shri shukdev ji ne maharaj parikshit ko katha shravan karate hue kaha - rajan ! shri brahmaji ne anek prakar ki srishti ki, parantu srishti ka vistar n ho saka. shri brahmaji daiv ke vishay men vichar karne lage, usi samay anek sharir ke do bhag ho gae aur donon vibhagon se ek stri-purush ka jora prakat hua. ye donon sarvabhaum samrat svayambhuv manu v maharani shatrupa ke nam se vikhyat hue. tab bari namrata se hath jorakar unhonne shri brahmaji se kaha bhagvn! ap hamse ho sakne yogya kisi aise karya ke lie agya dijiye, jisse is lok men hamari sarvatra kirti ho aur parlok men sadgati prapt ho sake. shri brahmaji ne kaha prithvi pate. tum donon ka kalyan ho.
tum apni is bharya se apne hi saman gunvti santti utpann karke dharmapurvak prithvi ka palan karo aur yagyaon dvara shrihri ki aradhna karo. manuji ne kaha- papnashak pitaji ! ap mere aur meri bhavi praja ke rahne ke lie sthan batlaiye. sanpurn jivon ko dharan karne vali prithvi is samay pralay ke jal men dubi hui hai. shri brahmaji vichar karne lage ki jiske sankalp matra se mera janm hua hai ve sarveshvar sarvashaktiman shri hari hi mera yah karya purn karen. shri brahmaji abhi yah chintan kar hi rahe the ki akasmat unke nasachidra se anguthe ke barabar akar ka varah-shishu nikla aur dekhte hi dekhte kshan bhar men hathi ke barabar ho gaya tatha akash men khara hua varah svarup munijan, sankadi manu maharaj sabhi ko ashcharyachkit v anandit karne laga.
sabhi unki stuti karne lage aur bhagvan yagyapurush parvatakar hokar ghor garjana karne lage. fir devtaon ke hit ke lie gajraj ki si lila karte hue jal men pravisht ho gae. tab bhagvan yagyamurti apne ban ke saman paine khuron se jal ko chirte hue us apar jalrashi ke us par pahunche jahan samast jivon ki ashrayashruta prithvi sthit thi. bhagvan shri hari jal men dubi hui prithvi ko apni darhon par lekar rasatal se upar ane lage. us samay unki bari shobha ho rahi thi. idhar lilabihari ki lila aur udhar svarn ki bhari gada hathon men lie vah diti ka pili ankhon vala kale parvat ke saman v mahan balshali chota putra hiranyaksh devarshi narad se puch raha tha- ‘‘apko vishnu ka kuch pata hai’’? main usse yuddh karne ke lie lalayit hun.
jiski hunkar matra se hi devta svargalok tyagakar anyatra chip gae the, varundev bhi apne krodh par niyantran kar yahi kah sake-bhai! hamen to ab yuddhadi ka koi chav nahin rah gaya hai. bhagvan puran purush ke siva hamen aur koi aisa dikhta bhi nahin, jo tum jaise rankushal mahan vir yoddha ko yuddh men santusht kar sake. daityaraj ! tum unhin ke pas jao aur mrityu ko varan karo. devarshi nardji ne kaha- bhagvan vishnu abhi-abhi shvet varah rup dharan karke isi samudra men sidhe prithvi ko rasatal se lene ke lie ja rahe hain. tum shighrata karo to pakar loge. devarshi ne daitya ko dekha. bhagvan shrihri ke parshad jay aur vijay ne sankadi kumaron ko satvin dyaurhi par digambar vritti men dekhakar unki hansi urayi aur bent arakar unhen age barhne se rok diya.
rishiyon ne yah kahte hue ki tumhari buddhi atyant mand hai,atah tum apni mand buddhi ke dosh se is vaikunth lok se nikalakar un pappurit yoniyon men jao, jahan kam, krodh evan lobh praniyon ke ye tin shatru nivas karte hain. vaikunthnivas shrihri ne samadarshi sankadi rishiyon ke vachnon ka anumodan karte hue kaha - ye jay-vijay mere parshad hain. inhonne apka apradh kiya hai. apne inhen dand dekar uchit hi kiya hai. ab ye diti ke garbh se maharshi kashyap ke putra rup men pragat hue hain. unmen ek to yahi hai. devarshi nardji ko daya ayi. bhagvan ke hath se marakar yah dusra janm le. tin hi janm men to fir apne rup ko pa lega. in janmon se jitni jaldi chute, utna hi achcha.
baba ne hiranyaksh ke uddhar ke lie hi use sukar rupdhari bhagvan narayan ke pas bhej diya. shri hari narayan varah rup se prithvi ko darhon ki nok par rakhe hue rasatal se upar ki or a rahe the, tabhi ‘are sukrrup dhari suradham.’ chillate aur bhagvan ki or teji se daurte hue hiranyaksh ne kaha - meri shakti ke sammukh tumhari yogmaya ka prabhav nahin chal sakta. mere dekhte tu prithvi ko lekar nahin bhag sakta. nirlajj kahin ka.’ shri bhagvan ne durjay daitya ke bagbanon ki chinta n kar bhaybhit prithvi ko uchit sthan par sthapit kar aur usmen apni adhar shakti ka sanchar kiya.
us samay hiranyaksh ke samne hi bhagvan par devagan pushp vrishti aur brahmaji unki stuti karne lage. bhagvan varah ne kaha daityaraj ! main to tere samne kuch bhi nahin. ab tu apne man ki kar le. viravar hiranyaksh evan bhagvan varah men bhayanak sangram hua. hiranyaksh aur maya se varahrup dharan karne vale bhagvan virat virateshvar ka yuddh dekhne ke lie muniyon sahit brahmaji vahan a gae. unhonne prabhu se prarthana ki, ‘prabho ! shighra iska vadh kar dalie.’ vidhata ke bholepan par shri bhagvan ne muskurakar hiranyaksh ki kanpti par ek tamacha mara aur upeksha se mare gae tamache ki chot se hi hiranyaksh ke netra bahar nikal ae. vah kate vriksh ki tarah dharashayi ho gaya. uske pran nikal gae.
golokdham gaman hua. brahmadi devtaon ne hiranyaksh ke bhagya ki sarahna ki aur kaha- ‘‘isne bhagvan ke kamal sadrish mukharbind ke darshan karte hue jo gati yogendra munindra mahamhim parmeshvar ka dhyan karke prapt karte hain, is daityaraj ne prapt ki hai. dhanya hai yah.’’ sur-samuday mahavrah prabhu ki stuti v pushp vrishti karne laga- vihay rupan varahan tirth koketi vishrute. vaishnavanan hitarthay kshetran tadguptamuttamam..
prithvi ke usi punah pratishtha kal se is shvet varahkal ki srishti praranbh hui hai. uttar kuruvarsh men bhagvan yagya purush varahmurti dharan karke virajman hain. sakshat prithvi devi vahan ke nivasiyon sahit unki atyant shraddha bhakti se upasna v stavan karti rahti hanai. un onkar svarup shukla karmamay triyugmurti purushottam bhagvan varah ko bar-bar namaskar hai.