logon ki mrityu uprant vibhinn karnon se athva moh maya vash jab unki atma bandhan mukt n hokar mrityu lok men hi ghumti rahti hai aur svayan mukt n hone ke karan in purvajon ka apne parivar par nakaratmak athva kisi n kisi rup men hanikarak prabhav parta hai to ise hi sadharntya pitri-dosh mana jata hai. shrimad bhagavadgita men bhagvan krishn ke prati jo vachan kahe gaye hain ‘‘sankhya-yog’’ namak dvitiya adhyay men uske anusar atma ko ajr-amar kaha gaya hai. atma n to kabhi janm leti hai aur n kabhi marti hai. ise n to koi shastra kat sakta hai, n agni jala sakti hai n hi jal gila kar sakta aur n hi pavan ise sukha sakta hai. yah to shashvat hai. jaise manushya fate-purane vastron ko tyagakar navin vastra dharan karte hain usi tarah atma bhi jirna-shirn purani deh ko tyagakar navin sharir ko dharan kar leti hai. ise hi mrityu hona aur janm lena kahte hain- sharirdhari ke liye. yah sarvavidit hi hai. atma dah sanskar ke bad moh maya adi ke jhanjhavaton men n bhatkti rahe isliye jab aisa pratit hone lagta hai ki kisi ki mrityu ka samay nikat hai to us jivatma ko krishn ke mukh se nikli bhagavadgita parhakar sunai jati hai taki sansar ki moh maya chut sake aur us prani ko mukti prapt ho sake.
hinduon ke do prasiddh granth hain bare hi pavitra pavan ramayan aur gita. jahan ek or ‘ramayn’ sansar men rahakar ‘jina’ sikhati hai vahin dusri or gita sansar se ‘jana’ sikhati hai (moksh marg ke lie). hamare manishiyon ne ashvin mas ka purn krishn paksh pitri shanti ke nimitt tarpan, shraddh adi karne ke lie pitri-paksh ke rup men manane ka nirnay liya hai. pitridosh mukti hetu gaya tirth men jakar jaldan, tarpan, shraddh, pinddan karna sarvashreshth mana jata hai. gaya kshetra men bhagvan gadadhar sadaiv sakshat virajte hain, is karan sab tirthon men ise vishesh prasiddhi prapt hai. pitri dosh shaman ke kuch upay
- shrimad bhagavat ka ek saptah chalne vala adyant path bhagavat katha vachak yogya brahman se ghar men karvane se pitron ki tripti hoti hai aur unki prasannata se pitridosh shant hota hai.
- shrimad bhagavad gita ka nirantar path svayan karne ya samy-samay par shreshth brahman, kulguru ya purohit se path karvane se pitrignon ki prasannata avashyanbhavi hoti hai. sath hi sath yagya, havan v viprabhoj bhi karna chahiye.
- garur puran ka yathochit avasar par pathn-pathan athva shravan karna pitri dosh shaman ka ek uttam upay hai. falasvarup jatak ko pitri-prasannata se sukh-shanti ka abhas hone lagta hai.
- bhagvan shri vishnu-varah prithvi devi se kahte hain ki he devi tumhare puchne par mainne apne guhya se guhya kshetra ki mahima ka varnan kiya. jo vyakti mere is sanandur kshetra ke mahatmya ka pratidin shraddha bhakti se path karega uske purva ki 18 pirhiyon ke log tar jaenge. (vishnu varah puran-sanandar mahatmya)
- pitron ke nimitt kiye jane vale gau-dan se pitri tript hote hain. - amavasya ke din pitron ke nam se dhup, dip, agarabatti jalane se, garibon ko bhojan karane se evan gau-mata ko koi bhi panch fal khilane se pitri-rin ka shaman hota hai.
- pitri-paksh ke 16 dinon men shraddha-vishvas purvak pitron ka tarpan karna chahie. - tripindi shraddh, narayan v nagbli shraddh yogya brahman ke sannidhya men karne se pitrigan prasann hote hain aur apne kul ki sada raksha karte hain.
- gaya dham men jakar shraddha ke sath pitron ke nam aur gotra adi ka sankalp lekar pinddan karne se pitron ko akshay lok ki prapti ho jati hai. gaya dham ke adhishthatri dev bhagvan gadadhar nath hain. is kshetra men unke ‘‘gadadhr-stotra’’ ka path karne se pitri-tripti sahit sarva saukhya ki prapti hoti hai.
- pitri-dosh ke karan roji-rojgar ki avnti, vivah badha, avivahit hona, santan n hona, putra sukh ka abhav, anna-dhan ka abhav, rog adi hone par pitridosh ke karak grahon ki ashubh falaprad sthiti ke anusar shanti karana chahiye. kundli se kaise janen pitri-rin - jab saur mandal ke adhishthata grah surya ki shani ke sath yuti ya drishti athva drishti-vinimay ho to kundli dekhne se pitri-rin hona gyat kiya ja sakta hai.
- tula rashisth, nich ke surya aur uchch ke shani ki janmakalin yuti vali sthiti aur vipattikarak pitri shrap parilakshit karti hai.
- surya ya chandrama ke sath rahu kundli men virajman hone se grahan yog kahlata hai. yah bhi pitri-dosh mana gaya hai. iske prabhav se nana prakar ki apattiyan jatak ko ghere rahti hain.
- janmakundli ke pratham, dvitiya evan dvadash bhav (1, 2 v 12) men rahu ki sthiti pitridosh nirmit karti hai.
- kisi ki janmakundli men guru aur rahu ki chandal yog vali yuti hone se jatak pitri rin se grasit hota hai, pancham bhav men.
- kundli men ‘surya-shani-rahu’ ki tripap grah vali yuti pitri dosh karak hoti hai.
- chandrama aur ketu sath-sath kundli men baithe hone se pitridosh ka abhas hota hai.