solah sanskaron men vivah sanskar ka vishesh sthan hai. ek prakar se vivah sanskar ke dvara hi stri tatha purush mil kar purnata ko prapt karte hain. vivah ke bina vyakti ka jivan adhura evan vyarth mana gaya hai. vivah sanskar dvara vyakti pitri rin se mukti prapt karta hai, santan ke janm se uska vansh age ko barhta hai. vivah ke pashchat hi vyakti grihasthashram men pravesh karta hai. manav jivan ke char ashramon men grihasthashram ko vishesh mahatva prapt hai. grihasth jivan men vyakti apni patni ke sath milakar anek parivarik evan samajik udrdayitvon ko purn karta hai.
vivah ke dvara hi uske jivan men ek aisi stri ka agaman hota hai jo jivanaparyant uske sath milakar jivan ke sangharshon ko jitne men uska sath deti hai. aisa mana jata hai ki purush ke jivan se agar stri ko alag kar diya jaye to is srishti ka akarshan hi samapt ho jayega, purush ke jivan se anand samapt hokar nirsta ka samavesh hone lagega aur anttah jivan ka mulya hi samapt ho jayega. vivah ke dvara hi purush ko stri ka sannidhya prapt hota hai, isliye vivah sanskar ko vishesh sthan prapt hai.
vivah sanskar ko sabse adhik mahattva kyon diya jata hai, is par bhi vichar kiya jana avashyak hai. kuch vyakti evan alpagyani vidvan vivah sanskar ko vivah sanpann hone tak ke vidhi-vidhanon tak simit karke dekhte hain. var-vadhu ka vivah sanpann ho gaya, isi ke sath vivah sanskar bhi purn ho gaya ... kintu vastav men aisa nahin he. vivah ke sath hi vyakti grihasthashram men pravesh karta hai. grihasth jivan men rahte hue hi use anek prakar ke parivarik aur samajik dayitvon ko pura karna parta hai.
vartaman men vyakti mrityuparyant grihasth jivan men hi lipt rahta hai. is karan vivah sanskar ko sarvadhik mahattva prapt hai. iske atirikt vivah sanskar se antim sanskar arthat antyeshti sanskar ke bich koi anya sanskar bhi nahin hai. isliye bhi iska bahut adhik mahattva mana gaya hai.
1. vivah ke madhyam se pita apni kanya ke bhavishya ki chinta se mukt ho jata hai kyonki vivah ke bad uski samast avashyaktaon ki purti tatha uski suraksha karne ka uttaradayitva uske pati ka ho jata hai.
2. vivah ke madhyam se hi vyakti apne putra ke liye kanya ko svikar karta hai. isse jahan parivar ke karyon men uska sahyog prapt hota hai, vahin uske dvara santan ko janm dene se uska vansh bhi age barhta hai.
3. vivah ke dvara do nitant aprichit stri-purush ek hokar jivan bhar sath rah kar apne uttaradayitvon ko pura karne men ek-dusre ka sahyog karte hain. stri ke bina purush aur purush ke bina stri ko adhura samjha jata hai. purush ke jivan men jab stri ka patni ke rup men agaman hota hai tabhi vah purnata ko prapt karta hai. isi karan se patni ko pati ki ardhangini kaha jata hai. svayan devon ke dev bhagvan shiv ke sharir ka adha bhag shakti rupini gauri ka mana gaya hai, isliye ve ardhanarishvar kahlaye.
4. vivah ke dvara do parivaron ke bich naye sanbandhon ka sutrapat hota hai. ek prakar se unki pratishtha, samman aur man men vriddhi hoti hai. do kutunb ek hokar nai shakti ban jate hain.