uttarakhand ki trasdi  

uttarakhand rajya men aisi bhishan prakritik apda ayi jisse lagabhag pura rajya hi trasdi ki chapet men a gaya aur charon or hahakar mach gaya. kedarnath dham yatra ke lie desh evan videsh ke alg-alag hisson se ae hue shraddhaluon ko is apda ne sada ke lie apnon se alag kar diya. aisi trasdi aj tak kisi ne apni ankhon se shayad hi dekhi hogi. bachav karya ke lie bharat ki sena evan uttarakhand prashasan rat-din lagi hui hai ki jo shraddhalugan bach gaye hain unhen surakshit bahar nikala ja sake. jo log bach gaye hain ve ishvar ko dhanyavad de rahe hain. kahte hain ki us ishvar ki ichcha ke bina ek patta bhi nahin hilta, to itni badi ghatna ke piche bhi unki hi koi ichcha rahi hogi evan unke dvara sanchalit grahon nakshatron ke sanyog ka bhi koi na koi karan avashya raha hoga. is trasdi ka avlokan jyotish ke najar se karte hain aur dekhte hain ki is trasdi ki vajah kya rahi jiske karan uttarakhand men rah rahe logon ka jivn-ast vyast ho gaya. bharat ke sabse navinatam rajyon men se uttarakhand bhi ek rajya hai, jo ki uttarapradesh se hi alag hokar bana hai. uttarakhand ka gathan 9 navambar 2000 ko arddh ratri men bharat ke 27 ven rajya ke rup men hua. tirthon ke gadh mane jane vale uttarakhand ki sthiti jo aj hai, use ham kabhi bhi shayad hi bhula payen. is varsh mansun ke purvagaman se 14 jun se 17 jun ke bich jaisi bhishan varsha hui, usse uttarakhand ke anek sthan jismen visheshakar mukhyatah tirth sthanon ko bhari matra men nuksan ka samna karna pada. pahadon men tej barish ke chalte alakananda ka jo ufan aya us ufan men bahut dhan-jan ki hani huyi jiski bharpai shayad hi ho sake. dhan ki hani to shayad puri bhi ho jaye parantu jan samanya ko jo nuksan hua vah apurniya hai. anek parivar jo tirth yatra men gaye the lapta ho gaye, ghar ke ghar bah gaye, kisi ke parivar ke sadasya ka koi pata nahin to kahin pura ka pura parivar hi is badh men bah gaya, jiska pata lagana asambhav sa lagta hai. us drishya ko jo, ki hamne t.v evan media ke madhyam se dekha vo drishya bhule nahin bhulta. ise vyaktigat karan samjhen ya ishvariya prakop ya prakriti ki narajgi. is ghatna par jab logon se charcha huyi to unmen ek parvatarohi se batchit ke dauran ye pata chala ki unke prashikshan ke dauran unhen ye bataya jata tha, ki himalay ki shrinkhla vishva ki sabse navin shrinkhla hai, isliye pavartarohan ke dauran unhen kisi bhi prakar ki dhvani ya shor ke lie mana kiya jata tha, jisse vahan ka vatavaran n bigde aur vahan kisi prakar ki dhvani ke karan kanpan na ho. parantu aj ke is adhunik yug men is bat ka dhyan bilkul nahin diya jata. bade-bade fectories, industries or helicopter sevayen nirantar vahan chal rahi hain jisse lagatar vahan ka ecological balance bigad raha hai aur is vajah se prakriti ki narajgi hamen sahni pad rahi hai. aiye dekhen ki grahon evan nakshatron ka is ghatna se kis had tak lena dena hai. jis samay uttarakhand ka vibhajan hua us samay chandrama min rashi evan u.bha. nakshatra men gochar kar raha tha. sath hi lagn men kark rashi thi. lagnesh hokar chandrama navam sthan men brihaspati ki rashi men hai, jo is kshetra ki pavitrata evan dharmik astha evan manyata ko darshata hai sath hi chandrama ka ashtamesh shani ke nakshatra men hona rajya ke liye prakritik apdaon se pidit hone ko darshata hai. lagn se kendra men chaturth bhav jo ki praja evan rajya ke sukh samriddhi ka dyotak hai, vahan surya ka nich ka hona tatha budh jo ki dvadshesh (hani) hai, uske sath yuti men rahna kisi prakar se sukh shanti men kami tatha rajya ke logon men bhay darshata hai. sukhesh shukra ki chathe bhav men sthiti aur ketu ki yuti bhi praja men rog evan prakritik durbalataon ko dikhata hai. lagn se ekadash men shani jo ki ashtamesh hai, vakri hokar ekadash men baitha hai. kyonki koi bhi pap grah vakri hone par adhik pap fal dete hain, isliye yahan shani ka vakri hona bhi ek mukhya karan raha. 14 jun se 17 jun tak uttarakhand men bhishan varsha ke chalte yah badh ki sthiti bani. atah us din surya evan guru ek hi nakshatra men the evan ek hi nadi men. medniya jyotish ke antargat trinadi chakranusar jab guru evan surya ek hi nadi men ho aur yadi brihaspati uday ya ast ho raha ho to ativrishti karak hote hain. sath hi jis din uttarakhand men badh se dhan-jan ki hani huyi us din 16 jun, din ravivar tha evan us samay uttarakhand ki kundali ke anusar budh ki mahadsha chal rahi thi, jo ki dvadshesh evan tritiyesh hai, evan gochar men bhi dvadash bhav (mithun rashi) men gochar kar raha tha. antardasha svami chandrama jo ki ek jaliya grah hai, evan janm lagn men bhi jaliya rashi men hai, lagnesh hokar tritiya bhav (kanya rashi) se gochar kar raha tha. isliye tisra bhav chaturth se vyay hone ke karan yah praja me bhay ko ingit karta hai. antardasha svami budh tha, jo ki punah dvadshesh ki bhumika men arthik evan sharirik hani ka suchak hai. budh mahadsha evan antardasha svami hone ke karan hani atyadhik huyi. us din sukshm dasha men shani ki dasha thi. shani ashtamesh hai jo ki prakritik apdaon ko darshata hai, tatha gochar men chaturth bhav se tula rashi men vakri hokar gochar kar raha tha. kisi bhi papagrah ka chaturth se gochar karna evan bali hona hanikarak hota hai, jiski vajah se yah ghatna uttarakhand ke lie amit chap chod gayi. sath hi shani us samay rahu ke nakshatra men tha jo ki lagn men dvadash men hai, aur gochar men bhi rahu ka chaturth se gochar karna dhan-jan ki hani evan praja men mansik chinta evan bhay ka suchak hai. yadi kuch mukhya grahon ke gochar ki bat karen to us din brihaspati jo ki dharm ke karak grah hain, tatha uttarakhand ki kundali men navmesh bhi hain gochar men mithun men the evan ast the. yahi karan hai ki is ghatna se tirth yatri evan tirth sthanon ki atyadhik kshati huyi. suyabhi us din mithun men pravesh kar rahe the to yah sanbhavna adhik prabal ho gayi. sath hi dhanesh surya ka dvadash se gochar karna bhi dhan ki hani ka dyotak hai. sukhesh shukra jo praja ka karak hai, dvadash men gochar karne se jan ki hani huyi arthat char grahon ka dvadash bhavon se gochar karna uttarakhand ke liye atyadhik hanikarak raha. ham parmatma se yahi prarthana karte hain ki aisi vinash lila dobara kabhi n dekhne ko mile evan jinke parijan bichad gaye, unhen vapas milane tatha divangto ki atma ko shanti pradan karen.