grih nirman aur vastu pan. sunil joshi junnarakar jis bhukhand ki lanbai adhik tatha chaurai kam ho, samkon vali us bhumi ko aytakar bhu-khand (plot) kahte hain. is prakar ki bhumi sarvasiddhi dayak hoti hai. 'stiarad dvigunan gehan grihasvamivinashanam' (vishvakarma prakash 2/109)- chaurai se dugni ya usse adhik lanbai ki aytakar lanba makan 'suryavedhi' aur uttar se dakshin ki or lanba makan 'chandravedhi' hota hai. chandravedhi makan dhan-samriddhidayak hai, kintu jal-sangrah ki drishti se suryavedhi shubh hota hai, chandravedhi makan men pani ki samasya rahti hai. brahmamuhurt kal men surya uttar purvi bhag men rahta hai.
yah samay yog-dhyan, bhajn-pujan aur chintn-manan ka hai. ye kriyaen saflta purvak sampann hon, is hetu makan ke uttar purva ki disha men khirki ya darvaja avashya hona chahie. jisse hamen arunoday ka labh mil sake. pratah 6 se 9 baje tak surya purva disha men rahta hai, islie ghar ka purvi bhag adhik khula rakhna chahie. jisse surya ki roshni adhik kamre men a sake. tabhi ham surya ki sakaratmak urja ka labh utha paainge.
grihnirman aranbh aur grih pravesh ke samay vibhinn devtaon ke rup men suryadev ka hi pujan hota hai taki pran urja dene vale arogya ke devta surya ka sarvadhik labh mil sake. surya rashmiyon ki jivndayini pranaurja ka bharpur labh uthane ke lie vastu shastra men purva disha ki pradhanta ko svikar kiya gaya hai. griharanbh muhurt se grih pravesh tak surya ka pradhanta se vichar kiya jata hai.
griharanbh ki ninv- vaishakh, shravan, kartik, margashirsh aur falgun in chandramason men griharanbh shubh hota hai. inke alava anya chandramas ashubh hone ke karan nishiddh kahe gaye hain. vaishakh men griharanbh karne se dhan dhanya, putra tatha arogya ki prapti hoti hai. shravan men dhan, pashu aur mitron ki vriddhi hoti hai. kartik men sarvasukh. margashirsh men uttam bhojya padarthon aur dhan ki prapti.
falgun men griharanbh karne se dhan tatha sukh ki prapti aur vansh vriddhi hoti hai. kintu ukt sabhi mason men malmas ka tyag karna chahie. griharanbh aur saurmas : griharanbh ke muhurt men chandramason ki apeksha saurmas adhik mahatvapurn, visheshtah ninv khodte samay surya sankranti vicharniya hai. purva kalamrit ka kathan hai- griharanbh men sthir v char rashiyon men surya rahe to grihasvami ke lie dhanavarddhak hota hai. jabki dvisvabhav (3, 6, 9, 12) rashi gat surya maranaprad hota hai.
atah mesh, vrish, kark, sinh, tula, vrishchik, makar aur kunbh rashiyon ke surya men griharanbh karna shubh rahta hai. mithun, kanya, dhanu aur min rashi ke surya men grih nirman praranbh nahin karna chahie. vibhinn saurmason men griharanbh ka fal devrishi narad ne is prakar bataya hai. meshmas-shubh, vrishmas-dhan vriddhi? mithunmas-mrityu karkamas-shubh, sinhmas-sevak vriddhi, kanyamas-rog, tulamas-sukh, vrishchikmas-dhanvriddhi, dhanumas-bahut hani, makr-dhan agam, kunbh-labh, aur minmas men griharanbh karne se grihasvami ko rog tatha bhay utpann hota hai.
saurmason aur chandramason men jahan fal ka virodh dikhai de vahan saurmas ka grahan aur chandramas ka tyag karna chahie kyonki chandramas gaun hai. vastu purush vichar : mahakvi kalidas aur maharshi vashishth anusar tin-tin chandramason men vastu purush ki disha nimnavat rahti hai.
bhadrapad, kartik, ashvin mas men ishan ki or. falgun, chaitra, vaishakh men naitya ki or. jyeshth, ashadh, shravan men agney kon ki or. margashirsh, paush, magh men vayavya disha ki or vastu purush ka mukh hota hai. vastu purush ka bhraman ishan se bayin or arthat vamavartt hota hai. vastu purush ke mukh pet aur pair ki dishaon ko chorakar pith ki disha men arthat chauthi, khali disha men ninv ki khudai shuru karna uttam rahta hai.
maharshi vashishth adi ne jis vastu purush ko 'vastunr' kaha tha, kalantar men use hi shesh nag, sarp, kalasarp aur rahu ki sangya de di gai. atah pathak isse bhramit n hon. makan ki nivan khodne ke lie surya jis rashi men ho uske anusar rahu ya sarp ke mukh, madhya aur puchch ka gyan karte hain. surya ki rashi jis disha men ho usi disha men, us saurmas rahu rahta hai. jaisa ki kaha gaya hai-
''yadrashigo'rkah khalu taddishayan, rahuah sada tishthati masi masi.''
yadi sinh, kanya, tula rashi men surya ho to rahu ka mukh ishan kon men aur puchch naitya kon men hogi aur agney kon khali rahega. atah ukt rashiyon ke surya men is khali disha (rahu prishthiya kon) se khataranbh ya ninv khanan praranbh karna chahie. vrishchik, dhanu, makar rashi ke surya men rahu mukh vayavya kon men hone se ishan kon khali rahta hai.
kunbh, min, mesh rashi ke surya men rahu mukh naitya kon men hone se vayavya kon khali rahega. vrish, mithun, kark rashi ke surya men rahu ka mukh agney kon men hone se naitya disha khali rahegi. ukt saur mason men is khali disha (kon) se hi ninv khodna shuru karna chahie. ab ek prashn uthta hai ki ham kisi khali kon men gadrha ya ninv khanan praranbh karne ke bad kis disha men khodte hue age barhen?
vastu purush ya sarp ka bhraman vamavartt hota hai. iske viprit kram se- baen se daen/dakshinavartta/klok vaij nivan ki khudai karni chahie. yatha agney kon se khudai praranbh karen to dakshin disha se jate hue naitya kon ki or age barhen. vishvakarma prakash men bataya gaya hai-
'ishantah sarpati kalasarpo vihay srishtin ganyed vidikshu.
sheshasya vastormukhamadhya -puchantrayan parityajyakhnechchaturtham॥'
vastu rupi sarp ka mukh, madhya aur puchch jis disha men sthit ho un tinon dishaon ko chorakar chauthi men ninv khanan aranbh karna chahie. ise ham nimn talika ke madhya se asani se samajh sakte hain.
shilanyas : griharanbh hetu ninv khat chakram aur vastukalasarp disha chakra men pradarshit ki gai surya ki rashiyan aur rahu prishthiya kon ninv khanan ke sath-sath shilanyas karne, buniyad bharne hetu, pratham chaukar akhand patthar rakhne hetu, khambhe (stanbh) pilar banane hetu inhi rashiyon v konon ka vichar karna chahie. jo kram ninv khodne ka likha gaya tha vahi pradakshin kram ninv bharne ka hai. ajakal makan adi banane hetu ar.si.si. ke pilar plot ke vibhinn bhagon men bana diye jate hain.
dhyan rakhen, yadi koi pilar rahu mukh ki disha men par raha ho to filhal use chor den. surya ke rashi parivartan ke bad hi use banaen to uttam rahega. katipay vastu vidon ka manna hai ki sarva pratham shilanyas agney disha men karna chahie. dainik kalrahu vas : arkottare vayudishan ch some, bhaume pratichyan budharnaite ch. yamye gurau vanhidishan ch shukre, mande ch purve pravdanti kal॥
rahukal ka vas ravivar ko uttar disha men, somvar ko vayavya men, mangal ko pashchim men, budhvar ko naitya men, guruvar ko dakshin men, shukravar ko agney men v shanivar ko purva disha men rahukal ka vas rahta hai. yatra ke alava grih nirman (griharanbh), grihapravesh men rahukal ka parityag karna chahie.
jaise-saurmas ke anusar nikale gaye muhurt ke adhar par agney disha men ninv khann/shilanyas karna nishchit ho. kintu shukravar ko agney men, shanivar ko purva disha men rahukal ka vas rahta hai. atah shukravar ko agney disha men griharanbh hetu ninv khann/ shilanyas praranbh n karen. vartaman samay men uttar samay men uttar bharat grih nirman ke samay kalrahu ya rahukal ka vichar nahin kiya jata hai. jabki iska vichar karna atyant mahatvapurn hai. bhumi khanan karya aur shilanyas adi men dainik rahukal ko bhi rahumukh ki bhanti varjit kiya jana chahie.
somvar, budhvar, guruvar, shukravar griharanbh hetu uttam kahe gaye hain. kintu in shubh varon men kalrahu ki disha ka nishedh karna chahie. ravivar, manglvar ko griharanbh karne se agnibhay aur shanivar men anek kasht hote hain. bhu-shayan vichar-surya ke nakshatra se chandrama ka nakshatra yadi 5, 7, 9, 12, 19, 26van rahe to prithvi shaynshil mani jati hain. bhushayan ke din khanan karya varjit hai. atah uproktanusar ginti ke nakshatron men ninv ki khudai n karen.
griharanbh ke shubh nakshatra : rohini, mrigshira, pushya, uttarafalguni, hast, chitra, svati, anuradha, uttarasharha aur revti adi vedh rahit nakshatra griharanbh hetu shreshth mane gaye hain. devrishi narad ke anusar griharanbh ke samay guru yadi rohini, pushya, mrigshira, ashlesha, tinon uttara ya purvasharha nakshatra men hon to grihasvami shrimant (dhanvan) hota hai tatha uske ghar men uttam rajyog vale putra/pautron ka janm hota hai. in falon ki prapti hetu guruvar ko griharanbh karen. ardra, hast, dhanishtha, vishakha, shatbhisha ya chitra nakshatra men shukra ho aur shukravar ko hi shilanyas karen to dhan-dhanya ki khub samriddhi hoti hai. grihasvami kuber ke saman sampann ho jata hai.
lagn shuddhi : griharanbh hetu sthir ya dvisvabhav rashi ka balvan lagn lena chahie. (pratah uprahan ya sandhyakal men griharanbh karna chahie) uprokt lagn ke kendra, trikon sthanon men shubh grah tatha 3, 6, 11 ven sthan men ashubh (papagrah) hon ya chatha sthan khali ho. athvan aur barhvan sthan bhi grah rahit hona chahie. is prakar ka lagn aur grah sthiti bhavan nirman ke shubharanbh hetu shreshth kahi gai hai.
jivan men jarurat hai jyotishiya margadarshan ki? abhi bat karen fyuchar point jyotishiyon se!