vaishakh mas mahatmya evan vrat  

vaishakh mas mahatmya evan vrat pan. brajkishor bharadvaj ‘brajvasi bhartiya sanskriti men vaishakh mas ki prasiddhi mahatmya evan vrat donon hi rupon men jagat men vyapt hai. n madhvsmo maso n kriten yugan samam. n ch vedsman shastran n tirthan gangya samam.. vaishakh ke saman koi mas nahin hai, satyayug ke saman koi yug nahin hai, ved ke saman koi shastra nahin hai aur gangaji ke saman koi tirth nahin hai. apne katipay vaishishtya ke karan vaishakh uttam mas hai. katha hai ki narad ji ne raja ambarish se kaha ki vaishakh mas ko brahmaji ne sab mason men uttam siddh kiya hai. yah mata ki bhanti sab jivon ko sada abhisht vastu pradan karta hai. dharm, yagya, kriya aur tapasya ka sar hai. yah mas sanpurn devtaon dvara pujit hai. jaise vidyaon men ved-vidya, mantron men pranav, vrikshon men kalpavriksh, dhenuon men kamdhenu, devtaon men vishnu, varnon men brahman, priya vastuon men pran, nadiyon men gangaji, tejon men surya, astra-shastron men chakra, dhatuon men svarn, vaishnavon men shiv tatha ratnon men kaustubhmni uttam hai, usi prakar dharm ke sadhnbhut mahinon men vaishakhmas sabse uttam hai. bhagvan vishnu ko prasann karne vala iske saman dusra koi mas nahin hai. jo vaishakhmas men suryoday se pahle snan karta hai, usse bhagvan vishnu nirantar priti karte hain. pap tabhi tak garjate hain, jab tak manushya vaishakh mas men pratahkal jal men snan nahin karta. rajan! vaishakh ke mahine men sab tirth, devta adi (tirth ke atirikta) bahar ke jal men bhi sadaiv sthit rahte hain. bhagvan vishnu ki agya se manushyon ka kalyan karne ke lie ve suryoday se lekar chah dand ke bhitar vahan upasthit rahte hain. vaishakh sarvashreshth mas hai aur sheshshayi bhagvan vishnu ko sada priya hai. jo punya sab danon se hota hai aur jo fal sab tirthon ke darshan se milta hai, usi punya aur fal ki prapti vaishakhmas men keval jaldan karne se ho jati hai. jo jaldan men asamarth hai, aise aishvarya ki abhilasha rakhne vale purush ko uchit hai ki vah dusre ko prabodh kare, dusre ko jaldan ka mahatva samjhae. yah sab danon se barhakar hitkari hai. jo manushya vaishakh mas men marg par yatriyon ke lie pyau lagata hai, vah vishnulok men pratishthit hota hai. nripashreshth ! prapadan (pausla ya pyau) devtaon, pitron tatha rishiyon ko atyant priya hai. jo pyau lagakar thake-mande pathikon ki pyas bujhata hai, us par brahma, vishnu aur shiv adi devtagan prasann hote hain. rajan ! vaishakh mas men jal ki ichcha rakhne vale ko jal, chaya chahne vale ko chata aur pankhe ki ichcha rakhne vale ko pankha dena chahie. rajendra ! jo pirit mahatmaon ko pyar se shital jal pradan karta hai, use utni hi matra se das hajar rajsuya yagyaon ka fal prapt hota hai. dhup aur parishram se pirit brahman ko jo pankha dulakar shitlta pradan karta hai, vah nishpap hokar bhagvan ka parshad ho jata hai. jo marg men thake hue shreshth dvij ko vastra se bhi hava karta hai, vah bhagvan vishnu ka sayujya prapt kar leta hai. jo shuddh chitt se tar ka pankha deta hai, uske sare papon ka shaman ho jata hai aur vah brahmalok ko jata hai. jo vishnupriya vaishakhmas men paduka dan karta hai, vah vishnulok ko jata hai. jo marg men anathon ke thahrne ke lie vishramshala banvata hai, uske punya-falka varnan nahin kiya ja sakta. madhyahn men ae hue brahman atithi ko yadi koi bhojan de to use anant punya ki prapti hoti hai. vaishakh men tel lagana, din men sona, kansyapatra men bhojan karna, khat par sona, ghar men nahana, nishiddh padarth khana dobara bhojan karna tatha rat men khana - in ath baton ka tyag karna chahie- tailabhyaghgan divasvapan tatha vai kansyabhojanam. khatvanidran grihe snanan nishi(sya ch bhakshanam.. vaishakhe varjayedashtau dvibhuktan naktabhojanam.. vaishakh men vrat ka palan karne vala jo purush padm patte par bhojan karta hai, vah sab papon se mukt ho vishnulok jata hai. jo vishnubhakt vaishakhmas men nadi-snan karta hai, vah tin janmon ke papon se mukt ho jata hai. jo suryoday ke samay kisi samudragamini nadi men vaishakh-snan karta hai, vah sat janmon ke papon se tatkal mukt jata hai. suryadev ke mesh rashi men ane par bhagvan vishnu ka vardan prapt karne ke uddeshya se vaishakh mas-snan ka vrat lena chahie. snan ke anantar bhagvan vishnu ki puja karni chahie. skandpuran men ullekh hai ki mahirath namak ek vilasi aur ajitanedriya raja vaishakh-snan matra se vaikunthdham ko prapt hua. vaishakh mas ke devta bhagvan madhusudan hain. unse is prakar ki prarthana karni chahie- madhusudan devesh vaishakhe meshge ravau. pratahsnanan karishyami nirvighnan kuru madhav.. ‘he madhusudan ! he deveshvar madhav ! main surya ke mesh rashi men sthit hone par vaishakh mas men pratah snan karunga, ap ise nirvighn purn kijie.’ tatpashchat nimn mantra se aghrya pradan karen- vaishakhe meshge bhanau pratah snanpraynah. aghryan te'han pradasyami grihan madhusudan.. vaishakh mas men manushya sankalpadi karya men yadi pushparenu tak ka parityag karke godan karta hai, to use apar sukh ki prapti hoti hai. ek mas tak vrat rakhakar godan karne vala is bhimavrat ke prabhav se shri harisvarup ho jata hai. yah mas ati uttam v pavitra hai. ismen upar varnit niyamon ka palan karne vala vyakti ihlok ke sukhon ko bhog karta hua dharma-arth -kam-moksh charon purusharthon ko bhi prapt kar leta hai. atah sabhi ko vaishakh mas ke sadachar, niyamon aur dharmon ka palan karna chahie.