar ke andar surya ki roshni ane v hava pravah men badha hai, purva disha ka hissa khula rakhne ka prayas karen tatha surya ki roshni ke ane ki badhaon ko hatayen. uttara-purva men n soen. ghar dakshinmukhi ho, ghar ka pravesh dvar dakshin-pashchim disha men ya vahan dhalan, gaddha ya taeylet hone jaise vastu doshon ka sudhar karne se rog v nazrdosh ka nidan ho jayega.
jyotishiya karan v nivarn: kundli men surya nich rashisth athva durbal hai tatha chandrama chathe, athven ya barhven bhav men sthit hai athva rahu se yukt v drisht hai. lagn, chandrama v shukra par rahu ka prabhav hai. durgapuja karen, surya v shivling ko nitya jal den tatha ‘un namah shivay ya mahamrityunjay mantra ka jap karen.
vivah badha: apke ghar men koi avivahit hai.
vastudosh v upay: ghar ke ishan v agney kon ke vastudoshon ko dur karen. kanya avivahit hai to uttara-pashchim men aur yadi larka avivahit hai to vah uttara-purva men soye.
jyotishiya karan v nivarn: apki kundli men guru v shukra donon shubh grahon ki sthiti ashubh hai. nivaran ke lie guruvar ka vrat karen. ghar men safai, pavitrata v shuddhi ka dhyan rakhen. satvik ahar karen. mans madira ka sevan n karen tatha nityaprati shrisukt v lakshmi sukt ka path karen.
ghar men kalah rahna: ghar men kalah rahti hai.
vastudosh v upay: brahm sthan ya agney kon men vastu dosh hain. brahm sthan se bhari vastu, agney kon se pani ki tanki v ishan kon se ilektrik mitar v rasoi hataen.
jyotishiya karan v nivarn: kundli men pirit surya v shukra ka upay karen. pratah jaldi uthakar surya ko aghrya den. pratyek shukravar kanya pujan karen v vrat ke din khatta n khaen.
naukar sanbandhi samasya: apke ghar men naukar nahin tikte aur ap hamesha naukron se pareshan rahte hain.
vastudosh v upay: ghar ke pashchim disha men vithishul hai, pashchim disha barhi hui hai, ghar-pashchimmukhi hai ya vahan koi gaddha hai. vastu dosh ko thik karen v shani yantra sthapit karen.
jyotishiya karan v nivarn: apki kundli men shani nich athva pirit hai. shani mantra ka jap karen tatha shanivar ko gur chane ka prasad sahit kuch dhan rashi naukron ko uphar svarup den.
uprokt samasyaen kai bar janmakundli men vishesh dasha ya gochar ke karan bhi ho sakti hain. atah yah jan lena bhi avashyak hai ki kahin yah samasya vastu dosh ke karan n hokar kundli ke karan to nahin hai. aisa hone par uprokt samadhan karagar nahin hote. atah yadi apko lagta hai ki vastu dosh thik karne par bhi samasya ka samadhan nahin mil raha hai to ap apni aur parivar ki kundli kisi vidvan jyotishi ko dikhaen aur upay dvara samadhan karen.