yun to prayah sabhi striyon ko tohfe/uphar pana achcha lagta hai jiski vajah sirf us vastu ki visheshta hi nahin balki usse juri sanvednaon ka dil ko chuna hota hai. jaisa ki ham sabhi jante hain ki stri hriday prayah purushon se kahin adhik bhavuk aur udar hota hai. manokamnaon aur bhavnaon se paripurn yah hriday kai bar kisi choti se choti chij par bhi itna lubha jata hai ki mano jindgi bhar ki khushiyan usi men bhari hon.
khas bat tab ho jati hai jab yah tohfa kisi khas ne diya ho jaise premi, pati, bachche, mata-pita, bhai-bahan, priya mitra ityadi. khas upalakshya jaise karva chaith par har stri pati dvara kuch n kuch bhent ki chah rakhti hain. manonukul uphar pakar jahan ek or vastu ki sarahna hoti hai vahin is bat par bhi stri hriday atyadhik garva mahsus karta hai aur bhav vibhor ho uthta hai ki uske pati usko kitna samjhte hain. aie jante hain
jyotish anusar kis lagna/rashi ki kya hai pasand (yah lekh khastaur par patiyon ko samarpit hai taki ve apni patni ki lagna/rashi janakar uske anusar uphar dekar unhen is karvachaith men khushi pradan karen).
mesh: ap upar se sakht aur andar se sanvednshil hain. chunautiyan aur jokhim bhare kam apko achche lagte hain evan jivan men romanch apko kafi pasand hai. apko uphar men ghumne-firne ke tikat ya holide paikej, lal rang ki vastuen jaise sari/pridhan, kuch alag dikhne vali nai se nai dijain aur stail ki vastu gift men pana pasand aega jo apko sabke akarshan ka kendra bana sake. ghar ki sajavat ka saman ya lal rang ke ratnon se jare abhushan apka manchaha uphar sabit ho sakte hain.
vrishbh: apki vrishabh rashi ka svami shukra hai. apko barhiya mahange restorent men kaindal lait dinar khana jaise romantik palon se paripurn samay atyadhik sukhdayi mahsus hota hai aur yah apke lie kisi tohfe se kam nahin hai. ful, chaeklet, laeng draiv, abhushnon men hire aur silvar luk ke abhushan, kaesmetik aitam, spa kupan, bonjai ka paudha apke kuch manchahe upharon men se chand hain. iske atirikt ap jivan men vastu se juri prem ki bhavna ko bahut mahatva deti hain.
mithun: apmen sahnshilta samanya se kuch kam hoti hai. likhne-parhne men apko adhik ruchi hai. baton ki shaukin hone ke karan smartafon ya kisi romanchak film ka tikat uphar men milna achcha lagta hai. iske sath hi pen set, dekoretiv steshnri set aur prayah hare rang ke ratn jare abhushan aur hare rang ke paridhan pasand ate hain. khel samagri, hare rang ki vastu ya koi foto jismen hariyali dikhai de rahi ho, aisi vastuen uphar men apke lie shubh aur prasannata dene vali rahengi.
karka: ap bahut sanvednshil, bhavuk aur sahriday hain. parivar valon ya karibi doston ke sath bahut achcha mahsus karti hain. uphar ke rup men apko kalatmak vastuen, sneh se bhare patra vishesh rup se pasand hote hain. iske atirikt haindmed vastuen, chandi se bani chijen, khane men dudh se bani chijen, safed vastuen uphar men pana pasand karti hain. safed motiyon ki mala apke man ko mohne men purnatah saksham hain.
sinh: ap svabhav se bahut udar hoti hain aur samaj men ap achchi sthiti rakhti hain. apko chahe chota ho parantu uchch stariya uphar pasand ate hain. branded abhushan, manikya, tanbe ki vastu, lakri ki chijen ya sunhre rang ka paridhan uphar men pana vishesh pasand hota hai. iske sath hi svarn se apko vishesh lagav hota hai. svarn abhushnon men vishesh ruchi rakhti hain. gulabi rang ati priya hota hai. fulon men gulab apka man moh leta hai.
kanya: ap apne aspas ki sabhi vastuon aur kriyaon ko vyavasthit rup men pasand karti hain. uphar men apko kanse ki dhatu se bani murti, hari dres, panne ki anguthi, hare rang ya rangbirangi malaen athva ganeshji ki murti/klakriti pasand aegi. yah uphar apko jivan men shubhta bhi denge. kisi ple ki tikat, muvi dekhna, kisi vishesh/samajik parti men sammilit hona apke din ko khas banata hai. apko aergenaijars kafi pasand ate hain jismen ap apna saman sahi tarike se rakh saken.
tula: ap sundar vastuon ki or sahjta se akarshit ho jati hain. apko uttam aur mahange vastron ka vishesh shauk hota hai. uphar men apko madhur khushbu vale itra, parafyum set, kaesmetik aitam, fulon ke guladaste, chandi ke abhushan aur hire ya hire jaise dikhne vale ratn jare abhushan achche lagte hain. apko paridhanon men kala aur parpal khasa pasand hota hai.
vrishchik: ap asadharan ichcha vali mahila hain. iske sath hi ap apni baton ko svayan tak hi simit rakhna pasand karti hain. uphar ki vastuon men apko lal rang jare abhushan uphar men pana pasand aega. iske sath hi apko lal rang ki vastuen v tanbe ki kalakritiyan bhi shubhatva pradan karengi. shodhaparak dimag hone ke karan apne kshetra se juri nai se nai taknik vali vastu apke lie ati shreshth uphar sabit hongi.
dhanu: ap utsah se purn rahne vali mahila hain. apko khas maukon ya utsava/vrat-tyohar par mandir jana pasand ata hai. apko uphar men gyanavardhak kitaben, svarn abhushan evan vastra adi uphar men prapt karna achcha lagta hai. prayah pila aur sunhra rang apko khasa pasand hai. iske atirikt apne priya khel ke upakaran uphar svarup prapt karna apko khushi deta hai.
makr: ap vyavharik aur ganbhir svabhav ki hain. uphar men laiptaep ya anya koi yantrik upakaran prapt karna apke lie prasannatadayak rahega. iske sath hi svachalit mashinri bhi apko prasannata degi. branded aur tarh-tarah ki sundar jutiyan/saindal ya chappalon ka ap khasa shauk rakhti hain. apko kala aur silvar rang atyadhik pasand hota hai. entik stail ki jank jvelri aur dal silvar paelish ke abhushan khasa pasandida uphar hogi.
kunbh: ap har chij ka bari bariki se adhyayan karti hain. apke lie purani nakkashi se yukt shopis ya nilam ya nile rang ke ratn se jare abhushan athva anguthi prasannatadayak uphar siddh ho sakte hain. prachinatam lauh dhatu par nirmit anya koi uphar bhi apke lie achcha rahega. multah nile v kale rang ke paridhan/sariyan pasand karengi. abhushnon men halki-fulki silvar paelish ke eligent dijain hi pasand karengi.
min: ap nyay pasand mahila hain. apni ichcha ke viruddh karya hone par ap bechain ho jati hain. uphar men apke lie sone ke abhushan, pili mithai, pile vastra, fish ekveriyam adi apko shubhta ke sath-sath prasannata bhi dega. apko rang birangi vastuen bhi khub lubhati hain. tarh-tarah ke naye se naye dijain ke paridhan apka man moh lete hain. faishan ke sath-sath kaesmetiks ka bhi khub shauk rakhti hain.