uttarakhand men prakriti ke pralyankari evan vidhvansak prakop ko asankhya logon ko bhugtna para. iske jyotishiya karan kya rahe? aprail 2013 se sitanbar 2013 tak purn kalasarp yog ka samay hai. iske karan sabhi grah rahu-ketu ke ek or ekatrit ho jate hain. ismen bhi char grah guru, surya, budh v shukra to mithun rashi men gochar kar hi rahe hain, mangal bhi lagabhag sath men vrish rashi men hai. chandrama apni tivra gati se in panchon grahon ke upar se gochar kar age hota rahta hai. is prakar 6 grahon ka yog to banta hi hai, aiye janen -
uttarakhand apda ke jyotishiya karan
kalasarp yog ke karan shani ka prabhav bhi usmen jur jata hai aur khagoliya drishti se yah ek asadharan sthiti ban jati hai jiska gurutvakarshaniya prabhav prithvi par atyadhik parta hai. is karan bhukanp, varsha, tufan adi ke asar barh jate hain. keval yahi nahin, manushya ki mansikta par bhi bahut prabhav parta hai aur vah ugra ho jata hai. yahi karan hai ki pichle 3 mah men anek bhukanp ae hain aur ativrishti ke karan uttarakhand men apda ai. yahi nahin kuch logon ne to lutpat bhi shuru kar di. yah sab grahon ke ek kon men a jane ke karan hua. jab bhi kuch varshon ke antral par grah ekatrit hote hain tab-tab aisi sthiti paida hoti rahti hai. uttarakhand ki yadi kundli dekhen to kark lagn hai v janta ke sthan arthat chaturth bhav men surya, budh baithe hain aur shani v rahu ki ashtam dhaiya chal rahi hai. shani, rahu gochar men donon vakri the aur suraksha karak guru ast the. sath hi 4 grah barhven bhav men v chandra se nesht chaturth bhav men gocharagat the. sabhi gochar nakaratmak hone ke karan yah trasdi hui aur hajaron ki janen gain v lakhon prabhavit hue.
bharat ki kundli se ghatna ka vishleshn
bharat ki kundli dekhen to usmen vrish lagn hai v 5 grah surya, budh, chandra, shukra v shani tisre ghar men sthit hain. isi karan svatantrata ke bad sanpurn bharat men mar-kat ki sthiti bani rahi aur gandhi ji ke lie hindu muslim dangon ko rokna behad kathin ho gaya. is samay gochar men chandrama se chaturth bhav men shani v rahu vidyaman hain jo janta ke lie kasht ka karan ban rahe hain, sath hi yah ashubh gochar svatantra bharat ke janmakalin guru par hone ke karan dharm v dharmik sthal ke lie vishesh ghatak hai. iske atirikt surya, budh, shukra v guru ke gochar men chandrama se barhven bhav mane sthiti tatha guru ke ast ho jane ke samay sthitiyon ne aur bhi vikat rup dharan kar liya. ismen yah bat adhik mahatvapurn hai ki jinka kark lagn ya kark rashi hai un par yah gochar vishesh kashtadayak hai. uttarakhand aur bharat ki kundliyon men bhi kark rashi ka hi prabhav hai.
bharat ka rajnaitik bhavishya
agle varsh 2014 men chunav hone vale hain. bi.je.pi. aur kangres men kante ki takkar hone vali hai. kangres ki or se rahul gandhi v bi.je.pi. ki or se narendra modi mukhya neta ke rup men ubhar kar a rahe hain. yadi ham purva men bane pradhanmantriyon ki kundliyon ka vishleshan karen to payenge ki javahrlal nehru, indira gandhi, rajiv gandhi, indrakumar gujral, devgaura, manmohan sinh adi samast neta apni shani ki sarhesati ke kal men hi pradhanmantri bane.
ane vale varsh 2014 men yadi mukhya netaon ki kundliyan dekhen to sarvapratham bi.je.pi. v kangres donon ki sarhesati chal rahi hai lekin kangres ki rashi kanya hai aur sarhesati samapt hone vali hai jabki bi.je.pi. ki rashi vrishchik hai aur uski sarhesati shuru hui hai. modi v rahul gandhi donon ki vrishchik rashi hai, atah in donon ki bhi sarhesati chal rahi hai.
yadi donon partiyon ke adhyakshon ki patri dekhen to bi.je.pi. adhyaksh rajnath sinh ki vrishchik rashi hai aur sarhesati chal rahi hai jabki soniya gandhi ki mithun rashi aur sarhesati samapt ho chuki hai. das varsh purva jab kangres soniya ke netritva men satta men ai thi us samay soniya gandhi v manmohan sinh donon ki hi sarhesati chal rahi thi jabki bi.je.pi. adhyaksh shri venkaiya naydu ki rashi sinh v el. ke. advani ki rashi mesh hone se donon ko hi sarhesati nahin thi. iska matalab yah hua ki satta hath men ane ke samay shani ki sarhesati ka prabhav charam par hota hai.
logon ke man men sarhesati se ek bhay ki sthiti bani hoti hai lekin dekha gaya hai ki jab bhi jatak ke upar sarhesati ka prabhav ata hai to uske pas satta ane ki sanbhavnaen prabal hone lagti hain. shani jatak ko apni kutniti aur achchi yojna nirman ke madhyam se shreshth prashasak bana deta hai.
jab jatak ke jivan ke kendra arthat man ke karak chandrama ke karib shani ane lagta hai to yah use satta prapti ke lie prerit karta hai. maujuda halat men bharat ke rajnaitik patal par is vishleshan ka parinam yah ingit karta hai ki sitare bi.je.pi. ke paksh men hain kyonki bi.je.pi. adhyaksh rajnath sinh, bi.je.pi. ki kundli v narendra modi, in tinon men shani ki sarhesati ka anukul prabhav hai.
bharat ke rajnaitik patal ke janm vivrn
| nam |
janm vivrn |
samy |
sthan |
lagna |
rashi |
| kangres ai |
02.01.1978 |
09:30 |
dilli |
makr |
kanya |
| bi.je.pi. |
06.04.1980 |
11:40 |
dilli |
mithun |
vrishchik |
| javahrlal nehru |
14.11.1889 |
23:06 |
ilahbad |
karka |
karka |
| indira gandhi |
19.11.1917 |
23:11 |
ilahbad |
karka |
makr |
| rajiv gandhi |
20.08.1944 |
07:30 |
mumbai |
sinh |
sinh |
| manmohan sinh |
26.09.1932 |
14:00 |
jhelm |
dhanu |
karka |
| rahul gandhi |
19.06.1970 |
05:50 |
dilli |
mithun |
vrishchik |
| soniya gandhi |
09.12.1946 |
21:30 |
turin |
karka |
mithun |
| priyanka gandhi |
12.01.1972 |
17:45 |
dilli |
mithun |
vrishchik |
| el. ke. advani |
08.11.1927 |
09:20 |
haidrabad |
vrishchik |
mesh |
| e. bi. bajpeyi |
25.12.1924 |
04:00 |
gvaliyar |
tula |
vrishchik |
| rajnath sinh |
12.02.1950 |
01:36 |
varansi |
vrishchik |
vrishchik |
| narendra modi |
17.09.1950 |
12:21 |
vadngr |
vrishchik |
vrishchik |
| nitish kumar |
01.03.1951 |
13:20 |
bakhtiyarpur |
mithun |
vrishchik |
| ai. ke. gujral |
04.12.1919 |
22:00 |
jhelm |
karka |
mesh |
| devegaura |
18.05.1933 |
11:00 |
hasn |
karka |
kunbh |
| venkaiya naydu |
01.07.1949 |
12:00 |
chavtpalem |
kanya |
sinh |
iske atirikt nitish ki kundli men bhi vrishchik rashi hai jis karan aisa jan parta hai ki unka grah yog bhi uttam hai lekin apekshakrit kam hai.
priyanka gandhi ki janmapatri men vrishchik rashi hone se unke bhi rajnaitik patal par shighrata se ubhrne ke grah yog bane hue hain. yadi soniya vishram len, rahul gandhi ko kangres ka adhyaksh niyukt karen v priyanka gandhi ko pradhanmantri ke pad ka ummidvar ghoshit karen to sitaron ka samikaran kuch kangres ke paksh men ho sakta hai.