bharat men aisa pahli bar hua jab gair kangeras parti ki purn bahumat vali sarkar bani ho. tis varshon ke bad desh men pahli bar purn bahumat vali ek parti ki sarkar bani hai yah bharat varsh ke agami bhavishya ke lie shubh sanket ho sakta hai. is lok sabha chunav men narendra modi hi ek matra aise rajneta the, jinhen sanpurn desh bhar men lokapriyata prapt hui tatha uske sakaratmak parin aam bhi chunav ke natijon men unke paksh men dikhe. nai sarkar ke lie ab desh ki anek samasyaon se nibtne ki bari chunautiyan hain. is pariperakshya men jyotishiya vishleshan se shri narendra modi sarkar ke bhavishya ke bare men unke shapath grahan samay ki kundli ke madhyam se nimn alekh prastut hai.
bharat ke 15ven pradhanmantri ke rup men rashtrapti bhavan men jab shri narendra modi ne pradhanmantri pad ki shapath li us samay par tula lagn vidyaman tha. lagn men uchch ke shani tatha rahu sthit hone se ve apne majbut iradon ko lekar sarkar chalana chahte hain is bat ka spasht sanket hai. lagnesh shukra saptam bhav (sajhedari sthan) men sthit hone se tatha lagn par purn drishti hone se is bat ka sanket hai ki ve sabko sath lekar chalenge tatha sarkar ki sthirta banae rakhne ke lie apni taraf se purn prayasarat rahenge evan ismen safal bhi ho jayenge. tula lagn char lagn hai tatha lagnesh aur karmesh bhi char rashi men hi sthit hai jiske falasvarup ve apni yojnaon ko tivragti se lagu karne ka bharpur prayas karenge.
lagnesh aur karmesh ka saptam bhav men ek sath sthit hona is bat ka bhi sanket hai ki ve apne mantrimandliya sahyogiyon se bhi apni karya pranali se karya karne ka sujhav dete rahenge tatha uska sarkar ke kamkaj par bhi sakaratmak prabhav parega. chaturthesh shani jo ki janta ka pratinidhi hokar lagn men uchchasth hokar mitra rahu ke sath sthit hai, iske prabhav se yah sarkar am logon ki samasyaon jaise mahangai, rojgar, krishi, vyapar ke kshetra men kare kadam uthane men piche nahin hategi, halanki ise lagu karne men praranbh men kuch dikkaten ayengi lekin bhavishya men uske sakaratmak parinam ki sanbhavna bhi adhik rahegi. labh sthan ka svami surya grah ashtam bhav men sthit hai jisse arthik kshetra men arthik labh ke lie sarkar ko adhik parishram karna parega, parantu tula lagn ke lie ekadshesh surya badhak grah bhi hai.
usi drishti se badhkesh surya ka ashtam sthan men sthit hona shubh hai jisse sarkar ki badhaen shighra nasht hoti rahengi tatha arthik labh ke kshetra men sarkar ko safltaen prapt hongi. dhanesh ke barhven bhav men jane se sarkar ko apne arthik bajat ke hisab se hi kharch karna chahie, jisse bhavishya men arthik sthiti par niyantran bana rahe. is or adhik dhyan dene ki avashyakta bhi rahegi. halanki dhankarak guru ki bhagyesh ke sath bhagya sthan men hi yuti hone se sarkar ko adhik arthik sankat se nahin gujrna parega. shighra hi uska samadhan hone ki sanbhavna bhi rahegi.
navmesh navam sthan men hi hone se tatha adhyatmik grah guru ki yuti hone se is bat ka bhi spasht sanket hai ki yah sarkar adhyatmik kshetron ke rakhrkhav, ganga adi pavitra nadiyon ki safai tatha tirth sthalon ke paryatkon ke lie vishesh sakaratmak kadam uthayegi sath hi desh men paryatan ke vikas ke lie bhi kai achchi yojnaen banayegi. sampradayik sukh-sauhard ke lie bhi ganbhirta se karya karegi.
dvadshesh budh ki trikon men svagrihi sthiti hone se yah sarkar apni videsh niti ko lekar sabhi deshon ke sath apne achche sanbandh sthapit karne ki koshish karegi. praranbh men inki videsh niti ka virodhi dal kafi virodh bhi karenge, parantu bhavishya men uske sakaratmak prabhav ko dekhakar ve bhi prabhavit honge. lagnesh ki lagn par drishti tatha lagn men uchchasth mitragrah hone se evan brihaspati ki lagn par drishti hone se tatha shubh grah shukra ki hora hone se yah sarkar apna karyakal purn karne men safal hogi.