grahon ki shanti ke lie mukhya rup se do prakar ke upay kie jate hain- ratn dharan evan dan. jis grah se sanbandhit ratn dharan kiya jata hai vah grah us jatak ke jivan men adhik prabhavshali ho jata hai tatha jis grah se sanbandhit dan kiya jata hai us grah vishesh se hone vali hani ka shaman hota hai. pratyek vyakti ko us grah se sanbandhit dan karna chahie jo uske lie hanikarak hai tatha us grah ka ratn dharan karna chahie jo uske lie labhdayak hai.
lagn bhav, tritiya bhav evan ashtam bhav ayurbhav hain aur yahi karan hai ki in ayurbhavon ka vyay karne vale inse dvadash bhav kramshah dvadash, dvitiya evan saptam bhav marak hain . iske atirikt char lagnon yatha mesh, tula, kark aur makar men ekadash bhav badhak hai, sthir lagnon yatha vrish, vrishchik, sinh aur kubh men navam bhav tatha dvisvabhav lagnon yatha mithun, kanya, dhanu evan min men saptam bhav badhak hai. pratyek jatak ko apni janmapatrika ke anusar badhak evan marak grahon se sanbandhit dan karna avashyak hai.
yah dan us samay aur bhi jyada avashyak ho jata hai jab in grahon ka prabhav vishonttari dasha ke karan vyakti par chal raha ho. grahon ka vishishtikaran kiya jana chahie tatha tadnusar hi dan athva ratn dharan kiya jana chahie. vishishtikaran se ashay grah vishesh ki purn janch se hai. yatha kanya lagn ki kundli men saptam bhav badhak bhi hai aur marak bhi. aisi sthiti men saptamesh tatha saptam men baithe grah evan vah grah jiske nakshatra men saptam bhav men grah baitha hai, in tinon ka dan avashyak hai.
ab yadi saptam bhav men shukra min rashisth evan revti nakshatra men aur budh min rashisth evan uttarabhadrapad nakshatra men virajman hai to aisi avastha men vishishtikaran is prakar kiya jana chahie ki grah vishesh ka sanpurn adhyayan kar uski prakriti tatha kshamata ka pura jayja liya ja sake. ukt udaharan men shukra evan budh ka avlokan karen to paenge ki saptam men baitha shukra uchchasth hokar budh ke nakshatra men aur budh nichasth hokar shani ke nakshatra men tatha donon brihaspati ki rashi men hain.
yahan par dan brihaspati pradhan tatva ka kiya jana hai. sath hi budh ke prabhav yukt uchchasth shukra evan shani ke prabhav yukt nichasth budh ka bhi samavesh kiya jana hai. shani ke nakshatra men upasthit budh, kisi prachin mandir men sthit bhagvan ganesh ki pratima ka dyotak hai, budh ke nakshatra men shukra haritima yukt mithe pakvan ka tatha brihaspati ghrit ka dyotak hai. is paristhiti men kisi jirn evan purane ganesh mandir men ghrit se taiyar kie gae haritima yukt mithe pakvan ka bhog nitya prati lagana labhdayak rahega.
isi prakar samast badhak evan marak grahon ka dan vishishtikaran ke adhar par kie jane par labh dekhne men ae hain. iske atirikt kisi labhkari evan karak grah ke ratn aur usse sanbandhit vastuen evan vastra dharan karne se us grah vishesh ke fal adhik prabhavshilta se prapt hote hain. udaharan ke lie yadi naukri men badha hai athva naukri mil nahin rahi hai to nishchit rup se dasham bhav evan chathe bhav se sanbandhit samasya hai kintu yadi naukri men samasya yah hai ki vetnvriiddh samay par nahin ho rahi hai
to yah samasya ekadash bhav evan dvitiya bhav se dekhi jani chahie. jatak ki vinshottari dasha men antar evan pratyantar ke sath hi uski samasyaon men bhi parivartan hota rahta hai. kintu kain bar yah dekhne men bhi ata hai ki ek grah vishesh kisi jatak ki kanudli men kisi karak bhav ka svami hone ke sath hi kisi badhak bhav ka bhi karak hota hai.
aisi sthiti men jyotishiya upay yadi sanpurn savdhani se n kiya jae to anarth ho sakta hai. jaise kisi kudli men dasham bhav ka karak grah marak ya badhak bhav ka signifiketar bhi ho sakta hai.
aisi sthiti men aise grah ka upay atyant savdhani ke sath kisi anubhvi jyotirvid ke margadarshan men hi karna chahie. ekadshesh ka ratn dharan karna sarvada hanirhit ho yah manna bhi galat hoga. kuch sthitiyon men jab jatak ke karya men atyant badhaen a rahi ho tab samanya rup se jyotishigan ekadshesh ya ekadash bhav men upasthit grah ka ratn dharan karne ki salah dete hain.
kintu char lagnon yatha mesh, kark, tula evan makar men ekadshesh ka ratn dharan karne se purva yah dekhna avashyak hai ki vah kisi anya prakar se bhi faldayak ho raha hai ya nahin. kyon ki samanya rup se char lagnon men ekadshesh badhak sthanadhipti hota hai.
is badhak sthanadhipti ke anyatha samuchit rup se faldayak nahin hone ki sthiti men yadi iska ratn dharan kiya jata hai tab yah nishchit rup se badhaon men vriddhi karta hai. santan prapti ke lie stri jatak ki kundli men jahan panchav bhav ka vichar kiya jana chahie vahin purush jatak ki kundli men saptam ka pancham arthat ekadash bhav ka vichar kiya jana chahie.
donon hi paristhitiyon men yah dekha jana chahie ki panchmesh athva ekadshesh ka prabhav barhe tatha in bhavon ke badhak, marak evan vyaykarak bhavon men upasthiti grahon tatha in bhavon ke svamiyon ka vishishtikaran ke adhar par dan kiya jae. is prakar se nishchit rup se labh prapti hoti hai.