kya apka jivan 'bhagya' shabd se juda hua hai  

kya apka jivan ‘bhagya’ shabd se juda hua hai? anjna gupta sabse pahle ham bhagya shabd ko samajh len. kuch vakya jo bahut log bolte hain, jaise ‘mere bhagya men hoga to jarur mil jayega’ ya fir ‘kismat achchi hogi to mera kam jarur chal jayega’ ya fir ‘kya mere bhagya men svasth jivan, jyada paisa ya sukhi aur safal jindgi likhi hai?’. bhagya shabd ko ek aisa khilauna bana diya jise saflta ya asflta ke sath asani se jor diya jata hai. kuch log aise hote hain jo kahte hain ki hamare bhagya men jo likha hoga, vahi hamen milega. fir to bhagvan ne hamen do panv diye the chalne ke liye to hamne apni avashyakta ke anusar ya apni suvidha ke lie rel, kar ya havai jahaj ka avishkar kyon kiya. agar hamara janm garm pradesh men hua hai to hamne apne aram ke liye e. si. ya kular ko kyon banaya. bhagya men din aur rat likhe the to hamne apne aram ke lie rat ko roshni men jhilmila diya. iska matalab hamne apne jivan ko suvidha ke sath aur sucharu rup se chalane ke liye bahut sari chijon ka nirman kiya hai. yadi ham apne sukhopbhog ke in sadhnon ke nirmata hain to ham hi to apne bhagya ke nirmata hue. lakri pani men tairti hai, loha pani men dub jata hai. lekin hamne is niyam ke viprit jakar lohe ke bare-bare jahaj banaye. pahar par pura ka pura shahar basa hua hota hai to fir aj bhagya ka sahara lekar mare-mare ya bechare bane kyon ghum rahe hain. bhagya ke sahare to pashu, pakshi bhi nahin rahte, ve bhi apna khana dhundh lete hain. kuch pakshi to sardi se bachne ke liye hajaron mil ka safar tay karke dusre pradesh men pahunch jate hain. manav jivan to us parmeshvar ki uttamottam kriti hai jisko ishvar ne apne hi rup men banaya hai aur ve sare gun diye hain jo uske pas hai. ishvar svayan rachyita hai. usne hamen sah-rachyita banaya hai. in sabke liye usne hamen ek bahut bara uphar diya, mastishk v buddhi ke rup men jisse ham apne jivan ko koi bhi mor de sakte hain. ham khud hi apne sukh-dukh, garibi-amiri, saflta-asflta ke nirmata hai. hamne apne mastishk se bare-bare avishkar kiye, sui se lekar havai jahaj tak banaye, apni utsukta ke liye chand par bhi pahunch gaye. garbhadhan jaisi prakritik ghatnaon par bhi kabu pakar hamne kritrim garbhadhan sanbhav kar diya. itna shaktishali hote huye bhi insan mamuli saflta ke liye bhagya ke bharose kyon rahta hai. bhagya aur kismat jaise shabd nakara aur kamjor admi ke liye hain. karmath admi apna bhagya khud banata hai. agar ap bhi jan le ki apke antrik sansar men kya hai, mastishk ki karyapranali kya hai to urja ke bare men janakar use parivartit kiya ja sakta hai. ant men jane brahmand ke kya niyam hain aur uski bhasha kya hai aur in sabka apas men kya sanbandh hai. us gyan se kuch bhi sanbhav hai. vastutah ap bhagya ke das nahin balki bhagya ke nirmata hain.