aj ke samay men yadi dekhen to adhikar aur suraksha ki bat mahilaon ki hi ho rahi hai, chahe vah di. ti. si. ki bason men adhik siten surakshit karne ki ho ya mahilaon ke lie alag se mahila baink banane ki bat ho. sanvat 2069 mahilaon ke hi nam raha hai. itna hi nahin desh ki rajdhani dilli men dabang mahilaon ne baik raili nikalakar samaj ko yah ahsas kara diya hai ki mahilaen kisi ki mohtaj nahin rahi hain balki purush samaj men bhay ki bhavna badhi hai ki kahin unse aisa kuch n ho jaye jisse mahilaon ke arop pratyarop ka shikar ho jayen. 23 march 2012 ko sanvat 2069 praranbh hua jis din shukravar tha, isi prakar surya ne mesh rashi men 13 aprail 2012 ko pravesh kiya. sanyogavash us din ka var bhi shukravar tha.
jis din naya sanvat praranbh hota hai us din ka var svami us sanvat ka raja kahlata hai tatha jis din surya mesh rashi men pravesh karta hai use mesh sankranti kahte hain aur mesh sankranti ke din ka svami us sanvat ka mantri kahlata hai. is prakar sanvat 2069 ke raja evan mantri donon hi shukra the. sanvat 2069 men shukra ka purn prabhav raha aur shukra grah ek strikarak grah hai arthat mahilaon se sanbandhit grah hai. yah 2069 ek aisa sanvat raha jismen mahilaon ke bare men hi vishesh charcha rahi. chahe vah dilli ka gaingrep kand raha ho ya indiya get se lekar sansad ya jantr-mantar tatha desh bhar men chote se chote ganv, shahar, muhallon se lekar metropalitan siti jaise dilli, munbai, kolkata, chennai jaise shahron men mahilaon ke prati apradh ke lie ugra pradarshan, dharna adi hote rahe.
itna hi nahin in dharna, pradarshan v juluson ne dilli ki sansad ke netaon v mantrignon ko sochne ko majbur kar diya. mahilaon ke liye vishesh rup se arakshan, vishesh rup se suraksha pradan karne hetu naye-naye niyam-kanun par vichar karna adi shamil hua. kul milakar yadi kaha jay to is sanvat men am janta v sarkar donon ka hi akarshan v kendra bindu mahilayen hi rahin. jab se desh ajad hua, san 1947 se lekar aj tak kabhi aisa nahin hua ki mahilaon ke hit ke liye kabhi pure desh men itni ganbhirtapurvak vichar aur charcha sabhi rajyon ke sadnon men aur desh ki sansad men hua ho. jab se desh ajad hua tab se kabhi bhi aisa nahin hua ki raja aur mantri donon shukra rahe hon. yahi karan hai ki sanvat 2069 mahilaon ke varchasva ka sanvat raha.
yah sanvat 10 aprail 2013 ko samapt ho jayega. sanvat 2070 ka praranbh 11 aprail 2013, guruvar ko ho jayega jabki mesh sankranti 13 aprail 2013 ko shanivar ki rat men hai. is prakar sanvat ke raja guru v mantri shani honge. to is prakar ham kah sakte hen ki is sanvat ke ant ke pashchat sanbhav hai ki jitni charcha v akarshan ka kendra sanvat 2069 men mahilaen rahi hain utna mahatva shayad agle sanvat ke praranbh hone tak n rahe aur sarkar v am janta ka prabhav nyaypalika v adhkar ke liye sangharsh ka ho kyonki guru nyayapriya grah mana gaya hai aur shani us nyay ki saja dilvane vala grah hai. is prakar ham kah sakte hain
ki ane vale sanvat men sanbhvtah am janta apne adhikar ke liye adhik jagruk ho jaye aur sarkar ko majburivash janta ke hit ko dhyan men rakhakar faisle lene ko vivash hona pade. aisa hi san 1857 men hua tha jab angreji sarkar ke virodh men bhartiya log uth khade hue the. us varsh 1857 men bhi sanvat ka raja guru aur mantri shani raha tha. yadi isi prakar sanvat ke raja aur mantri ka vichar karen to 15.8.1947 ko bhi sanvat ka raja surya v mantri surya the, us varsh hamara desh ajad hua tha arthat bharat ki janta ka gaurav badha tha. surya ka sanbandh gaurav, parakram, man-samman tatha raja v sarkar se hota hai. yahi karan raha ki hamara bharatavarsh jo itne varshon tak gulam raha vah 1947 men ajad ho gaya.