grahon ki kahani grahon ki jubani film abhinetri v nrityangna vaijyanti mala pan. dyarad tripathi char samachar ke pichle ankon men ap kai vishisht vyaktiyon ke jivan kal ka jyotishiya vishleshan parh chuke hain is ank men prastut hai prasiddh film abhinetri, nrityangna v sansad rah chuki shrimti vaijyanti mala bali ka jivan chakra. unhonne tamam utar-charhav dekhe parantu vichlit hue bina apna karya puri tanmayata se karti rahin aur jis kshetra men unhonne dakhal diya usmen saflta aur prasiddhi prapt ki. asha hai, is vishleshan se jyotish jigyasuon aur jyotish ki shiksha grahan kar rahe chatron ko labh milega. ek larki apne munh men chandi ka chammach lekar paida hui aur sone ke palne men pali barhi. vah ek film star ke ghar paida hui thi. use aj apni man aur pita men se ek ko chunna tha. adalat men sannata pasra hua tha. sabhi ki nigah us bachchi par thi. uski juban se nikla ek shabd uska bhavishya nirdharit karne vala tha aur jab vah boli to hangama ho gaya. uske shabd the ki ''main apne pita ke sath rahna chahti hun kyonki main unhen duniya men sabse jyada pyar karti hun''. yahi larki thi vaijyanti mala. inka janm 13 agast 1936 ko purvahn 11 bajakar 30 minat par maisur ke rurhivadi aur paranpraon ka kathorta se palan karne vale ek ayangar parivar men hua. jab inka janm hua, tab inki man ki umra 16 varsh thi.
man beti donon bahnon ki tarah bari huin. inka laln-palan inki nani (yagamma) ki dekh rekh men hua. inke pita bahut hi namra aur mridubhashi the. balika vaijyanti ne unhen kabhi gussa karte nahin dekha. vaise to yah bachchi bhi samanya bachchon ki tarah thi par usmen ek khas bat thi jo use auron se alag karti thi aur vah thi uski chal. uske sharir men tal tha. vah apne pairon par thirkne vali larki thi. vah hamesha se dansar banna chahti thi. shayad nritya uske andar tha islie vaijyanti ka jyadatar samay tarh-tarah ke kartbon aur nritya ki vibhinn kalaon ko sikhne men gujrta tha. chah sal ki umra men balika vaijyanti ko yurop jane ka avasar mila. maisur ke maharaj ke sanskritik dal men vaijyanti ki man, pita tatha nani (yagamma) bhi sath gain. yah san 1942 ki ghatna hai is dal men sattara-pachahattar kalakar v sangitkar shamil the. is tarah vaijyanti ko apne pahle nritya pradarshan ka mauka mila. is dal ne vetikan men pop ke samne bhi pradarshan kiya. us samay tak vaijyanti ne nritya kala ka koi prashikshan nahin liya tha. nakal utarna aur thore hath pair hilana hi use ata tha. fir bhi usne pop ke samne pradarshan kiya aur jab karyakram samapt hua to pop ne use ek boks men chandi ka medal pradan kiya. aie is ghatna kal ko jyotishiya drishti se dekhte hain kri prastut kundli tula lagn ki hai aur lagnesh shukra 11ven bhav men bhagyesh budh ke sath sthit hai jo jatka ki saflta ko darshata hai. dasham bhav men surya aur mangal ka sthit hona ismen aur char chand laga raha hai grahon ki is sthiti ke adhar par yah janne ka prayas karen ki inki man aur pita ke bich sanbandh kaisa raha aur nani dvara laln-palan kyon hua ? chaturth bhav se man ka aur navam se pita ka vichar kiya jata hai. navam bhav vyakti ke dharm aur pita ka bhav hota hai.
jyotish jigyasu aksar prashn karte hain ki navam bhav pita ka bhav hai to tritiya bhav man ka kyon nahin jabki navam bhav se saptam tritiya bhav hota hai. iska uttar hai ki is vedang jyotish men kai arth bahut gahre chupe hote hain. vyakti ke jivan men do manen ho sakti hain - ek jo janm de aur dusri jo palan kare. hamari bhartiya sanskriti men prayah hamare sanskaron ke karan janm dene vali man hi palan bhi karti hai. tritiya bhav vyakti ki janm dene vali ho sakti hai lekin janm ke bad jo shiksha, sanskar de, paln-poshan kare uska vichar chaturth bhav se kiya jata hai. vaijyanti mala ki janm dene vali man ke bhav arthat tritiya bhav men rahu baitha hai aur tritiya ka svami guru apne se barhven arthat dvitiya bhav men sthit hai. atah yah yog janm dene vali man se algav ki bat batata hai. vahin palan karne vali man ke bhav arthat chaturth bhav ka svami shani apne se dvitiya arthat pancham men sthit hai. yah paln-poshan karne vali inki man arthat nani dvara achcha lalan palan darshata hai. shukra ki shubh sthiti ne inhen khubsurti di aur abhinay tatha nrityakla men parangat banaya. vahin dasham bhav men sthit shakti ke karak surya aur mangal ne inhen vishesh urja se otaprot kiya aur desh videsh men khayati dilai. lagnesh shukra sinh rashi men 90.41sh ka hai arthat ketu ke nakshatra men hai aur yahi ketu navam bhav men sthit hai. yah yog jatka ke pita ke prati pragarh sneh ko darshata hai. 1 janvri 1942 se 20 janvri 1943 ke dauran rahu/ketu ka antar chal raha tha. ketu bhagya bhav men sthit hai. isi ne inhen pratham bar yurop jane ka avasar dilaya aur pop se inki bhent karai aur yahin se inke nritya jivan ki shuruat hui. vaijyanti ki pratibha ko dekhakar unki sangit aur nritya ki shiksha ke lie sarvashreshth guruon ki seva li gai. karnatak sangit ki shiksha unhonne manakkal shivraja ayyar se li.
ariyakudi ramanuj ayangar aur ramyapillai se unhonne nritya ki shiksha prapt ki. inki nritya kakshaen matra ath varsh ki umra se shuru ho gai thin aur terah varsh ki umra tak pahunchte - pahunchte vah nritya kala men pravin ho gain. akhir vah din bhi aya jab vaijyanti ke pratham nritya karyakram ka ayojan hona tha. is karyakram ke lie raman strit par ek bara sa ghar liya gaya. pahle bare hal adi nahin hote the. karyakram ki shuruat 13 aprail 1949 ko tamil navavarsh ke din ki jani thi. ank 13 ka vaijyanti mala ke jivan men vishesh mahatva raha hai. inka janm 13 agast ka hai. karyakram ki sabhi taiyari puri ho chuki thi tabhi ek ghatna ghati. stej ka nirikshan karte samay vaijyanti mala ka pair vahan pare bijli ke nange tar par par gaya aur vah kafi jhulas gain par apne dard ko pradarshan ke samay unhonne prakat nahin hone diya. agle din ke samachar patron men vaijyanti ki tasviron evan samacharon ki bharmar thi. ek akhbar ne likha- varugiral vaijyanti (yahi hai vaijyanti) dhire-dhire vaijyanti ke aur karyakram ayojit hone lage aur vaijyanti ek nrityangna ke rup men prasiddhi pane lagin. inhin dinon vaijyanti ke karyakram ka ayojan chennai ke mashhur gokhle hal men kiya gaya jahan 'e vi em' prodakshan ke malik shri e vi yayappa chetiyar aur em.vi. raman bhi upasthit the. karyakram ke uprant yayappa chetiyar ne unhen apni tamil film 'vajkai' men kam karne ka amantran diya. raman chunki parivarik mitra the atah film men kam karne ki anumti mil gai. film ne tahlka macha diya aur ise telgu men 'jivithm' tatha hindi men bahar nam se banaya gaya.
midiya ne is nrityangna ko 'vaijyanti d dansing star' nam diya. iske bad kuch aur kshetriya filmen banin par safal n ho sakin. is dauran vah dans sho karti rahin. tabhi samay palta aur unhen 'nagin' film ka prastav mila aur vaijyanti shuting ke lie munbai a gain. unhen is film men jivit sarpon ke sath kam karna para. parantu film pahle din hi dher ho gai. film ki sthiti dekhakar jankar unhen 'van film vandr' pukarne lage. par bhagya ko kuch aur hi manjur tha dhire-dhire nagin ko darshak milne lage aur holon men bhir barhne lagi. film men lata mangeshakar dvara gaya 'tan dole mera man dole' git sabki juban par charh gaya. fir to vaijyanti ka sitara uttar se dakshin tak chamkne laga. uske bad unhonne kai suprhit filmon men kam kiya aur sabhi or unhin ki charcha hone lagi. us samay, suraiya, madhubala, nargis, mina kumari adi abhinetriyon ka jor tha par vaijyanti ne in sabke bich apni ek alag pahchan kayam ki. vaijyanti aur dilip kumar ki jori ne kamal karna shuru kiya. tabhi 'sangm' film men kam karne aur dilip kumar ki film 'lidr' men der se pahunchne se donon men anaban rahne lagi aur yah jori, jo 'naya daur' se shuru hui thi, tut gai. film 'ram aur shyam' se unhen nikal diya gaya. iske bad amrapali, jvailthif, sangam adi ne saflta ke sare rikard tor die. kairiyar ki choti par pahunch unhonne sabko chaunkate hue apne vivah ki ghoshna kar di. aie ab is sabko jyotishiya drishti se dekhte hain. 1949 men inki brihaspati ki mahadsha praranbh hui. brihaspati dvitiya bhav men vrishchik rashi men 210.36sh ka hai arthat budh ke nakshatra men sthit hai.
brihaspati tisre v chathe bhavon ka svami bhi hai aur budh ke nakshatra men budh labh bhav men hai. chatha bhav dasham bhav se navam parta hai. isi brihaspati ki 16 varsh ki mahadsha ne inhen apne kairiyar men nit nai unchai tak pahunchaya. tamam filmi naykon ko chorakar is nayika ne apna nayak chuna do. chaman lal bali ko. do. bali rajkpur ke faimili doktar the. tamil film 'nilabu' ki shuting karte vakt vaijyanti dal jhil men dubte dubte bachin aur unhen do. bali ke pas laya gaya. do. bali ki chikitsa v dekh rekh men vaijyanti ek mah rahin aur svasth hone lagin. do. bali ki dekhbhal v seva bhav se vaijyanti bahut prabhavit huin aur unse prem karne lagin par samasya parivar ki rajamandi ki thi kyonki do. bali ravlpindi ke the aur vaijyanti shuddh dakshin bhartiya ayangar parivar se thin. par yagamma (nani) ke hastakshep se donon ka milan hua. 10 march 1968 ko donon ka vivah ayangar vivah paddhati se sanpann hua. khas logon ke sath hi tamilnadu ke rajyapal ujjval sinh ne var-vadhu ko ashirvad diya. jindgi apne veg se chalti rahi aur ek din shuchindra ke rup men vaijyanti ne sundar putra ko janm diya. vah ab ek supar star man ban chuki thin. 'sangm' film men kam karne aur film 'lidr' men der se pahunchne se dilip kumar se inki anaban rahne lagi aur yah jori, jo 'naya daur' se shuru hui thi, tut gai. film 'ram aur shyam' se unhen nikal diya gaya. iske bad amrapali, jvailthif, sangam adi ne saflta ke sare rikard tor die. aie ise ab jyotishiya drishti se dekhte hain. prem vivah ke lie lagnesh, saptamesh, panchmesh, tatha grahon men mangal aur shukra ko dekha jata hai.
prastut kundli men panchmesh shani pancham men hai tatha lagnesh shukra se uska drishti sanbandh bhi hai. panchmesh shani tisri drishti se saptam bhav ko bhi dekh raha hai. saptamesh mangal apni athvin drishti se pancham men baithe shani ko dekh raha hai. 3 julai 1965 se 3 julai 1984 tak vaijyanti par shani ki mahadsha chali. 10 march 1968 ko shani/shni/guru ka antar chal raha tha. gochar men un dinon shani min rashi men tha aur guru sinh rashi men vicharan kar raha tha. saptamesh mangal bhi shani ke sath min rashi men tha. ab kundli ke hisab se dekhte hain to pancham men baitha shani tisri drishti se saptam ko dekh raha hai tatha dvitiya bhav men baitha brihaspati panchvin drishti se min rashi ko dekh raha hai. upar varnit gochar aur janmapatri ke anusar janmakalin brihaspati (vivah ka kark). panchvin drishti se gochar ke shani ko dekh raha tha tatha gochar men sinh rashi ka brihaspati apni navin drishti se saptam bhav ko dekh raha tha. saptamesh mangal bhi gochar men shani ke sath yuti men tha. inhin sab karnon se unka vivah sanpann hua aur age chalakar isi panchmesh shani ne unko ek sundar putra ki man banaya. jindgi maje se chal rahi thi ki achanak ek tufan aya aur pura parivar bikhar gaya. do. bali ka svasthya thik nahin tha. ek bar ve sarjari se gujar chuke the. ek rat unki tabiyat jyada bigri aur fir kabhi thik n ho saki. isse vaijyanti tut gain aur atmahatya ka man bana liya. tabhi ek ghatna hui. do. bali ke parivar ne vaijyanti aur unke putra ko jaydad se bedakhal kar diya. vaijyanti fir uth khari huin. unhen jaydad ki nahin apitu samman ki chinta hui.
char sal tak mukdma larne ke bad unki vijay hui. un par sansad hone ke nate dabav dalne ke arop bhi lage parantu jit satya ki hi hui. jab sab kuch ho gaya to vaijyanti apne lie nai bhumika ki talash men jut gain. yah 1989 ke chunav ke samay ki bat hai. rajiv gandhi ne vaijyanti mala bali ko apni parti ke tikat par chunav larne ko amantrit kiya. unhonne kafi soch vichar ke bad prastav svikar kar liya. vah parinam se purva bahut ghabrai hui thin aur jab parinam aya to ve 1.5 lakh voton se jit gain. chunav ke dauran paison ki rajniti se vah duahkhi ho gain aur age chunav n larne ka faisla kar liya. iske bad vah do bar rajya sabha se sansad rahin. 1995 men annamlai vishvavidyalay ne unhen doktar ki upadhi se sammanit kiya. 1996 men film jagat men unke yogdan ke lie unhen filmafeyar laiftaim achivment se sammanit kiya gaya. ab ise jyotishiya drishti se dekhen to 3 julai 1984 se 29 navanbar 1986 tak budh men budh chal raha tha. budh bhagyesh hone ke sath sath vyayesh bhi hai tatha saptam bhav se tritiya aur chathe ka svami bhi hota hai. arthat tula lagn ki janmapatri men budh akarak hota hai. 1990 men jaise hi budh men surya ka antar chala vaise hi surya ne labhesh aur dasham men digbali hone ke karan mukdme men vijay dilai aur sath hi pati ka vichoh bhi karaya. 1989 men budh men shukra ka antar chal raha tha. shukra ashtamesh aur lagnesh hokar labh bhav men sthit hai. isi samay men rajniti men unka padarpan hua aur vah chunav men vijyi rahin. shukra is kundli men lagnesh aur ashtamesh bhi hai tatha ekadash men dvadshesh budh ke sath sinh rashi men sthit hai surya kark rashi men 270.18sh ka hai arthat budh ke nakshatra men hai. atah julai 2008 se navanbar 2011 tak chalne vala shukra men shukra ke antar ka samay inke lie kai upalabdhiyan v samman dilane vala hoga. parantu san 2012 men shukra/surya ka jo samay chal raha hoga vah inke jivan ke lie achcha nahin hoga. vaijyanti apne ap ko abhinetri se jyada nrityangna manti hain. vah natyalay akadmi ki ajivan adhyaksh hai aur chennai men nritya sadhna karte hue us admi ki yad men jivan vyatit kar rahi hain jiski khushbu se aj bhi unki sansen mahkti hain.