sanpurn desh men shivshankar ji ka sthan yatra tatra sarvatra hai aur bharat bhumi ke harek sanskritik prakshetra men vibhinn kal khand v vividh akar-prakar ke shivling pujit hain. inmen sanpurn bangal ki bhumi ka vishalatam shivling jahan aj virajman hai, vah hai vardhaman, jahan ke vardhamaneshvar shiv ko vishalatam hone ke karan ‘mote shiv’ kaha jata hai. rashtriya rajamarga-2 aur nai dilli havra graind kaerd rel khand par kolkata mahangri se takriban 100 kimi. pahle damodar nadi ke kinare avasthit vardhaman pashchim bangal ka pragtishil shahar hai jahan aj bhi vishal rajabhavan, puratan smarak, angreji rajya ke dharohar v vibhinn dharm se jure upasya sthal vidyaman hain.
sankshipt itihas: itihas ke pannon par adhyayan anushilan se gyat hota hai ki vardhaman ka namakaran 24ven tirthankar vardhaman mahavir ke nam se prakashit hai jahan damodar nadi ke pashrva men unhonne sarvapratham bahya kshetriya dharm prachar kiya tha. aise vardhaman ka shabdik sanniktta bangla bhasha sahitya men ‘pragti’ ya ‘vriddhi’ suchak hai jo is nagar ki vikas gatha ka spasht vyakhyan hai. sikandar mahan ke samay is pure kshetra ko ‘parthenis’ kaha gaya hai to gupt abhilekhon men vardhaman mukti ka spasht ullekh aya hai. ain-e-akbri men iska sanbodhan sharifabad ke rup men hai. vivaran milta hai ki 1650 i. ke karib kohli (lahaur) khatri vanshiya sangam ray ne jagannath puri ki yatra se lautte vakt vishram karne ke uprant sthan ke mahatva ko dekhte hue vyapar ki drishti se yahan baikunthpur ganv basaya aur kafi paise kharch karke is nagar ki sthapna ki. yah kalantar men vardaman, varddhaman athva vardhaman ke nam se charchit hua. kuch purva tak yahan ek prachin riyasat thi jiske vishal raj bhavan, smarak v dharm sthal aj bhi nagar ki shobha barha rahe hain.
san 1510 i. men yahan gurunanak ji ke kadam pare hain jo katuva se hokar idhar ae the aur aj bhi rajvati kshetra men unka sthan virajit hai. varsh 1742 i. men is sthan par alivardi khan ka adhipatya ho gaya aur fir 1760 imen yah ist indiya kanpni ke adhin chala gaya. praranbh men iska bhukshetra midnapur jile ke antargat tha aur 1884 i. tak yah hugli jile ka kshetra raha bad men 1885 men ise jile ka rup de diya gaya jo sanprati bangal ke panch bare nagron men ek hai. vartaman vivrn: sanpurn vardhaman nagar men nae-purane aitihasik v dharmik smarak sthapit hain jismen mukhya rajmarg par bana vijay toran aj bhi angreji raj ki yad dilata hai jise star aef indiya get bhi kaha gaya hai. iska nirman 1903 i. men laerd karjan ke samman men kiya gaya. pure nagar men shivshankar ke nam par mahadev para, prachin shiv mandir, lokeshvar nath, sarvamangla shiv mandir, 108 shiv mandir adi virajit hain par is sanpurn kshetra men jinki sarvadhik prasiddhi nirantar bani hai vah hain vardhamaneshvar mahadev, jo almganj kshetra men rais mils ke thik samne samatal bhukhnad par shobhayman hai.
shiv mandir katha: gril ke bane divar ke upar khule shed se shringarit baba ke is sthan par pahunchte hi shaiv shakti ka spasht abhas hone lagta hai jiska avirbhav charu chandra de ki jamin se varsh 1972 ke 10 agast ke din guruvar ko hua hai. kahte hain pahle yahin par ek manauti vriksh tha jiski puja sthaniya log karte the. ek bar usi ke niche kuch kala najar aya jisapar kuch thos girte khub tanak jhankar ki avaj ati. logon ne parishram se iski khudai ki aur dekhte-dekhte iska uddhar ho gaya. vardhaman vishvavidyalay ki tim ne is pure kshetra ka nirikshan kiya aur ise kshetra ke sabse purane v bare shiv ke rup men rekhankit kiya. yah shivling sarhetin sau man vajan ka hai jo 5 fit 9 inch v 18 fit vyas yukt hai. chamkdar kasauti patthar ka bana yah shivling nirman v shilpakarita ke adhar par kushan kalin bataya jata hai jiske nichle khand men vakra rekhiya akriti dekhi ja sakti hai. mandir ke 91 varshiya sevak ram prasad gangopadhyay ke putra pujari amar gangopadhyay batate hain ki chaiv saudagar v bihula lakhvind ki katha ke mahanayak yahi shiv ji hain jise varsh 1972 ke shravan 25 bangla tithi ko sthapit kiye jane ke bad pure desh ke shaiv bhakton ka jamavra bana rahta hai. aise to yahan pure shravan aur shivratri men dur-dur se bhakt ate hain par harek somvar ko bhi khub bhir lagti hai. shravan ke dinon men 72 kimi. duri par avasthit katva se ganga jal bhar kar kanvriyon ki holi ke jalaparn ka ab apna andaj dekha ja sakta hai. shivling ke niche bani rekhiya akriti trikon ka nirman karti hai aur aise shivling ki puja tantra siddhi ke lie upyukt mani jati hai.
anya mandir: yahin pas men age rajbati kshetra men man dhaneshvari mandir, somar kali bari, sarvamangla-man mandir, lakshmi narayan mandir, manokamna mandir, navin hanuman mandir v navagrah mandir ke sath vishal rajaprasad dekha ja sakta hai. iska nam ‘anjmn’ hai jismane ab pashchim bangal sarkar ka vibhagiya karya sanchalit hota hai. vardhaman ke shaiv tatva se jude varnan vivechan men navabghata ka 108 shiv mandir vishesh rup se darshaniya hai jise mukhya sinh dvar chaik se 10 minat ki duri tay karke dekha ja sakta hai. prayah ek hi akar prakar ke bane in shiv mandiron ke bare men yahin ki shodh chatra nayna gosvami batati hain ki pure desh men 108 mandirane ki yah mala anuthi v advitiya hai jo rani vishnu kumari dvara banvayi gayi hai. bahar men shiv parvati ka sundar rup svagat karte pratit hota hai.
darshan ke anya sthan: iske alava shahar men hi kali sthan, kamlakant ka sadhnapith, kankaleshvari mandir, vigyan bhavan, taramandal, gulab bag, lalitagarh kastra kainpas, sanskriti bhavan v krishna sagar park dekhne layak hai. vishvaguru ravindranath taigor ki amar kriti shanti niketan yahan se 52 kimi. duri par sarak v rel marg se jura hai. durgapur jaise - lauh nagri se 65 kimi. duri par avasthit vadharmaman men khana, thahrna v ghumna tinon sasta hai aur in sabon ke bich yahan ka mishtanna ‘sita bhog’ ‘va’ ‘mihidana’ khane ka apna maja hai. yahan ke devalay dopahar men prayah band rahte hain is karan darshan pujan sham subah jyada satik hai.
desh ke vishalatam shivling:- sanpurn desh men shivshankar ke vishalatam shivling virajman hain jinmen bhopal se 32 ki.mi. dur bhojpur ke bhoneshvar nam (18 x 7.5 fit), marauda, garima band, chattisagarh ke mahadev (18 x 20 fit), khajuraho ke mantegeshvar shiv (8.4 x 3.8 fit), jiro taun (andhra pradesh) ke siddheshvar mahadev (25 x 22 fit), vindhya kshetra men amreshvar mahadev (11 x 7 fit), tanjaur ke brihdeshvar (11.5 x 9.7 fit), varansi ke tilmandeshvar (3.5 x 3 fit), kollar ke kolingeshvar mahadev (3.7 x 5.1 fit), gaya ke vriddh parpita shiv (4.5 x 6.3 fit) adi ka sunam hai par khule men shivshankar ka itna bara shivling dekhakar man gadgad ho jata hai. upasthit bhaktajan v nagar ke jankar log batate hain ki sarvapratham charu chandra de v unke putron ne hi yahan mandir banvana chaha par baba ne sapne men khule men rahne ki bat batayi. assi ke dashak men bhi ek bar bare shikhar vale mandir banane ki bat uthi par baba ne apne bhakton ka man badal diya. is tarah aj bhi ye mote shiv khule men hi hain. kul milakar vardhaman nagar ka vardhamaneshvar mahadev apne akar prakar ke anurup yash, mahima ki drishti se bhi anupam v atulniya hai jo puratan kal men aur punah nae jamane men jan-jan ka aharnish kalyan kar raha hai.