jatak ki janmapatri men guru ka balvan hona hi us vyakti ki saflta ka bahut bara karan hota hai. guru ki kripa se vyakti ko buddhi, vivek, arogyata, dhan, santan aur vidya milte hanai. brihaspati ke balvan hone par vyakti dharm pracharak, pujari, shikshak aur sabka bhala karne vala hota hai. guru lagn men baitha ho, to bali hota hai. vah chandrama ke sath baitha ho, to cheshtabli hota hai. chandrama se kendra men guru sthit ho, to gaj kesri yog banta hai, jisse vyakti balvan, dhani, dirghajivi, pratishthit, buddhiman banne tatha lakshya prapt karne men safal hota hai. lagn se kendra, ya trikon men hone se vyakti ki ruchi jyotish shastra ki or hoti hai. bina budh ke buddhi nahin milti hai aur bina buddhi ke jyotishi nahin ban sakte. yadi budh balvan ho, to jatak lekhak, lekhakar, ganitagya aur jyotishi ban sakta hai.
kendra, ya trikon men budh ho, to achche fal milte hain. jaise grahon ke sath budh baithta hai, vaise hi fal deta hai. surya ke sath baithne se budhaditya yog banata hai, jisse jatak ko buddhiman, sab karyon men nipun aur sukhi banata hai. budh vyakti ko mansik shakti, tark shakti, kalpana shakti aur nirnay tak pahunchne ki yogyata deta hai. budh yadi pap grahon ke sath baitha ho, to ashubh fal deta hai. budh yadi chaturth sthan par baitha ho to nishfal hota hai. guru aur budh ke sath-sath yadi shani ki bhi kripa drishti ho jae, to jatak avashya hi jyotishi banta hai. shani 7 grahon men se sabse dur hai. yah bahut lanba chakkar katta hai. shani men vyapkta hai. ek safal jyotishi men vyapak drishtikon hona hi chahie.
use sabhi sanbhavnaon par vichar kar ke hi bolna chahie. shani ke balvan hone par vyakti ka yash dur-dur tak failta hai. shani ashtam bhav ka karak hai, jise randhra sthan bhi kaha jata hai; randhra arthat khadda. ek jyotishi hi bhavishyarupi andhkar ko dekh sakta hai. paragyan ko dene vala shani hi hai. vaigyanik karya aur shodh karya karne ke lie shani aur ashtam bhav ka balvan hona avashyak hai. yadi koi jatak shodh karya karna chahta hai, to uski ashtamesh, ya ashtam bhavasth grah ki dasha-antardasha honi chahie. guru, budh aur shani balvan hone chahien. jab shani lagn se kendra men svarashi, ya uchch rashi men ho, to shash yog banata hai, jismen jatak neta, mantri, ya pradhanmantri bhi ban sakta hai.
uski khyati charon dishaon men failti hai. jyotish ka karya buddhi pradhan karya hai. lagn men shirshoday rashiyan hone par jatak ki ruchi buddhi pradhan karya ki or hoti hai. lagn se hi jatak ke svarup, vivek, mastishk, deh aur atma ka vichar kiya jata hai. lagnesh ki sthiti aur balabal ke anusar is bhav se jatak ki jatiya unnati aur karyakushlta ka gyan prapt kiya jata hai. jyotishiyon ki kundliyon ka adhyayan karne par yah tathya samne aya ki lagnesh chandra, mangal, ya budh hone par jyotishi banne ki sanbhavna barh jati hai.