rang aur umang ka parva holi  

rang aur umang ka parva hai holi nand kishor purohit holi ka parva falgun shukla paksh ki purnima ko manaya jata hai. yah do bhagon men vibhakt hai. purnima ko holi ka pujan v holika dahan kiya jata hai tatha falgun krishn pratipda ko log ek-dusre ko rang-gulal adi lagate hain. is tithi ko bhadra ke mukh ka tyag kar nisha mukh men holi ka pujan karna chahie. holi ka parva vyakti ke jivan men harshollas lata hai. holi dahan ke sath-sath navanneshti yagya bhi kiya jata hai. is paranpra se ‘dharmadhvaj’ rajaon ke yahan falgun ki purnima ke prabhat men manushya gaje-baje sahit nagar se bahar van men ja kar sukhe trin ki tahniyan adi late hain aur gandh, akshatadi se unki puja kar nagar ya ganv se bahar pashchim disha men ek sthan par sangrah kar lete hain. ise holi dand ya prahlad kahte hain. ise ‘navanneshti’ ka yagya stanbh mana jata hai. holi ke samay kisanon ki fasal bhi katakar a jati hai tatha sabhi kisan ek bara alav (holi) jalakar apni khushhali-samriddhi ke lie agni ko apni fasal ka pahla hissa arpit karte hain. kisan dhan ki parakh bhi isi alav (holi) se karte hain. is karan holi ka mahatva bara hai. holi ke dusre din dhulendi hoti hai. is din log dhuli krira karte hain. shahar men kam, kintu ganvon men yah krira vishesh rup se hoti hai. is samay dhul ka yah khel ritu parivartan ke karan hone vale kasht se sharir ki raksha ke uddeshya se khela jata hai. holika ke vishay men kai kathaen hain. inmen sarvadhik prasiddh hai hiranyakshipu ki bahan holika ka prahlad ko ko marne ke lie use god men lekar ag men baithna. dusri katha ke anusar, bhagvan krishn dvara putna ka vadh isi din kiya gaya tha. tisri katha ke anusar, bhagvan shiv ne kamdev ko isi din shap dekar bhasm kar diya tha. holika pujan ke samay bahan manuj men ak ki lakri dalakar aur us par gobar lagakar use apne bhai ke sir se utarakar holika men dal deti hai. yah kriya vah apne bhai ki sare kashton se raksha ki kamna se karti hai. aisa karte hue vah prarthana karti hai ki jis tarah ishvar ne holika se prahlad ki raksha ki thi, usi tarah sankton se uske bhai ki raksha kare. isi din putna rakshasi bhagvan shri krishn ko marne ke lie ai thi, aur bhagvan ne putna ka vadh kiya tha. isilie nav dampati tatha ek varsh se kam ayu ke balkon se holika ki puja karai jati hai. kai sthanon par holi ke pujan ke samay kamagni jagane vale shabdon ka prayog kiya jata hai. kaha jata hai ki isi din bhagvan shiv ne kamdev ko bhasm kiya tha. kamdev ko jagrit karne ke lie bhi aise shabdon ke prayog ki paranpra hai. jivan men umang, asha, utsah adi ke sanchar ke lie aur nae mausam ke dushprabhav se bachav ke lie in dinon log pani, rang, achche khan-pan, git-sangit adi ka anand uthate hain. holika men svang rachne ki paranpra hai. yah paranpra bhagvan krishn ke samay se chalti a rahi hai. garg sanhita ke anusar bhagvan shri krishn radhaji ke vishesh agrah par holi khelne ke lie gae. bhagavan ko is samay majak karne tatha vatavaran ko hasyaprad banane ki sujhi, islie vah stri vesh dharan kar radhaji se milne gae. radhaji ko jab pata chala, to unhonne bhagvan ko kore lagae. kaha jata hai ki isi karan latth mar holi ki paranpra shuru hui. is avasar par rang ya gulal ka istemal kalar therepi ka kam karta hai jisse sharir ki vibhinn kashton se raksha hoti hai. sabhi log har prakar ki shatruta bhulakar holi khelte hain. holika dahan ke samay dafli bajane ki paranpra bhi kafi purani hai. vastutah kheton men pake anaj ko pakshiyon se bachane ke lie dafli bajai jati hai. kuch log kahte hain ki kheton men kam karne vale kisanon ke manoranjan ke lie git-sangit, dafli adi ka prayog kiya jata hai.